𖼖𖽚 𖼍𖽴 𖼄𖽶 𖼹𖽡𖾐 𖼖𖽦 𖼐𖽑𖽡 𖼽𖽚𖾐 𖼊𖽑𖽺 𖼠𖽙𖾐 𖼳𖽙𖾐
19
1 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼄𖽶 𖼮𖽑𖽧 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼐𖽑𖽡 𖼽𖽚𖾐 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼮𖽶𖾐 𖼖𖽚 𖼍𖽴 𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼊𖽡𖾐 𖼍𖽳𖾐．𖼖𖽚 𖼍𖽴 𖼐𖽦𖾐 𖼄𖽡𖽻𖾐 𖼺𖽺𖾑，𖼍𖽪𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼹𖽶𖾐，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐，2 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼈𖽳𖾐 𖼮𖽜𖾐 𖼀𖽑𖽙 𖼞𖽳𖾐 𖽃𖽔𖾑 𖼞𖽑𖽶𖾐 𖼽𖽡𖾐 𖼞𖽜，𖼮𖽑𖽡𖾑 𖼀𖽑𖽦𖾐 𖼊𖽑𖽡 𖼠𖽙𖾐 𖼷𖽑𖽡，𖼊𖽑𖽡 𖼦𖽑𖽦 𖼦𖽑𖽦，𖼄𖽶 𖼊𖽑𖽡 𖼍𖽪𖾐 𖼖𖽻𖾐 𖼺𖽺𖾑 𖼽𖽡𖾐 𖼊𖽙𖾐．”
𖼽𖽻 𖼈𖽳𖾐 𖼀𖽦𖾐：“𖼄𖽔 𖼽𖽡𖾐 𖼊𖽻𖾐！ 𖼣𖽙𖾐 𖼈𖽳𖾐 𖼊𖽦 𖼀𖽙 𖼦𖽑𖽦 𖼊𖽻𖾐．”
3 𖼦𖽑𖽻𖾐 𖼊𖽑𖽻𖾐，𖼖𖽚 𖼍𖽴 𖼹𖽳𖾐 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼺𖽺𖾑，𖼽𖽻 𖼈𖽳𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐，𖼽𖽻 𖼞𖽳𖾐 𖽃𖽔𖾑 𖼞𖽑𖽶𖾐 𖼊𖽡 𖼽𖽡𖾐．𖼖𖽚 𖼍𖽴 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐 𖼳𖽡𖽻𖾐，𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼠𖽻𖾐 𖼺𖽺𖾑，𖼽𖽻 𖼈𖽳𖾐 𖼷𖽙 𖼦𖽑𖽙𖾐．
𖼺𖽙 𖼍𖽙𖾐 𖼄𖽔 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪
4 𖼽𖽻 𖼈𖽳𖾐 𖼄𖽔 𖼽𖽦 𖼺𖽺 𖽃𖽙𖾑 𖼄𖽺，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽑𖽶𖾐 𖼞𖽳𖾐 𖼻𖽙 𖼐𖽜𖾐，𖼄𖽻 𖼮𖽑𖽻𖾐 𖼽𖽳𖾐 𖼖𖽙𖾐 𖼮𖽑𖽡𖾐，𖼄𖽳𖾑 𖼄𖽳 𖼖𖽻𖾐 𖼖𖽚 𖼍𖽴 𖼞𖽳𖾐 𖼦𖽑𖽺𖾐 𖼊𖽑𖽺 𖼰𖽻𖾑 𖼍𖽡． 5 𖼽𖽻 𖼈𖽳𖾐 𖼖𖽚 𖼍𖽴 𖼊𖽑𖽺 𖽃𖽶𖾐 𖼮𖽸，𖼽𖽻 𖼖𖽙𖾐 𖼀𖽦𖾐：“𖽃𖽙𖾑 𖼄𖽺𖾐 𖼐𖽑𖽡𖾐 𖼞𖽳𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼍𖽳𖾐？𖼽𖽻 𖼈𖽳𖾐 𖼊𖽑𖽺 𖼦𖽳 𖼊𖽑𖽧 𖼖𖽻𖾐，𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼊𖽻𖾐．”
6 𖼖𖽚 𖼍𖽴 𖼊𖽚𖾐 𖼖𖽻𖾐，𖽃𖽔𖾑 𖼊𖽪 𖼂𖽡𖾑 𖼍𖽡，𖼷𖽑𖽻𖾐 𖼷𖽪𖾐 𖼞𖽳𖾐 𖼽𖽡𖾐， 7 𖼀𖽦𖾐：“𖼣𖽙𖾐 𖼈𖽧 𖼐𖽑𖽳𖾐 𖽃𖽔𖾐！ 𖼊𖽶𖾐 𖼄𖽡𖽻 𖼊𖽑𖽔 𖼂𖽺𖾐 𖼞𖽜． 8 𖼐𖽦𖾐 𖼄𖽺！ 𖼣𖽙𖾐 𖼻𖽙 𖼄𖽳 𖼐𖽑𖽡 𖼽𖽚𖾐 𖼮𖽻𖾐，𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼣𖽻𖾐 𖼺𖽺，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼦𖽳 𖼊𖽑𖽧 𖼖𖽻𖾐 𖼐𖽑𖽡𖾐 𖼈𖽳𖾐 𖼞𖽜，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼺𖽳 𖽃𖽔 𖼊𖽺𖾐 𖼂𖽺𖾐 𖼽𖽡𖾐 𖼮𖽑𖽳𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼦𖽑𖽺𖾑 𖼐𖽑𖽡 𖼽𖽚𖾐 𖼣𖽙𖾐 𖽃𖽔𖾑 𖼞𖽑𖽶𖾐 𖼞𖽳𖾐 𖼖𖽻𖾐 𖼺𖽪𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼽𖽻 𖼈𖽳𖾐 𖼊𖽑𖽺 𖼊𖽑𖽡 𖼳𖽶 𖼖𖽺𖾑 𖽂𖽙𖾐 𖼂𖽺𖾐 𖼄𖽔 𖼊𖽙𖾐．”
9 𖼷𖽑𖽻𖾐 𖼷𖽪𖾐 𖼀𖽦𖾐：“𖼐𖽑𖽡𖾐 𖼞𖽑𖽶𖾑 𖼀𖽳 𖼺𖽺𖾑 𖼽𖽡𖾐！” 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖼖𖽻𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼍𖽺𖾑 𖼣𖽻𖾐 𖼖𖽺𖾑，𖼐𖽑𖽡𖾐 𖼄𖽡𖽻 𖼦𖽑𖽺 𖼺𖽪𖾐 𖼷𖽶 𖼄𖽻 𖼂𖽺𖾐 𖼖𖽔？𖼣𖽙𖾐 𖼈𖽳𖾐 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼀𖽑𖽧𖾐 𖼺𖽪𖾐，𖼽𖽻 𖼈𖽳𖾐 𖼊𖽑𖽺 𖼦𖽶𖾑 𖼄𖽔 𖼷𖽑𖽶𖾐 𖼦𖽹𖾑 𖼀𖽑𖽧𖾐 𖼊𖽻𖾐．” 𖽃𖽔𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖽂𖽙 𖼊𖽑𖽧 𖼄𖽙𖾐 𖼖𖽚 𖼍𖽴 𖼊𖽑𖽺 𖼊𖽜 𖼐𖽑𖽡𖽚𖾐，𖼽𖽻 𖼈𖽳𖾐 𖽃𖽔𖾑 𖼊𖽪 𖼊𖽑𖽺 𖼊𖽝 𖼖𖽦𖾑 𖼊𖽡 𖼽𖽡𖾐 𖼊𖽻𖾐．
10 𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽚𖾐 𖼖𖽻𖾐，𖼖𖽚 𖼍𖽴 𖼊𖽑𖽺 𖼺𖽶𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼺𖽺𖾑，𖽃𖽔𖾑 𖼊𖽪 𖼂𖽡𖾑 𖼍𖽡 𖼦𖽑𖽙𖾐． 11 𖼦𖽑𖽔𖾐 𖼖𖽺𖾑 𖽃𖽔𖾑 𖼊𖽪 𖼐𖽑𖽡𖾑 𖼮𖽻𖾐 𖼀𖽳 𖼮𖽻𖾐 𖼺𖽪𖾐 𖼷𖽑𖽻𖾐 𖼞𖽜 𖼄𖽻 𖼮𖽑𖽻𖾐 𖼽𖽳𖾐 𖼖𖽙𖾐 𖼮𖽑𖽡𖾐，𖼄𖽳𖾑 𖼄𖽳 𖼄𖽦𖾐 𖼊𖽪 𖼄𖽦𖾐 𖼈𖽧𖾑 𖼺𖽺𖾑，𖽃𖽔𖾑 𖼊𖽪 𖼰𖽙𖾐 𖽂𖽙𖾐 𖼄𖽔 𖼊𖽙𖾐．
𖼖𖽚 𖼍𖽴 𖼺𖽙 𖼍𖽙𖾐 𖼄𖽔 𖼰𖽡𖾑 𖼦𖽑𖽙𖾐
12 𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽚 𖼍𖽴 𖼖𖽙𖾐 𖼀𖽦𖾐：“𖼐𖽑𖽡𖾐 𖼦𖽑𖽺𖾑 𖼠𖽻𖾐 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼮𖽻𖾐 𖼺𖽺 𖼐𖽺𖾑？𖼄𖽦𖾑 𖼈𖽪𖾐 𖼣𖽻𖾐 𖼦𖽻，𖼻𖽙 𖼄𖽡𖾐 𖼐𖽜𖾐 𖼣𖽻𖾐 𖼦𖽻，𖼖𖽪𖾐 𖼞𖽑𖽶𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼣𖽻𖾐 𖼦𖽻，𖼐𖽑𖽡𖾐 𖼽𖽻 𖼈𖽳𖾐 𖼄𖽳𖾑 𖼄𖽳 𖼊𖽑𖽺 𖼦𖽳 𖼺𖽺𖾑，𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼖𖽡𖾐． 13 𖼣𖽙𖾐 𖼈𖽳𖾐 𖼐𖽕 𖼊𖽺𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼀𖽡𖾐 𖼖𖽚𖾐 𖼊𖽑𖽺 𖼍𖽶𖾐 𖼞𖽳𖾐 𖼮𖽑𖽡𖽪 𖼀𖽺𖾐，𖼽𖽺𖾐 𖼦𖽴 𖼦𖽫 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽳 𖼮𖽡𖽦．”
14 𖼖𖽚 𖼍𖽴 𖼊𖽚𖾐 𖼽𖽡𖾐，𖼽𖽻 𖼻𖽙 𖼄𖽳 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐 𖼄𖽦𖾑 𖼈𖽪𖾐 𖼊𖽑𖽺 𖼀𖽦𖾐 𖼊𖽑𖽧：“𖼐𖽑𖽡𖾐 𖼈𖽳𖾐 𖼐𖽕 𖼊𖽺𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼖𖽡𖾐！ 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽳 𖼮𖽡𖽦 𖼊𖽻𖾐．” 𖼦𖽑𖽻𖾐 𖼊𖽑𖽻𖾐，𖼽𖽻 𖼄𖽦𖾑 𖼈𖽪𖾐 𖼊𖽡 𖼮𖽑𖽻 𖼦𖽑𖽺𖾑 𖼈𖽳𖾐 𖼵𖽶𖾐 𖼊𖽻 𖼊𖽑𖽜𖾐 𖼺𖽪𖾐 𖼣𖽻𖾐．
15 𖼄𖽶 𖼊𖽑𖽡 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽚 𖼍𖽴 𖼊𖽑𖽺 𖼞𖽕 𖼺𖽺𖾑，𖼀𖽦𖾐：“𖼐𖽕 𖼊𖽺𖾐 𖼐𖽑𖽡𖾐 𖼄𖽳 𖼻𖽙 𖼐𖽺𖾐 𖼐𖽑𖽡𖾐 𖼻𖽙 𖼄𖽳 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼊𖽑𖽧 𖼽𖽡𖾐，𖼐𖽑𖽡𖾐 𖼞𖽜 𖼖𖽪𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼖𖽙𖾐 𖼀𖽙𖾐 𖼄𖽳 𖼮𖽡𖽦 𖼄𖽔 𖼻𖽻𖾐．”
16 𖼖𖽚 𖼍𖽴 𖼣𖽝 𖼷𖽑𖽦𖾐 𖼄𖽔 𖼊𖽙𖾐 𖼍𖽻𖾐 𖼞𖽙𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼖𖽚 𖼍𖽴 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼺𖽺𖾑，𖼄𖽶 𖼹𖽡𖾐 𖼖𖽦 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽚 𖼍𖽴 𖼐𖽺𖾐 𖼽𖽻 𖼄𖽳 𖼻𖽙，𖼹𖽦𖾑 𖼽𖽻 𖼻𖽙 𖼄𖽳 𖼐𖽑𖽡 𖼽𖽚𖾐 𖼞𖽳𖾐 𖼖𖽦 𖼀𖽑𖽦𖾐 𖼊𖽑𖽺 𖼺𖽶𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐，𖼀𖽑𖽨 𖼖𖽪𖾐 𖼦𖽜 𖼞𖽳𖾐 𖼮𖽻𖾐． 17 𖼽𖽻 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐 𖼠𖽙𖾑 𖼍𖽻𖾐，𖼀𖽦𖾐：“𖼈𖽪𖾑 𖼠𖽻𖾐 𖼖𖽙𖾐 𖼀𖽙𖾐 𖼮𖽡𖽪 𖼀𖽑𖽻𖾐 𖼻𖽻𖾐，𖼰𖽻𖾐 𖼀𖽑𖽚𖾐 𖼠𖽙𖾑 𖼍𖽻𖾐 𖼊𖽑𖽔 𖼐𖽦𖾐，𖼊𖽺𖾐 𖼠𖽻𖾐 𖼞𖽳𖾐 𖼖𖽺𖾑 𖼊𖽑𖽔 𖼦𖽑𖽡𖽚，𖼰𖽡𖽴 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐 𖼖𖽡𖾐，𖼐𖽑𖽡𖾐 𖼞𖽜 𖼄𖽳 𖼮𖽡𖽦 𖼦𖽑𖽙𖾐 𖼄𖽔 𖼻𖽻𖾐．”
18 𖼖𖽚 𖼍𖽴 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼞𖽜 𖽂𖽙 𖼰𖽡𖽺𖾐 𖼊𖽑𖽺 𖼊𖽑𖽔 𖼽𖽡𖾐． 19 𖼞𖽪𖾐 𖼮𖽡𖽺𖾐，𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼦𖽑𖽻𖾐，𖼐𖽑𖽡𖾐 𖼐𖽙𖾑 𖼣𖽜 𖼐𖽑𖽧𖾐 𖼮𖽡𖽻𖾐 𖼈𖽳 𖼣𖽙𖾐 𖼊𖽑𖽺 𖼞𖽜，𖼣𖽙𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽨𖾑．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼰𖽡𖽴 𖽂𖽙 𖼰𖽡𖽺𖾐 𖼊𖽑𖽺 𖼄𖽔 𖼮𖽑𖽡𖾐 𖼺𖽺 𖼹𖽦𖾐，𖼈𖽡𖾑 𖼞𖽑𖽙 𖼣𖽙𖾐 𖼞𖽳𖾐 𖼮𖽑𖽡𖾐 𖼖𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼳𖽶𖾐 𖼦𖽑𖽙𖾐 𖼊𖽻𖾐． 20 𖼐𖽦𖾐 𖼄𖽺！ 𖼖𖽪𖾐 𖼦𖽑𖽺𖾑 𖼊𖽝𖾐 𖼦𖽑𖽔𖾐 𖼮𖽶𖾐 𖼐𖽳 𖼺𖽪𖾐 𖼣𖽻𖾐，𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼖𖽳𖾐 𖼮𖽡𖽺．𖼞𖽑𖽶𖾑 𖼖𖽪𖾐 𖼻𖽙 𖼊𖽑𖽡 𖼊𖽝𖾐 𖼄𖽔 𖼣𖽻𖾐 𖼖𖽔？𖼣𖽙𖾐 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼺𖽺𖾑，𖼈𖽪𖾑 𖼠𖽻𖾐 𖽂𖽙𖾐 𖼠𖽙𖾑 𖼊𖽙𖾐．”
21 𖼄𖽶 𖼹𖽡𖾐 𖼖𖽦 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼮𖽑𖽡 𖼮𖽡𖽺𖾐 𖼖𖽙𖾐 𖼮𖽑𖽻𖾐，𖼣𖽙𖾐 𖼖𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐． 22 𖼐𖽑𖽡𖾐 𖼐𖽕 𖼊𖽺𖾐 𖼮𖽡𖽪 𖼀𖽑𖽻𖾐 𖼖𖽪𖾐 𖼞𖽑𖽶𖾑 𖼠𖽻𖾐 𖼽𖽡𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼄𖽔 𖼮𖽑𖽡𖾐 𖼺𖽺 𖽃𖽙𖾑 𖼄𖽺，𖼣𖽙𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼂𖽺𖾐 𖼊𖽻𖾐．” 𖽃𖽔𖾐 𖼺𖽺𖾑，𖼖𖽪𖾐 𖼞𖽑𖽶𖾑 𖼊𖽝𖾐 𖼺𖽙 𖽃𖽳 \fr 19．22 \ft “𖼺𖽙 𖽃𖽳 ” 𖼦𖽑𖽺𖾑 “𖼽𖽳𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
𖼺𖽙 𖼍𖽙𖾐 𖼄𖽔 𖼖𖽪𖾐 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐
23 𖼖𖽚 𖼍𖽴 𖼺𖽙 𖽃𖽳 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖽃𖽔𖾑 𖼄𖽶 𖼐𖽑𖽡𖾐 𖼊𖽚𖾐 𖼊𖽦𖾐 𖼖𖽻𖾐 𖼦𖽑𖽻𖾐． 24 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖽃𖽔𖾐 𖼍𖽚𖾑 𖼐𖽺𖾐 𖼖𖽡𖽚 𖼦𖽫 𖼀𖽑𖽨 𖼺𖽙 𖼍𖽙𖾐 𖼄𖽔 𖼖𖽪𖾐 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼊𖽑𖽺 𖼹𖽺𖾐． 25 𖼖𖽪𖾐 𖼞𖽑𖽶𖾑 𖼹𖽻𖾐 𖼐𖽺𖾐 𖼊𖽺𖾐 𖼠𖽻𖾐 𖼄𖽙𖾐，𖼦𖽑𖽔𖾐 𖼖𖽺𖾑 𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼐𖽜 𖼺𖽪𖾐，𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐．
26 𖼦𖽑𖽻𖾐 𖼊𖽑𖽻𖾐，𖼖𖽚 𖼍𖽴 𖼄𖽳 𖼻𖽙 𖼄𖽳𖾑 𖼊𖽺𖾐 𖼮𖽑𖽻𖾐，𖼰𖽻𖾐 𖼀𖽑𖽚𖾐 𖼠𖽙𖾑 𖼍𖽻𖾐 𖼐𖽦𖾐 𖼺𖽺𖾑，𖼷𖽑𖽙 𖼻𖽶𖾐 𖼊𖽑𖽡 𖼮𖽑𖽡𖾐 𖼀𖽑𖽢 𖼦𖽑𖽙𖾐．
27 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼽𖽡𖾐 𖽃𖽙𖾑 𖼄𖽺 𖼊𖽑𖽡 𖼐𖽑𖽡𖾐 𖼽𖽻 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼺𖽺𖾑， 28 𖼺𖽙 𖼍𖽙𖾐 𖼄𖽔 𖼖𖽪𖾐、 𖽃𖽴 𖼄𖽚 𖼖𖽔𖾐 𖼖𖽪𖾐 𖼐𖽺𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼘𖽜𖾑 𖼐𖽦𖾐，𖼊𖽡 𖼮𖽻 𖼄𖽔 𖼮𖽑𖽡𖾐 𖼺𖽪𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖽃𖽔𖾑 𖼞𖽑𖽶 𖼍𖽪𖾐 𖼖𖽻𖾐 𖼞𖽳𖾐 𖼄𖽡𖽻𖾐，𖼣𖽡𖽳 𖼮𖽑𖽡𖽪𖾐 𖽃𖽔𖾑 𖼞𖽑𖽶 𖼖𖽙𖾐 𖼺𖽶𖾑．
29 𖽂𖽙 𖼺𖽙𖾐 𖼂𖽙𖾐 𖼊𖽺𖾐 𖼠𖽻𖾐 𖼄𖽙𖾐 𖼞𖽳𖾐 𖼖𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼄𖽳 𖼮𖽡𖽦，𖼖𖽚 𖼍𖽴 𖼞𖽑𖽙𖾐 𖼮𖽻𖾐 𖼠𖽚 𖼺𖽪𖾐 𖼖𖽪𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼀𖽑𖽚𖾐 𖼄𖽡𖾑 𖼊𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽙𖾐 𖼺𖽺𖾑，𖼖𖽚 𖼍𖽴 𖼊𖽑𖽺 𖼄𖽳 𖼮𖽡𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．
𖼄𖽚 𖼽𖽔𖾐 𖼷𖽑𖽻𖾐 𖼮𖽑𖽪𖾐 𖼐𖽺𖾐 𖼽𖽕𖾑 𖼄𖽜 𖼷𖽑𖽻𖾐 𖼮𖽑𖽪𖾐 𖼞𖽪𖾐 𖼮𖽡𖽺𖾐
30 𖼖𖽚 𖼍𖽴 𖼺𖽙 𖽃𖽳 𖼖𖽪𖾐 𖼞𖽳𖾐 𖼮𖽻𖾐 𖼮𖽡𖽮𖾐 𖼺𖽺𖾑，𖼽𖽻 𖼻𖽙 𖼄𖽳 𖼐𖽑𖽡 𖼽𖽚𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼺𖽙 𖽃𖽳 𖼖𖽪𖾐 𖼞𖽳𖾐 𖼰𖽡𖾑 𖼦𖽑𖽙𖾐，𖽂𖽙 𖼰𖽡𖽺𖾐 𖼊𖽦𖾐 𖼽𖽡𖾐 𖼞𖽑𖽻𖾑 𖼮𖽻𖾐．𖼖𖽚 𖼍𖽴 𖼽𖽻 𖼻𖽙 𖼄𖽳 𖼐𖽑𖽡 𖼽𖽚𖾐 𖼖𖽙𖾐 𖼮𖽑𖽻𖾐 𖼈𖽦𖾑 𖼦𖽑𖽺𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼮𖽻𖾐． 31 𖼻𖽙 𖼄𖽳 𖼈𖽳 𖼀𖽑𖽚𖾐 𖼻𖽙 𖼄𖽳 𖼽𖽳𖾐 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖽃𖽔 𖼀𖽙 𖼄𖽻 𖼦𖽑𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼻𖽙 𖼐𖽜𖾐 𖼊𖽺𖾐 𖼊𖽑𖽺 𖼷𖽑𖽻𖾐 𖼮𖽻𖾐 𖼮𖽡𖽺𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖽃𖽔 𖼐𖽺𖾑 𖼖𖽙𖾐 𖼮𖽑𖽻𖾐 𖼈𖽴 𖼊𖽴𖾐 𖼺𖽪𖾐 𖼄𖽔 𖼮𖽻𖾐． 32 𖼖𖽻𖾐！ 𖽃𖽔 𖼐𖽺𖾑 𖼮𖽶𖾐 𖼀𖽳 𖼈𖽺𖾐 𖽃𖽔 𖼀𖽙 𖼞𖽜 𖼊𖽻𖾐 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼦𖽑𖽦 𖼮𖽑𖽳𖾐．𖼦𖽑𖽺𖾑 𖼻𖽻𖾐，𖽃𖽔 𖼐𖽺𖾑 𖽃𖽔 𖼀𖽙 𖼞𖽳𖾐 𖼮𖽑𖽻𖾐 𖽂𖽙𖾐 𖼻𖽙 𖼦𖽑𖽨𖾐 𖼻𖽳𖾐 𖼹𖽦𖾑 𖼊𖽙𖾐．”
33 𖽃𖽔𖾐 𖼺𖽺𖾑，𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽺𖾐，𖼽𖽻 𖼈𖽳𖾐 𖼮𖽶𖾐 𖼀𖽳 𖼈𖽺𖾐 𖼽𖽻 𖼀𖽙 𖼞𖽜 𖼊𖽻𖾐，𖼻𖽙 𖼄𖽳 𖼈𖽳 𖼊𖽡 𖼽𖽡𖾐 𖼽𖽻 𖼀𖽙 𖼖𖽙𖾐 𖼮𖽑𖽻𖾐 𖼦𖽑𖽦，𖼽𖽻 𖼻𖽙 𖼄𖽳 𖼞𖽑𖽙 𖼊𖽑𖽻𖾐 𖼽𖽦 𖼹𖽺𖾐，𖼞𖽑𖽙 𖼊𖽑𖽻𖾐 𖼍𖽪𖾐 𖼖𖽻𖾐 𖼺𖽪𖾐 𖼣𖽻𖾐，𖼽𖽻 𖼀𖽙 𖼊𖽑𖽡 𖼳𖽶 𖼖𖽺𖾑 𖼄𖽔 𖼺𖽝𖾑．
34 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼻𖽙 𖼄𖽳 𖼈𖽳 𖼹𖽦𖾑 𖼻𖽙 𖼄𖽳 𖼽𖽳𖾐 𖼖𖽙𖾐 𖼀𖽦𖾐：“𖽃𖽔 𖼄𖽺𖾐 𖼣𖽙𖾐 𖽃𖽔 𖼀𖽙 𖼖𖽙𖾐 𖼮𖽑𖽻𖾐 𖼦𖽑𖽦，𖽃𖽙𖾑 𖼄𖽺𖾐 𖽃𖽔 𖼐𖽺𖾑 𖼹𖽦𖾑 𖼮𖽶𖾐 𖼀𖽳 𖼈𖽺𖾐 𖽃𖽔 𖼀𖽙 𖼞𖽜 𖼊𖽻𖾐，𖼐𖽑𖽡𖾐 𖼊𖽡 𖼽𖽡𖾐 𖽃𖽔 𖼀𖽙 𖼖𖽙𖾐 𖼮𖽑𖽻𖾐 𖼦𖽑𖽦 𖼮𖽑𖽳𖾐．𖼦𖽑𖽺𖾑 𖼻𖽻𖾐，𖽃𖽔 𖼐𖽺𖾑 𖽃𖽔 𖼀𖽙 𖼞𖽳𖾐 𖼮𖽑𖽻𖾐 𖽂𖽙𖾐 𖼻𖽙 𖼦𖽑𖽨𖾐 𖼻𖽳𖾐 𖼹𖽦𖾑 𖼊𖽙𖾐．” 35 𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽺𖾐，𖼽𖽻 𖼈𖽳𖾐 𖼹𖽦𖾑 𖼮𖽶𖾐 𖼀𖽳 𖼈𖽺𖾐 𖼽𖽻 𖼀𖽙 𖼞𖽜 𖼊𖽻𖾐 𖼺𖽺𖾑，𖼻𖽙 𖼄𖽳 𖼽𖽳𖾐 𖼊𖽡 𖼽𖽡𖾐 𖼽𖽻 𖼀𖽙 𖼖𖽙𖾐 𖼮𖽑𖽻𖾐 𖼦𖽑𖽦，𖼽𖽻 𖼻𖽙 𖼄𖽳 𖼞𖽑𖽙 𖼊𖽑𖽻𖾐 𖼽𖽦 𖼹𖽺𖾐，𖼞𖽑𖽙 𖼊𖽑𖽻𖾐 𖼍𖽪𖾐 𖼖𖽻𖾐 𖼺𖽪𖾐 𖼣𖽻𖾐，𖼽𖽻 𖼀𖽙 𖼊𖽑𖽡 𖼳𖽶 𖼖𖽺𖾑 𖼄𖽔 𖼺𖽝𖾑．