𖼽𖽡 𖼺𖽔 𖼊𖽑𖽺 𖼽𖽚𖾐
21
1 𖼽𖽺𖾐 𖼦𖽴 𖼦𖽫 𖼽𖽻 𖽃𖽙𖾑 𖼄𖽺 𖼞𖽑𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼺𖽔 𖼖𖽔𖾐 𖼊𖽑𖽺 𖼐𖽦𖾐 𖼳𖽪𖾐,𖼽𖽻 𖼞𖽑𖽙𖾐 𖼞𖽜 𖼮𖽙𖾐 𖼖𖽙𖾐 𖼮𖽑𖽻𖾐 𖼺𖽔 𖼖𖽔𖾐 𖼖𖽙𖾐 𖼀𖽙𖾐 𖼄𖽡𖽻 𖼂𖽺𖾐 𖼀𖽑𖽢. 2 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐 𖼞𖽑𖽶𖾑 𖼮𖽶𖾐,𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼍𖽧𖾑 𖼷𖽑𖽦𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽡𖾐 𖼺𖽺𖾑,𖼺𖽔 𖼖𖽔𖾐 𖼞𖽜 𖼄𖽺 𖼊𖽦𖾐 𖼦𖽑𖽙𖾐,𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼮𖽑𖽻𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐. 3 𖼺𖽔 𖼖𖽔𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼻𖽙,𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻 𖼊𖽑𖽺 𖼽𖽡 𖼺𖽔 𖼄𖽡𖾐. 4 𖼽𖽡 𖼺𖽔 𖼊𖽑𖽺 𖼽𖽚𖾐 𖼦𖽑𖽙𖾐 𖼦𖽑𖽦 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐,𖼽𖽕𖾑 𖼂𖽚 𖼖𖽔𖾐 𖼦𖽗 𖽂𖽙 𖼺𖽙𖾐 𖼂𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼽𖽡 𖼺𖽔 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐. 5 𖼽𖽡 𖼺𖽔 𖼊𖽑𖽺 𖼽𖽚𖾐 𖼞𖽑𖽶𖾑 𖼮𖽶𖾐,𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽡 𖼦𖽑𖽙𖾐 𖼞𖽑𖽚 𖼖𖽚.
6 𖼺𖽔 𖼖𖽔𖾐 𖼀𖽦𖾐:“𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽜 𖼖𖽺𖾑 𖼞𖽜𖾐 𖼺𖽜𖾐,𖼄𖽡𖽻 𖼦𖽑𖽺𖾑 𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼷𖽑𖽻𖾐,𖼣𖽙𖾐 𖼖𖽙𖾐 𖼀𖽙𖾐 𖼖𖽺𖾑 𖼞𖽜𖾐 𖼺𖽜𖾐 𖼊𖽻𖾐.” 7 𖼽𖽻 𖼦𖽑𖽔𖾐 𖼖𖽺𖾑 𖼀𖽦𖾐:“𖽃𖽔 𖼺𖽺 𖽃𖽙𖾑 𖼄𖽺 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼀𖽦𖾐 𖼊𖽑𖽧 𖼠𖽸𖾑,𖼺𖽔 𖼖𖽔𖾐 𖽃𖽔𖾐 𖼞𖽶𖾑 𖼽𖽚𖾐 𖼊𖽻𖾐 𖼐𖽺𖾑?𖼞𖽪𖾐 𖼮𖽡𖽺𖾐,𖼽𖽻 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐 𖼺𖽺𖾑,𖼣𖽙𖾐 𖼽𖽻 𖼖𖽙𖾐 𖼀𖽙𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐.”
𖼳𖽡𖽕𖾑 𖼰𖽡𖽕 𖼐𖽺𖾐 𖼽𖽡 𖼳𖽸 𖼄𖽔 𖼖𖽡𖾑 𖼊𖽑𖽺 𖼞𖽕 𖼊𖽑𖽧 𖼽𖽡𖾐
8 𖽃𖽔𖾐 𖼞𖽶𖾑 𖼖𖽜𖾐 𖼖𖽜𖾐 𖼈𖽳 𖼍𖽪𖾐 𖼖𖽻𖾐,𖽃𖽔𖾐 𖼺𖽺𖾑 𖼀𖽕𖾑 𖼮𖽸𖾐 𖼰𖽡𖾑 𖼦𖽑𖽙𖾐.𖼽𖽡 𖼺𖽔 𖼊𖽑𖽺 𖼀𖽕𖾑 𖼮𖽸𖾐 𖼰𖽡𖾑 𖼦𖽑𖽙𖾐 𖼞𖽑𖽶𖾑 𖼮𖽶𖾐,𖼽𖽕𖾑 𖼂𖽚 𖼖𖽔𖾐 𖼦𖽗 𖼻𖽦 𖼷𖽙𖾐 𖼈𖽳 𖼂𖽺𖾐 𖼷𖽙. 9 𖽃𖽦𖾐 𖼰𖽧 𖼺𖽪𖾐 𖼳𖽡𖽕𖾑 𖼰𖽡𖽕 𖼞𖽳𖾐 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼈𖽳𖾐 𖼵𖽶𖾐 𖼊𖽑𖽧,𖼺𖽔 𖼖𖽔𖾐 𖼐𖽦𖾐 𖼄𖽡𖽻𖾐 𖼺𖽺𖾑, 10 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐:“𖼮𖽜𖾐 𖼄𖽙𖾐 𖼦𖽑𖽺𖾑 𖼽𖽚𖾐 𖼐𖽺𖾐 𖼽𖽻 𖼻𖽙 𖼊𖽑𖽺 𖼐𖽑𖽡𖾐 𖼞𖽕 𖼊𖽑𖽧 𖼽𖽡𖾐 𖼖𖽡𖾐! 𖼞𖽪𖾐 𖼮𖽡𖽺𖾐,𖼮𖽜𖾐 𖼄𖽙𖾐 𖼞𖽳𖾐 𖼻𖽙 𖼣𖽙𖾐 𖼻𖽙 𖼽𖽡 𖼺𖽔 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼄𖽡𖾐 𖼳𖽡𖽪 𖼊𖽑𖽺 𖽂𖽙𖾐 𖼄𖽔 𖼷𖽻.”
11 𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼖𖽙𖾐 𖼀𖽙𖾐 𖼺𖽺𖾑,𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪. 12 𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐:“𖼐𖽑𖽡𖾐 𖽃𖽔𖾐 𖼞𖽶𖾑 𖼐𖽺𖾐 𖼮𖽜𖾐 𖼄𖽙𖾐 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼄𖽔 𖼻𖽻𖾐,𖼐𖽑𖽡𖾐 𖼺𖽔 𖼖𖽔𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼖𖽡𖾐.𖼞𖽪𖾐 𖼮𖽡𖽺𖾐,𖼽𖽡 𖼺𖽔 𖼽𖽚𖾐 𖼺𖽪𖾐 𖼺𖽺𖾑,𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼰𖽕𖾐 𖼊𖽻𖾐. 13 𖼀𖽦𖾐 𖼮𖽜𖾐 𖼄𖽙𖾐 𖼞𖽳𖾐 𖼻𖽙 𖼊𖽑𖽺 𖼮𖽑𖽡𖾐,𖼽𖽻 𖼊𖽑𖽺 𖼖𖽺𖾑 𖼐𖽑𖽡𖾐 𖼽𖽚𖾐 𖼺𖽪𖾐 𖼣𖽻𖾐 𖼺𖽺𖾑,𖼣𖽙𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼖𖽺𖾑 𖼠𖽚 𖼊𖽑𖽡 𖼊𖽝𖾐 𖼊𖽴𖾐 𖼊𖽻𖾐.”
14 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽶 𖼊𖽑𖽡 𖼍𖽪𖾐 𖼖𖽻𖾐,𖽃𖽔𖾐 𖼮𖽡𖽦𖾐 𖼊𖽑𖽡 𖼖𖽧𖾑 𖼐𖽺𖾐 𖽃𖽔𖾑 𖼂𖽻𖾐 𖼈𖽺𖾐 𖼳𖽡𖽕𖾑 𖼰𖽡𖽕 𖼊𖽑𖽺 𖼞𖽜,𖼀𖽑𖽨 𖼽𖽻 𖼞𖽳𖾐 𖼈𖽳𖾐 𖼀𖽑𖽳 𖼍𖽦𖾐,𖼦𖽑𖽔𖾐 𖼖𖽺𖾑 𖽃𖽔𖾐 𖼞𖽶𖾑 𖼰𖽡𖽻𖾐 𖼽𖽻 𖼄𖽻𖾑,𖼽𖽻 𖼞𖽜 𖼺𖽜 𖼽𖽡𖾐 𖼦𖽑𖽙𖾐.𖽃𖽔𖾐 𖼺𖽺𖾑,𖼳𖽡𖽕𖾑 𖼰𖽡𖽕 𖼺𖽜 𖼽𖽡𖾐,𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽨𖾐 𖼺𖽜 𖼦𖽑𖽙 𖼦𖽑𖽙𖾐.
15 𖼖𖽧𖾑 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼻𖽜 𖼞𖽳𖾐 𖼦𖽑𖽻𖾐 𖼺𖽺𖾑,𖼳𖽡𖽕𖾑 𖼰𖽡𖽕 𖽃𖽔𖾐 𖼞𖽶𖾑 𖼊𖽑𖽺 𖼀𖽑𖽨 𖼺𖽧𖾐 𖼷𖽡𖾐 𖼻𖽙 𖼞𖽑𖽶𖾐 𖼍𖽙𖾑, 16 𖼽𖽻 𖼍𖽺𖾑 𖼺𖽜 𖼮𖽑𖽡𖽦𖾐 𖼊𖽑𖽡 𖼊𖽑𖽝𖾐 𖼀𖽝𖾐 𖼈𖽡𖾐 𖼞𖽳𖾐 𖼽𖽡𖾐,𖽃𖽔𖾐 𖼞𖽶𖾑 𖼍𖽴 𖼍𖽪𖾐 𖼊𖽡𖾐,𖼀𖽦𖾐:“𖽃𖽔𖾐 𖼞𖽶𖾑 𖼳𖽶𖾐 𖼞𖽳𖾐 𖼐𖽦𖾐 𖼄𖽡𖽻𖾐,𖼣𖽙𖾐 𖼷𖽳𖾑 𖼍𖽪𖾐 𖼄𖽔 𖼊𖽙𖾐.” 𖽃𖽔𖾐 𖼺𖽺𖾑 𖼽𖽻 𖼍𖽴 𖼍𖽪𖾐 𖼊𖽡𖾐,𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐.
17 𖽂𖽙 𖼺𖽙𖾐 𖼂𖽙𖾐 𖽃𖽔𖾐 𖼞𖽶𖾑 𖼞𖽳𖾐 𖼮𖽑𖽡𖽪 𖼀𖽺𖾐 𖼊𖽻 𖼮𖽨 𖼦𖽑𖽻𖾐,𖽃𖽔𖾐 𖼺𖽺𖾑 𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼖𖽦 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼳𖽡𖽕𖾑 𖼰𖽡𖽕 𖼊𖽑𖽺 𖽃𖽶𖾐:“𖼳𖽡𖽕𖾑 𖼰𖽡𖽕 ,𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼮𖽻𖾐 𖼐𖽺𖾑?𖼮𖽡𖽮𖾐 𖼄𖽔 𖼻𖽻𖾐! 𖼞𖽪𖾐 𖼮𖽡𖽺𖾐 𖽃𖽔𖾐 𖼞𖽶𖾑 𖼞𖽳𖾐 𖼮𖽑𖽡𖽪 𖼀𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽻 𖼮𖽨 𖼦𖽑𖽻𖾐. 18 𖼍𖽪𖾐 𖼖𖽻𖾐! 𖽃𖽔𖾐 𖼞𖽶𖾑 𖼊𖽑𖽺 𖼍𖽦𖾐 𖼍𖽪𖾐 𖼖𖽻𖾐,𖼹𖽳𖾐 𖼄𖽙𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐.𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼠𖽚 𖼈𖽳 𖼄𖽙𖾐 𖼊𖽴𖾐 𖼊𖽻𖾐.”
19 𖽂𖽙 𖼺𖽙𖾐 𖼂𖽙𖾐 𖼳𖽡𖽕𖾑 𖼰𖽡𖽕 𖼞𖽳𖾐 𖼄𖽦𖾐 𖼊𖽪 𖼞𖽜 𖼐𖽦𖾐 𖼮𖽡𖾐 𖼠𖽸𖾑,𖽃𖽔𖾐 𖼺𖽺𖾑 𖼽𖽻 𖼈𖽡𖾐 𖼊𖽪 𖼊𖽑𖽡 𖼊𖽝𖾐 𖼄𖽡𖽻𖾐.𖼽𖽻 𖼽𖽡𖾐 𖼖𖽧𖾑 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼊𖽙 𖼀𖽡𖾐,𖼈𖽺𖾐 𖽃𖽔𖾐 𖼞𖽶𖾑 𖼞𖽜 𖼊𖽻𖾐.
20 𖽂𖽙 𖼺𖽙𖾐 𖼂𖽙𖾐 𖽃𖽔𖾐 𖼞𖽶𖾑 𖼖𖽙𖾐 𖼮𖽑𖽻𖾐 𖼮𖽻𖾐,𖽃𖽔𖾐 𖼞𖽶𖾑 𖼖𖽜𖾐 𖼖𖽜𖾐 𖼈𖽳 𖼍𖽪𖾐 𖼖𖽻𖾐,𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐,𖼮𖽑𖽡𖽦𖾐 𖼀𖽝𖾐 𖼮𖽑𖽡𖽦𖾐 𖼞𖽙𖾐 𖼺𖽪𖾐 𖼊𖽑𖽡 𖼽𖽚𖾐 𖼀𖽑𖽢. 21 𖼽𖽻 𖼂𖽔𖾐 𖼖𖽕 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐,𖼽𖽻 𖼄𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼄𖽳 𖼻𖽙 𖼊𖽑𖽡 𖼽𖽚𖾐 𖼹𖽶𖾐 𖼽𖽻 𖼞𖽜.
𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽕𖾑 𖼂𖽡 𖼄𖽡 𖼖𖽴𖾑 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐
22 𖼞𖽑𖽶𖾑 𖼮𖽶𖾐,𖼽𖽕𖾑 𖼂𖽡 𖼄𖽡 𖼖𖽴𖾑 𖼐𖽺𖾐 𖼽𖽻 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼇𖽺𖾐 𖼠𖽴𖾑 ,𖼽𖽡𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐:“𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻,𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐. 23 𖽃𖽔𖾑 𖼄𖽳𖾐 𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽪 𖼍𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼖𖽡𖾐,𖼐𖽑𖽡𖾐 𖼣𖽙𖾐 𖼊𖽑𖽺 𖼐𖽺𖾐 𖼣𖽙𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼄𖽔 𖼮𖽑𖽡𖾐 𖼻𖽸 𖼊𖽻𖾐.𖼣𖽙𖾐 𖽃𖽔 𖼊𖽺𖾑 𖼻𖽻𖾐 𖼐𖽑𖽡𖾐 𖼖𖽙𖾐 𖼊𖽑𖽙,𖼐𖽑𖽡𖾐 𖼖𖽺𖾑 𖽃𖽔 𖼊𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼐𖽺𖾐 𖼐𖽑𖽡𖾐 𖼮𖽻𖾐 𖼞𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼖𖽙𖾐 𖼊𖽑𖽙 𖼖𖽡𖾐.”
24 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐:“𖼣𖽙𖾐 𖼄𖽳𖾐 𖼷𖽑𖽦𖾐 𖼐𖽑𖽧𖾐 𖼺𖽳.” 25 𖽃𖽙𖾑 𖼄𖽺 𖼊𖽑𖽙,𖼽𖽕𖾑 𖼂𖽡 𖼄𖽡 𖼖𖽴𖾑 𖼞𖽳𖾐 𖼮𖽜𖾐 𖼀𖽑𖽙 𖼈𖽡𖾐 𖼊𖽪 𖼊𖽑𖽡 𖼊𖽝𖾐 𖼐𖽻𖾑 𖼂𖽡𖾐 𖼽𖽡𖾐,𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽡𖽻 𖼦𖽑𖽺𖾑 𖼖𖽙𖾐 𖼀𖽙𖾐 𖼺𖽺𖾑 𖼽𖽕𖾑 𖼂𖽡 𖼄𖽡 𖼖𖽴𖾑 𖼊𖽑𖽺 𖼦𖽑𖽳𖾐 𖼄𖽪𖾑.
26 𖼽𖽕𖾑 𖼂𖽡 𖼄𖽡 𖼖𖽴𖾑 𖼀𖽦𖾐:“𖼄𖽡𖽻 𖼦𖽑𖽺𖾑 𖽃𖽔 𖼺𖽺 𖼂𖽺𖾐 𖼺𖽪𖾐 𖼣𖽻𖾐 𖼣𖽙𖾐 𖼄𖽔 𖼺𖽝𖾑,𖼐𖽑𖽡𖾐 𖽃𖽙𖾑 𖼄𖽺 𖼊𖽑𖽙 𖼣𖽙𖾐 𖼖𖽙𖾐 𖼀𖽦𖾐 𖼊𖽑𖽧 𖼄𖽔 𖼠𖽚,𖽃𖽔𖾑 𖼄𖽳𖾐 𖼺𖽺𖾑 𖼣𖽙𖾐 𖼄𖽡𖽻 𖼦𖽑𖽺𖾑 𖼊𖽻 𖼮𖽨.”
27 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽑𖽡 𖼐𖽺𖾐 𖼽𖽻𖾐 𖼺𖽶𖾐 𖼂𖽻𖾐 𖼖𖽻𖾐 𖼽𖽕𖾑 𖼂𖽡 𖼄𖽡 𖼖𖽴𖾑 𖼊𖽑𖽺 𖼞𖽜,𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐. 28 𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻𖾐 𖼷𖽪𖾐 𖼞𖽑𖽶𖾐 𖼮𖽑𖽻𖾐,𖼽𖽻𖾐 𖼊𖽑𖽦 \fr 21.28 \ft “𖼽𖽻 𖼊𖽑𖽦 ” 𖼦𖽑𖽺𖾑 𖼻𖽙 𖼦𖽳 𖼄𖽔 𖼠𖽚 𖼺𖽪𖾐 𖼽𖽻𖾐 𖼄𖽙𖾐 𖼣𖽻𖾐. 𖼳𖽶 𖼊𖽝𖾐 𖼀𖽑𖽨 𖼊𖽑𖽡 𖼀𖽳 𖼍𖽙𖾑.
29 𖼽𖽕𖾑 𖼂𖽡 𖼄𖽡 𖼖𖽴𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼊𖽻 𖼐𖽙𖾐:“𖼐𖽑𖽡𖾐 𖼽𖽻𖾐 𖼊𖽑𖽦 𖼦𖽑𖽺𖾑 𖼳𖽶 𖼊𖽝𖾐 𖼍𖽺𖾑 𖼀𖽑𖽨 𖼊𖽑𖽡 𖼀𖽳 𖼍𖽙𖾑 𖼺𖽪𖾐,𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼐𖽺𖾑?”
30 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽻 𖼞𖽑𖽚:“𖼐𖽑𖽡𖾐 𖼣𖽙𖾐 𖼞𖽳𖾐 𖼮𖽑𖽻𖾐 𖼽𖽻𖾐 𖼊𖽑𖽦 𖼦𖽑𖽺𖾑 𖼳𖽶 𖼊𖽝𖾐 𖼷𖽶𖾐 𖼺𖽺𖾑,𖼈𖽡𖾐 𖼊𖽪 𖼦𖽑𖽺𖾑 𖼣𖽙𖾐 𖼠𖽢𖾑 𖼺𖽪𖾐 𖼣𖽻𖾐 𖼖𖽙𖾐 𖼀𖽙𖾐 𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐.” 31 𖽃𖽔𖾐 𖼺𖽺𖾑,𖼞𖽑𖽶𖾑 𖼠𖽻𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐.𖼞𖽪𖾐 𖼮𖽡𖽺𖾐,𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼞𖽑𖽶𖾑 𖼠𖽻𖾐 𖼮𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐.
32 𖼽𖽻 𖼈𖽳𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼠𖽙𖾑 𖼍𖽻𖾐,𖼽𖽕𖾑 𖼂𖽡 𖼄𖽡 𖼖𖽴𖾑 𖼐𖽺𖾐 𖼽𖽻 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼇𖽺𖾐 𖼠𖽴𖾑 𖼀𖽑𖽚𖾐 𖼇𖽺𖾐 𖼖𖽡𖾑 𖼳𖽸𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐. 33 𖼽𖽕𖾑 𖼂𖽚 𖼖𖽔𖾐 𖼦𖽗 𖼈𖽡𖾐 𖼄𖽡 𖼊𖽑𖽡 𖼷𖽡𖾐 𖼍𖽳𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼍𖽙𖾑,𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐.𖼽𖽻 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽑𖽴. 34 𖼽𖽕𖾑 𖼂𖽚 𖼖𖽔𖾐 𖼦𖽗 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽡 𖼳𖽕𖾐 𖼄𖽙𖾐 𖼣𖽙𖾑 𖼮𖽻𖾐 𖼦𖽑𖽙𖾐.