𖽂𖽙 𖼮𖽑𖽻 𖼺𖽪𖾑 20

𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽕𖾑 𖼂𖽡 𖼄𖽡 𖼖𖽴𖾑

1 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽕𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽻𖾐 𖼮𖽑𖽶𖾑 𖼺𖽺𖾑，𖼐𖽑𖽧 𖼠𖽴 𖼇𖽪𖾐 𖼄𖽡𖾐 𖼊𖽺𖾐 𖼽𖽡𖾐，𖼰𖽡𖽔𖾐 𖼍𖽡 𖼺𖽶𖾐 𖼖𖽪𖾐 𖼐𖽺𖾐 𖼳𖽪𖾐 𖽃𖽳 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼰𖽡𖾐 𖼖𖽔𖾐 𖽃𖽳 𖼖𖽪𖾐 𖼞𖽳𖾐 𖼣𖽙𖾑 𖼮𖽻𖾐 𖼽𖽡𖾐． 2 𖼽𖽕𖾑 𖼂𖽚 𖼖𖽔𖾐 𖼦𖽗 𖼽𖽻 𖼄𖽳 𖼻𖽙 𖼺𖽔 𖼖𖽔𖾐 𖼊𖽑𖽺 𖼐𖽜𖾑 𖼄𖽙𖾐 𖼰𖽕𖾐，𖽃𖽔𖾐 𖼺𖽺𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼂𖽡 𖼄𖽡 𖼖𖽴𖾑 𖼷𖽑𖽻𖾐 𖼹𖽡𖾐 𖼺𖽔 𖼖𖽔𖾐 𖼊𖽑𖽺 𖼦𖽳 𖼂𖽡𖾐 𖼽𖽡𖾐 𖼦𖽑𖽙𖾐．

3 𖼊𖽑𖽡 𖼦𖽑𖽦 𖼮𖽻𖾐，𖼽𖽕𖾑 𖼂𖽡 𖼄𖽡 𖼖𖽴𖾑 𖼽𖽦 𖼄𖽦𖾐 𖼞𖽑𖽻𖾐 𖼠𖽻𖾐 𖼞𖽑𖽶𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼳𖽶𖾐 𖼷𖽻 𖼺𖽪𖾐 𖼷𖽑𖽻𖾐 𖼣𖽻𖾐！ 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼦𖽳 𖼂𖽻𖾐 𖼖𖽻𖾐 𖼺𖽪𖾐 𖼻𖽙 𖼄𖽳，𖼽𖽻 𖼷𖽑𖽻𖾐 𖼀𖽑𖽙 𖼮𖽻𖾐 𖼺𖽪𖾐 𖼻𖽙 𖼄𖽳 𖼣𖽻𖾐．”

4 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽡 𖼄𖽡 𖼖𖽴𖾑 𖼺𖽔 𖼖𖽔𖾐 𖼖𖽙𖾐 𖼄𖽔 𖼐𖽳 𖼺𖽺，𖽃𖽔𖾐 𖼺𖽺𖾑 𖼽𖽻 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼀𖽳𖾐 𖼈𖽡𖾐 𖼮𖽻𖾐 𖼺𖽪𖾐 𖼠𖽚 𖼊𖽑𖽺 𖼖𖽺𖾑 𖼐𖽑𖽡𖾐 𖼄𖽳 𖼮𖽡𖽦 𖼊𖽻𖾐 𖼖𖽔𖾑？ 5 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼣𖽙𖾐 𖼖𖽙𖾐 𖼀𖽦𖾐 𖼺𖽪𖾐：‘ 𖼽𖽻 𖼣𖽙𖾐 𖼐𖽜𖾑 𖼄𖽙𖾐 𖼣𖽻𖾐 ’ 𖼀𖽦𖾐 𖼄𖽔 𖼣𖽻𖾐 𖼖𖽔𖾑？𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼖𖽺𖾑 𖼀𖽦𖾐：‘ 𖼽𖽻 𖼣𖽙𖾐 𖽃𖽔 𖼍𖽕𖾑 𖼣𖽻𖾐．’ 𖼣𖽙𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼺𖽪𖾐，𖼐𖽑𖽧𖾐 𖼰𖽶𖾐 𖼳𖽶 𖼣𖽻𖾐，𖼣𖽙𖾐 𖼞𖽳𖾐 𖼦𖽑𖽙 𖼊𖽪 𖼄𖽔 𖼣𖽻𖾐．”

6 𖼽𖽦 𖼄𖽦𖾐 𖼞𖽑𖽻𖾐 𖼠𖽻𖾐 𖼊𖽑𖽺 𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼺𖽝𖾑，𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼺𖽪𖾐，𖼐𖽑𖽧𖾐 𖼰𖽶𖾐 𖼺𖽪𖾐 𖼣𖽻𖾐．𖼣𖽙𖾐 𖼐𖽑𖽡𖾐 𖼊𖽑𖽺 𖼀𖽨 𖼮𖽳 𖼺𖽪𖾐，𖼣𖽙𖾐 𖼊𖽑𖽺 𖼮𖽑𖽡𖽺 𖼂𖽚𖾐 𖼄𖽔 𖼻𖽻𖾐．𖽃𖽔𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼞𖽜 𖼽𖽻 𖼖𖽙𖾐 𖼄𖽔 𖼐𖽳 𖼽𖽡𖾐． 7 𖽃𖽔𖾑 𖼄𖽳𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽳𖾐 𖼄𖽳 𖼻𖽙，𖼐𖽑𖽡𖾐 𖼦𖽑𖽙𖾐 𖼽𖽻 𖼊𖽑𖽺 𖼞𖽑𖽚 𖼞𖽜 𖼖𖽡𖾐．𖼞𖽪𖾐 𖼮𖽡𖽺𖾐，𖼽𖽻 𖼺𖽡𖾐 𖼻𖽙 \fr 20．7 \ft “𖼺𖽡𖾐 𖼻𖽙 ” 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽡𖾑 𖼮𖽪 𖼊𖽻 𖼊𖽑𖽜𖾐 𖼺𖽪𖾐 𖼷𖽑𖽻𖾐 𖼣𖽻𖾐． 𖼣𖽻𖾐，𖼽𖽻 𖼐𖽑𖽡𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼊𖽻𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖽂𖽙𖾐 𖼠𖽙𖾑 𖼊𖽙𖾐．𖼐𖽑𖽡𖾐 𖼄𖽔 𖼦𖽑𖽙𖾐 𖼽𖽻 𖼊𖽑𖽺 𖼞𖽑𖽚 𖼞𖽜 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼳𖽶𖾐 𖼮𖽡𖽦 𖼊𖽻𖾐．”

8 𖼽𖽕𖾑 𖼂𖽡 𖼄𖽡 𖼖𖽴𖾑 𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼄𖽡𖽻 𖼦𖽑𖽺𖾑 𖼀𖽦𖾐 𖼽𖽻 𖼈𖽳𖾐 𖼊𖽑𖽺 𖼊𖽑𖽧，𖼽𖽻 𖼈𖽳𖾐 𖼮𖽡𖽮𖾐 𖼷𖽑𖽚． 9 𖼽𖽕𖾑 𖼂𖽡 𖼄𖽡 𖼖𖽴𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？𖼣𖽙𖾐 𖼐𖽑𖽡𖾐 𖼊𖽑𖽺 𖽃𖽔 𖼊𖽺𖾐 𖼊𖽑𖽡 𖼳𖽶 𖼮𖽑𖽡𖽺 𖼂𖽚𖾐 𖼠𖽚 𖼖𖽔？𖽃𖽔𖾐 𖼺𖽺𖾑 𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼷𖽑𖽻𖾐 𖼀𖽺 𖼞𖽜 𖼮𖽑𖽙 𖼽𖽺𖾐 𖼮𖽑𖽡𖽪𖾑 𖼈𖽳 𖼞𖽑𖽶𖾐 𖼊𖽡 𖼽𖽡𖾐 𖼐𖽺𖾑？𖼐𖽑𖽡𖾐 𖼣𖽙𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼷𖽻．” 10 𖼽𖽕𖾑 𖼂𖽡 𖼄𖽡 𖼖𖽴𖾑 𖼹𖽦𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐：“𖼐𖽑𖽡𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼺𖽪𖾐，𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽻𖾐 𖼐𖽺𖾑？”

11 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼣𖽙𖾐 𖼊𖽡 𖼮𖽑𖽻 𖼺𖽪𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽔 𖼮𖽡𖽮𖾐，𖼣𖽙𖾐 𖼄𖽳 𖼻𖽙 𖼖𖽙𖾐 𖼀𖽙𖾐 𖼺𖽺𖾑 𖼣𖽙𖾐 𖼊𖽑𖽺 𖼺𖽦 𖼊𖽻𖾐． 12 𖼦𖽑𖽻𖾐 𖼊𖽑𖽻𖾐，𖼽𖽻 𖼠𖽕𖾐 𖼰𖽶𖾐 𖼣𖽙𖾐 𖼐𖽜𖾑 𖼄𖽙𖾐 𖼣𖽻𖾐 𖼮𖽶𖾐，𖼽𖽻 𖼐𖽺𖾐 𖼣𖽙𖾐 𖼀𖽑𖽙 𖼠𖽻𖾐 𖼄𖽙𖾐 𖼄𖽔 𖼠𖽻𖾐 𖼺𖽪𖾐 𖼣𖽻𖾐，𖼠𖽙𖾑 𖼍𖽻𖾐 𖼽𖽻 𖼊𖽑𖽺 𖼹𖽶𖾐 𖼣𖽙𖾐 𖼄𖽳 𖼻𖽙 𖼰𖽕𖾐． 13 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽜 𖽃𖽔 𖼀𖽙 𖼈𖽴 𖼊𖽑𖽺 𖼰𖽡𖾑 𖼦𖽑𖽙𖾐，𖼠𖽳𖾐 𖼖𖽪𖾐 𖼄𖽡𖾐 𖼊𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼺𖽔 𖼖𖽔𖾐 𖼖𖽙𖾐 𖼀𖽦𖾐：‘ 𖽃𖽔 𖼐𖽺𖾑 𖽃𖽔 𖼊𖽺𖾑 𖼠𖽻𖾐 𖼮𖽑𖽡𖾐 𖼽𖽡𖾐 𖼣𖽻𖾐 𖼦𖽻，𖼐𖽑𖽡𖾐 𖼺𖽙𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖽃𖽔 𖼍𖽕𖾑 𖼣𖽻𖾐．𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼺𖽪𖾐，𖼣𖽙𖾐 𖼊𖽑𖽺 𖼮𖽨 𖼳𖽶 𖼣𖽻𖾐．’”

14 𖼽𖽕𖾑 𖼂𖽡 𖼄𖽡 𖼖𖽴𖾑 𖼽𖽻 𖼞𖽳𖾐 𖼐𖽑𖽡、 𖽃𖽔𖾑 𖼮𖽑𖽸 𖼽𖽻𖾐、 𖼮𖽜𖾐 𖼀𖽑𖽙 𖼮𖽜𖾐 𖼄𖽙𖾐 𖼦𖽑𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽳 𖼻𖽙 𖼺𖽔 𖼖𖽔𖾐 𖼊𖽑𖽺 𖼦𖽑𖽙𖾐 𖼀𖽑𖽚𖾐 𖼽𖽻 𖼞𖽜． 15 𖼽𖽕𖾑 𖼂𖽡 𖼄𖽡 𖼖𖽴𖾑 𖼀𖽦𖾐：“𖼐𖽦𖾐 𖼄𖽺！ 𖼣𖽙𖾐 𖼄𖽡𖾑 𖼐𖽦𖾐 𖼞𖽑𖽙𖾐 𖼣𖽻𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，𖼐𖽑𖽡𖾐 𖽃𖽔 𖼊𖽺𖾑 𖼄𖽦𖾐 𖼐𖽦𖾐 𖼊𖽑𖽝𖾐，𖼐𖽑𖽧𖾐 𖼺𖽳 𖼄𖽙𖾐 𖽃𖽔 𖼊𖽺𖾑 𖼄𖽦𖾐 𖼮𖽻𖾐 𖼻𖽻𖾐．”

16 𖼽𖽕𖾑 𖼂𖽡 𖼄𖽡 𖼖𖽴𖾑 𖼺𖽔 𖼖𖽔𖾐 𖼖𖽙𖾐 𖼀𖽦𖾐：𖼣𖽙𖾐 𖼀𖽑𖽨𖾐 𖼊𖽑𖽡 𖼍𖽪𖾐 𖼐𖽑𖽡𖾐 𖽃𖽔 𖼍𖽕𖾑 𖼊𖽑𖽺 𖼞𖽜，𖼐𖽑𖽡𖾐 𖼞𖽜 𖼊𖽑𖽡 𖼈𖽴 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼳𖽡𖽦𖾑 𖼍𖽻𖾐 𖼊𖽪𖾐 𖼄𖽔 𖼮𖽻𖾐 𖼦𖽑𖽙𖾐 𖼊𖽻𖾐．𖼦𖽑𖽺𖾑 𖼻𖽻𖾐，𖼷𖽑𖽻𖾐 𖼞𖽜 𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼄𖽔 𖼠𖽚 𖼺𖽪𖾐 𖼣𖽻𖾐 𖼺𖽝𖾑 𖼊𖽙𖾐．”

17-18 𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼄𖽳 𖼻𖽙 𖼖𖽙𖾐 𖼀𖽙𖾐 𖼺𖽺𖾑，𖼽𖽕𖾑 𖼂𖽡 𖼄𖽡 𖼖𖽴𖾑 𖼈𖽴 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑 𖼦𖽑𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽡 𖼄𖽡 𖼖𖽴𖾑 𖼊𖽑𖽺 𖼐𖽺𖾐 𖼽𖽻 𖼄𖽳 𖼻𖽙，𖼹𖽦𖾑 𖼽𖽻 𖼮𖽜𖾐 𖼄𖽙𖾐 𖼊𖽑𖽺 𖼞𖽪𖾐 𖼞𖽑𖽙 𖼦𖽑𖽻𖾐，𖼽𖽻 𖼈𖽳𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼠𖽸𖾑．