𖼽𖽚 𖼍𖽕𖾑 𖼐𖽺𖾐 𖼊𖽑𖽔𖾐 𖼄𖽔
38
1 𖼞𖽑𖽶𖾑 𖼮𖽶𖾐，𖼽𖽚 𖼍𖽕𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼰𖽡𖾑 𖼦𖽑𖽙𖾐，𖼹𖽺𖾐 𖼽𖽡𖾐 𖼽𖽕𖾑 𖼍𖽪𖾑 𖼖𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡𖾐 𖼖𖽔𖾐 𖼈𖽴 𖼞𖽳𖾐 𖼮𖽻𖾐． 2 𖼽𖽚 𖼍𖽕𖾑 𖼞𖽑𖽶𖾑 𖼠𖽻𖾐 𖼞𖽳𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼳𖽪𖾐 𖼽𖽕𖾑 𖼻𖽙 𖼄𖽳 𖼊𖽑𖽺 𖼄𖽡𖽻𖾐，𖽃𖽔𖾐 𖼺𖽺𖾑 𖼽𖽻 𖼊𖽑𖽺 𖼹𖽶𖾐，𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦． 3 𖼽𖽻 𖼄𖽺 𖼊𖽦𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼽𖽚 𖼍𖽕𖾑 𖽃𖽔𖾐 𖼞𖽶𖾑 𖼊𖽑𖽺 𖽃𖽳 𖼄𖽡𖾐． 4 𖼽𖽻 𖼹𖽦𖾑 𖼄𖽺 𖼊𖽦𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼽𖽻 𖼄𖽙𖾐 𖼽𖽻 𖼊𖽑𖽺 𖽃𖽴 𖼐𖽕 𖼄𖽡𖾐． 5 𖼽𖽻 𖼦𖽑𖽔𖾐 𖼖𖽺𖾑 𖼄𖽺 𖼊𖽦𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼳𖽶𖾑 𖼖𖽔𖾐 𖼄𖽡𖾐．𖼳𖽶𖾑 𖼖𖽔𖾐 𖼊𖽑𖽺 𖼽𖽚𖾐 𖼞𖽑𖽶𖾑 𖼮𖽶𖾐，𖼽𖽚 𖼍𖽕𖾑 𖼰𖽡𖾐 𖼳𖽡𖾐 𖼖𖽪𖾐 𖼞𖽳𖾐 𖼮𖽻𖾐．6 𖼽𖽚 𖼍𖽕𖾑 𖼽𖽻 𖼻𖽙 𖼈𖽳 𖽃𖽳 𖼖𖽙𖾐 𖼂𖽻𖾐 𖼄𖽳 𖼻𖽙 𖼹𖽶𖾐，𖼽𖽻 𖼊𖽑𖽺 𖼊𖽑𖽔𖾐 𖼄𖽔 𖼄𖽡𖾐． 7 𖼽𖽺𖾐 𖼦𖽴 𖼦𖽫 𖼐𖽦𖾐 𖼂𖽻𖾐 𖼖𖽻𖾐，𖼽𖽚 𖼍𖽕𖾑 𖼻𖽙 𖼈𖽳 𖽃𖽳 𖼞𖽑𖽶𖾑 𖼷𖽑𖽻𖾐 𖼊𖽶𖾐 𖼊𖽑𖽡 𖼽𖽚𖾐 𖼣𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼞𖽜 𖼳𖽶𖾐 𖼦𖽑𖽙𖾐． 8 𖽃𖽔𖾐 𖼺𖽺𖾑，𖼽𖽚 𖼍𖽕𖾑 𖽃𖽴 𖼐𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽑𖽡𖽻𖾐 𖼍𖽕𖾑 𖼄𖽳 𖼻𖽙 𖼖𖽙𖾐 𖼮𖽑𖽻𖾐 𖼦𖽑𖽦 𖼽𖽡𖾐，𖼦𖽑𖽺𖾑 𖼐𖽑𖽳𖾐 𖼄𖽻 𖼂𖽺𖾐 𖼷𖽻 𖼺𖽪𖾐 𖼄𖽡𖽻 𖼣𖽻𖾐，𖼐𖽑𖽡𖾐 𖼐𖽑𖽡𖽻𖾐 𖼍𖽕𖾑 𖼖𖽙𖾐 𖼀𖽙𖾐 𖼻𖽙 𖼦𖽑𖽨𖾐 𖼻𖽳𖾐 𖼹𖽦𖾑 𖼖𖽡𖾐．”
9 𖽃𖽴 𖼐𖽕 𖼺𖽝𖾑，𖼽𖽻 𖼄𖽦𖾑 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖽃𖽔𖾐 𖼞𖽶𖾑 𖼽𖽻 𖼻𖽙 𖼄𖽔 𖼰𖽕𖾐 𖼊𖽻𖾐．𖽃𖽴 𖼐𖽕 𖼽𖽻 𖼍𖽕𖾑 𖼖𖽙𖾐 𖼀𖽙𖾐 𖼻𖽙 𖼦𖽑𖽨𖾐 𖼻𖽳𖾐 𖼹𖽦𖾑 𖼄𖽔 𖼺𖽳 𖼺𖽺𖾑，𖼞𖽑𖽙𖾐 𖼽𖽻 𖼄𖽦𖾑 𖼖𖽙𖾐 𖼮𖽑𖽻𖾐 𖼦𖽑𖽦 𖼞𖽑𖽶𖾑 𖼮𖽶𖾐，𖼽𖽻 𖼄𖽦𖾑 𖼞𖽜 𖼄𖽺 𖼄𖽔 𖼊𖽦𖾐． 10 𖼽𖽺𖾐 𖼦𖽴 𖼦𖽫 𖼐𖽦𖾐 𖼂𖽻𖾐 𖼖𖽻𖾐，𖽃𖽴 𖼐𖽕 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼣𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼞𖽜 𖼳𖽶𖾐 𖼦𖽑𖽙𖾐．
11 𖼽𖽚 𖼍𖽕𖾑 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝，𖼳𖽶𖾑 𖼖𖽔𖾐 𖼖𖽺𖾑 𖼽𖽻 𖼽𖽪𖾐 𖼐𖽑𖽡 𖼽𖽚𖾐 𖼖𖽙𖾐 𖼺𖽶𖾑 𖼳𖽶𖾐 𖼦𖽑𖽙𖾐 𖼠𖽸𖾑 𖼮𖽡𖽮𖾐．𖽃𖽔𖾐 𖼺𖽺𖾑，𖼽𖽻 𖼮𖽑𖽡 𖼄𖽙𖾐 𖼊𖽑𖽔𖾐 𖼄𖽔 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽑𖽡𖽻𖾐 𖼀𖽙 𖼈𖽴 𖼞𖽳𖾐 𖼽𖽡𖾐 𖼄𖽳 𖼮𖽑𖽶 𖼄𖽙𖾐 𖼐𖽑𖽡𖾐 𖼦𖽑𖽦 𖼳𖽪𖾐，𖼣𖽙𖾐 𖼻𖽙 𖼳𖽶𖾑 𖼖𖽔𖾐 𖼈𖽳 𖼍𖽪𖾐 𖼖𖽻𖾐 𖼖𖽙𖾐 𖼳𖽡𖽻𖾐．” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼊𖽑𖽔𖾐 𖼄𖽔 𖼞𖽚 𖼽𖽡𖾐，𖼽𖽻 𖼀𖽙 𖼈𖽴 𖼞𖽳𖾐 𖼮𖽻𖾐．
12 𖼐𖽑𖽡𖾐 𖼦𖽑𖽦 𖼊𖽑𖽡 𖼳𖽕𖾐 𖼄𖽙𖾐 𖼠𖽚 𖼽𖽡𖾐，𖼽𖽚 𖼍𖽕𖾑 𖼞𖽳𖾐 𖼄𖽳 𖼻𖽙 𖼳𖽶𖾐 𖼦𖽑𖽙𖾐．𖼮𖽑𖽧𖾐 𖼞𖽪 𖼐𖽑𖽡𖾐 𖼦𖽑𖽦 𖼠𖽚 𖼦𖽑𖽻𖾐 𖼞𖽑𖽶𖾑 𖼮𖽶𖾐，𖼽𖽚 𖼍𖽕𖾑 𖼽𖽻 𖼞𖽙𖾐 𖼮𖽑𖽻 𖼽𖽕𖾑 𖼍𖽪𖾑 𖼖𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼳𖽡𖾐 𖼖𖽔𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼊𖽑𖽧 𖼐𖽕 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐，𖼽𖽻 𖼖𖽙𖾐 𖼂𖽻𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼺𖽪𖾐 𖼞𖽳𖾐 𖼽𖽡𖾐． 13 𖼷𖽑𖽻𖾐 𖼊𖽑𖽔𖾐 𖼄𖽔 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐：“𖼐𖽑𖽡𖾐 𖼽𖽚 𖼀𖽑𖽙 𖽃𖽔𖾑 𖼄𖽳𖾐 𖼊𖽑𖽧 𖼐𖽕 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼊𖽻𖾐．”
14 𖼊𖽑𖽔𖾐 𖼄𖽔 𖼐𖽦𖾐 𖼄𖽡𖽻𖾐，𖼳𖽶𖾑 𖼖𖽔𖾐 𖼈𖽳 𖼍𖽪𖾐 𖼖𖽻𖾐 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼊𖽑𖽺 𖼄𖽔 𖼹𖽶𖾐．𖽃𖽔𖾐 𖼺𖽺𖾑 𖼽𖽻 𖼄𖽳 𖼮𖽑𖽶 𖼄𖽙𖾐 𖼀𖽑𖽡𖽻𖾐 𖼷𖽑𖽶 𖼖𖽳𖾑 𖼦𖽑𖽙𖾐，𖼀𖽑𖽡𖾐 𖼊𖽑𖽪𖾐 𖼻𖽜 𖼮𖽑𖽻 𖼄𖽦𖾐 𖼀𖽜𖾐，𖼞𖽶𖾐 𖼮𖽑𖽶 𖼮𖽑𖽨𖾑 𖼍𖽡，𖼊𖽑𖽧 𖼐𖽕 𖼄𖽡𖾐 𖼊𖽺𖾐 𖼽𖽡𖾐 𖼮𖽨𖾐 𖼄𖽙𖾐 𖼊𖽑𖽺 𖼽𖽡𖾐 𖼐𖽕 𖼽𖽺𖾑 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼊𖽡𖾐．
15 𖼽𖽚 𖼍𖽕𖾑 𖼽𖽻 𖼊𖽑𖽺 𖼐𖽦𖾐 𖼄𖽡𖽻𖾐，𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼣𖽻𖾐 𖼊𖽡 𖼮𖽑𖽻，𖼞𖽪𖾐 𖼮𖽡𖽺𖾐 𖼽𖽻 𖼮𖽑𖽻 𖼄𖽦𖾐 𖼀𖽜𖾐 𖼍𖽡 𖼍𖽳𖾐． 16 𖼽𖽚 𖼍𖽕𖾑 𖼽𖽻 𖼮𖽑𖽡 𖼄𖽙𖾐 𖼣𖽻𖾐 𖼄𖽔 𖼺𖽝𖾑 𖼺𖽺𖾑，𖼻𖽙 𖼄𖽳 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽻 𖼖𖽙𖾐 𖼀𖽦𖾐：“𖼖𖽻𖾐！ 𖼣𖽙𖾐 𖼞𖽜 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼽𖽦．”
𖼊𖽑𖽔𖾐 𖼄𖽔 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽦 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼣𖽙𖾐 𖼊𖽑𖽺 𖼞𖽜 𖼊𖽻𖾐 𖼐𖽺𖾑？”
17 𖼽𖽚 𖼍𖽕𖾑 𖼊𖽻 𖼞𖽑𖽚：“𖼣𖽙𖾐 𖽃𖽔𖾑 𖼮𖽑𖽸 𖼷𖽪𖾐 𖼠𖽻𖾐 𖼊𖽑𖽺 𖽃𖽔𖾑 𖼮𖽑𖽸 𖼠𖽻𖾑 𖼻𖽙 𖼊𖽑𖽡 𖼊𖽝𖾐 𖼦𖽑𖽙𖾐 𖼐𖽑𖽡𖾐 𖼊𖽑𖽺 𖼞𖽜 𖼖𖽻𖾐 𖼊𖽻𖾐．”
𖼊𖽑𖽔𖾐 𖼄𖽔 𖼀𖽦𖾐：“𖼐𖽑𖽡𖾐 𖼄𖽔 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽺 𖽃𖽙𖾑 𖼄𖽺，𖼄𖽡𖽻 𖼐𖽑𖽡 𖼊𖽑𖽡 𖼹𖽻𖾐 𖼀𖽑𖽨 𖼣𖽙𖾐 𖼞𖽜 𖼺𖽺𖾑，𖼮𖽨 𖼄𖽡𖽻𖾐 𖼂𖽺𖾐 𖼊𖽙𖾐 𖼊𖽙𖾐 𖼐𖽺𖾑？”
18 𖼽𖽚 𖼍𖽕𖾑 𖼊𖽻 𖼐𖽙𖾐：“𖼣𖽙𖾐 𖽃𖽔 𖼊𖽺𖾑 𖼳𖽶 𖼈𖽺𖾐 𖼐𖽑𖽡𖾐 𖼞𖽜 𖼺𖽺𖾑，𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐 𖼐𖽺𖾑？” 𖼊𖽑𖽔𖾐 𖼄𖽔 𖼊𖽻 𖼞𖽑𖽚：“𖼐𖽑𖽡𖾐 𖼞𖽳𖾐 𖼺𖽙 𖼍𖽴𖾑 𖼖𖽚𖾐 𖼂𖽚𖾐 𖼖𖽦 𖼐𖽑𖽡𖾐 𖼺𖽶𖾐，𖼐𖽑𖽡𖾐 𖼞𖽳𖾐 𖼮𖽡𖽪 𖼳𖽡𖽦𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼍𖽚𖾐 𖼖𖽜．” 𖽃𖽔𖾐 𖼺𖽺𖾑， 𖼽𖽚 𖼍𖽕𖾑 𖼄𖽡𖽻 𖼐𖽑𖽡 𖼈𖽺𖾐 𖼽𖽻 𖼞𖽜 𖼦𖽑𖽙𖾐，𖼽𖽻 𖼖𖽙𖾐 𖼮𖽑𖽻𖾐 𖼽𖽦 𖼺𖽺𖾑，𖼊𖽑𖽔𖾐 𖼄𖽔 𖼽𖽚 𖼍𖽕𖾑 𖼞𖽳𖾐 𖼮𖽑𖽻𖾐 𖼄𖽺 𖼊𖽦𖾐 𖼦𖽑𖽙𖾐． 19 𖼊𖽑𖽔𖾐 𖼄𖽔 𖼍𖽪𖾐 𖼖𖽻𖾐 𖼺𖽜 𖼽𖽡𖾐，𖼀𖽑𖽡𖾐 𖼊𖽑𖽪𖾐 𖼖𖽧 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼄𖽳 𖼮𖽑𖽶 𖼄𖽙𖾐 𖼀𖽑𖽡𖽻𖾐 𖼷𖽑𖽶 𖼈𖽦．
20 𖼽𖽚 𖼍𖽕𖾑 𖼽𖽻 𖼞𖽙𖾐 𖼮𖽑𖽻 𖼳𖽡𖾐 𖼖𖽔𖾐 𖼊𖽑𖽺 𖼹𖽡𖾐 𖼺𖽺𖾑，𖽃𖽔𖾑 𖼮𖽑𖽸 𖼠𖽻𖾑 𖼻𖽙 𖼊𖽑𖽡 𖼊𖽝𖾐 𖼦𖽑𖽙𖾐 𖼂𖽡𖾐 𖼽𖽡𖾐，𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼞𖽳𖾐 𖼮𖽑𖽻𖾐 𖼽𖽻 𖼄𖽡𖽻 𖼐𖽑𖽡 𖼈𖽺𖾐 𖼞𖽚 𖼖𖽻𖾐 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖼽𖽻 𖼊𖽑𖽺 𖼰𖽙𖾐 𖼄𖽔 𖽂𖽙𖾐． 21 𖼳𖽡𖾐 𖼖𖽔𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼊𖽑𖽺 𖼊𖽻 𖼐𖽙𖾐：“𖼽𖽡𖾐 𖼐𖽕 𖼽𖽺𖾑 𖼮𖽨𖾐 𖼄𖽙𖾐 𖼦𖽜 𖼞𖽳𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼦𖽑𖽺𖾑 𖼠𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼄𖽔 𖼮𖽻𖾐．”
22 𖼳𖽡𖾐 𖼖𖽔𖾐 𖼞𖽚 𖼽𖽡𖾐 𖼽𖽚 𖼍𖽕𖾑 𖼖𖽙𖾐 𖼀𖽦𖾐：“𖼣𖽙𖾐 𖼽𖽻 𖼊𖽑𖽺 𖼰𖽙𖾐 𖼄𖽔 𖽂𖽙𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼖𖽺𖾑 𖼀𖽦𖾐，𖼞𖽑𖽶𖾑 𖼠𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼄𖽔 𖼮𖽻𖾐．” 23 𖼽𖽚 𖼍𖽕𖾑 𖼀𖽦𖾐：“𖼣𖽙𖾐 𖽃𖽔𖾑 𖼮𖽑𖽸 𖼠𖽻𖾑 𖼻𖽙 𖼦𖽑𖽙𖾐 𖼂𖽡𖾐 𖼽𖽡𖾐 𖼦𖽑𖽙𖾐，𖼐𖽑𖽡𖾐 𖼽𖽻 𖼊𖽑𖽺 𖼰𖽙𖾐 𖼄𖽔 𖽂𖽙𖾐 𖼺𖽪𖾐 𖼣𖽻𖾐．𖼄𖽡𖽻 𖼐𖽑𖽡 𖼞𖽑𖽶𖾑 𖼹𖽻𖾐 𖼽𖽻 𖼊𖽑𖽺 𖼞𖽜 𖼻𖽻𖾐，𖽃𖽔 𖼐𖽺𖾑 𖼞𖽜 𖼳𖽡𖽦𖾑 𖼍𖽻𖾐 𖼄𖽔 𖼻𖽻𖾐．”
𖼊𖽑𖽔𖾐 𖼄𖽔 𖼣𖽜𖾐 𖼷𖽜𖾐 𖼽𖽚𖾐
24 𖽃𖽔 𖼖𖽙𖾐 𖼳𖽨𖾐 𖼀𖽙𖾐 𖼺𖽙𖾐 𖼊𖽝𖾐 𖼠𖽚 𖼦𖽑𖽙𖾐，𖼷𖽑𖽻𖾐 𖼽𖽚 𖼍𖽕𖾑 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐：“𖼐𖽑𖽡𖾐 𖼮𖽑𖽡 𖼄𖽙𖾐 𖼊𖽑𖽔𖾐 𖼄𖽔 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽺𖾑，𖼄𖽺 𖼊𖽦𖾐 𖼦𖽑𖽙𖾐．”
𖼽𖽚 𖼍𖽕𖾑 𖼀𖽦𖾐：“𖼽𖽻 𖼊𖽑𖽺 𖼳𖽡𖽺𖾐 𖼊𖽑𖽧 𖼖𖽻𖾐，𖼮𖽑𖽡𖽪𖾐 𖼳𖽶𖾐 𖼦𖽑𖽙𖾐 𖼻𖽻𖾐．”
25 𖼊𖽑𖽔𖾐 𖼄𖽔 𖼊𖽑𖽺 𖼳𖽡𖽺𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼹𖽡𖾐 𖼽𖽻 𖼽𖽚 𖼀𖽑𖽙 𖼊𖽑𖽺 𖼄𖽡𖽻𖾐 𖼽𖽡𖾐，𖼽𖽻 𖼖𖽙𖾐 𖼀𖽦𖾐：“𖼄𖽡𖽻 𖼐𖽑𖽡 𖼦𖽑𖽺𖾑 𖽃𖽔 𖼺𖽺 𖼞𖽳𖾐 𖼣𖽻𖾐，𖼣𖽙𖾐 𖽃𖽔 𖼺𖽺 𖼞𖽳𖾐 𖼮𖽑𖽻𖾐 𖼄𖽺 𖼊𖽦𖾐 𖼺𖽪𖾐 𖼣𖽻𖾐．” 𖼊𖽑𖽔𖾐 𖼄𖽔 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖼊𖽑𖽡 𖼠𖽙𖾐 𖼵𖽜𖾑 𖼐𖽦𖾐，𖼺𖽙 𖼍𖽴𖾑 𖼖𖽚𖾐 𖼂𖽚𖾐 𖼖𖽦 𖼐𖽑𖽡𖾐 𖼺𖽶𖾐、 𖼮𖽡𖽪 𖼳𖽡𖽦𖾐 𖼐𖽺𖾐 𖼍𖽚𖾐 𖼖𖽜 𖼦𖽑𖽺𖾑 𖽃𖽔 𖼺𖽺 𖼞𖽳𖾐 𖼣𖽻𖾐 𖼐𖽺𖾑？”
26 𖼽𖽚 𖼍𖽕𖾑 𖼄𖽡𖽻 𖼐𖽑𖽡 𖼞𖽑𖽶𖾑 𖼹𖽻𖾐 𖼊𖽑𖽺 𖼵𖽜𖾑 𖼊𖽑𖽧 𖼖𖽻𖾐 𖼺𖽺𖾑，𖼀𖽦𖾐：“𖼽𖽻 𖼣𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼖𖽡 𖼮𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽻 𖼊𖽑𖽺 𖼄𖽔 𖼹𖽶𖾐 𖼣𖽙𖾐 𖼻𖽙 𖼳𖽶𖾑 𖼖𖽔𖾐 𖼊𖽑𖽺 𖼞𖽜．” 𖼞𖽑𖽶𖾑 𖼮𖽶𖾐 𖼮𖽑𖽻𖾐 𖼍𖽪𖾐，𖼽𖽚 𖼍𖽕𖾑 𖼹𖽦𖾑 𖼽𖽻 𖼮𖽑𖽡 𖼄𖽙𖾐 𖼖𖽙𖾐 𖼮𖽑𖽻𖾐 𖼄𖽔 𖼽𖽦．
27 𖼊𖽑𖽔𖾐 𖼄𖽔 𖽃𖽔𖾐 𖼞𖽶𖾑 𖼽𖽚𖾐 𖼞𖽑𖽶𖾑 𖼮𖽶𖾐 𖼺𖽺𖾑 𖼺𖽝𖾑，𖼦𖽑𖽦 𖼂𖽙𖾐 𖼞𖽑𖽶𖾐 𖽃𖽔𖾐 𖼞𖽶𖾑 𖼣𖽜𖾐 𖼷𖽜𖾐 𖼣𖽻𖾐． 28 𖽃𖽔𖾐 𖼞𖽶𖾑 𖼽𖽚𖾐 𖼞𖽑𖽶𖾑 𖼮𖽶𖾐，𖽃𖽔𖾐 𖼞𖽶𖾑 𖼊𖽑𖽡 𖼽𖽚𖾐 𖼖𖽦 𖼀𖽑𖽦𖾐 𖼊𖽑𖽡 𖼂𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐．𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽳𖾐 𖼐𖽑𖽡𖾐 𖼊𖽑𖽡 𖼮𖽑𖽡𖾐 𖼈𖽺𖾐 𖼂𖽻𖾐 𖼖𖽻𖾐，𖼊𖽑𖽜 𖽃𖽔𖾐 𖼞𖽶𖾑 𖼖𖽦 𖼀𖽑𖽦𖾐 𖼊𖽑𖽺 𖼍𖽡，𖼀𖽦𖾐：“𖼦𖽑𖽺𖾑 𖼽𖽚𖾐 𖽃𖽙𖾑 𖼄𖽺 𖼽𖽚𖾐 𖼺𖽪𖾐 𖼣𖽻𖾐．” 29 𖼦𖽑𖽻𖾐 𖼊𖽑𖽻𖾐，𖽃𖽔𖾐 𖼞𖽑𖽶𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼀𖽑𖽚𖾐 𖼞𖽚 𖼽𖽡𖾐，𖼽𖽻 𖼍𖽕𖾑 𖼊𖽑𖽺 𖽃𖽙𖾑 𖼄𖽺 𖼽𖽚𖾐 𖼊𖽑𖽧 𖼖𖽻𖾐．𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖽃𖽙𖾑 𖼄𖽺 𖼐𖽻𖾑 𖼽𖽚𖾐 𖼊𖽑𖽧 𖼖𖽻𖾐 𖼐𖽺𖾑？” 𖽃𖽔𖾐 𖼺𖽺𖾑，𖼻𖽙 𖼈𖽳 𖼊𖽑𖽺 𖼇𖽕 𖼖𖽴𖾑 𖼺𖽶𖾐 𖼄𖽡𖾐． 30 𖼠𖽙𖾑 𖼍𖽻𖾐，𖼽𖽻 𖼐𖽑𖽳𖾐 𖼄𖽻 𖼊𖽑𖽺 𖼖𖽺𖾑 𖼽𖽚𖾐 𖼊𖽑𖽧 𖼖𖽻𖾐，𖼖𖽦 𖼀𖽑𖽦𖾐 𖼊𖽑𖽺 𖼄𖽳𖾐 𖼐𖽑𖽡𖾐 𖼊𖽑𖽜 𖼍𖽳𖾐．𖽃𖽔𖾐 𖼺𖽺𖾑，𖼽𖽻 𖼊𖽑𖽺 𖼳𖽡𖽺𖾑 𖼖𖽔𖾐 𖼄𖽡𖾐．