𖼽𖽱𖾐 𖼺𖽴𖾑 𖼐𖽺𖾐 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻
37
1 𖼽𖽔 𖼠𖽴𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽻𖾐，𖼞𖽑𖽶𖾑 𖼽𖽻 𖼀𖽙 𖼣𖽙𖾑 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐．2 𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐，𖼽𖽔 𖼠𖽴𖾑 𖼈𖽴 𖼞𖽳𖾐 𖼞𖽪𖾐 𖼮𖽡𖽺𖾐 𖼣𖽻𖾐：𖼽𖽱𖾐 𖼺𖽴𖾑 𖼽𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽻 𖼀𖽙 𖼞𖽳𖾐 𖼄𖽳 𖼖𖽳𖾐 𖼀𖽑𖽡𖾑 𖼖𖽔𖾐 𖼐𖽺𖾐 𖼳𖽧 𖼀𖽑𖽕𖾑 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖼮𖽻𖾐．𖼽𖽻 𖼷𖽑𖽡𖾐 𖼳𖽶 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑．𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼀𖽦𖾐 𖼽𖽻 𖼀𖽙 𖼖𖽙𖾐 𖼊𖽑𖽧．
3 𖼽𖽡 𖼺𖽴𖾑 𖼖𖽡𖽦𖾑 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼠𖽻𖾐 𖼊𖽑𖽺 𖼽𖽱𖾐 𖼺𖽴𖾑 𖼖𖽙𖾐 𖼠𖽳𖾐 𖼖𖽳𖾐 𖼮𖽨，𖼞𖽪𖾐 𖼮𖽡𖽺𖾐 𖼽𖽻 𖼞𖽑𖽚 𖼊𖽑𖽙 𖼄𖽻 𖼺𖽺𖾑 𖼽𖽱𖾐 𖼺𖽴𖾑 𖼊𖽑𖽺 𖼽𖽚𖾐．𖼽𖽻 𖼽𖽱𖾐 𖼺𖽴𖾑 𖼖𖽙𖾐 𖼀𖽙𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼊𖽑𖽡 𖼳𖽡𖽚𖾐 𖼐𖽝． 4 𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼀𖽙 𖼽𖽱𖾐 𖼺𖽴𖾑 𖼊𖽑𖽺 𖼮𖽨 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼮𖽨 𖼦𖽶𖾑 𖼄𖽔 𖼷𖽑𖽶𖾐．𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼊𖽑𖽺 𖼐𖽑𖽧𖾐 𖼷𖽚𖾐，𖼽𖽻 𖼖𖽙𖾐 𖼮𖽑𖽻𖾐 𖼷𖽙𖾐 𖼖𖽙𖾐 𖼊𖽑𖽙 𖼊𖽻 𖼄𖽔 𖼊𖽑𖽜𖾐．
𖼽𖽱𖾐 𖼺𖽴𖾑 𖼽𖽦 𖼄𖽦𖾐 𖼞𖽑𖽻𖾐
5 𖼽𖽱𖾐 𖼺𖽴𖾑 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐，𖼀𖽦𖾐 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼊𖽑𖽧 𖼺𖽺𖾑，𖼽𖽻 𖼈𖽳𖾐 𖼠𖽳𖾐 𖼠𖽳𖾐 𖼽𖽻 𖼊𖽑𖽺 𖼦𖽶𖾑． 6 𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽻 𖼐𖽙𖾐 𖼍𖽳𖾐，𖼣𖽙𖾐 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐： 7 𖽃𖽔 𖼐𖽺𖾑 𖼄𖽡𖾐 𖼠𖽻𖾐 𖼳𖽙𖾐 𖼹𖽝𖾐 𖼐𖽦𖾑，𖼣𖽙𖾐 𖼐𖽦𖾑 𖼺𖽪𖾐 𖼳𖽙𖾐 𖼹𖽝𖾐 𖼐𖽕 𖼊𖽺𖾐 𖼦𖽑𖽡𖽚 𖼍𖽪𖾐 𖼖𖽻𖾐，𖼐𖽑𖽡𖾐 𖼈𖽳𖾐 𖼐𖽦𖾑 𖼺𖽪𖾐 𖼳𖽙𖾐 𖼹𖽝𖾐 𖼖𖽻𖾐 𖼺𖽺𖾑，𖼣𖽙𖾐 𖼐𖽦𖾑 𖼺𖽪𖾐 𖼳𖽙𖾐 𖼹𖽝𖾐 𖼊𖽑𖽺 𖼰𖽻𖾑 𖼍𖽡 𖼊𖽑𖽴．”
8 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼠𖽕𖾐 𖼰𖽶𖾐 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼊𖽻𖾐 𖼖𖽔𖾑？𖼠𖽕𖾐 𖼰𖽶𖾐 𖼣𖽙𖾐 𖼈𖽳𖾐 𖼊𖽑𖽺 𖼠𖽕 𖼊𖽻𖾐 𖼖𖽔𖾑？” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼽𖽱𖾐 𖼺𖽴𖾑 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼐𖽺𖾐 𖼽𖽻 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼀𖽙𖾐 𖼠𖽳𖾐 𖼠𖽳𖾐 𖼽𖽻 𖼊𖽑𖽺 𖼦𖽶𖾑．
9-10 𖼠𖽙𖾑 𖼍𖽻𖾐，𖼽𖽱𖾐 𖼺𖽴𖾑 𖼹𖽦𖾑 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐，𖼀𖽦𖾐 𖼽𖽻 𖼀𖽙 𖼐𖽺𖾐 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼊𖽑𖽧，𖼽𖽻 𖼀𖽦𖾐：“𖼣𖽙𖾐 𖼹𖽦𖾑 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐，𖼣𖽙𖾐 𖼽𖽦 𖼄𖽦𖾐 𖼞𖽑𖽻𖾐 𖼄𖽡𖽻𖾐：𖽃𖽔𖾑 𖼄𖽶 𖼐𖽑𖽡𖾐、 𖼳𖽨𖾐 𖼀𖽙𖾐 𖼐𖽺𖾐 𖼠𖽳𖾐 𖼷𖽑𖽡𖾐 𖼍𖽡𖾑 𖼊𖽝𖾐 𖼖𖽻𖾐 𖼣𖽙𖾐 𖼊𖽑𖽺 𖼊𖽑𖽴．” 𖽃𖽔𖾐 𖼺𖽺𖾑，𖼽𖽻 𖼀𖽙 𖼽𖽻 𖼊𖽑𖽺 𖼦𖽑𖽳𖾐，𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼣𖽻𖾐 𖼐𖽺𖾑？𖼣𖽙𖾐 𖼐𖽺𖾐 𖼐𖽑𖽡𖽻𖾐 𖼄𖽙𖾐，𖼐𖽑𖽡𖾐 𖼈𖽧 𖼄𖽻 𖼐𖽑𖽳𖾐 𖼄𖽻，𖼠𖽕𖾐 𖼰𖽶𖾐 𖼂𖽴𖾐 𖼹𖽺𖾐 𖼐𖽑𖽡𖾐 𖼊𖽑𖽺 𖼊𖽑𖽴 𖼊𖽻𖾐 𖼖𖽔𖾑？” 11 𖼽𖽻 𖼽𖽪𖾐 𖼄𖽳𖾑 𖼄𖽳 𖼽𖽻 𖼊𖽑𖽺 𖼐𖽑𖽧𖾐 𖼷𖽚𖾐，𖼽𖽻 𖼀𖽙 𖼍𖽺𖾑 𖼄𖽡𖽻 𖼦𖽑𖽺𖾑 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑．
𖼽𖽱𖾐 𖼺𖽴𖾑 𖼊𖽑𖽺 𖼈𖽪 𖽃𖽦𖾐 𖼰𖽧 𖼄𖽡𖾐 𖼊𖽺𖾐𖼽𖽡𖾐
12 𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼽𖽡𖾐，𖼽𖽻 𖼀𖽙 𖼞𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼊𖽑𖽺 𖼖𖽚𖾑． 13 𖼽𖽡 𖼺𖽴𖾑 𖼖𖽡𖽦𖾑 \pn 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔 𖼽𖽪𖾐 𖼞𖽑𖽶𖾑 𖼹𖽻𖾐 𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑 𖼄𖽔 𖼣𖽻𖾐 𖼖𖽔？𖼐𖽑𖽡𖾐 𖼖𖽻𖾐！ 𖼣𖽙𖾐 𖼐𖽑𖽡𖾐 𖼊𖽑𖽺 𖼹𖽡𖾐 𖼽𖽻 𖼈𖽳𖾐 𖼞𖽳𖾐 𖼽𖽡𖾐．”
𖼽𖽱𖾐 𖼺𖽴𖾑 𖼊𖽻 𖼞𖽑𖽚：“𖼣𖽻𖾐，𖼣𖽙𖾐 𖼽𖽡𖾐 𖼊𖽻𖾐．”
14 𖼽𖽡 𖼺𖽴𖾑 𖼖𖽡𖽦𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼺𖽺𖾑 𖼐𖽦𖾐 𖼽𖽡𖾐，𖼐𖽑𖽡𖾐 𖽃𖽔 𖼽𖽪𖾐 𖼞𖽑𖽶𖾑 𖼹𖽻𖾐 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？𖽃𖽔𖾑 𖼮𖽑𖽸 𖼽𖽻𖾐 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？𖽃𖽔𖾐 𖼺𖽺𖾑，𖼀𖽑𖽚𖾐 𖼞𖽚 𖼖𖽻𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧．” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽱𖾐 𖼺𖽴𖾑 𖼞𖽜 𖼳𖽡𖾐 𖼂𖽚 𖼖𖽪𖽦 𖼖𖽻𖾐 𖼞𖽑𖽪 𖼞𖽳𖾐 𖼰𖽡𖾑 𖼦𖽑𖽙𖾐，𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐．
15 𖼞𖽑𖽶𖾑 𖼮𖽶𖾐，𖼽𖽱𖾐 𖼺𖽴𖾑 𖼄𖽡𖾐 𖼳𖽡𖽻𖾐 𖼠𖽻𖾐 𖼞𖽑𖽶𖾐 𖼮𖽨𖾐 𖼺𖽜 𖼦𖽑𖽙，𖼷𖽑𖽻𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼮𖽻𖾐 𖼺𖽺𖾑，𖼽𖽻 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼰𖽙𖾐 𖼐𖽺𖾑？”
16 𖼽𖽻 𖼊𖽻 𖼞𖽑𖽚：“𖼣𖽙𖾐 𖽃𖽔 𖼽𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼰𖽙𖾐，𖼽𖽻 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑 𖼽𖽡𖾐 𖼦𖽑𖽙𖾐 𖼐𖽺𖾑？𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧 𖼞𖽜．”
17 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼽𖽻 𖼈𖽳𖾐 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼣𖽙𖾐 𖼽𖽻 𖼈𖽳𖾐 𖼀𖽦𖾐 𖼞𖽳𖾐 𖼊𖽻 𖼮𖽨，𖼽𖽻 𖼈𖽳𖾐 𖼍𖽙𖾐 𖼊𖽑𖽔𖾐 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼠𖽙𖾑 𖼍𖽻𖾐 𖼰𖽙𖾐 𖼽𖽡𖾐，𖼍𖽙𖾐 𖼊𖽑𖽔𖾐 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼰𖽙𖾐 𖼄𖽡𖽻𖾐．
18 𖼽𖽻 𖼈𖽳𖾐 𖼄𖽡𖾐 𖼈𖽡 𖼈𖽡 𖼄𖽙𖾐 𖼽𖽱𖾐 𖼺𖽴𖾑 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑， 𖼽𖽱𖾐 𖼺𖽴𖾑 𖼺𖽜 𖼽𖽻 𖼈𖽳𖾐 𖼞𖽳𖾐 𖼄𖽔 𖼐𖽳 𖼖𖽻𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼷𖽜𖾐 𖼀𖽜𖾐，𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐 𖼺𖽦 𖼦𖽑𖽙𖾐 𖼊𖽻𖾐． 19 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼐𖽦𖾐 𖼄𖽺！ 𖼽𖽦 𖼄𖽦𖾐 𖼞𖽑𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽻𖾐． 20 𖼖𖽻𖾐！ 𖽃𖽔 𖼐𖽺𖾑 𖼽𖽻 𖼊𖽑𖽺 𖼺𖽦 𖼦𖽑𖽙𖾐，𖼷𖽴𖾐 𖼄𖽡𖾐 𖼊𖽪 𖼊𖽑𖽡 𖼊𖽝𖾐 𖼞𖽑𖽶𖾐 𖼹𖽺𖾐 𖼺𖽺𖾑，𖼀𖽦𖾐：‘ 𖼽𖽻 𖼊𖽑𖽺 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼷𖽙 𖼦𖽑𖽙𖾐．’ 𖽃𖽔 𖼐𖽺𖾑 𖼐𖽦𖾐 𖼍𖽳𖾐，𖼽𖽻 𖼞𖽑𖽙𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖽃𖽔𖾑 𖼞𖽶𖾐 𖽃𖽔 𖼊𖽺𖾐 𖼀𖽑𖽢 𖼊𖽻𖾐．”
21 𖼖𖽡𖽚 𖼂𖽡𖽦𖾑 𖼊𖽻 𖼮𖽨 𖼺𖽺𖾑，𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼊𖽡 𖼮𖽑𖽻，𖼽𖽻 𖼀𖽦𖾐：“𖽃𖽔 𖼐𖽺𖾑 𖼽𖽻 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼄𖽔 𖼊𖽙𖾐．”
22 𖼖𖽡𖽚 𖼂𖽡𖽦𖾑 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼽𖽻 𖼊𖽑𖽺 𖼺𖽶 𖼊𖽑𖽧 𖼄𖽔 𖼊𖽙𖾐，𖽃𖽔 𖼐𖽺𖾑 𖼽𖽻 𖼊𖽑𖽺 𖼷𖽴𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼊𖽪 𖼞𖽑𖽶𖾐 𖼹𖽺𖾐 𖼮𖽑𖽳𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐 𖼄𖽔 𖼊𖽙𖾐．” 𖼖𖽡𖽚 𖼂𖽡𖽦𖾑 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽪𖾐，𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼺𖽺𖾑，𖼦𖽳 𖼽𖽻 𖼀𖽙 𖼊𖽑𖽺 𖼞𖽑𖽚 𖼞𖽜 𖼊𖽡 𖼮𖽑𖽻．
23 𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼞𖽳𖾐 𖼮𖽑𖽡𖾐，𖼽𖽻 𖼈𖽳𖾐 𖼽𖽻 𖼀𖽑𖽡𖽻𖾐 𖼮𖽻 𖼖𖽧 𖼦𖽑𖽙𖾐，𖼞𖽑𖽶𖾑 𖼽𖽻 𖼞𖽑𖽙𖾐 𖼈𖽦 𖼺𖽪𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼞𖽑𖽶𖾑 𖼳𖽡𖽚𖾐 𖼣𖽻𖾐． 24 𖼽𖽻 𖼈𖽳𖾐 𖼽𖽻 𖼊𖽑𖽺 𖼵𖽪𖾐 𖼍𖽡，𖼷𖽴𖾐 𖼄𖽡𖾐 𖼊𖽪 𖼞𖽑𖽶𖾐 𖼹𖽺𖾐，𖼄𖽡𖾐 𖼊𖽪 𖼞𖽑𖽶𖾑 𖼞𖽻𖾑 𖼞𖽻 𖼣𖽻𖾐，𖽃𖽔𖾐 𖼮𖽡𖽦𖾐 𖼄𖽔 𖼈𖽶．
25 𖼽𖽻 𖼈𖽳𖾐 𖼊𖽡𖾐 𖼹𖽺𖾐 𖼷𖽙𖾐 𖼷𖽙，𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐 𖼄𖽡𖽻𖾐，𖼽𖽡 𖼳𖽸 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼈𖽳𖾐 𖼖𖽦 𖼀𖽑𖽙 𖼊𖽑𖽡 𖼷𖽪𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽻𖾐．𖼽𖽻 𖼈𖽳𖾐 𖼞𖽳𖾐 𖼖𖽚𖾑 𖼊𖽑𖽚 𖼳𖽡𖽻𖾐 𖼄𖽶𖾐、 𖼺𖽧𖾐 𖼷𖽑𖽳𖾐 𖼐𖽺𖾐 𖼺𖽧𖾐 𖼰𖽡𖾐 𖼰𖽡𖽦𖾐 𖼍𖽳𖾐，𖽃𖽦𖾐 𖼰𖽧 𖼹𖽺𖾐 𖼽𖽡𖾐 𖼊𖽻𖾐．
26 𖼽𖽚 𖼍𖽕𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼺𖽺𖾑，𖼽𖽺𖾐 𖼮𖽑𖽡𖽪𖾑 𖼰𖽳𖾐 𖼍𖽡 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼷𖽻 𖼀𖽜𖾐 𖼮𖽻𖾐 𖼐𖽺𖾑？ 27 𖽃𖽔 𖼐𖽺𖾑 𖼽𖽻 𖼊𖽑𖽺 𖼈𖽪 𖼽𖽡 𖼳𖽸 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽳𖾐 𖼖𖽦 𖼀𖽑𖽙 𖼊𖽑𖽺 𖼞𖽜 𖼻𖽻𖾐，𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖼽𖽻 𖽃𖽔 𖼐𖽺𖾑 𖼐𖽑𖽳𖾐 𖼄𖽻 𖼣𖽻𖾐，𖽃𖽔 𖼐𖽺𖾑 𖼦𖽙 𖼮𖽑𖽪𖾐 𖼐𖽦 𖼮𖽑𖽪𖾐 𖼣𖽻𖾐．” 𖽃𖽔𖾐 𖼺𖽺𖾑，𖼈𖽧 𖼄𖽻 𖼐𖽑𖽳𖾐 𖼄𖽻 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐． 28 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼄𖽡 𖼍𖽡𖽦𖾑 𖼺𖽪𖾐 𖼈𖽳𖾐 𖼖𖽦 𖼀𖽑𖽙 𖼮𖽨𖾐 𖼠𖽚 𖼞𖽑𖽻𖾑 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼄𖽡𖾐 𖼊𖽪 𖼞𖽑𖽶𖾐 𖼮𖽑𖽻𖾐 𖼺𖽶𖾐 𖼊𖽦𖾐 𖼖𖽻𖾐，𖼀𖽑𖽨𖾐 𖼐𖽑𖽡 𖼷𖽑𖽡𖾐 𖼀𖽑𖽡 𖼂𖽺𖾐 𖼈𖽪 𖼽𖽡 𖼳𖽸 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽜．𖼽𖽡 𖼳𖽸 𖼄𖽔 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼦𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐 𖼦𖽑𖽙𖾐．
29 𖼠𖽙𖾑 𖼍𖽻𖾐，𖼖𖽡𖽚 𖼂𖽡𖽦𖾑 𖼀𖽑𖽚𖾐 𖼄𖽡𖾐 𖼊𖽪 𖼞𖽳𖾐 𖼮𖽑𖽡𖾐，𖼽𖽱𖾐 𖼺𖽴𖾑 𖼊𖽑𖽺 𖼄𖽔 𖼄𖽡𖽻𖾐 𖼺𖽺𖾑，𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦． 30 𖼖𖽡𖽚 𖼂𖽡𖽦𖾑 𖼽𖽻 𖼐𖽑𖽳𖾐 𖼄𖽻 𖼞𖽑𖽶𖾑 𖼹𖽻𖾐 𖼞𖽳𖾐 𖼽𖽡𖾐，𖼀𖽦𖾐：“𖼽𖽱𖾐 𖼺𖽴𖾑 𖼊𖽑𖽺 𖼄𖽔 𖼄𖽡𖽻𖾐 𖼦𖽑𖽙𖾐，𖼣𖽙𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？”
31 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖽃𖽔𖾑 𖼮𖽑𖽸 𖼠𖽻𖾑 𖼊𖽑𖽡 𖼊𖽝𖾐 𖼺𖽦 𖼦𖽑𖽙𖾐，𖼽𖽱𖾐 𖼺𖽴𖾑 𖼞𖽳𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼈𖽺𖾐 𖽃𖽔𖾑 𖼮𖽑𖽸 𖼺𖽶 𖼖𖽡𖾑， 32 𖼷𖽑𖽻𖾐 𖼹𖽡𖾐 𖼀𖽑𖽡𖽻𖾐 𖼮𖽻 𖼹𖽳𖾐 𖼦𖽑𖽙𖾐 𖼽𖽻 𖼀𖽙 𖼞𖽜 𖼽𖽡𖾐，𖼀𖽦𖾐：“𖼀𖽑𖽡𖽻𖾐 𖼮𖽻 𖼹𖽳𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼠𖽺𖾑 𖽂𖽙𖾐 𖼺𖽪𖾐 𖼣𖽻𖾐，𖼐𖽑𖽡𖾐 𖼊𖽑𖽡 𖼠𖽙𖾐 𖼐𖽦𖾐，𖼐𖽑𖽡𖾐 𖼻𖽙 𖼞𖽳𖾐 𖼣𖽻𖾐 𖼣𖽻𖾐？”
33 𖼽𖽻 𖼐𖽦𖾐 𖼊𖽑𖽧 𖼖𖽻𖾐 𖼺𖽺𖾑，𖼀𖽦𖾐：“𖼦𖽑𖽺𖾑 𖼣𖽙𖾐 𖼻𖽙 𖼞𖽳𖾐 𖼀𖽑𖽡𖽻𖾐 𖼮𖽻 𖼣𖽻𖾐，𖼽𖽻 𖼊𖽑𖽺 𖼠𖽕𖾐 𖼰𖽶𖾐 𖼰𖽸𖾐 𖼮𖽑𖽡𖽦 𖼦𖽑𖽙𖾐！ 𖼽𖽻 𖼊𖽑𖽺 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼷𖽙 𖼦𖽑𖽙𖾐！” 34 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦，𖼽𖽦 𖼄𖽳𖾐 𖼮𖽡𖽪 𖼳𖽡𖽦𖾐 𖼐𖽦𖾑，𖼽𖽻 𖼻𖽙 𖼖𖽙𖾐 𖼀𖽙𖾐 𖼊𖽑𖽡 𖼳𖽕𖾐 𖼄𖽙𖾐 𖼮𖽑𖽧𖾐 𖼞𖽪 𖼦𖽑𖽙𖾐． 35 𖼽𖽻 𖼻𖽙 𖼄𖽡𖾐 𖼐𖽜𖾐 𖼄𖽳𖾑 𖼄𖽳 𖼍𖽪𖾐 𖼖𖽻𖾐 𖼽𖽻 𖼊𖽑𖽺 𖼐𖽑𖽧𖾐 𖼍𖽡𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼐𖽑𖽧𖾐 𖼍𖽡𖾐 𖼷𖽶𖾐 𖼄𖽔 𖼦𖽶𖾐，𖼽𖽻 𖼀𖽦𖾐：“𖼣𖽙𖾐 𖼮𖽑𖽧𖾐 𖼮𖽑𖽧𖾐 𖼞𖽪 𖼞𖽪 𖼄𖽙𖾐 𖼳𖽶𖾐 𖼷𖽪𖾐 𖼄𖽡𖾐 𖼹𖽺𖾐 𖼽𖽡𖾐 𖼺𖽺𖾑，𖼣𖽙𖾐 𖼻𖽙 𖼞𖽳𖾐 𖼽𖽡𖾐 𖼊𖽻𖾐．” 𖼽𖽔 𖼠𖽴𖾑 𖼽𖽱𖾐 𖼺𖽴𖾑 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼣𖽶𖾐．
36 𖼄𖽡 𖼍𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼦𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐，𖼈𖽪 𖼺𖽺𖾑 𖼂𖽙𖾐 𖼊𖽑𖽧 𖼇𖽕 𖼊𖽑𖽺 𖼞𖽜． 𖼂𖽙𖾐 𖼊𖽑𖽧 𖼇𖽕 𖼦𖽑𖽺𖾑 𖼇𖽕 𖼖𖽻 \fr 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼊𖽑𖽡 𖼽𖽚𖾐 𖼣𖽻𖾐．