𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼈𖽴 𖼞𖽳𖾐 𖼮𖽑𖽡𖾐
29
1 𖼽𖽔 𖼠𖽴𖾑 𖼦𖽑𖽔𖾐 𖼖𖽺𖾑 𖼮𖽨𖾐 𖼺𖽜 𖽃𖽙𖾑 𖼄𖽺 𖼽𖽡𖾐 𖼺𖽺𖾑，𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼷𖽑𖽻𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐． 2 𖼽𖽻 𖼄𖽡𖾐 𖼠𖽻𖾐 𖼈𖽡𖾐 𖼊𖽪 𖼊𖽑𖽡 𖼊𖽝𖾐 𖼐𖽦𖾐 𖼄𖽡𖽻𖾐，𖼞𖽑𖽶𖾑 𖼮𖽡𖽺 𖼊𖽻𖾐 𖼈𖽡𖾐 𖼊𖽪 𖼣𖽻𖾐．𖼽𖽻𖾐 𖼺𖽙𖾐 𖼷𖽪𖾐 𖼈𖽡𖾐 𖼊𖽪 𖼀𖽙 𖼮𖽑𖽶𖾐 𖼽𖽦 𖼍𖽳𖾐，𖼖𖽚𖾐 𖼀𖽑𖽡 𖼈𖽳 𖼊𖽑𖽡 𖼊𖽝𖾐 𖼈𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼍𖽳𖾐．3 𖼽𖽻𖾐 𖼷𖽪𖾐 𖼄𖽳𖾑 𖼄𖽳 𖼮𖽑𖽡𖾐 𖼖𖽻𖾐 𖼦𖽑𖽻𖾐 𖼞𖽑𖽶𖾑 𖼮𖽶𖾐 𖼺𖽺𖾑，𖼖𖽚𖾑 𖼀𖽑𖽙 𖼈𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼺𖽪𖾐 𖼖𖽚𖾐 𖼀𖽑𖽡 𖼈𖽳 𖼀𖽑𖽪𖾐 𖼦𖽑𖽙𖾐，𖽃𖽔𖾐 𖼮𖽡𖽦𖾐 𖼊𖽑𖽜 𖼽𖽻𖾐 𖼷𖽪𖾐 𖼞𖽜 𖼊𖽻𖾐，𖼠𖽙𖾑 𖼍𖽻𖾐 𖼹𖽦𖾑 𖼈𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼍𖽡． 4 𖼽𖽔 𖼠𖽴𖾑 𖼖𖽚𖾑 𖼀𖽑𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼊𖽻 𖼐𖽙𖾐：“𖼈𖽧 𖼐𖽑𖽳𖾐 𖽃𖽔𖾐！ 𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼐𖽺𖾑？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼦𖽔𖾐 𖼖𖽕 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐．”
5 𖼽𖽔 𖼠𖽴𖾑 𖼹𖽦𖾑 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼈𖽳𖾐 𖼐𖽕 𖼦𖽴𖾑 𖼖𖽡𖾑 𖼂𖽙𖾑 𖼖𖽔𖾐 𖼂𖽔𖾐 𖼊𖽑𖽺 𖼺𖽝𖾑 𖼺𖽝𖾑？” 𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼺𖽝𖾑 𖼍𖽳𖾐．”
6 𖼽𖽔 𖼠𖽴𖾑 𖼦𖽑𖽔𖾐 𖼖𖽺𖾑 𖼊𖽻 𖼐𖽙𖾐：“𖼽𖽻 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼺𖽙𖾑 𖼺𖽙𖾐 𖼮𖽻𖾐 𖼍𖽳𖾐．𖼐𖽦𖾐 𖼄𖽺！ 𖼽𖽻 𖼻𖽙 𖼄𖽳 𖼖𖽔𖾐 𖼰𖽡𖽦 𖼽𖽻𖾐 𖼷𖽪𖾐 𖼊𖽑𖽺 𖼦𖽳 𖼮𖽑𖽡𖾐 𖼖𖽻𖾐 𖼮𖽻𖾐．”
7 𖼽𖽔 𖼠𖽴𖾑 𖼀𖽦𖾐：“𖽃𖽔𖾑 𖼄𖽳𖾐 𖼐𖽦 𖼍𖽳𖾐 𖼺𖽺，𖼮𖽡𖽺 𖼷𖽪𖾐 𖼻𖽶𖾑 𖼖𖽻𖾐 𖼰𖽶𖾐 𖼄𖽔 𖼮𖽑𖽡𖾐 𖼺𖽺，𖼐𖽑𖽡𖾐 𖼈𖽳𖾐 𖼽𖽻𖾐 𖼷𖽪𖾐 𖽃𖽔𖾐 𖼮𖽡𖽦𖾐 𖼍𖽻𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼹𖽦𖾑 𖼊𖽑𖽡 𖼠𖽸𖾑 𖼖𖽚𖾑 𖼽𖽡𖾐 𖼮𖽑𖽳𖾐．”
8 𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼮𖽑𖽳𖾐！ 𖼞𖽪𖾐 𖼮𖽡𖽺𖾐，𖼽𖽻𖾐 𖼷𖽪𖾐 𖼄𖽳𖾑 𖼄𖽳 𖼮𖽑𖽡𖾐 𖼖𖽻𖾐 𖼦𖽑𖽻𖾐，𖼈𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼊𖽪𖾐 𖼖𖽚𖾐 𖼀𖽑𖽡 𖼈𖽳 𖼀𖽑𖽪𖾐 𖼦𖽑𖽙𖾐 𖼺𖽪𖾐 𖼮𖽻𖾐 𖼺𖽺𖾑，𖽃𖽔𖾐 𖼮𖽡𖽦𖾐 𖼊𖽑𖽜 𖼽𖽻𖾐 𖼷𖽪𖾐 𖼞𖽜 𖽂𖽙𖾐 𖼊𖽻𖾐 𖼊𖽙𖾐．”
9 𖼽𖽔 𖼠𖽴𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼮𖽻𖾐 𖼺𖽺 𖼞𖽑𖽶𖾑 𖼮𖽶𖾐，𖼖𖽔𖾐 𖼰𖽡𖽦 𖼽𖽻 𖼀𖽙 𖼞𖽳𖾐 𖼽𖽻𖾐 𖼷𖽪𖾐 𖼊𖽑𖽺 𖼦𖽳 𖼮𖽑𖽡𖾐 𖼖𖽻𖾐 𖼦𖽑𖽻𖾐．𖼖𖽔𖾐 𖼰𖽡𖽦 𖼦𖽑𖽺𖾑 𖼽𖽻𖾐 𖼖𖽚𖾑 𖼺𖽪𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼣𖽻𖾐． 10 𖼽𖽔 𖼠𖽴𖾑 𖼽𖽻 𖼈𖽪𖾐 𖼈𖽴 𖼻𖽙 𖼄𖽳 𖼖𖽔𖾐 𖼰𖽡𖽦 𖼐𖽺𖾐 𖼽𖽻𖾐 𖼷𖽪𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼺𖽜 𖽃𖽙𖾑 𖼄𖽺 𖼽𖽡𖾐，𖼈𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼊𖽪𖾐 𖼖𖽚𖾐 𖼀𖽑𖽡 𖼈𖽳 𖼀𖽑𖽪𖾐 𖼦𖽑𖽙𖾐，𖽃𖽔𖾐 𖼮𖽡𖽦𖾐 𖼊𖽑𖽜 𖼽𖽻 𖼈𖽪𖾐 𖼖𖽔𖾐 𖼂𖽔𖾐 𖼞𖽳𖾐 𖼽𖽻𖾐 𖼷𖽪𖾐 𖼞𖽜 𖼊𖽻𖾐． 11 𖼽𖽔 𖼠𖽴𖾑 𖼖𖽔𖾐 𖼰𖽡𖽦 𖼮𖽑𖽻 𖼄𖽦𖾐 𖼊𖽑𖽺 𖼹𖽮𖾑 𖼺𖽺𖾑，𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐． 12 𖼽𖽻 𖼖𖽙𖾐 𖼀𖽦𖾐 𖼊𖽑𖽧：“𖼣𖽙𖾐 𖼐𖽑𖽡𖽻𖾐 𖼀𖽙 𖼞𖽳𖾐 𖼺𖽙𖾑 𖼻𖽙，𖼖𖽡𖾑 𖼂𖽦 𖼰𖽡𖽔𖾐 𖼞𖽳𖾐 𖼻𖽙 𖼣𖽻𖾐．” 𖽃𖽔𖾐 𖼺𖽺𖾑，𖼖𖽔𖾐 𖼰𖽡𖽦 𖼰𖽡𖽴 𖼞𖽚 𖼽𖽡𖾐，𖼽𖽻 𖼀𖽙 𖼖𖽙𖾐 𖼀𖽦𖾐 𖼊𖽑𖽧．
13 𖼖𖽔𖾐 𖼂𖽔𖾐 𖼽𖽻 𖼺𖽙𖾑 𖼻𖽙 𖼽𖽔 𖼠𖽴𖾑 𖼮𖽑𖽡𖾐 𖼖𖽻𖾐 𖼞𖽳𖾐 𖼊𖽻 𖼮𖽨 𖼺𖽺𖾑，𖼰𖽡𖽴 𖼊𖽚𖾐 𖼽𖽡𖾐 𖼽𖽻 𖼊𖽑𖽺 𖼹𖽶𖾐，𖼽𖽻 𖼊𖽑𖽺 𖼈𖽝𖾐 𖼍𖽦𖾐，𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼽𖽻 𖼊𖽑𖽺 𖼦𖽳 𖼞𖽚 𖼽𖽡𖾐．𖼽𖽔 𖼠𖽴𖾑 𖼞𖽑𖽙𖾐 𖼠𖽚 𖼺𖽪𖾐 𖼄𖽡𖽻 𖼀𖽦𖾐 𖼖𖽔𖾐 𖼂𖽔𖾐 𖼊𖽑𖽺 𖼰𖽨𖾐 𖼦𖽑𖽙𖾐． 14 𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼠𖽕𖾐 𖼰𖽶𖾐 𖼣𖽙𖾐 𖼺𖽙𖾑 𖼻𖽙 𖼣𖽻𖾐．” 𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼳𖽨𖾐 𖼀𖽙𖾐 𖼮𖽻𖾐 𖼦𖽑𖽙𖾐．
𖼽𖽔 𖼠𖽴𖾑 𖼽𖽻 𖼈𖽪𖾐 𖼞𖽳𖾐 𖼻𖽙 𖼄𖽳 𖼐𖽑𖽡 𖼽𖽚𖾐 𖼊𖽑𖽺 𖼹𖽶𖾐
15 𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼺𖽙𖾑 𖼻𖽙 𖼣𖽻𖾐 𖼺𖽺𖾑，𖽂𖽙 𖼀𖽑𖽶 𖼄𖽔 𖼮𖽻𖾐 𖼐𖽺𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽙𖾐 𖼖𖽔𖾑？𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧，𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖽂𖽙 𖼀𖽑𖽶 𖼖𖽡𖾐？”
16 𖼖𖽔𖾐 𖼂𖽔𖾐 𖼻𖽙 𖼄𖽳 𖼐𖽑𖽡 𖼽𖽚𖾐 𖼮𖽻𖾐，𖼈𖽳 𖼺𖽪𖾐 𖼖𖽡𖾑 𖼽𖽕𖾑 𖼄𖽡𖾐，𖼽𖽳𖾐 𖼺𖽪𖾐 𖼖𖽔𖾐 𖼰𖽡𖽦 𖼄𖽡𖾐． 17 𖼖𖽡𖾑 𖼽𖽕𖾑 𖼞𖽳𖾐 𖼄𖽦𖾐 𖼊𖽪 𖼐𖽦𖾐 𖼹𖽳𖾐 𖼊𖽑𖽻𖾐，𖼖𖽔𖾐 𖼰𖽡𖽦 𖼞𖽳𖾐 𖼞𖽶𖾐 𖼂𖽚𖾐 𖼠𖽳𖾐 𖼖𖽳𖾐 𖼽𖽚𖾐 𖼹𖽳𖾐，𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑．
18 𖼽𖽔 𖼠𖽴𖾑 𖼖𖽔𖾐 𖼰𖽡𖽦 𖼊𖽑𖽺 𖼦𖽑𖽻𖾑 𖼺𖽺𖾑，𖼖𖽔𖾐 𖼂𖽔𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼻𖽙 𖼄𖽳 𖼽𖽳𖾐 𖼖𖽔𖾐 𖼰𖽡𖽦 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽧𖾐 𖼺𖽳 𖼄𖽙𖾐 𖼐𖽑𖽡𖾐 𖼊𖽑𖽺 𖼳𖽶 𖼞𖽑𖽚 𖼠𖽙𖾐 𖼳𖽙𖾐 𖼊𖽻𖾐．”
19 𖼖𖽔𖾐 𖼂𖽔𖾐 𖼀𖽦𖾐：“𖼣𖽙𖾐 𖼽𖽻 𖼊𖽑𖽺 𖼀𖽑𖽨 𖼐𖽑𖽡𖾐 𖼞𖽜，𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼞𖽜 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐，𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼻𖽻𖾐．” 20 𖼖𖽔𖾐 𖼰𖽡𖽦 𖼖𖽙𖾐 𖼀𖽙𖾐 𖼺𖽺𖾑，𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼊𖽑𖽺 𖼳𖽶 𖼞𖽑𖽚 𖼠𖽙𖾐 𖼳𖽙𖾐 𖼦𖽑𖽙𖾐．𖼽𖽻 𖼖𖽔𖾐 𖼰𖽡𖽦 𖼊𖽑𖽺 𖼦𖽑𖽻𖾑 𖼺𖽺𖾑，𖼦𖽑𖽺𖾑 𖼳𖽶 𖼞𖽑𖽚 𖼐𖽑𖽡𖾐 𖼦𖽑𖽦 𖼄𖽔 𖼣𖽜𖾐 𖼄𖽔 𖼐𖽑𖽡𖽺 𖼠𖽚 𖼦𖽑𖽻𖾐．
21 𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼦𖽑𖽦 𖼀𖽡𖾐 𖼦𖽑𖽻𖾐，𖼣𖽙𖾐 𖼄𖽳 𖼻𖽙 𖼊𖽑𖽺 𖼀𖽑𖽨 𖼣𖽙𖾐 𖼞𖽜 𖼖𖽻𖾐 𖼦𖽻，𖼣𖽙𖾐 𖼞𖽜 𖼽𖽻 𖼖𖽙𖾐 𖼮𖽑𖽻𖾐 𖽂𖽙𖾐 𖼦𖽑𖽦 𖼊𖽙𖾐．”
22 𖽃𖽔𖾐 𖼺𖽺𖾑，𖼖𖽔𖾐 𖼂𖽔𖾐 𖼻𖽦 𖼷𖽙𖾐 𖼂𖽺𖾐 𖼍𖽙𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼻𖽦 𖼷𖽙． 23 𖼄𖽶 𖼮𖽑𖽧 𖼞𖽑𖽶𖾑 𖼮𖽶𖾐，𖼖𖽔𖾐 𖼂𖽔𖾐 𖼽𖽻 𖼻𖽙 𖼄𖽳 𖼈𖽳 𖼖𖽡𖾑 𖼽𖽕𖾑 𖼊𖽑𖽺 𖼦𖽳 𖼽𖽔 𖼠𖽴𖾑 𖼞𖽜 𖼺𖽺𖾑，𖼽𖽔 𖼠𖽴𖾑 𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦． 24 𖼖𖽔𖾐 𖼂𖽔𖾐 𖼽𖽻 𖼮𖽜𖾐 𖼄𖽙𖾐 𖼳𖽧 𖼀𖽑𖽕𖾑 𖼊𖽑𖽺 𖼀𖽑𖽨 𖼖𖽡𖾑 𖼽𖽕𖾑 𖼞𖽜，𖼖𖽡𖾑 𖼽𖽕𖾑 𖼞𖽳𖾐 𖼮𖽜𖾐 𖼄𖽙𖾐 𖼂𖽺𖾐．
25 𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐 𖼺𖽺𖾑，𖼽𖽔 𖼠𖽴𖾑 𖼐𖽦𖾐 𖼊𖽚𖾐 𖼖𖽻𖾐，𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦 𖼺𖽪𖾐 𖼖𖽡𖾑 𖼽𖽕𖾑 𖼣𖽻𖾐．𖽃𖽔𖾐 𖼺𖽺𖾑，𖼖𖽔𖾐 𖼂𖽔𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐？𖼣𖽙𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐，𖼖𖽔𖾐 𖼰𖽡𖽦 𖼖𖽙𖾐 𖼀𖽙𖾐 𖼺𖽪𖾐 𖼣𖽻𖾐．𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼇𖽪 𖼐𖽺𖾑？”
26 𖼖𖽔𖾐 𖼂𖽔𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼄𖽡𖾐 𖼊𖽺𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐，𖼻𖽙 𖼄𖽳 𖼈𖽳 𖼊𖽑𖽺 𖼄𖽔 𖼇𖽪𖾐 𖼺𖽺 𖽃𖽙𖾑 𖼄𖽺，𖼻𖽙 𖼄𖽳 𖼽𖽳𖾐 𖼊𖽑𖽺 𖼇𖽪𖾐 𖼺𖽪𖾐 𖼄𖽔 𖼮𖽻𖾐． 27 𖼞𖽳𖾐 𖼊𖽚𖾐 𖼐𖽑𖽡𖾐 𖼦𖽑𖽦 𖼳𖽶 𖼐𖽑𖽡𖾐 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼣𖽙𖾐 𖼈𖽳𖾐 𖼻𖽙 𖼄𖽳 𖼽𖽳𖾐 𖼊𖽑𖽺 𖼖𖽺𖾑 𖼀𖽑𖽨 𖼐𖽑𖽡𖾐 𖼞𖽜 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼹𖽦𖾑 𖼣𖽙𖾐 𖼊𖽑𖽺 𖼳𖽶 𖼞𖽑𖽚 𖼠𖽙𖾐 𖼳𖽙𖾐 𖼖𖽡𖾐．”
28 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼽𖽻 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐．𖼽𖽻 𖼖𖽡𖾑 𖼽𖽕𖾑 𖼖𖽙𖾐 𖼮𖽑𖽻𖾐 𖼞𖽳𖾐 𖼊𖽚𖾐 𖼐𖽑𖽡𖾐 𖼦𖽑𖽦 𖼳𖽶 𖼐𖽑𖽡𖾐 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼖𖽔𖾐 𖼂𖽔𖾐 𖼽𖽻 𖼻𖽙 𖼄𖽳 𖼽𖽳𖾐 𖼖𖽔𖾐 𖼰𖽡𖽦 𖼊𖽑𖽺 𖼀𖽑𖽨 𖼽𖽔 𖼠𖽴𖾑 𖼞𖽜． 29 𖼖𖽔𖾐 𖼂𖽔𖾐 𖼦𖽑𖽔𖾐 𖼖𖽺𖾑 𖼽𖽻 𖼮𖽜𖾐 𖼄𖽙𖾐 𖼀𖽑𖽡𖾑 𖼖𖽔𖾐 𖼊𖽑𖽺 𖼀𖽑𖽨 𖼖𖽔𖾐 𖼰𖽡𖽦 𖼞𖽜，𖼖𖽔𖾐 𖼰𖽡𖽦 𖼞𖽳𖾐 𖼮𖽜𖾐 𖼄𖽙𖾐 𖼂𖽺𖾐． 30 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽔 𖼠𖽴𖾑 𖼖𖽔𖾐 𖼰𖽡𖽦 𖼖𖽙𖾐 𖼮𖽑𖽻𖾐 𖼦𖽑𖽦，𖼦𖽑𖽔𖾐 𖼖𖽺𖾑 𖼖𖽔𖾐 𖼰𖽡𖽦 𖼊𖽑𖽺 𖼮𖽨 𖼺𖽪𖾐 𖼖𖽡𖾑 𖼽𖽕𖾑 𖼊𖽑𖽺 𖼦𖽶𖾑 𖼄𖽔 𖼷𖽑𖽶𖾐 𖼮𖽨．𖼽𖽔 𖼠𖽴𖾑 𖼹𖽦𖾑 𖼖𖽔𖾐 𖼂𖽔𖾐 𖼊𖽑𖽺 𖼳𖽶 𖼞𖽑𖽚 𖼠𖽙𖾐 𖼳𖽙𖾐．
𖼽𖽔 𖼠𖽴𖾑 𖼞𖽳𖾐 𖼻𖽙
31 𖼽𖽔 𖼠𖽴𖾑 𖼖𖽡𖾑 𖼽𖽕𖾑 𖼊𖽑𖽺 𖼄𖽔 𖼮𖽨，𖼽𖽺𖾐 𖼦𖽴 𖼦𖽫 𖼐𖽦𖾐 𖼄𖽡𖽻𖾐 𖼺𖽺𖾑，𖼖𖽡𖾑 𖼽𖽕𖾑 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐，𖼖𖽔𖾐 𖼰𖽡𖽦 𖼞𖽜 𖼻𖽙 𖼄𖽡𖾐 𖼐𖽜𖾐 𖼄𖽔 𖼽𖽚𖾐． 32 𖼖𖽡𖾑 𖼽𖽕𖾑 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼽𖽻 𖼊𖽑𖽺 𖼖𖽡𖽚 𖼂𖽡𖽦𖾑 \fr 29．32 \ft “𖼖𖽡𖽚 𖼂𖽡𖽦𖾑 ” 𖼦𖽑𖽺𖾑 “𖼐𖽦𖾐 𖼄𖽡𖽻𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐，𖼞𖽪𖾐 𖼮𖽡𖽺𖾐 𖼽𖽻 𖼀𖽦𖾐：“𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼳𖽚𖾑 𖼞𖽑𖽪 𖼊𖽑𖽺 𖼐𖽦𖾐 𖼄𖽡𖽻𖾐 𖼦𖽑𖽻𖾐，𖽃𖽔𖾑 𖼄𖽳𖾐 𖼣𖽙𖾐 𖼷𖽑𖽻𖾐 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼊𖽑𖽺 𖼮𖽨 𖼊𖽻𖾐．”
33 𖼖𖽡𖾑 𖼽𖽕𖾑 𖼹𖽦𖾑 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼀𖽦𖾐：“𖼽𖽔 𖼠𖽴𖾑 𖼣𖽙𖾐 𖼊𖽑𖽺 𖼄𖽔 𖼮𖽨，𖼽𖽺𖾐 𖼦𖽴 𖼦𖽫 𖼊𖽻 𖼮𖽨 𖼺𖽺𖾑，𖼹𖽦𖾑 𖼣𖽙𖾐 𖼞𖽜 𖼻𖽙 𖼊𖽑𖽡 𖼽𖽚𖾐 𖼽𖽚𖾐．” 𖼦𖽑𖽺𖾑 𖼖𖽙𖾐 𖼺𖽶𖾑 𖼺𖽺𖾑，𖼽𖽻 𖼻𖽙 𖼊𖽑𖽺 𖼳𖽡𖾐 𖼄𖽡𖽺 \fr 29．33 \ft “𖼳𖽡𖾐 𖼄𖽡𖽺 ” 𖼦𖽑𖽺𖾑 “𖼊𖽻 𖼮𖽨 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
34 𖼖𖽡𖾑 𖼽𖽕𖾑 𖼹𖽦𖾑 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼀𖽦𖾐：“𖼣𖽙𖾐 𖼷𖽑𖽻𖾐 𖼀𖽑𖽙 𖼖𖽙𖾐 𖼀𖽙𖾐 𖼻𖽙 𖼺𖽙𖾐 𖼽𖽚𖾐 𖼽𖽚𖾐 𖼦𖽑𖽙𖾐 𖼺𖽺𖾑，𖽃𖽔𖾑 𖼄𖽳𖾐 𖼽𖽻 𖼐𖽑𖽧𖾐 𖼄𖽙𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼖𖽙𖾐 𖼊𖽴 𖼊𖽻𖾐．” 𖼦𖽑𖽺𖾑 𖼖𖽙𖾐 𖼺𖽶𖾑 𖼺𖽺𖾑，𖼽𖽻 𖼻𖽙 𖼊𖽑𖽺 𖼖𖽡𖾑 𖼈𖽪𖽺𖾑 \fr 29．34 \ft “𖼖𖽡𖾑 𖼈𖽪𖽺𖾑 ” 𖼦𖽑𖽺𖾑 “𖼐𖽑𖽧𖾐 𖼄𖽙𖾐 𖼣𖽙𖾐 𖼖𖽙𖾐 𖼊𖽴 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
35 𖼖𖽡𖾑 𖼽𖽕𖾑 𖼹𖽦𖾑 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼺𖽺𖾑，𖼀𖽦𖾐：“𖼦𖽑𖽺𖾑 𖼊𖽑𖽡 𖼰𖽻𖾐 𖼖𖽙𖾐 𖼮𖽑𖽡𖾐，𖽃𖽔𖾑 𖼄𖽳𖾐 𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼊𖽻𖾐．” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼻𖽙 𖼊𖽑𖽺 𖼽𖽚 𖼍𖽕𖾑 \fr 29．35 \ft “𖼽𖽚 𖼍𖽕𖾑 ” 𖼦𖽑𖽺𖾑 “𖼞𖽑𖽪𖾐 𖼮𖽑𖽳 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．𖼠𖽙𖾑 𖼍𖽻𖾐，𖼖𖽡𖾑 𖼽𖽕𖾑 𖼄𖽺 𖼄𖽔 𖼊𖽦𖾐．