𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽶 𖼹𖽡𖾐 𖼖𖽦 𖼊𖽑𖽺 𖼠𖽙𖾐 𖼳𖽙𖾐
18
1 𖼽𖽺𖾐 𖼦𖽴 𖼦𖽫 𖼄𖽕𖾑 𖼖𖽡𖾑 𖼞𖽳𖾐 𖼺𖽧𖾐 𖼈𖽳 𖼷𖽡𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽜 𖼄𖽡𖽻𖾐．𖼞𖽑𖽶𖾑 𖼊𖽑𖽡 𖼠𖽸𖾑 𖼦𖽑𖽔𖾐 𖼮𖽶𖾐 𖼷𖽑𖽙𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼦𖽑𖽺𖾐 𖼠𖽴𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼊𖽡𖾐 𖼍𖽳𖾐． 2 𖼽𖽻 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼐𖽕 𖼊𖽺𖾐 𖼷𖽑𖽻𖾐 𖼺𖽙𖾐 𖼽𖽚𖾐 𖼽𖽻 𖽃𖽙𖾑 𖼄𖽺 𖼀𖽳 𖼦𖽑𖽡𖽚 𖼍𖽳𖾐 𖼞𖽳𖾐 𖼄𖽡𖽻𖾐．𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖼦𖽑𖽺𖾐 𖼠𖽴𖾐 𖽃𖽔𖾑 𖼊𖽪 𖼮𖽑𖽡𖽺 𖼮𖽑𖽻𖾐 𖼰𖽡𖽴 𖼂𖽡𖾐 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼹𖽶𖾐，𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐．3 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽑𖽔 𖼽𖽡𖾐 𖼦𖽻． 4 𖼣𖽙𖾐 𖽃𖽔𖾐 𖼮𖽡𖽦𖾐 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼮𖽑𖽡𖾑 𖼀𖽑𖽦𖾐 𖼷𖽑𖽡，𖽃𖽔𖾐 𖼺𖽺𖾑 𖼺𖽧𖾐 𖼷𖽡𖾐 𖼞𖽑𖽶𖾐 𖼊𖽑𖽡 𖼠𖽸𖾑 𖼐𖽙 𖼺𖽺． 5 𖼦𖽑𖽔𖾐 𖼖𖽺𖾑 𖼣𖽙𖾐 𖼽𖽡𖾐 𖽃𖽔𖾑 𖼂𖽻𖾐 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼐𖽑𖽡𖾐 𖼈𖽳𖾐 𖼞𖽜 𖼷𖽙，𖼐𖽑𖽡𖾐 𖼈𖽳𖾐 𖽂𖽙 𖼞𖽶𖾐 𖼞𖽑𖽙 𖼦𖽑𖽻𖾐 𖼺𖽺𖾑 𖼺𖽜 𖼽𖽡𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼮𖽜𖾐 𖼀𖽑𖽙 𖼞𖽳𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐，𖼦𖽑𖽺𖾑 𖼻𖽻𖾐 𖼂𖽺𖾐 𖼷𖽻．”
𖼽𖽻 𖼈𖽳𖾐 𖼀𖽦𖾐：“𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼻𖽻𖾐．”
6 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽕 𖼐𖽕𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼊𖽡 𖼽𖽡𖾐，𖼺𖽔 𖼖𖽔𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼀𖽦𖾐：“𖼐𖽑𖽡𖾐 𖼐𖽕 𖼐𖽕𖾐 𖼷𖽙𖾐 𖼄𖽶𖾐 𖼹𖽳𖾐 𖼺𖽙𖾐 𖼳𖽜𖾐 𖼄𖽙𖾐 \fr 18．6 \ft “𖼷𖽙𖾐 𖼄𖽶𖾐 𖼺𖽙𖾐 𖼳𖽜𖾐 𖼄𖽙𖾐 ” 𖽃𖽔 𖼖𖽙𖾐 “𖼷𖽑𖽡𖾐 𖼐𖽑𖽡 𖼰𖽡𖾐 ” 𖼮𖽻𖾐． 𖼈𖽺𖾐 𖼺𖽺𖾑，𖼻𖽸 𖽃𖽔𖾑 𖼂𖽻𖾐 𖼂𖽺𖾐．” 7 𖼽𖽕𖾑 𖼂𖽚 𖼖𖽔𖾐 𖼦𖽗 𖼹𖽦𖾑 𖼰𖽡𖽴 𖼐𖽑𖽡 𖼷𖽪𖾐 𖼠𖽻𖾐 𖼞𖽑𖽶𖾐 𖼽𖽡𖾐，𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼐𖽑𖽡 𖼻𖽙 𖼷𖽑𖽪𖾐 𖼊𖽑𖽡 𖼮𖽑𖽡𖾐 𖼺𖽶𖾐 𖼂𖽻𖾐 𖼖𖽻𖾐，𖼰𖽡𖽻𖾐 𖼮𖽜𖾐 𖼀𖽑𖽙 𖼊𖽑𖽺 𖼞𖽜，𖼮𖽜𖾐 𖼀𖽑𖽙 𖼐𖽕 𖼊𖽺𖾐 𖼽𖽡𖾐 𖼂𖽺𖾐 𖼳𖽡𖽻𖾐． 8 𖼽𖽕𖾑 𖼂𖽚 𖼖𖽔𖾐 𖼦𖽗 𖼹𖽦𖾑 𖼀𖽕𖾑 𖼮𖽸𖾐 𖼰𖽡𖾐 𖼷𖽑𖽳𖾐、 𖼀𖽕𖾑 𖼮𖽸𖾐 𖼈𖽡𖾐 𖼐𖽺𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼺𖽪𖾐 𖼐𖽑𖽡 𖼻𖽙 𖼷𖽑𖽪𖾐 𖼦𖽙 𖼈𖽺𖾐 𖼂𖽻𖾐 𖼖𖽻𖾐 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑．𖼽𖽻 𖼈𖽳𖾐 𖼷𖽙 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼺𖽧𖾐 𖼷𖽡𖾐 𖼞𖽑𖽶𖾐 𖼦𖽑𖽡𖽚 𖼽𖽻 𖼈𖽳𖾐 𖼊𖽑𖽺 𖼠𖽙𖾐 𖼳𖽙𖾐．
𖼺𖽔 𖼖𖽔𖾐 𖼞𖽜 𖼻𖽙 𖼽𖽚𖾐 𖼮𖽙𖾐
9 𖼷𖽑𖽻𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼄𖽳 𖼻𖽙 𖼺𖽔 𖼖𖽔𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼽𖽻 𖼊𖽻 𖼞𖽑𖽚 𖼀𖽦𖾐：“𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽻𖾐 𖼍𖽳𖾐．”
10 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼀𖽦𖾐：“𖼐𖽦𖾑 𖼦𖽑𖽦 𖼦𖽑𖽺𖾑 𖼊𖽑𖽙𖾐 𖼮𖽑𖽡𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼀𖽑𖽚𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼞𖽚 𖼖𖽻𖾐．𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼄𖽳 𖼻𖽙 𖼺𖽔 𖼖𖽔𖾐 𖼷𖽑𖽜𖾑 𖼷𖽑𖽜𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐．”
𖼺𖽔 𖼖𖽔𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼠𖽙𖾑 𖼍𖽻𖾐 𖼀𖽳 𖼦𖽑𖽺𖾐 𖼠𖽴𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼮𖽻𖾐，𖼽𖽻 𖼖𖽺𖾑 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼦𖽑𖽻𖾐．
11 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼺𖽔 𖼖𖽔𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐，𖼺𖽔 𖼖𖽔𖾐 𖼞𖽳𖾐 𖼞𖽶𖾐 𖼮𖽑𖽶 𖼖𖽳𖾑 𖼖𖽺𖾑 𖼐𖽙 𖼦𖽑𖽻𖾐． 12 𖼺𖽔 𖼖𖽔𖾐 𖼞𖽑𖽶 𖼈𖽳𖾐 𖼀𖽦𖾐：“𖽃𖽔𖾑 𖼄𖽳𖾐 𖼣𖽙𖾐 𖼞𖽶𖾐 𖼮𖽑𖽶 𖼞𖽫 𖼦𖽑𖽻𖾐，𖼣𖽙𖾐 𖼺𖽡 𖼀𖽑𖽙 𖼖𖽺𖾑 𖼄𖽻 𖼦𖽑𖽻𖾐，𖽃𖽔 𖼊𖽺𖾐 𖼣𖽻𖾐 𖼺𖽺𖾑 𖼦𖽑𖽺𖾑 𖼳𖽶 𖼖𖽺𖾑 𖼊𖽪𖾐 𖼄𖽡𖽻 𖼮𖽻𖾐 𖼠𖽸𖾑 𖼐𖽺𖾑？”
13 𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐：“𖼺𖽔 𖼖𖽔𖾐 𖽃𖽔𖾐 𖼹𖽻𖾐 𖼞𖽑𖽶 𖼈𖽳𖾐 𖼺𖽺𖾑，𖼀𖽦𖾐：‘ 𖼣𖽙𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼠𖽸𖾑 𖼍𖽳𖾐 𖼖𖽔𖾑？’ 14 𖼽𖽺𖾐 𖼦𖽴 𖼦𖽫 𖼂𖽺𖾐 𖼀𖽑𖽢 𖼄𖽔 𖼠𖽸𖾑 𖼺𖽪𖾐 𖼄𖽡𖽻 𖼮𖽻𖾐 𖼍𖽳𖾐 𖼖𖽔？𖼐𖽦𖾑 𖼦𖽑𖽦 𖼦𖽑𖽺𖾑 𖼊𖽑𖽙𖾐 𖼮𖽑𖽡𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼀𖽑𖽚𖾐 𖼦𖽑𖽺𖾑 𖼠𖽻𖾐 𖼞𖽚 𖼖𖽻𖾐．𖼞𖽑𖽶𖾑 𖼮𖽶𖾐，𖼺𖽔 𖼖𖽔𖾐 𖼷𖽑𖽜𖾑 𖼷𖽑𖽜𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐．”
15 𖼺𖽔 𖼖𖽔𖾐 𖼮𖽡𖽮𖾐 𖼍𖽪𖾐 𖼖𖽻𖾐 𖼺𖽺𖾑，𖼵𖽜𖾑 𖼄𖽔 𖼦𖽶𖾐，𖼀𖽦𖾐：“𖼣𖽙𖾐 𖼞𖽑𖽶 𖼈𖽳𖾐 𖼄𖽔 𖼊𖽑𖽝𖾐．”
𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼄𖽔 𖼣𖽻𖾐，𖼐𖽑𖽡𖾐 𖼠𖽕𖾐 𖼰𖽶𖾐 𖼈𖽳𖾐 𖼺𖽪𖾐 𖼣𖽻𖾐 𖼍𖽳𖾐．”
𖼽𖽕𖾑 𖼂𖽚 𖼖𖽔𖾐 𖼦𖽗 𖼺𖽙 𖼍𖽙𖾐 𖼄𖽔 𖼖𖽪𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐
16 𖽃𖽔𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼺𖽜 𖼍𖽪𖾐，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼀𖽳 𖼀𖽑𖽡𖽻 𖼘𖽜𖾑 𖼐𖽦𖾐．𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽜，𖼽𖽻 𖼈𖽳𖾐 𖼊𖽑𖽺 𖼮𖽨𖾐 𖼄𖽙𖾐 𖼊𖽑𖽡 𖼊𖽑𖽜𖾐 𖼦𖽑𖽙𖾐． 17 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼂𖽺𖾐 𖼊𖽻𖾐 𖼺𖽪𖾐 𖼄𖽡𖽻，𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼰𖽳𖾐 𖼍𖽡 𖼊𖽙𖾐 𖼖𖽔𖾑？ 18 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼷𖽑𖽜𖾑 𖼷𖽑𖽜𖾐 𖽂𖽙 𖼊𖽙𖾐 𖼞𖽳𖾐 𖼠𖽚 𖼊𖽴𖾐 𖼍𖽙𖾑 𖼊𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼞𖽳𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙，𖼽𖽻 𖼖𖽙𖾐 𖼀𖽙𖾐 𖼺𖽺𖾑 𖼷𖽑𖽜𖾑 𖼷𖽑𖽜𖾐 𖼄𖽢 𖽂𖽙𖾐 𖼊𖽻𖾐． 19 𖼣𖽙𖾐 𖼽𖽻 𖼊𖽑𖽺 𖼺𖽺𖾐 𖼄𖽳𖾐 𖼺𖽪𖾐，𖼽𖽻 𖼞𖽜 𖼽𖽻 𖼊𖽑𖽡 𖼈𖽴 𖼷𖽑𖽻𖾐 𖼐𖽺𖾐 𖼽𖽻 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼀𖽦𖾐 𖼄𖽪𖾑 𖼖𖽡𖾐，𖼣𖽙𖾐 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼳𖽪𖾐，𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼹𖽳𖾐 𖼂𖽺𖾐．𖽃𖽔𖾐 𖼺𖽺𖾑，𖼣𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽺 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼊𖽻 𖼂𖽪𖾑 𖼞𖽜 𖼄𖽳𖾑 𖼄𖽳 𖼀𖽑𖽢 𖼦𖽑𖽻𖾐 𖼊𖽻𖾐．”
20 𖼽𖽺𖾐 𖼦𖽴 𖼦𖽫 𖼀𖽦𖾐：“𖼺𖽙 𖼍𖽙𖾐 𖼄𖽔 𖼖𖽪𖾐 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼀𖽡𖾐 𖼖𖽚𖾐，𖼽𖽻 𖼈𖽳𖾐 𖼊𖽑𖽺 𖼍𖽶𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖼦𖽑𖽔𖾐 𖼮𖽶𖾐 𖼈𖽳 𖼰𖽡． 21 𖽃𖽔𖾑 𖼄𖽳𖾐 𖼣𖽙𖾐 𖼹𖽺𖾐 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼂𖽺𖾐 𖼊𖽪𖾐 𖼊𖽑𖽺 𖼐𖽦𖾐，𖼣𖽙𖾐 𖼞𖽑𖽙𖾐 𖼊𖽻 𖼮𖽨 𖼺𖽪𖾐 𖼖𖽙𖾐 𖼺𖽶𖾑 𖼐𖽺𖾑 𖼄𖽔 𖼺𖽶𖾑？𖼄𖽔 𖼺𖽶𖾑 𖼀𖽦𖾐 𖼖𖽺𖾑 𖼣𖽙𖾐 𖼺𖽝𖾑 𖼊𖽻𖾐．”
22 𖼷𖽑𖽻𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼠𖽻𖾐 𖼊𖽑𖽺 𖼐𖽑𖽡 𖼽𖽚𖾐 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼽𖽡𖾐．𖼽𖽕𖾑 𖼂𖽚 𖼖𖽔𖾐 𖼦𖽗 𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼍𖽳𖾐． 23 𖼽𖽕𖾑 𖼂𖽚 𖼖𖽔𖾐 𖼦𖽗 𖼺𖽜 𖼽𖽻 𖼖𖽙𖾐 𖼐𖽳 𖼽𖽡𖾐，𖼀𖽦𖾐：“𖼐𖽑𖽡𖾐 𖼠𖽕𖾐 𖼰𖽶𖾐 𖼷𖽑𖽻𖾐 𖼹𖽳𖾐 𖼐𖽺𖾐 𖼷𖽑𖽻𖾐 𖼊𖽶𖾐 𖼊𖽑𖽺 𖼊𖽑𖽡 𖼊𖽑𖽜 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐 𖼖𖽔𖾑？ 24 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼣𖽙 𖼷𖽑𖽡𖾐 𖼽𖽚𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼠𖽕𖾐 𖼰𖽶𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐 𖼖𖽔𖾑？𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼞𖽑𖽶𖾑 𖼣𖽙 𖼷𖽑𖽡𖾐 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽡𖽺 𖼦𖽑𖽙𖾐 𖼊𖽻𖾐 𖼄𖽔 𖼣𖽻𖾐 𖼖𖽔？ 25 𖼐𖽑𖽡𖾐 𖼠𖽕𖾐 𖼰𖽶𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼄𖽔 𖼠𖽸𖾑 𖼊𖽻𖾐！ 𖼷𖽑𖽻𖾐 𖼹𖽳𖾐 𖼐𖽺𖾐 𖼷𖽑𖽻𖾐 𖼊𖽶𖾐 𖼊𖽑𖽺 𖼊𖽑𖽡 𖼊𖽑𖽜 𖼺𖽦 𖼦𖽑𖽙𖾐 𖼺𖽺𖾑，𖼷𖽑𖽻𖾐 𖼹𖽳𖾐 𖼞𖽜 𖼷𖽑𖽻𖾐 𖼊𖽶𖾐 𖼖𖽙𖾐 𖼺𖽶𖾑 𖼦𖽹𖾑 𖼄𖽳𖾐，𖼦𖽑𖽺𖾑 𖼳𖽶 𖼄𖽡𖽻 𖼐𖽑𖽡𖾐 𖼠𖽕𖾐 𖼰𖽶𖾐 𖼄𖽔 𖼂𖽺𖾐 𖼊𖽻𖾐！ 𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼺𖽪𖾐 𖼺𖽡 𖼀𖽑𖽙，𖼀𖽳𖾐 𖼈𖽡𖾐 𖼳𖽶 𖼄𖽡𖽻 𖼄𖽔 𖼂𖽺𖾐 𖼠𖽸𖾑 𖼖𖽔𖾑？”
26 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼣𖽙 𖼷𖽑𖽡𖾐 𖼽𖽚𖾐 𖼰𖽙𖾐 𖽂𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽡𖽺 𖼦𖽑𖽙𖾐 𖼊𖽻𖾐．”
27 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼣𖽙𖾐 𖼐𖽑𖽡𖾑 𖼄𖽶𖾐 𖼍𖽺𖾑 𖼣𖽻𖾐 𖼊𖽑𖽻𖾐，𖼦𖽑𖽔𖾐 𖼖𖽺𖾑 𖼺𖽡 𖼀𖽑𖽙 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼂𖽡𖾑． 28 𖼷𖽑𖽻𖾐 𖼹𖽳𖾐 𖼣𖽙 𖼷𖽑𖽡𖾐 𖼽𖽚𖾐 𖼠𖽻𖾐 𖼊𖽑𖽺 𖼣𖽙 𖼽𖽚𖾐 𖼣𖽻𖾐 𖼐𖽑𖽡𖽪𖾑 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼣𖽙 𖼽𖽚𖾐 𖼣𖽻𖾐 𖼐𖽑𖽡𖽪𖾑 𖼖𖽙𖾐 𖼀𖽙𖾐 𖼺𖽺𖾑，𖼖𖽪𖾐 𖼄𖽳𖾑 𖼄𖽳 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐 𖼖𖽔𖾑？”
𖼽𖽻 𖼀𖽦𖾐：“𖼣𖽙𖾐 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼖𖽡𖾐 𖼷𖽑𖽡𖾐 𖼣𖽙 𖼽𖽚𖾐 𖼰𖽙𖾐 𖽂𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼖𖽪𖾐 𖼞𖽑𖽶𖾑 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐．”
29 𖼽𖽕𖾑 𖼂𖽚 𖼖𖽔𖾐 𖼦𖽗 𖼦𖽑𖽔𖾐 𖼖𖽺𖾑 𖼀𖽦𖾐：“𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼖𖽡𖾐 𖼷𖽑𖽡𖾐 𖼽𖽚𖾐 𖼍𖽺𖾑 𖼰𖽙𖾐 𖽂𖽙𖾐 𖼊𖽑𖽡𖾑 𖼣𖽻𖾐 𖼐𖽺𖾑？”
𖼽𖽻 𖼀𖽦𖾐：“𖼷𖽑𖽻𖾐 𖼹𖽳𖾐 𖼦𖽑𖽺𖾑 𖼖𖽡𖾐 𖼷𖽑𖽡𖾐 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼦𖽑𖽔𖾐 𖼖𖽺𖾑 𖼖𖽪𖾐 𖼞𖽑𖽶𖾑 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐．”
30 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼺𖽡 𖼀𖽑𖽙 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽑𖽔 𖼀𖽶 𖼻𖽶 𖼞𖽜，𖼣𖽙𖾐 𖼞𖽜 𖼀𖽦𖾐 𖼺𖽺：‘ 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼺𖽙𖾐 𖼷𖽑𖽡𖾐 𖼽𖽚𖾐 𖼍𖽺𖾑 𖼰𖽙𖾐 𖽂𖽙𖾐 𖼊𖽑𖽡𖾑 𖼣𖽻𖾐 𖼐𖽺𖾑？’”
𖼽𖽻 𖼀𖽦𖾐：“𖼣𖽙𖾐 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼺𖽙𖾐 𖼷𖽑𖽡𖾐 𖼽𖽚𖾐 𖼰𖽙𖾐 𖽂𖽙𖾐 𖼊𖽡𖾑𖽑 𖼣𖽻𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼄𖽔 𖼂𖽺𖾐 𖼊𖽻𖾐．”
31 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼣𖽙𖾐 𖼦𖽑𖽔𖾐 𖼖𖽺𖾑 𖼺𖽡 𖼀𖽑𖽙 𖼖𖽙𖾐 𖼀𖽦𖾐 𖼂𖽡𖾑，𖼷𖽑𖽻𖾐 𖼹𖽳𖾐 𖼐𖽑𖽡 𖼷𖽑𖽡𖾐 𖼽𖽚𖾐 𖼍𖽺𖾑 𖼰𖽙𖾐 𖽂𖽙𖾐 𖼊𖽡𖾑𖽑 𖼣𖽻𖾐 𖼐𖽺𖾑？”
𖼽𖽻 𖼀𖽦𖾐：“𖼷𖽑𖽻𖾐 𖼹𖽳𖾐 𖼦𖽑𖽺𖾑 𖼐𖽑𖽡 𖼷𖽑𖽡𖾐 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼦𖽑𖽔𖾐 𖼖𖽺𖾑 𖼖𖽪𖾐 𖼞𖽑𖽶𖾑 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐．”
32 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽦𖾐：“𖼺𖽡 𖼀𖽑𖽙 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽑𖽔 𖼀𖽶 𖼻𖽶 𖼞𖽜，𖼣𖽙𖾐 𖼹𖽦𖾑 𖼊𖽑𖽡 𖼂𖽦𖾑 𖼀𖽦𖾐，𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼹𖽳𖾐 𖼷𖽑𖽡𖾐 𖼽𖽚𖾐 𖼍𖽺𖾑 𖼰𖽙𖾐 𖽂𖽙𖾐 𖼊𖽑𖽡𖾑 𖼣𖽻𖾐 𖼐𖽺𖾑？”
𖼽𖽻 𖼀𖽦𖾐：“𖼷𖽑𖽻𖾐 𖼹𖽳𖾐 𖼦𖽑𖽺𖾑 𖼷𖽑𖽡𖾐 𖼽𖽚𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼦𖽑𖽔𖾐 𖼖𖽺𖾑 𖼖𖽪𖾐 𖼞𖽑𖽶𖾑 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐．”
33 𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼺𖽺𖾑 𖼺𖽜 𖼽𖽡𖾐 𖼦𖽑𖽙𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽺𖾑 𖼀𖽑𖽚𖾐 𖼺𖽺𖾑 𖼽𖽻 𖼄𖽳𖾑 𖼮𖽻𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．