𖼽𖽔 𖼠𖽴𖾑 𖼞𖽜 𖼖𖽔𖾐 𖼂𖽔𖾐 𖼖𖽙𖾐 𖼣𖽜𖾐 𖼽𖽡𖾐
28
1 𖼽𖽡 𖼺𖽔 𖼽𖽻 𖼻𖽙 𖼽𖽔 𖼠𖽴𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼄𖽢 𖼦𖽙𖾐 𖼽𖽻 𖼞𖽜，𖼦𖽑𖽔𖾐 𖼖𖽺𖾑 𖼽𖽻 𖼊𖽑𖽺 𖼀𖽦𖾐 𖼄𖽪𖾑：“𖼐𖽑𖽡𖾐 𖼰𖽡𖽔𖾐 𖼐𖽕 𖼺𖽪𖾐 𖼻𖽙 𖼄𖽳 𖽂𖽙𖾐 𖼹𖽶𖾐 𖼄𖽔 𖼊𖽙𖾐． 2 𖼐𖽑𖽡𖾐 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼐𖽑𖽡𖽻𖾑 𖼠𖽙𖾐 𖼂𖽡 𖼊𖽑𖽪 𖼖𖽡𖾑 𖼈𖽴 𖼞𖽳𖾐 𖼽𖽡𖾐，𖼐𖽑𖽡𖽻𖾐 𖼈𖽪𖾐 𖼖𖽔𖾐 𖼂𖽔𖾐 𖼞𖽳𖾐 𖼻𖽙 𖼄𖽳 𖼊𖽑𖽡 𖼽𖽚𖾐 𖼊𖽑𖽺 𖼹𖽶𖾐 𖼖𖽡𖾐． 3 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼄𖽢 𖼖𖽪 𖼐𖽑𖽡𖾐 𖼄𖽻𖾑，𖼐𖽑𖽡𖾐 𖼞𖽜 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑 𖼀𖽑𖽙 𖼍𖽪𖾐 𖼖𖽻𖾐，𖼮𖽑𖽪𖾐 𖼳𖽶 𖼈𖽳 𖼄𖽙𖾐 𖼀𖽑𖽢 𖼊𖽻𖾐． 4 𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐 𖼄𖽢，𖼖𖽪 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼄𖽻𖾑，𖼐𖽑𖽡𖾐 𖼞𖽜 𖽃𖽔 𖼐𖽺𖾑 𖽃𖽔𖾑 𖼄𖽳𖾐 𖼣𖽙𖾑 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖽂𖽙𖾐 𖼺𖽺𖾑 𖼄𖽡𖾐 𖼳𖽡𖽪 𖼂𖽺𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼣𖽙𖾑 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼖𖽪 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼞𖽜 𖼦𖽑𖽙𖾐 𖼳𖽶 𖼣𖽻𖾐．”5 𖽃𖽔𖾐 𖼺𖽺𖾑，𖼽𖽡 𖼺𖽔 𖼽𖽻 𖼻𖽙 𖼽𖽔 𖼠𖽴𖾑 𖼊𖽑𖽺 𖼄𖽪𖾑 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼽𖽡𖾐．𖼽𖽔 𖼠𖽴𖾑 𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼂𖽡 𖼊𖽑𖽪 𖼖𖽡𖾑 𖼻𖽙 𖼖𖽔𖾐 𖼂𖽔𖾐 𖼈𖽴 𖼞𖽳𖾐 𖼽𖽡𖾐．𖼖𖽔𖾐 𖼂𖽔𖾐 𖼦𖽑𖽺𖾑 𖼽𖽔 𖼠𖽴𖾑 𖼐𖽺𖾐 𖼽𖽡 𖼺𖽻 𖼞𖽳𖾐 𖽃𖽔𖾐 𖼈𖽪𖾐，𖼖𖽡𖾑 𖼂𖽦 𖼰𖽡𖽔𖾐 𖼽𖽻 𖼍𖽕𖾑 𖼣𖽻𖾐．
𖼽𖽡 𖼺𖽻 𖼹𖽦𖾑 𖼄𖽳 𖼖𖽳𖾐 𖼊𖽑𖽡 𖼽𖽚𖾐 𖼹𖽶𖾐
6 𖼽𖽡 𖼺𖽻 𖼐𖽦𖾐 𖼄𖽡𖽻𖾐，𖼽𖽡 𖼺𖽔 𖼄𖽢 𖼦𖽙𖾐 𖼽𖽔 𖼠𖽴𖾑 𖼊𖽑𖽺 𖼄𖽻𖾑，𖼽𖽻 𖼊𖽑𖽺 𖼹𖽡𖾐 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼞𖽳𖾐 𖼄𖽳 𖼻𖽙 𖼹𖽶𖾐．𖼽𖽡 𖼺𖽻 𖼹𖽦𖾑 𖼐𖽦𖾐 𖼄𖽡𖽻𖾐，𖼽𖽡 𖼺𖽔 𖼄𖽢 𖼦𖽙𖾐 𖼽𖽔 𖼠𖽴𖾑 𖼊𖽑𖽺 𖼄𖽻𖾑 𖼞𖽑𖽶𖾑 𖼮𖽶𖾐 𖼀𖽦𖾐 𖼄𖽪𖾑：“𖼐𖽑𖽡𖾐 𖼰𖽡𖽔𖾐 𖼐𖽕 𖼺𖽪𖾐 𖼻𖽙 𖼄𖽳 𖽂𖽙𖾐 𖼹𖽶𖾐 𖼄𖽔 𖼊𖽙𖾐．” 7 𖼽𖽡 𖼺𖽻 𖼦𖽑𖽔𖾐 𖼖𖽺𖾑 𖼐𖽦𖾐 𖼄𖽡𖽻𖾐，𖼽𖽔 𖼠𖽴𖾑 𖼽𖽻 𖼀𖽙 𖼽𖽻 𖼄𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐． 8 𖼽𖽡 𖼺𖽻 𖽃𖽙𖾑 𖼄𖽺 𖼊𖽑𖽙 𖼄𖽳 𖼻𖽙 𖼐𖽑𖽡 𖼽𖽚𖾐 𖼮𖽻𖾐 𖼍𖽳𖾐 𖼦𖽑𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽻 𖽃𖽔𖾑 𖼄𖽳𖾐 𖼺𖽺𖾑 𖼺𖽝𖾑，𖼽𖽻 𖼀𖽙 𖼰𖽡𖽔𖾐 𖼐𖽕 𖼺𖽪𖾐 𖼻𖽙 𖼄𖽳 𖼊𖽑𖽺 𖼐𖽦𖾐 𖼄𖽔 𖼍𖽪𖾐． 9 𖽃𖽔𖾐 𖼺𖽺𖾑，𖼽𖽻 𖼹𖽦𖾑 𖼽𖽡𖾐 𖼄𖽔 𖼦𖽔𖾐 𖼖𖽔𖾐 𖼊𖽑𖽺 𖼹𖽶𖾐 𖼄𖽳 𖼖𖽳𖾐 𖼂𖽺𖾐．𖼄𖽔 𖼦𖽔𖾐 𖼖𖽔𖾐 𖼦𖽑𖽺𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼞𖽳𖾐 𖼻𖽙 𖼄𖽳 𖼣𖽻𖾐，𖼽𖽻 𖼍𖽕𖾑 𖼐𖽑𖽧 𖼂𖽦𖾑 𖼽𖽱𖾐 𖼣𖽻𖾐．
𖼽𖽔 𖼠𖽴𖾑 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼽𖽦 𖼄𖽦𖾐 𖼞𖽑𖽻𖾐
10 𖼽𖽔 𖼠𖽴𖾑 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐，𖼦𖽔𖾐 𖼖𖽕 𖼖𖽪𖾐 𖼞𖽳𖾐 𖼽𖽡𖾐． 11 𖼽𖽻 𖼖𖽻𖾐 𖼄𖽡𖾐 𖼊𖽺𖾐 𖼊𖽑𖽡 𖼄𖽦𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐，𖽃𖽔𖾐 𖼺𖽺𖾑 𖼞𖽑𖽶𖾑 𖼠𖽻𖾐 𖼦𖽑𖽦．𖼽𖽻 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼈𖽺𖾐 𖼈𖽪𖾑 𖼞𖽪 𖼊𖽪𖾐 𖼂𖽺𖾐，𖼞𖽑𖽶𖾑 𖼠𖽻𖾐 𖼽𖽦 𖼹𖽺𖾐． 12 𖼽𖽻 𖼽𖽦 𖼄𖽦𖾐 𖼞𖽑𖽻𖾐 𖼐𖽦𖾐 𖼄𖽡𖽻𖾐，𖼊𖽦𖾐 𖼷𖽜𖾐 𖼊𖽑𖽡 𖼷𖽸 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽻𖾐 𖼄𖽶 𖼠𖽻𖾐 𖼊𖽦𖾐 𖼮𖽨𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽶 𖼹𖽡𖾐 𖼖𖽦 𖼊𖽦𖾐 𖼷𖽜𖾐 𖼊𖽑𖽺 𖼹𖽺𖾐 𖼹𖽺𖾐 𖼊𖽦𖾐 𖼊𖽦𖾐．
13 𖼽𖽺𖾐 𖼦𖽴 𖼦𖽫 𖼊𖽦𖾐 𖼷𖽜𖾐 𖼊𖽑𖽺 𖼦𖽑𖽡𖽚 𖼺𖽺𖾑，𖼀𖽦𖾐：“𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐，𖼣𖽙𖾐 𖼐𖽑𖽡𖽻𖾐 𖼂𖽸𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼦𖽑𖽔𖾐 𖼖𖽺𖾑 𖼐𖽑𖽡𖽻𖾐 𖼀𖽙 𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽑𖽙𖾐 𖼽𖽦 𖼞𖽳𖾐 𖼄𖽡𖾐 𖼊𖽺𖾐，𖼣𖽙𖾐 𖼖𖽪 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼊𖽻𖾐． 14 𖼣𖽙𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼷𖽑𖽜𖾑 𖼷𖽑𖽜𖾐 𖼄𖽡𖾑 𖼐𖽦𖾐 𖼊𖽑𖽺 𖼦𖽳 𖼐𖽑𖽡 𖼖𖽙𖾐 𖼺𖽶𖾑 𖼄𖽨 𖼺𖽺𖾑，𖼮𖽡𖾐 𖼊𖽚𖾐 𖼄𖽡𖾐、 𖼮𖽡𖾐 𖼖𖽻𖾑 𖼄𖽡𖾐、 𖼠𖽳𖾐 𖼻𖽸 𖼄𖽡𖾐、 𖼳𖽶 𖼐𖽑𖽡𖽻𖾐 𖼄𖽡𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼮𖽻𖾐 𖼀𖽡𖾐 𖼊𖽻𖾐．𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼖𖽺𖾑 𖼄𖽢 𖽂𖽙𖾐 𖼊𖽻𖾐． 15 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼣𖽻𖾐 𖼦𖽻，𖼣𖽙𖾐 𖼐𖽑𖽡𖾐 𖼊𖽑𖽺 𖼐𖽦𖾐 𖼳𖽪𖾐 𖼊𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼦𖽳 𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽚 𖼖𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼄𖽔 𖼰𖽡𖾑 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐 𖼄𖽳𖾑 𖼄𖽳 𖼖𖽪 𖼞𖽜 𖼦𖽑𖽻𖾐 𖼰𖽶𖾐 𖼮𖽑𖽡𖾐 𖼊𖽻𖾐．”
16 𖼽𖽔 𖼠𖽴𖾑 𖼽𖽦 𖼦𖽙𖾑 𖼮𖽑𖽡，𖼀𖽦𖾐：“𖼽𖽺𖾐 𖼦𖽴 𖼦𖽫 𖼠𖽕𖾐 𖼰𖽶𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐，𖼣𖽙𖾐 𖽃𖽔𖾐 𖼹𖽻𖾐 𖼄𖽔 𖼺𖽝𖾑 𖼐𖽺𖾑？” 17 𖼽𖽻 𖼮𖽡𖽮𖾐 𖼷𖽑𖽚 𖼺𖽺𖾑，𖼀𖽦𖾐：“𖼦𖽑𖽺𖾑 𖼺𖽡 𖼮𖽡𖾐 𖼄𖽡𖾐 𖼊𖽺𖾐 𖼣𖽻𖾐，𖼠𖽳𖾐 𖼖𖽪𖾐 𖼄𖽡𖾐 𖼊𖽺𖾐 𖼖𖽙𖾐 𖼄𖽔 𖼺𖽶𖾑．𖼦𖽑𖽺𖾑 𖼄𖽡𖾐 𖼊𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽃𖽔𖾑 𖼞𖽑𖽶𖾐，𖼄𖽶 𖼠𖽻𖾐 𖼞𖽳𖾐 𖽃𖽔𖾑 𖼊𖽪 𖼣𖽻𖾐．”
18 𖼽𖽔 𖼠𖽴𖾑 𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼽𖽻 𖼈𖽪𖾑 𖼞𖽪 𖼊𖽪𖾐 𖼂𖽺𖾐 𖼺𖽪𖾐 𖼖𖽚𖾐 𖼄𖽙𖾐 𖼰𖽻 𖼍𖽪𖾐 𖼺𖽺𖾑，𖼖𖽚𖾐 𖼻𖽶𖾐 𖼂𖽺𖾐，𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼐𖽑𖽡𖾑 𖼦𖽜． 19 𖽃𖽔𖾐 𖼺𖽺𖾑，𖼽𖽻 𖼄𖽡𖾐 𖼊𖽺𖾐 𖼞𖽑𖽶𖾑 𖼊𖽑𖽺 𖼂𖽚 𖼊𖽑𖽴𖾑 𖼖𖽡𖾑 \fr 28．19 \ft “𖼂𖽚 𖼊𖽑𖽴𖾑 𖼖𖽡𖾑 ” 𖼦𖽑𖽺𖾑 “𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽃𖽔𖾑 𖼞𖽑𖽶𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．𖼦𖽑𖽻𖾐 𖼊𖽑𖽻𖾐，𖼄𖽡𖾐 𖼊𖽺𖾐 𖼞𖽑𖽶𖾑 𖽃𖽙𖾑 𖼄𖽺 𖼊𖽑𖽙 𖼖𖽪𖾑 𖼺𖽶𖾐 𖼄𖽡𖾐 𖼺𖽪𖾐 𖼣𖽻𖾐．
20 𖼽𖽔 𖼠𖽴𖾑 𖼐𖽑𖽧𖾐 𖼺𖽳 𖼄𖽙𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼣𖽙𖾐 𖼞𖽑𖽙𖾐 𖼺𖽜 𖼺𖽪𖾐 𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼖𖽙𖾐 𖼐𖽦𖾐 𖼳𖽪𖾐，𖼷𖽙 𖼊𖽪𖾐 𖼖𖽪 𖼣𖽙𖾐 𖼄𖽻𖾑，𖼣𖽙𖾐 𖼞𖽜 𖼀𖽑𖽡𖽻𖾐 𖼷𖽑𖽶 𖽂𖽙𖾐 𖼈𖽦， 21 𖼣𖽙𖾐 𖼞𖽜 𖼺𖽙𖾑 𖼺𖽙𖾐 𖼀𖽑𖽚𖾐 𖼣𖽻𖾐 𖼀𖽙 𖼈𖽴 𖼞𖽳𖾐 𖼞𖽚 𖼮𖽑𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼺𖽡𖾐 𖼰𖽕𖾐 𖼊𖽻𖾐， 22 𖼣𖽙𖾐 𖼖𖽚𖾐 𖼻𖽶𖾐 𖼰𖽻 𖼍𖽪𖾐 𖼞𖽳𖾐 𖼄𖽡𖾐 𖼊𖽺𖾐，𖼦𖽑𖽺𖾑 𖼷𖽑𖽜𖾑 𖼷𖽑𖽜𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼂𖽺𖾐 𖼊𖽻𖾐．𖼐𖽑𖽡𖾐 𖼞𖽑𖽙𖾐 𖼖𖽪 𖼣𖽙𖾐 𖼞𖽜 𖼺𖽪𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼈𖽺𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐．”