30
1 𖼖𖽔𖾐 𖼰𖽡𖽦 𖼐𖽦𖾐 𖼄𖽡𖽻𖾐，𖼽𖽻 𖼽𖽔 𖼠𖽴𖾑 𖼖𖽙𖾐 𖼀𖽙𖾐 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑．𖽃𖽔𖾐 𖼺𖽺𖾑 𖼽𖽻 𖼷𖽶𖾐 𖼊𖽑𖽺 𖼐𖽑𖽧𖾐 𖼐𖽙𖾐，𖼽𖽻 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼳𖽶𖾐 𖼊𖽻𖾐．”2 𖼽𖽔 𖼠𖽴𖾑 𖼀𖽶 𖼻𖽶，𖼖𖽔𖾐 𖼰𖽡𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐 𖼖𖽔𖾑？”
3 𖼖𖽔𖾐 𖼰𖽡𖽦 𖼀𖽦𖾐：“𖼣𖽙𖾐 𖼮𖽜𖾐 𖼄𖽙𖾐 𖼀𖽑𖽡𖾑 𖼖𖽔𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖼐𖽑𖽡𖾐 𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦 𖼮𖽑𖽳𖾐，𖼽𖽻 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼣𖽙𖾐 𖼄𖽻𖾑 𖼺𖽺𖾑，𖼣𖽙𖾐 𖼽𖽻 𖼞𖽳𖾐 𖼮𖽑𖽻𖾐 𖽃𖽔𖾐 𖼞𖽶𖾑 𖽂𖽙𖾐 𖼊𖽙𖾐．”
4 𖽃𖽔𖾐 𖼺𖽺𖾑，𖼖𖽔𖾐 𖼰𖽡𖽦 𖼽𖽻 𖼮𖽜𖾐 𖼄𖽙𖾐 𖼀𖽑𖽡𖾑 𖼖𖽔𖾐 𖼊𖽑𖽺 𖼀𖽑𖽨 𖼽𖽔 𖼠𖽴𖾑 𖼞𖽳𖾐 𖼄𖽳 𖼖𖽳𖾐 𖼂𖽺𖾐．𖼽𖽔 𖼠𖽴𖾑 𖼽𖽡𖾐 𖼀𖽑𖽡𖾑 𖼖𖽔𖾐 𖼖𖽙𖾐 𖼮𖽑𖽻𖾐 𖼦𖽑𖽦． 5 𖼀𖽑𖽡𖾑 𖼖𖽔𖾐𖼄𖽺 𖼊𖽦𖾐 𖼺𖽺𖾑，𖼻𖽙 𖼊𖽑𖽡 𖼽𖽚𖾐 𖼽𖽚𖾐． 6 𖼖𖽔𖾐 𖼰𖽡𖽦 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼖𖽙𖾐 𖼀𖽙𖾐 𖼳𖽡𖽦𖾑 𖼍𖽻𖾐 𖼊𖽪𖾐 𖼖𖽧 𖼦𖽑𖽙𖾐，𖼣𖽙𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼖𖽺𖾑 𖼊𖽻 𖼞𖽑𖽚 𖼺𖽺𖾑，𖼻𖽙 𖼊𖽑𖽡 𖼽𖽚𖾐 𖼖𖽪 𖼣𖽙𖾐 𖼄𖽻𖾑．” 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼍𖽗𖾑 \fr 30．6 \ft “𖼍𖽗𖾑 ” 𖼦𖽑𖽺𖾑 “𖼳𖽡𖽦𖾑 𖼍𖽻𖾐 𖼊𖽪𖾐 𖼖𖽧 𖼦𖽑𖽙𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐． 7 𖼖𖽔𖾐 𖼰𖽡𖽦 𖼞𖽳𖾐 𖼮𖽜𖾐 𖼄𖽙𖾐 𖼀𖽑𖽡𖾑 𖼖𖽔𖾐 𖼄𖽺 𖼊𖽦𖾐 𖼺𖽺𖾑，𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼹𖽦𖾑 𖼻𖽙 𖼊𖽑𖽡 𖼽𖽚𖾐 𖼽𖽚𖾐． 8 𖼖𖽔𖾐 𖼰𖽡𖽦 𖼀𖽦𖾐：“𖼣𖽙𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼣𖽻𖾐 𖼷𖽶𖾐 𖼖𖽙𖾐 𖼮𖽑𖽻𖾐 𖼐𖽻𖾑 𖼊𖽦，𖼣𖽙𖾐 𖽂𖽙 𖼊𖽙𖾐 𖼦𖽑𖽻𖾐．” 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼐𖽕 𖼇𖽮 𖼊𖽑𖽔𖾐 𖼖𖽡𖾑 \fr 30．8 \ft “𖼐𖽕 𖼇𖽮 𖼊𖽑𖽔𖾐 𖼖𖽡𖾑 ” 𖼦𖽑𖽺𖾑 “𖼐𖽻𖾑 𖼊𖽦 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
9 𖼖𖽡𖾑 𖼽𖽕𖾑 𖼐𖽦𖾐 𖼄𖽡𖽻𖾐，𖼽𖽻 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼐𖽙 𖼦𖽑𖽻𖾐 𖼺𖽺𖾑，𖼽𖽻 𖼮𖽜𖾐 𖼄𖽙𖾐 𖼳𖽧 𖼀𖽑𖽕𖾑 𖼊𖽑𖽺 𖼀𖽑𖽨 𖼽𖽔 𖼠𖽴𖾑 𖼞𖽳𖾐 𖼄𖽳 𖼖𖽳𖾐 𖼂𖽺𖾐． 10 𖼖𖽡𖾑 𖼽𖽕𖾑 𖼞𖽳𖾐 𖼮𖽜𖾐 𖼄𖽙𖾐 𖼳𖽧 𖼀𖽑𖽕𖾑 ，𖼽𖽻 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐． 11 𖼖𖽡𖾑 𖼽𖽕𖾑 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼄𖽢 𖼮𖽻𖾐！” 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼰𖽡𖽔𖾐 𖼍𖽴 \fr 30．11 \ft “𖼰𖽡𖽔𖾐 𖼍𖽴 ” 𖼦𖽑𖽺𖾑 “𖼄𖽢 𖼮𖽻𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐． 12 𖼖𖽡𖾑 𖼽𖽕𖾑 𖼞𖽳𖾐 𖼮𖽜𖾐 𖼄𖽙𖾐 𖼳𖽧 𖼀𖽑𖽕𖾑 ，𖼹𖽦𖾑 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐． 13 𖼖𖽡𖾑 𖼽𖽕𖾑 𖼀𖽦𖾐：“𖼣𖽙𖾐 𖼠𖽕𖾐 𖼰𖽶𖾐 𖼄𖽢 𖼮𖽻𖾐，𖼻𖽙 𖼄𖽳 𖼞𖽑𖽙𖾐 𖼣𖽻𖾐 𖼣𖽙𖾐 𖼊𖽑𖽺 𖼄𖽢 𖼮𖽻𖾐 𖼀𖽦𖾐 𖼊𖽻𖾐．” 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼽𖽕𖾑 𖼳𖽴𖾑 \fr 30．13 \ft “𖼽𖽕𖾑 𖼳𖽴𖾑 ” 𖼦𖽑𖽺𖾑 “𖼄𖽢 𖼮𖽻𖾐 ” 𖼐𖽺𖾐 “𖼞𖽜𖾐 𖼺𖽜𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
14 𖼳𖽙𖾐 𖼻𖽪𖾐 𖼠𖽜𖾐 𖼷𖽑𖽳 𖼰𖽶𖾐 𖼞𖽑𖽶𖾑 𖼮𖽶𖾐，𖼖𖽡𖽚 𖼂𖽡𖽦𖾑 𖼊𖽚𖾐 𖼽𖽡𖾐，𖼄𖽡𖾐 𖼠𖽻𖾐 𖼞𖽳𖾐 𖼮𖽨 𖼷𖽑𖽡 𖼰𖽙𖾐 𖽂𖽙𖾐 𖼺𖽺𖾑，𖼈𖽺𖾐 𖼞𖽚 𖼖𖽻𖾐 𖼽𖽻 𖼄𖽙𖾐 𖼖𖽡𖾑 𖼽𖽕𖾑 𖼊𖽑𖽺 𖼞𖽜．
𖼖𖽔𖾐 𖼰𖽡𖽦 𖼖𖽡𖾑 𖼽𖽕𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼻𖽙 𖼰𖽙𖾐 𖽂𖽙𖾐 𖼺𖽪𖾐 𖼮𖽨 𖼷𖽑𖽡 𖼊𖽑𖽡 𖼀𖽧𖾑 𖼣𖽙𖾐 𖼊𖽑𖽺 𖼄𖽻𖾑 𖼞𖽜．”
15 𖼖𖽡𖾑 𖼽𖽕𖾑 𖼊𖽻 𖼞𖽑𖽚：“𖼐𖽑𖽡𖾐 𖼣𖽙𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼐𖽻𖾑 𖼦𖽑𖽙𖾐 𖼖𖽺𖾑 𖼐𖽑𖽧𖾐 𖼄𖽔 𖼖𖽚 𖼺𖽺 𖼖𖽔？𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼻𖽙 𖼞𖽳𖾐 𖼮𖽨 𖼷𖽑𖽡 𖼐𖽻𖾑 𖼊𖽻𖾐 𖼖𖽔𖾑？”
𖼖𖽔𖾐 𖼰𖽡𖽦 𖼀𖽦𖾐：“𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽺，𖼽𖽻 𖼞𖽜 𖽃𖽙𖾑 𖼄𖽺𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼦𖽑𖽦 𖼺𖽺𖾑，𖼐𖽑𖽡𖾐 𖼻𖽙 𖼞𖽳𖾐 𖼮𖽨 𖼷𖽑𖽡 𖼖𖽳𖾑 𖼣𖽙𖾐 𖼊𖽑𖽺 𖼞𖽜 𖼻𖽻𖾐．”
16 𖼄𖽶 𖼮𖽑𖽧 𖼞𖽑𖽶𖾑 𖼮𖽶𖾐，𖼽𖽔 𖼠𖽴𖾑 𖼄𖽡𖾐 𖼠𖽻𖾐 𖼮𖽑𖽻𖾐 𖼞𖽚 𖼖𖽻𖾐，𖼖𖽡𖾑 𖼽𖽕𖾑 𖼊𖽚𖾐 𖼽𖽡𖾐 𖼽𖽻 𖽃𖽙𖾑 𖼄𖽺 𖼹𖽶𖾐，𖼀𖽦𖾐：“𖼐𖽑𖽡𖾐 𖽃𖽙𖾑 𖼄𖽺𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼦𖽑𖽦 𖼖𖽡𖾐．𖼞𖽪𖾐 𖼮𖽡𖽺𖾐 𖼣𖽙𖾐 𖼠𖽕𖾐 𖼰𖽶𖾐 𖼣𖽙𖾐 𖼻𖽙 𖼞𖽳𖾐 𖼮𖽨 𖼷𖽑𖽡 𖼻𖽜 𖼐𖽑𖽡𖾐 𖼊𖽑𖽺 𖼖𖽳𖾑 𖽂𖽙𖾐 𖼦𖽑𖽻𖾐．” 𖽃𖽔𖾐 𖼺𖽺𖾑，𖼞𖽑𖽶𖾑 𖼊𖽑𖽡 𖼦𖽑𖽦 𖼽𖽔 𖼠𖽴𖾑 𖼖𖽡𖾑 𖼽𖽕𖾑 𖼖𖽙𖾐 𖼮𖽑𖽻𖾐 𖼦𖽑𖽦． 17 𖽂𖽙 𖼺𖽙𖾐 𖼂𖽙𖾐 𖼖𖽡𖾑 𖼽𖽕𖾑 𖼞𖽳𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚 𖼺𖽺𖾑，𖼽𖽻 𖼞𖽜 𖼄𖽺 𖼊𖽦𖾐，𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼻𖽙 𖼣𖽙 𖼽𖽚𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼽𖽚𖾐． 18 𖼖𖽡𖾑 𖼽𖽕𖾑 𖼀𖽦𖾐：“𖼣𖽙𖾐 𖼮𖽜𖾐 𖼄𖽙𖾐 𖼊𖽑𖽺 𖼀𖽑𖽨 𖼣𖽙𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼞𖽜 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼊𖽑𖽺 𖽂𖽙 𖼀𖽑𖽶 𖼞𖽜 𖼦𖽑𖽻𖾐．” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼽𖽡 𖼺𖽕𖾑 𖼰𖽡𖽔𖾐 \fr 30．18 \ft “𖼽𖽡 𖼺𖽕𖾑 𖼰𖽡𖽔𖾐 ” 𖼦𖽑𖽺𖾑 “𖼮𖽡 𖼖𖽪 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐． 19 𖼖𖽡𖾑 𖼽𖽕𖾑 𖼹𖽦𖾑 𖼄𖽺 𖼊𖽦𖾐，𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼻𖽙 𖼮𖽑𖽡𖽚 𖼽𖽚𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼽𖽚𖾐． 20 𖼖𖽡𖾑 𖼽𖽕𖾑 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼄𖽢 𖼈𖽳 𖼖𖽪 𖼣𖽙𖾐 𖼞𖽜，𖽃𖽔𖾑 𖼄𖽳𖾐 𖼣𖽙𖾐 𖼷𖽑𖽻𖾐 𖼀𖽑𖽙 𖼣𖽙𖾐 𖼊𖽑𖽺 𖼐𖽦𖾐 𖼍𖽪𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼻𖽙 𖼮𖽑𖽡𖽚 𖼽𖽚𖾐 𖼽𖽚𖾐 𖼦𖽑𖽙𖾐．” 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼳𖽡𖾐 𖼂𖽪𖾑 𖼖𖽪𖽦 \fr 30．20 \ft “𖼳𖽡𖾐 𖼂𖽪𖾑 𖼖𖽪𖽦 ” 𖼦𖽑𖽺𖾑 “𖼐𖽦𖾐 𖼍𖽪𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
21 𖼠𖽙𖾑 𖼍𖽻𖾐，𖼖𖽡𖾑 𖼽𖽕𖾑 𖼦𖽑𖽔𖾐 𖼖𖽺𖾑 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼽𖽚𖾐，𖼍𖽡 𖼐𖽕 𖼄𖽡𖾐．
22 𖽂𖽙 𖼺𖽙𖾐 𖼂𖽙𖾐 𖼖𖽔𖾐 𖼰𖽡𖽦 𖼊𖽑𖽺 𖼐𖽦𖾐 𖼳𖽪𖾐 𖼂𖽻𖾐 𖼞𖽜，𖼽𖽻 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚，𖼽𖽻 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼠𖽸𖾑． 23 𖽃𖽔𖾐 𖼺𖽺𖾑 𖼖𖽔𖾐 𖼰𖽡𖽦 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐，𖼽𖽻 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽳𖾐 𖼳𖽡𖽦𖾑 𖼍𖽻𖾐 𖼊𖽪𖾐 𖼊𖽑𖽺 𖼖𖽧 𖼦𖽑𖽙𖾐 𖼦𖽑𖽻𖾐．” 24 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽺𖾑，𖽃𖽔𖾐 𖼞𖽶𖾑 𖼊𖽑𖽺 𖼽𖽱𖾐 𖼺𖽴𖾑 \fr 30．24 \ft “𖼽𖽱𖾐 𖼺𖽴𖾑 ” 𖼦𖽑𖽺𖾑 “𖼽𖽺𖾐 𖼦𖽴 𖼦𖽫 𖼹𖽦𖾑 𖼣𖽙𖾐 𖼊𖽑𖽺 𖼻𖽙 𖼊𖽑𖽡 𖼽𖽚𖾐 𖼖𖽪 𖼄𖽻𖾑 𖼞𖽜 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
𖼽𖽔 𖼠𖽴𖾑 𖼐𖽺𖾐 𖼖𖽔𖾐 𖼂𖽔𖾐 𖽂𖽙 𖼀𖽑𖽶 𖼍𖽧𖾑 𖼷𖽑𖽦𖾐
25 𖼖𖽔𖾐 𖼰𖽡𖽦 𖼽𖽱𖾐 𖼺𖽴𖾑 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼽𖽔 𖼠𖽴𖾑 𖼽𖽻 𖼽𖽚 𖼀𖽑𖽙 𖼖𖽙𖾐 𖼀𖽦𖾐：“𖼣𖽙𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼞𖽜 𖼻𖽻𖾐，𖽃𖽔𖾐 𖼺𖽺𖾑 𖼣𖽙𖾐 𖼀𖽑𖽚𖾐 𖼽𖽻 𖼄𖽳𖾑 𖼽𖽚𖾐 𖼈𖽳 𖼄𖽡𖾐 𖼊𖽺𖾐 𖽂𖽙𖾐 𖼞𖽚 𖼽𖽡𖾐 𖼊𖽙𖾐． 26 𖼣𖽙𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼞𖽑𖽙𖾐 𖽂𖽙𖾐 𖼺𖽪𖾐 𖼄𖽳 𖼻𖽙 𖼐𖽺𖾐 𖼻𖽙 𖼄𖽡𖾐 𖼐𖽜𖾐 𖼀𖽑𖽨 𖼣𖽙𖾐 𖼊𖽑𖽺 𖼞𖽜 𖼺𖽺𖾑，𖼣𖽙𖾐 𖼞𖽜 𖼀𖽑𖽚𖾐 𖼞𖽚 𖼽𖽡𖾐 𖼖𖽡𖾐．𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼺𖽝𖾑 𖼍𖽳𖾐，𖼣𖽙𖾐 𖽃𖽔 𖼊𖽺𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼣𖽻𖾐．”
27 𖼖𖽔𖾐 𖼂𖽔𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼮𖽑𖽻 𖼄𖽦𖾐 𖼐𖽦𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽑𖽺 𖼊𖽑𖽔 𖼰𖽡𖾑 𖼦𖽑𖽙𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼰𖽕𖾐 𖼐𖽦𖾐 𖼄𖽡𖾐 𖼀𖽻𖾐 𖼦𖽑𖽻𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽢 𖼖𖽪 𖼣𖽙𖾐 𖼊𖽑𖽺 𖼄𖽻𖾑 𖼺𖽪𖾐 𖼣𖽻𖾐．” 28 𖼖𖽔𖾐 𖼂𖽔𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖽂𖽙 𖼀𖽑𖽶 𖼍𖽧𖾑 𖼻𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”
29 𖼽𖽔 𖼠𖽴𖾑 𖼽𖽻 𖼽𖽚 𖼀𖽑𖽙 𖼖𖽙𖾐 𖼀𖽦𖾐：“𖼣𖽙𖾐 𖽃𖽔 𖼊𖽺𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼦𖽑𖽙𖾐，𖼐𖽑𖽡𖾐 𖼞𖽳𖾐 𖼮𖽡𖽺 𖼷𖽪𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽻𖾐 𖽃𖽔 𖼊𖽺𖾐 𖼺𖽺𖾑 𖼹𖽳𖾐 𖼺𖽪𖾐，𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼺𖽝𖾑 𖼍𖽳𖾐． 30 𖼣𖽙𖾐 𖼄𖽔 𖼖𖽻𖾐 𖼺𖽺 𖽃𖽙𖾑 𖼄𖽺，𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼣𖽻𖾐 𖼐𖽑𖽡𖽪𖾑，𖽃𖽔𖾑 𖼄𖽳𖾐 𖼐𖽑𖽡𖾐 𖼦𖽑𖽔𖾐 𖼮𖽶𖾐 𖼮𖽻𖾐 𖼄𖽨 𖼺𖽪𖾐 𖼣𖽻𖾐．𖼽𖽺𖾐 𖼦𖽴 𖼦𖽫 𖼣𖽙𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽢 𖼖𖽪 𖼐𖽑𖽡𖾐 𖼊𖽑𖽺 𖼄𖽻𖾑 𖼞𖽜．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼺𖽺𖾑 𖼽𖽻 𖼄𖽳𖾑 𖼞𖽳𖾐 𖼄𖽡𖾐 𖼳𖽡𖽪 𖽂𖽙𖾐 𖼮𖽻𖾐 𖼊𖽙𖾐 𖼐𖽺𖾑？”
31 𖼖𖽔𖾐 𖼂𖽔𖾐 𖼊𖽻 𖼐𖽙𖾐：“𖼣𖽙𖾐 𖽃𖽔 𖼊𖽺𖾑 𖼳𖽶 𖼐𖽑𖽡𖾐 𖼊𖽑𖽺 𖼞𖽜 𖼖𖽡𖾐 𖼐𖽺𖾑？”
𖼽𖽔 𖼠𖽴𖾑 𖼊𖽻 𖼞𖽑𖽚：“𖼐𖽑𖽡𖾐 𖼠𖽳𖾐 𖼖𖽪𖾐 𖼣𖽙𖾐 𖼊𖽑𖽺 𖼞𖽜 𖼄𖽔 𖼻𖽻𖾐，𖼐𖽑𖽡𖾐 𖼣𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼹𖽦𖾑 𖼐𖽑𖽡𖾐 𖼖𖽙𖾐 𖼀𖽙𖾐 𖼮𖽡𖽺 𖼷𖽪𖾐 𖼐𖽦𖾐 𖼳𖽪𖾐 𖼠𖽙𖾐 𖼳𖽙𖾐 𖼊𖽻𖾐． 32 𖽃𖽙𖾑 𖼐𖽑𖽡𖾐 𖼣𖽙𖾐 𖼐𖽑𖽡𖾐 𖼞𖽳𖾐 𖽃𖽔𖾑 𖼮𖽑𖽸、 𖼽𖽻𖾐 𖼷𖽪𖾐 𖼞𖽑𖽶𖾐 𖼮𖽑𖽻𖾐 𖼺𖽜 𖼮𖽨𖾐 𖼺𖽺𖾑，𖼞𖽑𖽙𖾐 𖼄𖽦𖾐 𖼊𖽴 𖼺𖽪𖾐、 𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖼐𖽺𖾐 𖼐𖽦𖾑 𖼐𖽦𖾐 𖼮𖽻𖾐 𖼺𖽪𖾐 𖼽𖽻𖾐，𖼞𖽑𖽙𖾐 𖼄𖽦𖾐 𖼊𖽴 𖼺𖽪𖾐 𖼐𖽺𖾐 𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖽃𖽔𖾑 𖼮𖽑𖽸，𖼦𖽑𖽺𖾑 𖼹𖽻𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼣𖽙𖾐 𖼞𖽳𖾐 𖽂𖽙 𖼀𖽑𖽶 𖼂𖽺𖾐 𖼖𖽡𖾐． 33 𖼐𖽑𖽡𖾐 𖽃𖽔𖾑 𖼞𖽶𖾐 𖼖𖽻𖾐 𖼺𖽺𖾑 𖼣𖽙𖾐 𖼞𖽳𖾐 𖽂𖽙 𖼀𖽑𖽶 𖼰𖽕𖾐 𖼐𖽦𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼣𖽙𖾐 𖼮𖽨 𖼄𖽡𖽻𖾐 𖽂𖽙𖾐 𖼂𖽺𖾐 𖼊𖽙𖾐．𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽻𖾐 𖼺𖽺𖾑，𖼞𖽑𖽙𖾐 𖼄𖽦𖾐 𖼄𖽔 𖼊𖽴 𖼺𖽪𖾐 𖽃𖽔𖾑 𖼮𖽑𖽸 𖼣𖽻𖾐 𖼦𖽻，𖼐𖽦𖾑 𖼐𖽦𖾐 𖼄𖽔 𖼮𖽻𖾐 𖼺𖽪𖾐 𖼽𖽻𖾐 𖼣𖽻𖾐 𖼦𖽻，𖼣𖽙𖾐 𖼞𖽑𖽶 𖼂𖽻𖾐 𖼖𖽻𖾐 𖼺𖽪𖾐 𖼰𖽕𖾐 𖼮𖽑𖽳𖾐．”
34 𖼖𖽔𖾐 𖼂𖽔𖾐 𖼀𖽦𖾐：“𖼣𖽻𖾐！ 𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼮𖽑𖽳𖾐．” 35 𖼦𖽑𖽻𖾐 𖼊𖽑𖽻𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼠𖽻𖾐 𖼞𖽑𖽶𖾐，𖼞𖽑𖽙𖾐 𖼠𖽕𖾐 𖼺𖽪𖾐 𖼐𖽺𖾐 𖼄𖽦𖾐 𖼊𖽴 𖼺𖽪𖾐 𖽃𖽔𖾑 𖼮𖽑𖽸 𖼠𖽻𖾑，𖼞𖽑𖽙𖾐 𖼄𖽦𖾐 𖼊𖽴 𖼺𖽪𖾐 𖼐𖽺𖾐 𖼠𖽕𖾐 𖼺𖽪𖾐 𖽃𖽔𖾑 𖼮𖽑𖽸 𖼄𖽙𖾐，𖼹𖽦𖾑 𖼐𖽦𖾑 𖼐𖽦𖾐 𖼮𖽻𖾐 𖼺𖽪𖾐 𖼽𖽻𖾐 𖼞𖽑𖽙𖾐 𖼣𖽻𖾐，𖼖𖽔𖾐 𖼂𖽔𖾐 𖼄𖽳𖾑 𖼄𖽳 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼀𖽑𖽨 𖼺𖽺𖾑 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐． 36 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽜 𖼽𖽔 𖼠𖽴𖾑 𖼊𖽑𖽺 𖼰𖽡𖾑 𖼺𖽜 𖼽𖽡𖾐 𖼦𖽑𖽙𖾐，𖼽𖽻 𖼖𖽙𖾐 𖼺𖽙𖾐 𖼐𖽑𖽡𖾐 𖼺𖽜 𖼮𖽨𖾐 𖼄𖽙𖾐 𖼰𖽨𖾑 𖼞𖽳𖾐 𖼮𖽻𖾐．𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼹𖽦𖾑 𖼖𖽔𖾐 𖼂𖽔𖾐 𖼖𖽙𖾐 𖼀𖽙𖾐 𖼞𖽑𖽻𖾐 𖼂𖽻𖾑 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼖𖽚𖾑．
𖼽𖽔 𖼠𖽴𖾑 𖼄𖽪𖾐 𖼊𖽪𖾐 𖼻𖽜 𖼀𖽻𖾐 𖼀𖽡𖾐 𖽂𖽙𖾐
37 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽔 𖼠𖽴𖾑 𖼐𖽑𖽡𖾑 𖼀𖽑𖽨𖾐 𖼺𖽧𖾐、 𖼺𖽳 𖼀𖽑𖽳 𖼄𖽡 𖼺𖽧𖾐 𖼐𖽺𖾐 𖼀𖽑𖽦 𖼞𖽑𖽢 𖼺𖽧𖾐 𖼞𖽳𖾐 𖼠𖽕𖾑 𖼖𖽦 𖼐𖽜𖾐 𖼈𖽺𖾐 𖼺𖽺𖾑，𖼺𖽧𖾐 𖼠𖽚𖾐 𖼊𖽑𖽡 𖼰𖽡𖾑 𖼊𖽑𖽡 𖼰𖽡𖾑 𖼀𖽑𖽝 𖼦𖽑𖽙𖾐，𖼺𖽧𖾐 𖼠𖽕𖾑 𖼖𖽦 𖼞𖽜 𖼀𖽑𖽨𖾑 𖼀𖽑𖽨𖾐 𖼊𖽑𖽦 𖼊𖽚𖾐 𖼊𖽑𖽧 𖼖𖽻𖾐． 38 𖼹𖽦𖾑 𖼀𖽑𖽝 𖼊𖽑𖽧 𖼖𖽻𖾐 𖼺𖽪𖾐 𖼺𖽧𖾐 𖼠𖽕𖾑 𖼈𖽺𖾐 𖼺𖽺𖾑 𖼈𖽡𖾐 𖼳𖽡𖽪 𖼐𖽺𖾐 𖼖𖽡𖾑 𖼊𖽑𖽪 𖼠𖽻𖾐 𖼞𖽑𖽶𖾐 𖼮𖽑𖽴𖾐，𖼺𖽧𖾐 𖼠𖽕𖾑 𖼞𖽜 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖽃𖽙𖾑 𖼄𖽺 𖼞𖽳𖾐 𖼮𖽻𖾐．𖽃𖽔𖾑 𖼮𖽑𖽸 𖼽𖽻𖾐 𖽃𖽔𖾐 𖼮𖽡𖽦𖾐 𖼊𖽻𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽑𖽪𖾐 𖼦𖽑𖽨𖾐． 39 𖽃𖽔𖾑 𖼮𖽑𖽸 𖼽𖽻𖾐 𖼺𖽧𖾐 𖼠𖽕𖾑 𖼖𖽦 𖽃𖽙𖾑 𖼄𖽺 𖼮𖽻𖾐 𖼮𖽑𖽪𖾐 𖼦𖽑𖽨𖾐 𖼺𖽺𖾑，𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖼐𖽺𖾐 𖼄𖽦𖾐 𖼊𖽴 𖼺𖽪𖾐 𖼻𖽙 𖼦𖽳． 40 𖼽𖽔 𖼠𖽴𖾑 𖽃𖽔𖾑 𖼮𖽑𖽸 𖼻𖽙 𖼐𖽺𖾐 𖼽𖽻𖾐 𖼻𖽙 𖼦𖽑𖽺𖾑 𖼹𖽻𖾐 𖼀𖽜𖾐 𖼀𖽑𖽪𖾐 𖼊𖽑𖽧 𖼖𖽻𖾐 𖼽𖽻 𖼷𖽺𖾐 𖼂𖽺𖾐 𖼺𖽺𖾑，𖼖𖽔𖾐 𖼂𖽔𖾐 𖼞𖽳𖾐 𖽃𖽔𖾑 𖼮𖽑𖽸 𖼐𖽺𖾐 𖼽𖽻𖾐 𖼷𖽪𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼄𖽔 𖼮𖽻𖾐，𖼷𖽙𖾐 𖼖𖽙𖾐 𖼄𖽔 𖼦𖽑𖽚 𖼀𖽑𖽧𖾐．
41 𖼖𖽔𖾐 𖼂𖽔𖾐 𖼞𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽑𖽪𖾐 𖼺𖽪𖾐 𖼮𖽑𖽪𖾐 𖼦𖽑𖽨𖾐 𖼰𖽶𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽔 𖼠𖽴𖾑 𖼺𖽧𖾐 𖼠𖽕𖾑 𖼖𖽦 𖼈𖽺𖾐 𖼺𖽺𖾑，𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖽃𖽙𖾑 𖼄𖽺 𖼀𖽳 𖼞𖽳𖾐 𖼈𖽡𖾐 𖼳𖽡𖽪 𖼠𖽻𖾐 𖼞𖽑𖽶𖾐 𖼮𖽑𖽴𖾐，𖼽𖽻 𖼈𖽳𖾐 𖼞𖽜 𖼺𖽧𖾐 𖼠𖽕𖾑 𖼖𖽦 𖽃𖽙𖾑 𖼄𖽺 𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽑𖽪𖾐 𖼦𖽑𖽨𖾐． 42 𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼮𖽑𖽸 𖼽𖽻𖾐 𖼠𖽴𖾐 𖼺𖽪𖾐 𖼮𖽑𖽪𖾐 𖼦𖽑𖽨𖾐 𖼞𖽑𖽶𖾑 𖼮𖽶𖾐，𖼽𖽔 𖼠𖽴𖾑 𖼺𖽧𖾐 𖼠𖽕𖾑 𖼖𖽦 𖼄𖽔 𖼮𖽑𖽴𖾐．𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑，𖼠𖽴𖾐 𖼺𖽪𖾐 𖼖𖽔𖾐 𖼂𖽔𖾐 𖼞𖽜，𖼷𖽑𖽪𖾐 𖼺𖽪𖾐 𖼽𖽔 𖼠𖽴𖾑 𖽂𖽙𖾐． 43 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼦𖽑𖽔𖾐 𖼮𖽶𖾐 𖼀𖽻𖾐 𖼀𖽡𖾐 𖽂𖽙𖾐，𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐、 𖼮𖽜𖾐 𖼀𖽑𖽙、 𖼮𖽜𖾐 𖼄𖽙𖾐、 𖼖𖽚𖾑 𖼊𖽑𖽚 𖼐𖽺𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽡 𖼂𖽜𖾐 𖼄𖽙𖾐 𖼮𖽻𖾐．