𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼊𖽑𖽺 𖼰𖽡𖾑 𖼦𖽑𖽙𖾐
31
1 𖼽𖽔 𖼠𖽴𖾑 𖼊𖽻 𖼮𖽨，𖼖𖽔𖾐 𖼂𖽔𖾐 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖽃𖽔 𖼀𖽙 𖼞𖽑𖽙𖾐 𖼮𖽻𖾐 𖼳𖽶 𖼽𖽔 𖼠𖽴𖾑 𖼮𖽑𖽢𖾑 𖼐𖽻𖾑 𖼦𖽑𖽙𖾐 𖼦𖽑𖽻𖾐，𖼽𖽻 𖼞𖽑𖽙𖾐 𖼮𖽻𖾐 𖼳𖽶 𖼄𖽡𖽻 𖼐𖽑𖽡 𖼮𖽡𖽺 𖼷𖽪𖾐，𖼄𖽳𖾑 𖼄𖽳 𖼖𖽺𖾑 𖽃𖽔 𖼀𖽙 𖼞𖽳𖾐 𖼮𖽑𖽻𖾐 𖽂𖽙𖾐 𖼺𖽪𖾐 𖼣𖽻𖾐．” 2 𖼽𖽔 𖼠𖽴𖾑 𖼦𖽑𖽔𖾐 𖼖𖽺𖾑 𖼐𖽦𖾐 𖼄𖽡𖽻𖾐，𖼖𖽔𖾐 𖼂𖽔𖾐 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼮𖽑𖽻 𖼄𖽦𖾐 𖼹𖽳𖾐 𖼽𖽻 𖼊𖽑𖽺 𖼄𖽔 𖼞𖽜．3 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽚𖾐 𖼺𖽺𖾑 𖼐𖽑𖽡𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼄𖽡𖾐 𖼊𖽺𖾐，𖼐𖽑𖽡𖾐 𖼈𖽧 𖼐𖽑𖽳𖾐 𖼮𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼞𖽚 𖼽𖽡𖾐 𖼖𖽡𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽻𖾐．”
4 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼷𖽑𖽻𖾐 𖼹𖽡𖾐 𖼖𖽔𖾐 𖼰𖽡𖽦 𖼐𖽺𖾐 𖼖𖽡𖾑 𖼽𖽕𖾑 𖼊𖽑𖽺 𖽃𖽶𖾐，𖼄𖽡𖾐 𖼳𖽡𖽻𖾐 𖼀𖽙 𖼽𖽻 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑 𖼞𖽳𖾐 𖼞𖽑𖽻𖾑 𖼽𖽡𖾐， 5 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽦𖾐 𖼄𖽡𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼣𖽙𖾐 𖼊𖽑𖽺 𖼮𖽑𖽻 𖼄𖽦𖾐 𖼹𖽳𖾐 𖼄𖽔 𖼞𖽜 𖼦𖽑𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐． 6 𖼣𖽙𖾐 𖽂𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖼊𖽑𖽺 𖼠𖽙𖾐 𖼳𖽙𖾐，𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼺𖽝𖾑 𖼍𖽳𖾐 𖼳𖽶 𖼣𖽻𖾐．
7 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖼣𖽙𖾐 𖼊𖽑𖽺 𖼇𖽪，𖼷𖽑𖽡𖾐 𖼂𖽦𖾑 𖼄𖽙𖾐 𖼣𖽙𖾐 𖼞𖽳𖾐 𖽂𖽙 𖼀𖽑𖽶 𖼂𖽺𖾐 𖼂𖽚𖾐．𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽜 𖼣𖽙𖾐 𖼊𖽑𖽺 𖼄𖽔 𖼦𖽹𖾑 𖼀𖽑𖽧𖾐． 8 𖼽𖽻 𖼄𖽦𖾐 𖼊𖽴 𖼺𖽪𖾐 𖼣𖽙𖾐 𖼞𖽳𖾐 𖽂𖽙 𖼀𖽑𖽶 𖼂𖽺𖾐 𖼀𖽦𖾐 𖼊𖽑𖽡𖾑 𖼣𖽻𖾐，𖼞𖽑𖽙𖾐 𖼦𖽳 𖼺𖽪𖾐 𖽃𖽔𖾑 𖼮𖽑𖽸 𖼻𖽙、 𖼽𖽻𖾐 𖼻𖽙 𖼄𖽳𖾑 𖼄𖽳 𖼄𖽦𖾐 𖼊𖽴．𖼽𖽻 𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖼣𖽙𖾐 𖼞𖽳𖾐 𖽂𖽙 𖼀𖽑𖽶 𖼂𖽺𖾐 𖼀𖽦𖾐 𖼊𖽑𖽡𖾑 𖼣𖽻𖾐，𖼞𖽑𖽙𖾐 𖼦𖽳 𖼺𖽪𖾐 𖽃𖽔𖾑 𖼮𖽑𖽸 𖼻𖽙、 𖼽𖽻𖾐 𖼻𖽙 𖼄𖽳𖾑 𖼄𖽳 𖼖𖽺𖾑 𖼠𖽕𖾑 𖼠𖽕𖾐 𖼮𖽻𖾐． 9 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼞𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼈𖽺𖾐 𖼂𖽻𖾐 𖼖𖽻𖾐，𖼖𖽪 𖼣𖽙𖾐 𖼊𖽑𖽺 𖼞𖽜 𖼦𖽑𖽙𖾐．
10 𖽃𖽔𖾑 𖼮𖽑𖽸 𖼮𖽑𖽪𖾐 𖼦𖽑𖽨𖾐 𖼞𖽑𖽶𖾑 𖼮𖽶𖾐，𖼊𖽑𖽡 𖼰𖽻𖾐 𖼮𖽻𖾐，𖼣𖽙𖾐 𖼽𖽦 𖼄𖽦𖾐 𖼞𖽑𖽻𖾐 𖼄𖽡𖽻𖾐，𖽃𖽔𖾑 𖼮𖽑𖽸 𖼄𖽙𖾐 𖼖𖽙𖾐 𖼮𖽑𖽻𖾐 𖼮𖽑𖽪𖾐 𖼦𖽑𖽨𖾐 𖼺𖽪𖾐 𖽃𖽔𖾑 𖼮𖽑𖽸 𖼠𖽻𖾑 𖼄𖽳𖾑 𖼄𖽳 𖼖𖽺𖾑 𖼍𖽚 𖼠𖽕𖾐、 𖼄𖽦𖾐 𖼊𖽴 𖼐𖽺𖾐 𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖼍𖽺𖾑 𖼣𖽻𖾐． 11 𖼣𖽙𖾐 𖼽𖽦 𖼄𖽦𖾐 𖼞𖽑𖽻𖾐 𖼠𖽻𖾐 𖼞𖽑𖽶𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽶 𖼹𖽡𖾐 𖼖𖽦 𖼣𖽙𖾐 𖼊𖽑𖽺 𖽃𖽶𖾐：“𖼽𖽔 𖼠𖽴𖾑 ！” 𖼣𖽙𖾐 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
12 𖼽𖽻 𖼀𖽦𖾐：“𖼐𖽑𖽡𖾐 𖼹𖽳𖾐 𖼄𖽙𖾐 𖼐𖽦𖾐 𖼄𖽺！ 𖽃𖽔𖾑 𖼮𖽑𖽸 𖼄𖽙𖾐 𖼖𖽙𖾐 𖼮𖽑𖽻𖾐 𖼮𖽑𖽪𖾐 𖼦𖽑𖽨𖾐 𖼺𖽪𖾐 𖽃𖽔𖾑 𖼮𖽑𖽸 𖼠𖽻𖾑，𖼄𖽳𖾑 𖼄𖽳 𖼖𖽺𖾑 𖼍𖽚 𖼠𖽕𖾐、 𖼄𖽦𖾐 𖼊𖽴 𖼐𖽺𖾐 𖼠𖽕𖾑 𖼠𖽕𖾐 𖼮𖽻𖾐 𖼺𖽪𖾐 𖼍𖽺𖾑 𖼣𖽻𖾐．𖼞𖽪𖾐 𖼮𖽡𖽺𖾐 𖼖𖽔𖾐 𖼂𖽔𖾐 𖼐𖽑𖽡𖾐 𖼖𖽙𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻，𖼣𖽙𖾐 𖼄𖽳𖾑 𖼄𖽳 𖼐𖽦𖾐 𖼄𖽡𖽻𖾐 𖼦𖽑𖽻𖾐． 13 𖼣𖽙𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼮𖽻𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼐𖽑𖽡𖾑 𖼖𖽚𖾐 𖼻𖽶𖾐 𖼊𖽑𖽺 𖼦𖽜 𖼠𖽚，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼐𖽑𖽧𖾐 𖼺𖽳 𖼄𖽙𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼷𖽑𖽦𖾐 𖼠𖽚．𖽃𖽔𖾑 𖼄𖽳𖾐 𖼐𖽑𖽡𖾐 𖼍𖽪𖾐 𖼖𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐，𖼀𖽑𖽚𖾐 𖼐𖽑𖽡𖾐 𖼈𖽧 𖼐𖽑𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼞𖽚 𖼽𖽡𖾐 𖼖𖽡𖾐．”
14 𖼖𖽔𖾐 𖼰𖽡𖽦 𖼐𖽺𖾐 𖼖𖽡𖾑 𖼽𖽕𖾑 𖼽𖽔 𖼠𖽴𖾑 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖽃𖽔 𖼀𖽙 𖼈𖽴 𖼞𖽳𖾐 𖼮𖽻𖾐 𖼺𖽺𖾑，𖼦𖽑𖽔𖾐 𖼖𖽺𖾑 𖼷𖽻 𖼀𖽜𖾐 𖼐𖽺𖾐 𖼄𖽡𖾐 𖼳𖽡𖽪 𖽂𖽙𖾐 𖼊𖽙𖾐 𖼺𖽺 𖼖𖽔𖾑？ 15 𖼽𖽻 𖼣𖽙𖾐 𖼈𖽳𖾐 𖼊𖽑𖽺 𖼊𖽑𖽡 𖼈𖽴 𖼷𖽑𖽻𖾐 𖼖𖽺𖾑 𖼄𖽔 𖼰𖽕𖾐 𖼄𖽔 𖼣𖽻𖾐 𖼖𖽔？𖼞𖽪𖾐 𖼮𖽡𖽺𖾐，𖼽𖽻 𖼣𖽙𖾐 𖼈𖽳𖾐 𖼊𖽑𖽺 𖼈𖽪 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼣𖽙𖾐 𖼈𖽳𖾐 𖼞𖽳𖾐 𖼇𖽪𖾐 𖼀𖽑𖽶 𖼊𖽑𖽺 𖼊𖽻𖾐 𖼦𖽑𖽙𖾐． 16 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼈𖽳𖾐 𖽃𖽔 𖼀𖽙 𖼞𖽳𖾐 𖼞𖽑𖽙𖾐 𖼈𖽺𖾐 𖼂𖽻𖾐 𖼖𖽻𖾐 𖼺𖽪𖾐 𖼄𖽡𖽻 𖼐𖽑𖽡 𖼮𖽡𖽺 𖼷𖽪𖾐，𖼄𖽳𖾑 𖼄𖽳 𖼖𖽺𖾑 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼻𖽙 𖼄𖽡𖾐 𖼐𖽜𖾐 𖼞𖽳𖾐 𖼣𖽻𖾐．𖽃𖽔𖾑 𖼄𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼄𖽪𖾑 𖼺𖽪𖾐，𖼐𖽑𖽡𖾐 𖼐𖽑𖽧𖾐 𖼺𖽳 𖼂𖽺𖾐 𖼽𖽡𖾐 𖼻𖽻𖾐．”
17 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼍𖽪𖾐 𖼖𖽻𖾐，𖼽𖽻 𖼻𖽙 𖼄𖽡𖾐 𖼐𖽜𖾐 𖼐𖽺𖾐 𖼽𖽻 𖼄𖽳 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼖𖽚𖾑 𖼊𖽑𖽚 𖼷𖽳， 18 𖼹𖽦𖾑 𖼽𖽻 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼞𖽑𖽙𖾐 𖽂𖽙𖾐 𖼺𖽪𖾐 𖼮𖽡𖽺 𖼷𖽪𖾐 𖼞𖽕、 𖼄𖽡𖽻 𖼐𖽑𖽡 𖼈𖽺𖾐 𖼺𖽺𖾑，𖼽𖽻 𖼀𖽙 𖼮𖽻𖾐 𖼞𖽳𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐． 19 𖼞𖽑𖽶𖾑 𖼮𖽶𖾐，𖼖𖽔𖾐 𖼂𖽔𖾐 𖼽𖽻𖾐 𖼳𖽡𖽦𖾐 𖼷𖽑𖽳 𖼽𖽡𖾐 𖼦𖽑𖽙𖾐 𖼺𖽺𖾑，𖼖𖽔𖾐 𖼰𖽡𖽦 𖼽𖽻 𖼀𖽙 𖽃𖽔𖾑 𖼞𖽑𖽶𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼞𖽑𖽶． 20 𖼽𖽔 𖼠𖽴𖾑 𖼞𖽑𖽶𖾐 𖼞𖽑𖽶𖾐 𖼮𖽡𖽪 𖼺𖽜 𖼽𖽡𖾐 𖼦𖽑𖽙𖾐 𖼺𖽺𖾑，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼖𖽔𖾐 𖼂𖽔𖾐 𖼞𖽜 𖼄𖽔 𖼺𖽝𖾑． 21 𖼽𖽔 𖼠𖽴𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼽𖽻 𖼞𖽑𖽙𖾐 𖼮𖽻𖾐 𖼳𖽶 𖼦𖽳 𖼮𖽑𖽻𖾐 𖼺𖽺𖾑，𖼮𖽡𖽪 𖼺𖽜 𖼽𖽡𖾐 𖼦𖽑𖽙𖾐．𖼽𖽻 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼄𖽙𖾐 𖼠𖽚 𖼽𖽡𖾐，𖼺𖽜 𖼰𖽡𖾐 𖼖𖽡𖽦𖾑 𖽂𖽙 𖼰𖽡𖽺𖾐 𖼀𖽳 𖼀𖽑𖽡𖽻 𖼽𖽡𖾐．
𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼊𖽑𖽺 𖼞𖽕 𖼽𖽡𖾐
22 𖼺𖽙𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼖𖽔𖾐 𖼂𖽔𖾐 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼽𖽔 𖼠𖽴𖾑 𖼮𖽡𖽪 𖼺𖽜 𖼽𖽡𖾐 𖼦𖽑𖽙𖾐． 23 𖽃𖽔𖾐 𖼺𖽺𖾑，𖼖𖽔𖾐 𖼂𖽔𖾐 𖼽𖽻 𖼈𖽧 𖼐𖽑𖽳𖾐 𖼊𖽑𖽺 𖼦𖽳 𖼮𖽑𖽻𖾐，𖼽𖽔 𖼠𖽴𖾑 𖼠𖽙𖾑 𖼍𖽻𖾐 𖼞𖽕 𖼽𖽡𖾐．𖼳𖽶 𖼐𖽑𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼺𖽜 𖼦𖽑𖽙𖾐 𖼺𖽺𖾑，𖼰𖽡𖾐 𖼖𖽡𖽦𖾑 𖽂𖽙 𖼰𖽡𖽺𖾐 𖼞𖽳𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼄𖽳𖾐． 24 𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽺𖾐，𖼽𖽕𖾑 𖼖𖽕 𖼺𖽪𖾐 𖼷𖽑𖽻𖾐 𖼖𖽔𖾐 𖼂𖽔𖾐 𖼽𖽦 𖼄𖽦𖾐 𖼞𖽑𖽻𖾐 𖼠𖽻𖾐 𖼞𖽑𖽶𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼀𖽦𖾐 𖼊𖽑𖽧：“𖼐𖽑𖽡𖾐 𖼷𖽜𖾐 𖼍𖽳𖾐，𖼽𖽔 𖼠𖽴𖾑 𖼊𖽑𖽺 𖼄𖽔 𖼠𖽕𖾐 𖽂𖽙𖾐 𖼀𖽦𖾐 𖼄𖽔 𖼊𖽙𖾐．”
25 𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼊𖽑𖽺 𖼞𖽕 𖼄𖽳𖾐 𖼞𖽑𖽶𖾑 𖼮𖽶𖾐，𖼽𖽔 𖼠𖽴𖾑 𖼰𖽡𖾐 𖼖𖽡𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼦𖽑𖽺𖾐 𖼠𖽴𖾐 𖼍𖽚．𖽃𖽔𖾐 𖼺𖽺𖾑，𖼖𖽔𖾐 𖼂𖽔𖾐 𖼐𖽺𖾐 𖼽𖽻 𖼈𖽧 𖼐𖽑𖽳𖾐 𖼖𖽺𖾑 𖼰𖽡𖾐 𖼖𖽡𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼦𖽑𖽺𖾐 𖼠𖽴𖾐 𖼍𖽚． 26 𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？𖼐𖽑𖽡𖾐 𖼊𖽝 𖼊𖽦 𖼐𖽻𖾑 𖼮𖽴𖾐 𖼖𖽙𖾐 𖼺𖽶𖾑，𖼞𖽑𖽶𖾐 𖼞𖽑𖽶𖾐 𖼣𖽙𖾐 𖼻𖽙 𖼄𖽳 𖼦𖽑𖽺𖾑 𖼹𖽻𖾐 𖼊𖽑𖽺 𖼦𖽳 𖼺𖽜 𖼦𖽑𖽙𖾐． 27 𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼞𖽜 𖼄𖽔 𖼺𖽝𖾑，𖼞𖽑𖽶𖾐 𖼞𖽑𖽶𖾐 𖼮𖽡𖽪 𖼺𖽜，𖼣𖽙𖾐 𖼞𖽜 𖼺𖽺𖾑 𖼞𖽜𖾐 𖼺𖽜𖾐 𖼄𖽙𖾐 𖼮𖽑𖽡𖽪 𖼮𖽻、 𖼠𖽪 𖼊𖽝、 𖼮𖽑𖽧 𖼀𖽝𖾐 𖼐𖽑𖽡𖾐 𖼊𖽑𖽺 𖼄𖽔 𖽂𖽙𖾐 𖼦𖽑𖽙𖾐 𖼺𖽜 𖼐𖽺𖾑？ 28 𖼀𖽜𖾐 𖼀𖽺 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼣𖽙𖾐 𖼞𖽜 𖼺𖽺𖾑 𖼣𖽙𖾐 𖼖𖽡𖾑 𖼂𖽙𖾑 𖼖𖽡𖾑 𖼄𖽙𖾐 𖼐𖽺𖾐 𖼻𖽙 𖼄𖽳 𖼖𖽙𖾐 𖼮𖽑𖽻𖾐 𖼖𖽺𖾑 𖼮𖽑𖽻 𖼄𖽦𖾐 𖼄𖽔 𖽂𖽙𖾐 𖼹𖽮𖾑．𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼦𖽑𖽔𖾐 𖼮𖽶𖾐 𖼣𖽡𖽳𖾐 𖼍𖽺！ 29 𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼀𖽑𖽧𖾐 𖼞𖽳𖾐 𖽂𖽙 𖼐𖽑𖽡𖾐 𖼮𖽻𖾐 𖼍𖽳𖾐．𖼦𖽑𖽻𖾐 𖼊𖽑𖽻𖾐，𖽃𖽔 𖼄𖽺𖾐 𖼐𖽑𖽡𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧：‘ 𖼐𖽑𖽡𖾐 𖼷𖽜𖾐 𖼍𖽳𖾐，𖼽𖽔 𖼠𖽴𖾑 𖼊𖽑𖽺 𖼄𖽔 𖼠𖽕𖾐 𖽂𖽙𖾐 𖼀𖽦𖾐 𖼄𖽔 𖼊𖽙𖾐．’ 30 𖽃𖽔𖾑 𖼄𖽳𖾐 𖼐𖽑𖽡𖾐 𖼐𖽑𖽡𖽻𖾐 𖼀𖽙 𖼈𖽴 𖼊𖽑𖽺 𖼮𖽨 𖼺𖽺𖾑，𖼄𖽔 𖼽𖽡𖾐 𖼄𖽔 𖼦𖽶𖾐 𖼺𖽪𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖽃𖽔𖾐 𖼹𖽻𖾐 𖼣𖽙𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼞𖽑𖽶 𖼐𖽺𖾑？”
31 𖼽𖽔 𖼠𖽴𖾑 𖼖𖽔𖾐 𖼂𖽔𖾐 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼞𖽑𖽶𖾐 𖼞𖽑𖽶𖾐 𖼮𖽡𖽪 𖼺𖽜 𖼺𖽪𖾐，𖼐𖽑𖽡𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼻𖽙 𖼄𖽳 𖼦𖽑𖽺𖾑 𖼹𖽻𖾐 𖼊𖽑𖽺 𖼐𖽻𖾑 𖼀𖽑𖽚𖾐 𖼞𖽚 𖼽𖽡𖾐 𖼠𖽸𖾑 𖼮𖽡𖽮𖾐． 32 𖼀𖽦𖾐 𖼺𖽺𖾑 𖼐𖽑𖽡𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖼮𖽑𖽡𖾐，𖼐𖽑𖽡𖾐 𖽃𖽔 𖼺𖽺 𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼊𖽑𖽧 𖼖𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼠𖽙𖾑 𖼄𖽔 𖼻𖽻𖾐．𖼐𖽑𖽡𖾐 𖽃𖽔 𖼐𖽺𖾑 𖼈𖽧 𖼐𖽑𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽑𖽚𖾐 𖼐𖽦𖾐 𖼮𖽑𖽳𖾐，𖼐𖽑𖽡𖾐 𖼄𖽡𖽻 𖼐𖽑𖽡 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽺𖾐 𖼂𖽡𖾐 𖼽𖽡𖾐 𖼻𖽻𖾐．” 𖼽𖽔 𖼠𖽴𖾑 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽪𖾐，𖼖𖽔𖾐 𖼰𖽡𖽦 𖼺𖽡𖾐 𖼮𖽑𖽡𖽻𖾐 𖼞𖽑𖽶，𖼞𖽑𖽶𖾑 𖼽𖽻 𖼄𖽔 𖼺𖽝𖾑．
33 𖼖𖽔𖾐 𖼂𖽔𖾐 𖼊𖽡 𖼽𖽡𖾐 𖼺𖽺𖾑，𖼽𖽔 𖼠𖽴𖾑 𖼞𖽳𖾐 𖼦𖽑𖽺𖾐 𖼠𖽴𖾐、 𖼖𖽡𖾑 𖼽𖽕𖾑 𖼞𖽳𖾐 𖼦𖽑𖽺𖾐 𖼠𖽴𖾐 𖼐𖽺𖾐 𖼮𖽜𖾐 𖼄𖽙𖾐 𖼐𖽑𖽡 𖼽𖽚𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼀𖽑𖽚𖾐 𖼮𖽨𖾐．𖼦𖽑𖽻𖾐 𖼊𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼀𖽑𖽚𖾐 𖼄𖽔 𖼊𖽑𖽧 𖼖𖽻𖾐．𖽃𖽔𖾐 𖼺𖽺𖾑 𖼽𖽻 𖼖𖽡𖾑 𖼽𖽕𖾑 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼖𖽔𖾐 𖼰𖽡𖽦 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼊𖽡 𖼽𖽡𖾐． 34 𖼖𖽔𖾐 𖼰𖽡𖽦 𖼺𖽡𖾐 𖼮𖽑𖽡𖽻𖾐 𖼈𖽺𖾐 𖼖𖽚𖾑 𖼊𖽑𖽚 𖼦𖽑𖽙𖾐 𖼞𖽑𖽶𖾐 𖼰𖽳𖾐 𖼺𖽺𖾑，𖼞𖽑𖽶𖾑 𖼊𖽑𖽺 𖼊𖽡𖾐 𖼍𖽳𖾐．𖼖𖽔𖾐 𖼂𖽔𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼀𖽑𖽚𖾐 𖼮𖽨𖾐 𖼦𖽑𖽻𖾐 𖼊𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼀𖽑𖽚𖾐 𖼄𖽔 𖽂𖽙𖾐． 35 𖼖𖽔𖾐 𖼰𖽡𖽦 𖼽𖽻 𖼀𖽙 𖼖𖽙𖾐 𖼀𖽦𖾐：“𖽃𖽔 𖼀𖽙 𖽃𖽔𖾐！ 𖼊𖽑𖽔 𖼀𖽶 𖼻𖽶 𖼞𖽜！ 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼍𖽪𖾐 𖼖𖽻𖾐 𖼀𖽑𖽢 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐 𖼣𖽙𖾐 𖼞𖽶𖾐 𖼮𖽑𖽶𖾐 𖼖𖽳𖾑 𖼊𖽑𖽙 𖼷𖽻．” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼖𖽔𖾐 𖼂𖽔𖾐 𖼄𖽳𖾑 𖼄𖽳 𖼀𖽑𖽚𖾐 𖼮𖽨𖾐 𖼖𖽺𖾑 𖼺𖽡𖾐 𖼮𖽑𖽡𖽻𖾐 𖼀𖽑𖽚𖾐 𖼄𖽔 𖼊𖽑𖽧 𖼖𖽻𖾐．
36 𖼽𖽔 𖼠𖽴𖾑 𖼀𖽶 𖼻𖽶 𖼺𖽺𖾑，𖼖𖽔𖾐 𖼂𖽔𖾐 𖼖𖽙𖾐 𖼮𖽑𖽻𖾐 𖼦𖽻𖾐 𖼊𖽦 𖼍𖽪𖾐 𖼖𖽻𖾐．𖼽𖽻 𖼖𖽔𖾐 𖼂𖽔𖾐 𖼊𖽑𖽺 𖼦𖽑𖽳𖾐 𖼀𖽦𖾐：“𖼣𖽙𖾐 𖽃𖽔 𖼊𖽺𖾑 𖼳𖽶 𖼦𖽑𖽙 𖼊𖽪 𖼮𖽻𖾐，𖽃𖽔 𖼊𖽺𖾑 𖼳𖽶 𖼽𖽺𖾐 𖼮𖽑𖽡𖽪𖾑 𖼮𖽻𖾐 𖼺𖽺𖾑，𖼐𖽑𖽡𖾐 𖼠𖽻𖾐 𖼄𖽺 𖼄𖽙𖾐 𖼣𖽙𖾐 𖼊𖽑𖽺 𖼞𖽕 𖼐𖽺𖾑？ 37 𖼐𖽑𖽡𖾐 𖼣𖽙𖾐 𖼄𖽡𖽻 𖼐𖽑𖽡 𖼄𖽡𖽻 𖼠𖽴𖾐 𖼀𖽑𖽚𖾐 𖼮𖽨𖾐 𖼦𖽑𖽻𖾐，𖼐𖽑𖽡𖾐 𖼞𖽳𖾐 𖼄𖽡𖽻 𖼐𖽑𖽡 𖽃𖽔 𖼊𖽺𖾑 𖼳𖽶 𖼀𖽑𖽚𖾐 𖽂𖽙𖾐 𖼐𖽺𖾑？𖼀𖽑𖽨 𖼈𖽧 𖼐𖽑𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼺𖽺𖾑，𖼽𖽻 𖼈𖽳𖾐 𖼞𖽜 𖽃𖽔 𖼺𖽺 𖼮𖽑𖽢𖾑 𖼮𖽶𖾐 𖼺𖽪𖾐 𖼣𖽻𖾐 𖼀𖽦𖾐 𖼊𖽑𖽧 𖼍𖽳𖾐．
38 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼺𖽪𖾐 𖼦𖽑𖽺𖾑 𖼐𖽑𖽡 𖼷𖽑𖽡𖾐 𖼞𖽑𖽚，𖼐𖽑𖽡𖾐 𖼞𖽳𖾐 𖼽𖽻𖾐 𖼄𖽙𖾐 𖼐𖽺𖾐 𖽃𖽔𖾑 𖼮𖽑𖽸 𖼄𖽙𖾐，𖼻𖽙 𖼀𖽑𖽧 𖼄𖽔 𖼠𖽚，𖼐𖽑𖽡𖾐 𖼞𖽳𖾐 𖽃𖽔𖾑 𖼮𖽑𖽸 𖼠𖽻𖾑 𖼐𖽺𖾐 𖼽𖽻𖾐 𖼖𖽙𖾐 𖼣𖽙𖾐 𖼺𖽦 𖼷𖽙 𖼄𖽔 𖼷𖽻𖾐， 39 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼰𖽸𖾐 𖼮𖽑𖽡𖽦 𖼦𖽑𖽙𖾐 𖼺𖽪𖾐，𖼣𖽙𖾐 𖼈𖽺𖾐 𖼞𖽚 𖼖𖽻𖾐 𖼐𖽑𖽡𖾐 𖼊𖽑𖽺 𖼞𖽜 𖼄𖽔 𖼠𖽚，𖼄𖽳𖾑 𖼄𖽳 𖼣𖽙𖾐 𖼐𖽑𖽡𖾐 𖼊𖽑𖽺 𖼮𖽑𖽡𖽪𖾑 𖼦𖽑𖽙𖾐 𖼺𖽪𖾐 𖼣𖽻𖾐．𖼄𖽶 𖼐𖽑𖽡𖾐 𖼣𖽻𖾐 𖼦𖽻，𖼄𖽶 𖼮𖽑𖽧 𖼣𖽻𖾐 𖼦𖽻，𖼞𖽑𖽙𖾐 𖼀𖽑𖽧 𖼦𖽑𖽙𖾐 𖼺𖽪𖾐，𖼐𖽑𖽡𖾐 𖼣𖽙𖾐 𖼞𖽜 𖼮𖽑𖽡𖽪𖾑 𖼖𖽡𖾐．
40 𖼄𖽶 𖼐𖽑𖽡𖾐 𖼣𖽙𖾐 𖼊𖽑𖽺 𖽃𖽔𖾑 𖼄𖽶 𖼷𖽑𖽙𖾐 𖼖𖽴𖾑，𖼄𖽶 𖼮𖽑𖽧 𖼣𖽙𖾐 𖼊𖽑𖽺 𖼐𖽑𖽡𖾐 𖼀𖽑𖽨𖾐 𖼞𖽑𖽴，𖼺𖽙𖾑 𖼺𖽙𖾐 𖼄𖽔 𖽂𖽙𖾐 𖼽𖽦，𖼣𖽙𖾐 𖼄𖽔 𖼐𖽙 𖼦𖽑𖽺𖾑 𖼻𖽻𖾐 𖼮𖽻𖾐． 41 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼺𖽪𖾐 𖼦𖽑𖽺𖾑 𖼐𖽑𖽡 𖼷𖽑𖽡𖾐 𖼞𖽑𖽚，𖼐𖽑𖽡𖾐 𖼻𖽙 𖼄𖽳 𖼐𖽑𖽡 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡𖾐 𖼊𖽑𖽺 𖼷𖽑𖽡𖾐 𖼖𖽡𖾐 𖼞𖽑𖽚 𖼠𖽙𖾐 𖼳𖽙𖾐 𖼦𖽑𖽙𖾐．𖼐𖽑𖽡𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡𖾐 𖼊𖽑𖽺 𖼮𖽑𖽡𖽚 𖼞𖽑𖽚 𖼠𖽙𖾐 𖼳𖽙𖾐 𖼦𖽑𖽙𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖽂𖽙 𖼀𖽑𖽶 𖼊𖽑𖽺 𖼷𖽑𖽡𖾐 𖼂𖽦𖾑 𖼂𖽺𖾐 𖼂𖽚𖾐． 42 𖼣𖽻𖾐 𖼀𖽙 𖼽𖽡 𖼺𖽔 𖼞𖽑𖽙𖾐 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐、 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼽𖽚𖾐 𖼣𖽙𖾐 𖼖𖽙𖾐 𖼄𖽔 𖼮𖽑𖽻𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽜 𖼖𖽦 𖼞𖽻 𖼄𖽙𖾐 𖼞𖽚 𖼽𖽡𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽳𖾐 𖼳𖽚𖾑 𖼞𖽑𖽪 𖼐𖽺𖾐 𖼄𖽪𖾐 𖽂𖽙 𖼊𖽑𖽺 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖽃𖽔 𖼄𖽺𖾐 𖼐𖽑𖽡𖾐 𖼊𖽑𖽺 𖼦𖽑𖽳𖾐．”
𖼽𖽔 𖼠𖽴𖾑 𖼐𖽺𖾐 𖼖𖽔𖾐 𖼂𖽔𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐
43 𖼖𖽔𖾐 𖼂𖽔𖾐 𖼽𖽔 𖼠𖽴𖾑 𖼊𖽑𖽺 𖼊𖽻 𖼞𖽑𖽚，𖼀𖽦𖾐：“𖼻𖽙 𖼄𖽳 𖼦𖽑𖽺𖾑 𖼹𖽻𖾐 𖼣𖽙𖾐 𖼞𖽳𖾐 𖼣𖽻𖾐，𖽃𖽔𖾐 𖼞𖽶𖾑 𖼦𖽑𖽺𖾑 𖼹𖽻𖾐 𖼣𖽙𖾐 𖼞𖽳𖾐 𖼣𖽻𖾐，𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼦𖽑𖽺𖾑 𖼹𖽻𖾐 𖼖𖽺𖾑 𖼣𖽙𖾐 𖼞𖽳𖾐 𖼣𖽻𖾐，𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼞𖽑𖽙𖾐 𖼮𖽻𖾐 𖼺𖽪𖾐 𖼄𖽳𖾑 𖼄𖽳 𖼣𖽙𖾐 𖼞𖽳𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼻𖽙 𖼄𖽳 𖼐𖽺𖾐 𖼽𖽻 𖼈𖽳𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖽃𖽔𖾐 𖼞𖽶𖾑 𖼊𖽑𖽺 𖼣𖽙𖾐 𖼦𖽹𖾑 𖼀𖽑𖽧𖾐 𖼊𖽙𖾐 𖼖𖽔𖾑？ 44 𖼖𖽻𖾐！ 𖽃𖽔𖾑 𖼄𖽳𖾐 𖼐𖽑𖽡𖾐 𖼐𖽺𖾐 𖼣𖽙𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽺𖾑，𖽃𖽔 𖼐𖽺𖾑 𖼷𖽙𖾐 𖼖𖽙𖾐 𖼊𖽑𖽙 𖼞𖽳𖾐 𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐．”
45 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼈𖽺𖾐 𖼂𖽻𖾐 𖼖𖽻𖾐，𖼰𖽻 𖼍𖽪𖾐 𖼖𖽚𖾐 𖼻𖽶𖾐 𖼂𖽺𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼮𖽨𖾐 𖼖𖽙𖾐 𖼀𖽙𖾐 𖼺𖽙 𖼂𖽺𖾐． 46 𖼽𖽔 𖼠𖽴𖾑 𖼽𖽻 𖼈𖽧 𖼐𖽑𖽳𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼖𖽚𖾐 𖼄𖽙𖾐 𖼠𖽜𖾐 𖼂𖽜𖾐．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼄𖽳𖾑 𖼄𖽳 𖼖𖽚𖾐 𖼄𖽙𖾐 𖼈𖽺𖾐 𖼂𖽻𖾐 𖼖𖽻𖾐 𖼊𖽑𖽡 𖼂𖽜𖾐 𖼂𖽜𖾐 𖼍𖽪𖾐，𖼖𖽚𖾐 𖼂𖽜𖾐 𖼀𖽙 𖼮𖽑𖽶𖾐 𖼮𖽻𖾐 𖼷𖽙 𖼊𖽻𖾐． 47 𖼖𖽔𖾐 𖼂𖽔𖾐 𖼖𖽚𖾐 𖼂𖽜𖾐 𖼊𖽑𖽺 𖼽𖽡𖾐 𖼰𖽡𖽔𖾐 𖽃𖽳 𖼺𖽔 𖼦𖽔𖾐 𖼍𖽪𖾑 𖼊𖽑𖽔𖾐 \fr 31．47 \ft “𖼽𖽡𖾐 𖼰𖽡𖽔𖾐 𖽃𖽳 𖼺𖽔 𖼦𖽔𖾐 𖼍𖽪𖾑 𖼊𖽑𖽔𖾐 ” 𖼦𖽑𖽺𖾑 “𖼮𖽨 𖼄𖽡𖽻𖾐 𖼖𖽚𖾐 𖼂𖽜𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．𖼦𖽑𖽻𖾐 𖼊𖽑𖽻𖾐，𖼽𖽔 𖼠𖽴𖾑 𖼖𖽚𖾐 𖼂𖽜𖾐 𖼊𖽑𖽺 𖼰𖽡𖽔𖾐 𖼖𖽺𖾑 𖼍𖽴 \fr 31．47 \ft “𖼰𖽡𖽔𖾐 𖼖𖽺𖾑 𖼍𖽴 ” 𖼦𖽑𖽺𖾑 “𖼖𖽚𖾐 𖼂𖽜𖾐 𖼦𖽑𖽺𖾑 𖼺𖽙 𖼣𖽻𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
48 𖼖𖽔𖾐 𖼂𖽔𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼖𖽚𖾐 𖼂𖽜𖾐 𖼦𖽑𖽺𖾑 𖼐𖽑𖽡𖾐 𖼣𖽙𖾐 𖼠𖽻𖾐 𖼊𖽑𖽺 𖼞𖽳𖾐 𖼮𖽨 𖼄𖽡𖽻𖾐 𖼣𖽻𖾐．” 𖽃𖽔𖾐 𖼺𖽺𖾑 𖼖𖽚𖾐 𖼂𖽜𖾐 𖼊𖽑𖽺 𖼰𖽡𖽔𖾐 𖼖𖽺𖾑 𖼍𖽴 𖼄𖽡𖾐， 49 𖼦𖽑𖽔𖾐 𖼖𖽺𖾑 𖼄𖽡 𖼺𖽶𖾐 𖼂𖽔𖾐 𖼄𖽡𖾐．𖼞𖽪𖾐 𖼮𖽡𖽺𖾐 𖼖𖽔𖾐 𖼂𖽔𖾐 𖼀𖽦𖾐：“𖽃𖽔 𖼐𖽺𖾑 𖼀𖽜𖾐 𖼀𖽺 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼞𖽜 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽑𖽕 𖼐𖽦𖾐 𖼖𖽡𖾐． 50 𖼐𖽑𖽡𖾐 𖼣𖽙𖾐 𖼻𖽙 𖼄𖽳 𖼞𖽜 𖼳𖽚𖾑 𖼞𖽑𖽪 𖼣𖽻𖾐 𖼦𖽻，𖼹𖽦𖾑 𖼠𖽳𖾐 𖼖𖽪𖾐 𖼄𖽳 𖼻𖽙 𖼹𖽶𖾐 𖼣𖽻𖾐 𖼦𖽻，𖼷𖽑𖽻𖾐 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼺𖽪𖾐 𖼄𖽔 𖼮𖽻𖾐 𖼊𖽑𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼷𖽜𖾐 𖼍𖽳𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼺𖽝𖾑 𖼍𖽳𖾐．”
51 𖼖𖽔𖾐 𖼂𖽔𖾐 𖼦𖽑𖽔𖾐 𖼖𖽺𖾑 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼞𖽳𖾐 𖼣𖽙𖾐 𖼞𖽑𖽙𖾐 𖼰𖽻 𖼍𖽪𖾐 𖼺𖽪𖾐 𖼖𖽚𖾐 𖼻𖽶𖾐 𖼐𖽺𖾐 𖼣𖽙𖾐 𖼞𖽑𖽙𖾐 𖼠𖽜𖾐 𖼂𖽜𖾐 𖼺𖽪𖾐 𖼖𖽚𖾐 𖼂𖽜𖾐 𖼊𖽑𖽺 𖼐𖽦𖾐， 52 𖼖𖽚𖾐 𖼂𖽜𖾐 𖼦𖽑𖽺𖾑 𖼮𖽨 𖼄𖽡𖽻𖾐 𖼣𖽻𖾐，𖼖𖽚𖾐 𖼻𖽶𖾐 𖼦𖽑𖽺𖾑 𖼖𖽺𖾑 𖼮𖽨 𖼄𖽡𖽻𖾐 𖼣𖽻𖾐．𖼣𖽙𖾐 𖼖𖽚𖾐 𖼂𖽜𖾐 𖼊𖽑𖽺 𖼄𖽔 𖼖𖽻𖾑 𖼠𖽚𖾐 𖼽𖽡𖾐 𖼐𖽑𖽡𖾐 𖼊𖽑𖽺 𖼦𖽹𖾑，𖼐𖽑𖽡𖾐 𖼖𖽺𖾑 𖼖𖽚𖾐 𖼂𖽜𖾐 𖼐𖽺𖾐 𖼖𖽚𖾐 𖼻𖽶𖾐 𖼊𖽑𖽺 𖼖𖽻𖾑 𖼠𖽚 𖼖𖽻𖾐 𖼣𖽙𖾐 𖼊𖽑𖽺 𖽂𖽙𖾐 𖼦𖽹𖾑 𖼄𖽔 𖼊𖽙𖾐． 53 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖽂𖽙 𖼺𖽙𖾐 𖼂𖽙𖾐、 𖼐𖽕 𖼦𖽜𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽺𖾐 𖼽𖽻 𖼈𖽳𖾐 𖽃𖽔 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽜 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽻𖾐 𖼳𖽶 𖼊𖽻 𖼐𖽙𖾐 𖼖𖽡𖾐．”
𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼽𖽻 𖼀𖽙 𖼽𖽡 𖼺𖽔 𖼞𖽑𖽙𖾐 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐． 54 𖼽𖽔 𖼠𖽴𖾑 𖼦𖽑𖽔𖾐 𖼖𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼍𖽡𖾐 𖼊𖽪𖾐 𖼂𖽺𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜，𖼽𖽻 𖼐𖽳 𖼦𖽙𖾐 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼷𖽙𖾐 𖼷𖽙．𖼽𖽻 𖼈𖽳𖾐 𖼷𖽙 𖼦𖽑𖽙𖾐 𖼺𖽺𖾑，𖽂𖽙 𖼰𖽡𖽺𖾐 𖼊𖽑𖽺 𖼦𖽑𖽦．
55 𖼖𖽔𖾐 𖼂𖽔𖾐 𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼽𖽻 𖼖𖽡𖾑 𖼂𖽙𖾑 𖼖𖽡𖾑 𖼄𖽙𖾐 𖼐𖽺𖾐 𖼻𖽙 𖼄𖽳 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽺𖾑，𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐．