𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼹𖽦𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼷𖽙𖾐 𖼈𖽳𖾐 𖼽𖽡𖾐
43
1 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼦𖽑𖽦 𖼄𖽦 𖼈𖽳 𖼰𖽡， 2 𖼽𖽻 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼰𖽡𖽦𖾐 𖼞𖽚 𖼖𖽻𖾐 𖼺𖽪𖾐 𖼷𖽙𖾐 𖼷𖽙 𖼦𖽑𖽻𖾐 𖼺𖽺𖾑，𖼽𖽻 𖼈𖽳𖾐 𖽃𖽔 𖼀𖽙 𖼀𖽦𖾐：“𖼐𖽑𖽡𖾐 𖼈𖽳𖾐 𖼹𖽦𖾑 𖼣𖽙𖾐 𖼖𖽙𖾐 𖼀𖽙𖾐 𖼷𖽙𖾐 𖼈𖽳𖾐 𖼽𖽡𖾐．”3 𖼽𖽚 𖼍𖽕𖾑 𖼽𖽻 𖼀𖽙 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼦𖽑𖽔𖾐 𖼮𖽶𖾐 𖼮𖽶𖾐 𖼣𖽙𖾐 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑：‘ 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽳𖾐 𖼄𖽻 𖼄𖽔 𖼮𖽑𖽻𖾐 𖼖𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼖𖽻𖾐 𖼄𖽔 𖼊𖽙𖾐．’ 4 𖽃𖽔𖾐 𖼺𖽺𖾑，𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖼐𖽑𖽳𖾐 𖼄𖽻 𖼊𖽑𖽺 𖼀𖽑𖽨 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼹𖽺𖾐 𖼽𖽡𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼷𖽙𖾐 𖼈𖽳𖾐． 5 𖼐𖽑𖽡𖾐 𖼽𖽻 𖼊𖽑𖽺 𖼄𖽔 𖼀𖽑𖽨 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼖𖽺𖾑 𖼄𖽔 𖼹𖽺𖾐 𖼽𖽡𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽳𖾐 𖼄𖽻 𖼄𖽔 𖼮𖽑𖽻𖾐 𖼖𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼖𖽻𖾐 𖼄𖽔 𖼊𖽙𖾐．’ ”
6 𖼽𖽡 𖼺𖽴𖾑 𖼖𖽡𖽦𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼦𖽹𖾑 𖼐𖽺𖾑？𖽃𖽔𖾐 𖼹𖽻𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼀𖽦𖾐 𖼊𖽑𖽧，𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼐𖽑𖽳𖾐 𖼄𖽻 𖼊𖽑𖽡 𖼽𖽚𖾐 𖼮𖽻𖾐 𖼺𖽺．”
7 𖼽𖽻 𖼈𖽳𖾐 𖼊𖽻 𖼞𖽑𖽚：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼹𖽳𖾐 𖼄𖽙𖾐 𖽃𖽔 𖼐𖽺𖾑 𖼖𖽙𖾐 𖼮𖽡 𖼠𖽳𖾐 𖼺𖽪𖾐 𖼄𖽡𖽻 𖼐𖽺𖾐 𖽃𖽔 𖼐𖽺𖾑 𖼞𖽳𖾐 𖼈𖽧 𖼐𖽑𖽳𖾐 𖼐𖽳 𖼦𖽙𖾐 𖼊𖽑𖽺 𖼰𖽙𖾐 𖼊𖽻 𖼐𖽙𖾐 𖼺𖽺𖾑，𖼀𖽦𖾐：‘ 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼮𖽻𖾐 𖼮𖽻𖾐 𖼺𖽺？𖼐𖽑𖽡𖾐 𖼈𖽳𖾐 𖼠𖽳𖾐 𖼖𖽪𖾐 𖼐𖽑𖽳𖾐 𖼄𖽻 𖼮𖽻𖾐 𖼮𖽻𖾐 𖼺𖽺？’ 𖽃𖽔𖾐 𖼺𖽺𖾑 𖼣𖽙𖾐 𖼈𖽳𖾐 𖼽𖽻 𖼊𖽻 𖼐𖽙𖾐 𖼖𖽙𖾐 𖼮𖽑𖽻𖾐 𖼊𖽻 𖼞𖽑𖽚．𖽃𖽔 𖼺𖽺 𖼺𖽝𖾑，𖼽𖽻 𖼹𖽦𖾑 𖼣𖽙𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼐𖽑𖽳𖾐 𖼄𖽻 𖼊𖽑𖽺 𖼦𖽳 𖼹𖽺𖾐 𖼖𖽻𖾐 𖼖𖽡𖾐．’”
8 𖼽𖽚 𖼍𖽕𖾑 𖼹𖽦𖾑 𖼽𖽻 𖼀𖽙 𖼽𖽡 𖼺𖽴𖾑 𖼖𖽡𖽦𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼻𖽙 𖼽𖽳𖾐 𖼊𖽑𖽺 𖼹𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼐𖽕 𖼐𖽕𖾐 𖼽𖽡𖾐 𖼊𖽻𖾐．𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼐𖽺𖾐 𖼐𖽑𖽡𖾐、 𖼣𖽙𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼞𖽜 𖽂𖽙𖾐 𖼠𖽙𖾑 𖼊𖽙𖾐，𖼄𖽦 𖼳𖽶𖾐 𖼄𖽔 𖼻𖽻𖾐．
9 𖼣𖽙𖾐 𖼹𖽳𖾐 𖼄𖽙𖾐 𖼽𖽻 𖼊𖽑𖽺 𖼐𖽦𖾐 𖼳𖽪𖾐，𖼽𖽻 𖼊𖽑𖽺 𖼺𖽙𖾑 𖼺𖽙𖾐 𖼦𖽳 𖼞𖽚 𖼖𖽻𖾐 𖼐𖽑𖽡𖾐 𖼞𖽜 𖼊𖽻𖾐．𖼣𖽙𖾐 𖼽𖽻 𖼊𖽑𖽺 𖼄𖽔 𖼰𖽡𖽻𖾐 𖼐𖽑𖽡𖾐 𖼞𖽜 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽑𖽡 𖼻𖽳𖾐 𖼽𖽺𖾐 𖼮𖽑𖽡𖽪𖾑 𖼀𖽶 𖼊𖽻𖾐． 10 𖽃𖽔 𖼐𖽺𖾑 𖼄𖽔 𖼍𖽻𖾐 𖼞𖽙𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼄𖽳𖾐 𖼐𖽑𖽡 𖼂𖽦𖾑 𖼖𖽺𖾑 𖼞𖽚 𖼮𖽑𖽡𖾐 𖼖𖽻𖾐 𖼊𖽙𖾐．”
11 𖼽𖽻 𖼈𖽳𖾐 𖽃𖽔 𖼀𖽙 𖼽𖽡 𖼺𖽴𖾑 𖼖𖽡𖽦𖾑 𖼀𖽦𖾐：“𖼦𖽑𖽺𖾑 𖼖𖽙𖾐 𖼺𖽶𖾑 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐：𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽚𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼳𖽶 𖼺𖽧𖾐 𖼷𖽑𖽳𖾐、 𖼀𖽨 𖼈𖽡𖾐、 𖼳𖽡𖽻𖾐 𖼄𖽶𖾐 𖼺𖽧𖾐 𖼰𖽡𖾐、 𖼹𖽳𖾑 𖼄𖽡 𖼐𖽺𖾐 𖼺𖽳 𖼀𖽑𖽳 𖼄𖽡 𖼐𖽑𖽧𖾐 𖼊𖽑𖽡 𖼹𖽻𖾐 𖼀𖽑𖽨 𖼀𖽶 𖼖𖽧𖾑 𖼰𖽡𖽺𖾐 𖼺𖽺𖾑，𖼈𖽺𖾐 𖼹𖽺𖾐 𖼽𖽡𖾐 𖼦𖽑𖽙𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼞𖽜 𖼖𖽡𖾐． 12 𖼐𖽑𖽡𖾐 𖼈𖽳𖾐 𖼀𖽑𖽨𖾐 𖼀𖽑𖽡 𖼄𖽨 𖼄𖽨 𖼊𖽑𖽡 𖼀𖽜𖾐 𖼈𖽺𖾐 𖼹𖽺𖾐 𖼽𖽡𖾐 𖼖𖽡𖾐， 𖼞𖽪𖾐 𖼮𖽡𖽺𖾐 𖽃𖽙𖾑 𖼄𖽺 𖼐𖽑𖽡𖾐 𖼈𖽳𖾐 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼀𖽑𖽚𖾐 𖼞𖽚 𖼖𖽻𖾐 𖼺𖽪𖾐 𖼀𖽑𖽨𖾐 𖼀𖽑𖽡，𖼐𖽑𖽡𖾐 𖼈𖽳𖾐 𖼈𖽺𖾐 𖼽𖽻 𖼊𖽑𖽺 𖼞𖽑𖽚 𖼞𖽜 𖼽𖽡𖾐 𖼖𖽡𖾐，𖼞𖽑𖽶𖾑 𖼽𖽻 𖼈𖽳𖾐 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐 𖼄𖽔 𖼦𖽙𖾑 𖼮𖽑𖽡 𖼺𖽪𖾐 𖼣𖽻𖾐 𖼖𖽡𖾐 𖼷𖽻． 13 𖼐𖽑𖽡𖾐 𖼈𖽳𖾐 𖼐𖽑𖽳𖾐 𖼄𖽻 𖼊𖽑𖽺 𖼦𖽳 𖼺𖽺𖾑，𖼐𖽕 𖼐𖽕𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼽𖽡𖾐 𖼦𖽻． 14 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽜 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼞𖽕 𖼍𖽪𖾐 𖼺𖽺𖾑，𖼽𖽻 𖼞𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼖𖽡𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼈𖽧 𖼐𖽑𖽳𖾐 𖼳𖽡𖾐 𖼄𖽡𖽺 𖼐𖽺𖾐 𖼂𖽡𖽦𖾑 𖼽𖽔 𖼄𖽡𖽺 𖼊𖽑𖽺 𖼀𖽑𖽨 𖼞𖽚 𖼖𖽻𖾐 𖼞𖽜．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼻𖽙 𖼞𖽜 𖼀𖽑𖽧 𖼦𖽑𖽙𖾐 𖼖𖽡𖾐 𖼊𖽑𖽡𖾑 𖼣𖽻𖾐，𖼀𖽑𖽧 𖼦𖽑𖽙𖾐 𖼍𖽺𖾑 𖼻𖽻𖾐．”
𖼽𖽱𖾐 𖼺𖽴𖾑 𖼻𖽦 𖼷𖽙𖾐 𖼂𖽺𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼰𖽙𖾑
15 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼈𖽺𖾐，𖼀𖽑𖽨𖾐 𖼀𖽑𖽡 𖼄𖽨 𖼄𖽨 𖼊𖽑𖽡 𖼀𖽜𖾐 𖼀𖽶，𖼦𖽑𖽔𖾐 𖼖𖽺𖾑 𖼂𖽡𖽦𖾑 𖼽𖽔 𖼄𖽡𖽺 𖼊𖽑𖽺 𖼦𖽳 𖼺𖽺𖾑，𖼹𖽺𖾐 𖼽𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼽𖽱𖾐 𖼺𖽴𖾑 𖼊𖽑𖽺 𖼄𖽡𖽻𖾐 𖼽𖽡𖾐． 16 𖼽𖽱𖾐 𖼺𖽴𖾑 𖼐𖽦𖾐 𖼄𖽡𖽻𖾐，𖼂𖽡𖽦𖾑 𖼽𖽔 𖼄𖽡𖽺 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼖𖽻𖾐，𖽃𖽔𖾐 𖼺𖽺𖾑 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼦𖽳 𖼣𖽙𖾐 𖽃𖽔𖾑 𖼞𖽑𖽶𖾐 𖼽𖽡𖾐，𖼮𖽡𖽺 𖼺𖽦 𖼻𖽦 𖼷𖽙𖾐 𖼂𖽺𖾐 𖼳𖽡𖽻𖾐，𖼞𖽪𖾐 𖼮𖽡𖽺𖾐 𖽃𖽔𖾑 𖼐𖽑𖽡 𖼞𖽪𖾐 𖼷𖽑𖽡𖾐 𖼐𖽑𖽡 𖼄𖽦𖾐 𖼊𖽑𖽙 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙 𖼊𖽻𖾐．” 17 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽱𖾐 𖼺𖽴𖾑 𖼀𖽦𖾐 𖼖𖽙𖾐 𖼮𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼦𖽳 𖼽𖽱𖾐 𖼺𖽴𖾑 𖼞𖽳𖾐 𖽃𖽔𖾑 𖼞𖽑𖽶𖾐 𖼽𖽡𖾐．
18 𖼽𖽻 𖼈𖽳𖾐 𖼊𖽑𖽺 𖼦𖽳 𖼽𖽱𖾐 𖼺𖽴𖾑 𖼞𖽳𖾐 𖽃𖽔𖾑 𖼞𖽑𖽶𖾐 𖼮𖽑𖽡𖾐 𖼺𖽺𖾑，𖼽𖽻 𖼈𖽳𖾐 𖼮𖽡𖽮𖾐 𖼍𖽪𖾐 𖼖𖽻𖾐，𖼀𖽦𖾐：“𖽃𖽔 𖼐𖽺𖾑 𖼊𖽑𖽺 𖼦𖽳 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽪𖾐，𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖼈𖽺𖾐 𖼀𖽑𖽚𖾐 𖽃𖽔 𖼐𖽺𖾑 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼞𖽑𖽚 𖼺𖽪𖾐 𖼀𖽑𖽨𖾐 𖼀𖽑𖽡 𖼖𖽙𖾐 𖼀𖽙𖾐 𖼺𖽪𖾐 𖼣𖽻𖾐，𖽃𖽔𖾑 𖼄𖽳𖾐 𖽃𖽔 𖼐𖽺𖾑 𖼞𖽳𖾐 𖼦𖽑𖽙 𖼊𖽪 𖼰𖽙𖾐 𖼺𖽺𖾑，𖽃𖽔 𖼐𖽺𖾑 𖼊𖽑𖽺 𖼦𖽹𖾑 𖼀𖽑𖽧𖾐，𖽃𖽔 𖼐𖽺𖾑 𖼞𖽜 𖼮𖽜𖾐 𖼀𖽑𖽙 𖼂𖽺𖾐，𖼦𖽑𖽔𖾐 𖼖𖽺𖾑 𖽃𖽔 𖼐𖽺𖾑 𖼞𖽳𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼐𖽻𖾑 𖼊𖽻𖾐．”
19 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼽𖽱𖾐 𖼺𖽴𖾑 𖼞𖽳𖾐 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼖𖽙𖾐 𖼐𖽳 𖼽𖽡𖾐，𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐．
20 𖼽𖽻 𖼈𖽳𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼈𖽳𖾐 𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖼹𖽺𖾐 𖼖𖽻𖾐，𖼠𖽕𖾐 𖼰𖽶𖾐 𖼷𖽙𖾐 𖼈𖽳𖾐 𖼖𖽻𖾐 𖼺𖽪𖾐 𖼣𖽻𖾐．
21 𖼠𖽙𖾑 𖼍𖽻𖾐 𖼣𖽙𖾐 𖼈𖽳𖾐 𖼦𖽑𖽦 𖼞𖽳𖾐 𖼮𖽑𖽡𖾐，𖼀𖽶 𖼖𖽧𖾑 𖼀𖽑𖽡𖾐 𖼦𖽑𖽙𖾐 𖼞𖽑𖽶𖾑 𖼮𖽶𖾐 𖼺𖽺𖾑，𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼺𖽪𖾐 𖼀𖽑𖽨𖾐 𖼀𖽑𖽡 𖼦𖽑𖽔𖾐 𖼖𖽺𖾑 𖼽𖽻 𖼄𖽳𖾑 𖼞𖽳𖾐 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼍𖽳𖾐，𖼊𖽑𖽡 𖼀𖽑𖽡 𖼖𖽺𖾑 𖼄𖽔 𖼣𖽻𖾐 𖼐𖽑𖽡𖽪𖾑．𖽃𖽔𖾑 𖼄𖽳𖾐 𖼣𖽙𖾐 𖼈𖽳𖾐 𖼈𖽺𖾐 𖼀𖽑𖽚𖾐 𖼞𖽚 𖼖𖽻𖾐 𖼞𖽑𖽚 𖼊𖽻𖾐． 22 𖼣𖽙𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼀𖽑𖽨𖾐 𖼀𖽑𖽡 𖼈𖽺𖾐 𖼺𖽺𖾑，𖼷𖽙𖾐 𖼈𖽳𖾐 𖼖𖽻𖾐．𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖽃𖽔 𖼺𖽺 𖼀𖽑𖽨𖾐 𖼀𖽑𖽡 𖼈𖽺𖾐 𖼀𖽑𖽚𖾐 𖼣𖽙𖾐 𖼈𖽳𖾐 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼺𖽪𖾐 𖼣𖽻𖾐，𖼣𖽙𖾐 𖼈𖽳𖾐 𖼄𖽔 𖼺𖽝𖾑．”
23 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽔 𖼣𖽝 𖼳𖽚𖾑，𖼮𖽡𖽮𖾐 𖼄𖽔 𖼻𖽻𖾐！ 𖼀𖽑𖽨𖾐 𖼀𖽑𖽡 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐、 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜，𖼀𖽑𖽨 𖼐𖽑𖽡𖾐 𖼈𖽳𖾐 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼺𖽪𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼀𖽑𖽨𖾐 𖼀𖽑𖽡 𖼣𖽙𖾐 𖼷𖽶𖾐 𖽂𖽙𖾐 𖼦𖽑𖽻𖾐．” 𖽃𖽔𖾐 𖼺𖽺𖾑，𖼽𖽻 𖼳𖽡𖾐 𖼄𖽡𖽺 𖼊𖽑𖽺 𖼦𖽳 𖼊𖽑𖽧 𖼖𖽻𖾐 𖼽𖽻 𖼈𖽳𖾐 𖼞𖽜．
24 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼦𖽳 𖼽𖽱𖾐 𖼺𖽴𖾑 𖽃𖽔𖾑 𖼞𖽑𖽶𖾐 𖼊𖽡 𖼽𖽡𖾐，𖽃𖽔𖾐 𖼮𖽡𖽦𖾐 𖼮𖽑𖽳 𖼽𖽻 𖼈𖽳𖾐 𖼞𖽜 𖼮𖽑𖽡𖾑 𖼀𖽑𖽦𖾐 𖼷𖽑𖽡，𖼦𖽑𖽔𖾐 𖼖𖽺𖾑 𖼳𖽶𖾑 𖼀𖽺 𖼈𖽺𖾐 𖼽𖽻 𖼈𖽳𖾐 𖼞𖽳𖾐 𖼊𖽑𖽳 𖼖𖽳𖾐 𖼄𖽪 𖼰𖽙𖾑． 25 𖼽𖽻 𖼈𖽳𖾐 𖼊𖽻 𖼮𖽨，𖼽𖽻 𖼈𖽳𖾐 𖼞𖽑𖽶𖾑 𖼠𖽻𖾐 𖼞𖽳𖾐 𖼷𖽙𖾐 𖼷𖽙 𖼊𖽻𖾐 𖼺𖽺𖾑，𖼦𖽑𖽙𖾐 𖼽𖽱𖾐 𖼺𖽴𖾑 𖼊𖽑𖽺 𖼞𖽜 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼂𖽺𖾐 𖼳𖽡𖽻𖾐 𖼀𖽑𖽢，𖼽𖽱𖾐 𖼺𖽴𖾑 𖼞𖽚 𖼖𖽻𖾐 𖼖𖽙𖾐 𖼳𖽡𖽻𖾐．
26 𖼽𖽱𖾐 𖼺𖽴𖾑 𖼞𖽚 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼄𖽡𖽻 𖼐𖽑𖽡 𖼈𖽺𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼦𖽑𖽙𖾐 𖼽𖽱𖾐 𖼺𖽴𖾑 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼂𖽴𖾐 𖼹𖽺𖾐 𖼽𖽻 𖼊𖽑𖽺 𖼊𖽑𖽴． 27 𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐 𖼦𖽑𖽻𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔 𖼀𖽙，𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼷𖽑𖽻𖾐 𖼄𖽻 𖼞𖽑𖽶𖾑 𖼽𖽚𖾐 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？𖼽𖽻 𖼮𖽻𖾐 𖼮𖽻𖾐 𖼺𖽺？”
28 𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼞𖽑𖽶𖾑 𖼺𖽙𖾑 𖼺𖽙𖾐 𖼮𖽻𖾐 𖼍𖽳𖾐，𖼽𖽻 𖼮𖽻𖾐 𖼍𖽳𖾐 𖼺𖽺．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼹𖽦𖾑 𖼽𖽻 𖼊𖽑𖽺 𖼊𖽑𖽴．
29 𖼽𖽱𖾐 𖼺𖽴𖾑 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼽𖽻 𖼖𖽙𖾐 𖼮𖽑𖽻𖾐 𖼀𖽑𖽙 𖼠𖽻𖾐 𖼄𖽙𖾐 𖼠𖽻𖾐 𖼺𖽪𖾐 𖼽𖽻 𖼐𖽑𖽳𖾐 𖼄𖽻 𖼂𖽡𖽦𖾑 𖼽𖽔 𖼄𖽡𖽺 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼽𖽻 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚 𖼺𖽪𖾐，𖼦𖽑𖽔𖾐 𖼮𖽶𖾐 𖼽𖽳𖾐 𖼺𖽪𖾐 𖼐𖽑𖽳𖾐 𖼄𖽻 𖼣𖽻𖾐 𖼖𖽔？” 𖼦𖽑𖽔𖾐 𖼖𖽺𖾑 𖼀𖽦𖾐：“𖼻𖽙 𖼽𖽳𖾐 𖽃𖽔𖾐！ 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼄𖽢 𖼖𖽪．” 30 𖼽𖽱𖾐 𖼺𖽴𖾑 𖼽𖽻 𖼐𖽑𖽳𖾐 𖼄𖽻 𖼊𖽑𖽺 𖼮𖽨 𖼰𖽡，𖼐𖽕 𖼊𖽺𖾐 𖼽𖽻 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼊𖽑𖽡 𖼂𖽦𖾑 𖼣𖽶𖾐 𖼦𖽑𖽙𖾐．
31 𖼠𖽙𖾑 𖼍𖽻𖾐，𖼽𖽻 𖼮𖽑𖽻 𖼄𖽦𖾐 𖼷𖽑𖽡 𖼦𖽑𖽙𖾐 𖼊𖽚𖾐 𖼖𖽻𖾐，𖼽𖽻 𖼈𖽳𖾐 𖼊𖽑𖽺 𖼄𖽔 𖼺𖽝𖾑 𖼖𖽙𖾐 𖼺𖽶𖾑 𖼂𖽺𖾐，𖼷𖽑𖽻𖾐 𖼊𖽑𖽺 𖼹𖽡𖾐 𖼺𖽺𖾑 𖼷𖽙𖾐 𖼦𖽙𖾐 𖼍𖽡𖾐．
32 𖼽𖽻 𖼈𖽳𖾐 𖼽𖽱𖾐 𖼺𖽴𖾑 𖼖𖽙𖾐 𖼀𖽙𖾐 𖼹𖽪𖾐 𖼹𖽪𖾐 𖼊𖽑𖽡 𖼀𖽑𖽦 𖼞𖽪𖾐 𖼍𖽙𖾑，𖼽𖽱𖾐 𖼺𖽴𖾑 𖼞𖽳𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽙𖾐 𖼊𖽑𖽡 𖼀𖽑𖽦 𖼞𖽪𖾐 𖼍𖽙𖾑，𖼹𖽦𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙 𖼖𖽦 𖼠𖽸𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖼊𖽑𖽡 𖼀𖽑𖽦 𖼞𖽪𖾐 𖼍𖽙𖾑．𖼞𖽪𖾐 𖼮𖽡𖽺𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼺𖽺𖾑，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼷𖽙𖾐 𖼷𖽙 𖼐𖽑𖽧𖾐 𖼄𖽔 𖼺𖽳． 33 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼞𖽜 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼊𖽻𖾑 𖼊𖽻𖾐 𖼊𖽡𖾐 𖼹𖽺𖾐，𖼈𖽳 𖼮𖽑𖽻𖾐 𖼽𖽳𖾐 𖼖𖽙𖾐 𖼮𖽑𖽡𖾐 𖼊𖽡𖾐 𖼹𖽺𖾐 𖼺𖽪𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼐𖽦𖾐，𖼦𖽑𖽔𖾐 𖼮𖽶𖾐 𖼞𖽑𖽙 𖼣𖽝． 34 𖼽𖽱𖾐 𖼺𖽴𖾑 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼞𖽳𖾐 𖼷𖽙 𖼊𖽪𖾐 𖼀𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽜．𖼂𖽡𖽦𖾑 𖼽𖽔 𖼄𖽡𖽺 𖽂𖽙𖾐 𖼺𖽪𖾐，𖼞𖽑𖽻𖾐 𖼂𖽻𖾑 𖼊𖽑𖽺 𖼣𖽙 𖼀𖽜𖾐 𖼠𖽳𖾐．𖼽𖽻 𖼈𖽳𖾐 𖼽𖽱𖾐 𖼺𖽴𖾑 𖼖𖽙𖾐 𖼮𖽑𖽻𖾐 𖼮𖽶𖾐 𖼀𖽳 𖼊𖽻𖾐，𖼻𖽦 𖼷𖽙 𖼞𖽜𖾐 𖼺𖽜𖾐．