𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼳𖽶𖾑 𖼐𖽦𖾐
22
1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽙𖾑 𖼍𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼳𖽶𖾑 𖼐𖽦𖾐，𖼽𖽻 𖼖𖽙𖾐 𖼀𖽦𖾐：“𖼽𖽕𖾑 𖼂𖽚 𖼖𖽔𖾐 𖼦𖽗！”𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．” 2 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼐𖽙𖾑 𖼣𖽜 𖼺𖽪𖾐 𖼻𖽙 𖼍𖽡𖾑 𖼽𖽡 𖼺𖽔 𖼊𖽑𖽺 𖼦𖽳 𖼺𖽺𖾑，𖼄𖽚 𖼖𖽡𖾑 𖼽𖽕𖾑 𖼄𖽡𖾐 𖼊𖽺𖾐 𖼽𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼊𖽑𖽪 𖼄𖽪𖾑 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐，𖼽𖽻 𖼊𖽑𖽺 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐 𖼣𖽙𖾐 𖼞𖽜 𖼖𖽡𖾐．”
3 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼊𖽑𖽳 𖼖𖽳𖾐 𖼄𖽪 𖼠𖽙𖾐 𖼳𖽙𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼻𖽜 𖼖𖽚𖾐 𖼂𖽚𖾐 𖼺𖽧𖾐 𖼂𖽺𖾐 𖼳𖽡𖽻𖾐 𖼀𖽑𖽢，𖼮𖽜𖾐 𖼀𖽑𖽙 𖼐𖽑𖽡 𖼽𖽚𖾐 𖼐𖽺𖾐 𖼽𖽻 𖼻𖽙 𖼽𖽡 𖼺𖽔 𖼊𖽑𖽺 𖼦𖽳 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼊𖽑𖽪 𖼄𖽪𖾑 𖼞𖽳𖾐 𖼄𖽡𖾐 𖼊𖽺𖾐 𖼽𖽡𖾐 𖼦𖽑𖽙𖾐． 4 𖼺𖽙𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼘𖽜𖾑 𖼐𖽦𖾐，𖼄𖽡𖾐 𖼈𖽡 𖼈𖽡 𖽂𖽙 𖼺𖽙𖾐 𖼂𖽙𖾐 𖼊𖽑𖽪 𖼄𖽪𖾑 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽺 𖼐𖽦𖾐 𖼄𖽡𖽻𖾐． 5 𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻 𖼮𖽜𖾐 𖼀𖽑𖽙 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽳 𖼖𖽳𖾐 𖼄𖽪 𖼐𖽦𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖼣𖽙𖾐 𖼐𖽺𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼠𖽻𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼺𖽺𖾑，𖼀𖽑𖽚𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼞𖽚 𖼖𖽻𖾐 𖼊𖽻𖾐．”
6 𖼽𖽕𖾑 𖼂𖽚 𖼖𖽔𖾐 𖼦𖽗 𖼮𖽑𖽡𖽪𖾐 𖼺𖽧𖾐 𖼀𖽑𖽨 𖼽𖽻 𖼻𖽙 𖼽𖽡 𖼺𖽔 𖼞𖽜 𖼀𖽶，𖼽𖽻 𖽃𖽔𖾑 𖼊𖽑𖽙 𖼐𖽺𖾐 𖽃𖽔𖾐 𖼍𖽚𖾑 𖼈𖽺𖾐．𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼊𖽑𖽡 𖼊𖽑𖽜 𖼮𖽨𖾐 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐， 7 𖼽𖽡 𖼺𖽔 𖼽𖽻 𖼀𖽙 𖼖𖽙𖾐 𖼀𖽦𖾐：“𖽃𖽔 𖼀𖽙 𖽃𖽔𖾐！”
𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼣𖽙𖾐 𖼻𖽙 𖽃𖽔𖾐，𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
𖼽𖽡 𖼺𖽔 𖼀𖽦𖾐：“𖼐𖽦𖾐 𖼄𖽺！ 𖽃𖽔𖾐 𖼍𖽚𖾑 𖼐𖽺𖾐 𖼮𖽑𖽡𖽪𖾐 𖼺𖽧𖾐 𖼮𖽻𖾐 𖼍𖽳𖾐 𖼦𖽑𖽻𖾐，𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼽𖽻𖾐 𖼻𖽙 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
8 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼣𖽙𖾐 𖼻𖽙 𖽃𖽔𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼷𖽺𖾐 𖼽𖽻 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼽𖽻𖾐 𖼻𖽙 𖼂𖽺𖾐 𖼳𖽡𖽻𖾐 𖼊𖽻𖾐．” 𖽃𖽔𖾐 𖼺𖽺𖾑，𖼐𖽑𖽡 𖼂𖽙𖾑 𖼖𖽙 𖼹𖽦𖾑 𖼮𖽨𖾐 𖼺𖽜 𖽃𖽙𖾑 𖼄𖽺 𖼽𖽡𖾐．
9 𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽪 𖼄𖽪𖾑 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼺𖽧𖾐 𖼹𖽜𖾐 𖼺𖽺𖾑 𖼍𖽡𖾐 𖼷𖽻𖾐 𖼊𖽑𖽺 𖼍𖽙𖾑，𖼽𖽻 𖼻𖽙 𖼊𖽑𖽺 𖼀𖽑𖽳𖾐 𖼍𖽡，𖼀𖽑𖽨 𖼮𖽑𖽡𖽪𖾐 𖼺𖽧𖾐 𖼊𖽑𖽺 𖼍𖽦𖾐．
10 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖽃𖽔𖾑 𖼊𖽑𖽙 𖼈𖽺𖾐，𖼽𖽻 𖼻𖽙 𖼊𖽑𖽺 𖼺𖽦 𖼊𖽻𖾐 𖼞𖽑𖽶𖾑 𖼮𖽶𖾐， 11 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼹𖽡𖾐 𖼖𖽦 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖽃𖽶𖾐，𖼀𖽦𖾐：“𖼽𖽕𖾑 𖼂𖽚 𖼖𖽔𖾐 𖼦𖽗！ 𖼽𖽕𖾑 𖼂𖽚 𖼖𖽔𖾐 𖼦𖽗 ！” 𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
12 𖼄𖽶 𖼹𖽡𖾐 𖼖𖽦 𖼀𖽦𖾐：“𖽃𖽔𖾐 𖼞𖽶𖾑 𖼊𖽑𖽺 𖼊𖽑𖽔 𖼺𖽦，𖼽𖽻 𖼊𖽑𖽺 𖽂𖽙𖾐 𖼦𖽹𖾑 𖼀𖽑𖽧𖾐 𖼄𖽔 𖼊𖽙𖾐！ 𖽃𖽔𖾑 𖼄𖽳𖾐 𖼣𖽙𖾐 𖼺𖽝𖾑，𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼣𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼞𖽑𖽙𖾐 𖼐𖽙𖾑 𖼣𖽜 𖼺𖽪𖾐 𖼻𖽙 𖼍𖽡𖾑 𖼊𖽑𖽺 𖼄𖽔 𖼹𖽺𖾐 𖼍𖽙𖾑，𖼀𖽑𖽨 𖼣𖽙𖾐 𖼞𖽜 𖼦𖽑𖽙𖾐．”
13 𖼽𖽕𖾑 𖼂𖽚 𖼖𖽔𖾐 𖼦𖽗 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼘𖽜𖾑 𖼐𖽦𖾐，𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼺𖽪𖾐，𖼽𖽻𖾐 𖼖𖽙𖾐 𖼊𖽑𖽡 𖼊𖽝𖾐 𖼐𖽦𖾐 𖼄𖽡𖽻𖾐，𖼽𖽻𖾐 𖼮𖽑𖽡𖽪𖾐 𖼺𖽧𖾐 𖼷𖽑𖽪𖾐 𖼠𖽻𖾐 𖼞𖽑𖽶𖾐 𖼐𖽑𖽡𖽚𖾐 𖼍𖽳𖾐．𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻𖾐 𖼖𖽙𖾐 𖼺𖽶𖾐 𖼂𖽻𖾐 𖼖𖽻𖾐，𖼽𖽻 𖼻𖽙 𖼊𖽑𖽡𖾑 𖼮𖽪 𖼍𖽡𖾐 𖼮𖽡𖽺𖾐 𖼂𖽺𖾐 𖼮𖽑𖽡𖽪𖾐 𖼦𖽑𖽙𖾐． 14 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 “𖼽𖽺𖾐 𖼦𖽴 𖼦𖽫 𖼽𖽡 𖼖𖽴𖾑 ” 𖼄𖽡𖾐．𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐，𖼷𖽑𖽻𖾐 𖼦𖽑𖽔𖾐 𖼖𖽺𖾑 𖼀𖽦𖾐 𖼺𖽪𖾐 𖼮𖽻𖾐：“𖼽𖽺𖾐 𖼦𖽴 𖼦𖽫 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼂𖽺𖾐 𖼳𖽡𖽻𖾐 𖼮𖽻𖾐 𖼊𖽻𖾐．”
15 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼹𖽡𖾐 𖼖𖽦 𖼹𖽦𖾑 𖼊𖽑𖽡 𖼂𖽦𖾑 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖽃𖽶𖾐，𖼀𖽦𖾐： 16 “𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼦𖽑𖽙𖾐，𖼐𖽑𖽡𖾐 𖼞𖽑𖽙𖾐 𖼐𖽙𖾑 𖼣𖽜 𖼺𖽪𖾐 𖼻𖽙 𖼍𖽡𖾑 𖼊𖽑𖽺 𖼄𖽔 𖼹𖽺𖾐 𖼍𖽙𖾑．𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼄𖽳𖾑 𖼞𖽚 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐： 17 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼄𖽢 𖼈𖽳 𖼖𖽪 𖼐𖽑𖽡𖾐 𖼞𖽜 𖼊𖽻𖾐，𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼄𖽶 𖼠𖽻𖾐 𖼊𖽑𖽺 𖼠𖽳𖾐、 𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼦𖽳 𖼐𖽑𖽡 𖼖𖽙𖾐 𖼺𖽶𖾑 𖼄𖽨 𖼷𖽑𖽚 𖼊𖽻𖾐，𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼷𖽑𖽜𖾑 𖼷𖽑𖽜𖾐 𖼮𖽡𖾐 𖼂𖽦𖾐 𖼞𖽳𖾐 𖼖𖽪𖾐 𖼊𖽑𖽺 𖼊𖽝 𖼊𖽦 𖽂𖽙𖾐 𖼊𖽻𖾐． 18 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼺𖽪𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙，𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼀𖽙𖾐 𖼺𖽺𖾑 𖼄𖽢 𖽂𖽙𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼦𖽑𖽻𖾐．’”
19 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽑𖽚𖾐 𖼽𖽻 𖼮𖽜𖾐 𖼀𖽑𖽙 𖼞𖽳𖾐 𖼮𖽑𖽡𖾐．𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽡 𖼊𖽑𖽜 𖼀𖽑𖽚𖾐 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐．𖼽𖽕𖾑 𖼂𖽚 𖼖𖽔𖾐 𖼦𖽗 𖼂𖽡𖽦 𖼳𖽶𖾑 𖼂𖽔𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐．
𖼐𖽕 𖼦𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
20 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽙𖾑 𖼍𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐，𖼀𖽦𖾐：“𖼐𖽑𖽡𖾐 𖼐𖽑𖽳𖾐 𖼄𖽻 𖼐𖽕 𖼦𖽴𖾑 𖼄𖽳 𖼈𖽪𖾑 𖼄𖽧𖾑 𖼰𖽡𖽔𖾐 ，𖼽𖽻 𖼖𖽙𖾐 𖼀𖽙𖾐 𖼻𖽙 𖼦𖽑𖽦 𖼽𖽚𖾐 𖼽𖽚𖾐： 21 𖼻𖽙 𖼈𖽳 𖼊𖽑𖽺 𖼈𖽪𖾐 𖼺𖽶𖾐 𖼄𖽡𖾐，𖼽𖽻 𖼐𖽑𖽳𖾐 𖼄𖽻 𖼂𖽪𖾑 𖼺𖽶𖾐、 𖼰𖽡𖾐 𖼄𖽪 𖼖𖽡𖾑、 22 𖼰𖽡𖾐 𖼳𖽡𖽱𖾐、 𖼦𖽔𖾐 𖼺𖽙、 𖼂𖽧𖾑 𖼍𖽕、 𖼽𖽡𖾑 𖼖𖽔𖾐 𖼐𖽺𖾐 𖼂𖽡 𖼊𖽑𖽪 𖼖𖽡𖾑 𖼣𖽻𖾐．𖼰𖽡𖾐 𖼄𖽪 𖼖𖽡𖾑 𖼻𖽙 𖼽𖽕𖾑 𖼖𖽕 𖼣𖽻𖾐，𖼂𖽡 𖼊𖽑𖽪 𖼖𖽡𖾑 𖼻𖽙 𖼄𖽳 𖼖𖽡𖾑 𖼂𖽦 𖼰𖽡𖽔𖾐 𖼣𖽻𖾐．” 23 𖼽𖽻 𖼈𖽳𖾐 𖼦𖽑𖽦 𖼽𖽚𖾐 𖼐𖽕 𖼦𖽴𖾑 𖼐𖽺𖾐 𖼄𖽧𖾑 𖼰𖽡𖽔𖾐 𖼞𖽳𖾐 𖼻𖽙 𖼣𖽻𖾐． 24 𖼐𖽕 𖼦𖽴𖾑 𖼞𖽳𖾐 𖼄𖽳 𖼖𖽳𖾐 𖼖𖽡𖽚 𖼄𖽔 𖼄𖽡𖾐，𖼽𖽻 𖼊𖽑𖽧 𖼂𖽕、 𖼰𖽡𖽔𖾐 𖼦𖽕、 𖼊𖽑𖽔𖾐 𖼳𖽡𖽕 𖼐𖽺𖾐 𖼄𖽔 𖼰𖽡𖽔𖾐 𖼊𖽑𖽺 𖼽𖽚𖾐．