𖼽𖽕𖾑 𖼂𖽚 𖼖𖽕 𖼊𖽑𖽺 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽡𖾐 𖼂𖽚𖾐
17
1 𖼽𖽕𖾑 𖼂𖽚 𖼖𖽕 𖼠𖽶𖾐 𖼷𖽑𖽡𖾐 𖼠𖽶𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼞𖽜 𖼄𖽡𖽻𖾐，𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼐𖽑𖽡𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽦𖾐 𖼊𖽪𖾐 𖼄𖽔 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼐𖽑𖽧𖾐 𖼰𖽶𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼂𖽺𖾐 𖼖𖽡𖾐． 2 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼀𖽑𖽙 𖼄𖽨 𖽂𖽙 𖼊𖽙𖾐 𖼊𖽻𖾐．”3 𖼽𖽕𖾑 𖼂𖽚 𖼖𖽕 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐，𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼽𖽻 𖼖𖽙𖾐 𖼀𖽦𖾐： 4 “𖼐𖽦𖾐 𖼄𖽺！ 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐：𖼐𖽑𖽡𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼞𖽳𖾐 𖽃𖽔 𖼀𖽙 𖼂𖽺𖾐 𖼊𖽻𖾐． 5 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼐𖽑𖽡𖾐 𖼄𖽡𖾐 𖼽𖽕𖾑 𖼂𖽚 𖼖𖽕 𖼄𖽔 𖽃𖽶𖾐 𖼊𖽻𖾐，𖼐𖽑𖽡𖾐 𖼊𖽑𖽺 𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽡𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼐𖽑𖽡𖾐 𖼞𖽜 𖼺𖽺𖾑 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼞𖽳𖾐 𖽃𖽔 𖼀𖽙 𖼂𖽺𖾐 𖼍𖽳𖾐 𖼦𖽑𖽻𖾐． 6 𖼣𖽙𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼀𖽑𖽙 𖼄𖽨 𖽂𖽙 𖼊𖽙𖾐，𖼠𖽚 𖼞𖽑𖽙 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽑𖽻𖾐 𖼊𖽴𖾐，𖼈𖽪𖾐 𖼍𖽦 𖼞𖽑𖽙 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼊𖽻𖾐．
7 𖼣𖽙𖾐 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐，𖼣𖽙𖾐 𖼳𖽪𖾐 𖼻𖽺𖾐 𖼺𖽺𖾑 𖼽𖽻 𖼞𖽜 𖼻𖽳𖾐 𖼹𖽦𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼂𖽺𖾐，𖼣𖽙𖾐 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼂𖽺𖾐 𖼊𖽻𖾐． 8 𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽑𖽙𖾐 𖼣𖽙𖾑 𖼮𖽻𖾐 𖼞𖽳𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐，𖼣𖽙𖾐 𖼖𖽪 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼺𖽺𖾑，𖼻𖽳𖾐 𖼹𖽦𖾐 𖼞𖽳𖾐 𖼄𖽡𖾐 𖼳𖽡𖽪 𖼂𖽺𖾐 𖼊𖽻𖾐，𖼣𖽙𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼂𖽺𖾐 𖼊𖽻𖾐．”
𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 — 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐
9 𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐：“𖼐𖽑𖽡𖾐 𖼄𖽳𖾐 𖼷𖽑𖽦𖾐 𖼊𖽑𖽺 𖼳𖽪𖾐 𖼻𖽺𖾐 𖼖𖽡𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽳𖾑 𖼄𖽳 𖼖𖽺𖾑 𖼻𖽳𖾐 𖼹𖽦𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐！ 10 𖼣𖽙𖾐 𖼞𖽑𖽙𖾐 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐：𖼐𖽑𖽡𖾐 𖼈𖽳𖾐 𖼻𖽙 𖼐𖽜𖾐 𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐，𖼐𖽑𖽡𖾐 𖼈𖽳𖾐 𖼄𖽳𖾐 𖼷𖽑𖽦𖾐 𖼦𖽑𖽺𖾑 𖼊𖽑𖽺 𖼳𖽪𖾐 𖼻𖽺𖾐 𖼷𖽻． 11 𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐，𖼦𖽑𖽺𖾑 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 𖼣𖽻𖾐． 12 𖼐𖽑𖽡𖾐 𖼈𖽳𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼞𖽳𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐 𖼺𖽪𖾐，𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼽𖽚𖾐 𖼺𖽪𖾐 𖼣𖽻𖾐 𖼦𖽻，𖼀𖽑𖽨𖾐 𖼻𖽜 𖼞𖽑𖽻𖾐 𖼂𖽻𖾑 𖼀𖽑𖽙 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼦𖽻，𖼽𖽚𖾐 𖼹𖽺𖾐 𖼖𖽻𖾐 𖼦𖽑𖽦 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐 𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐． 13 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼽𖽚𖾐 𖼺𖽪𖾐 𖼐𖽺𖾐 𖼐𖽑𖽡𖾐 𖼀𖽑𖽨𖾐 𖼻𖽜 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐，𖼄𖽳𖾑 𖼄𖽳 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐．𖼦𖽑𖽺𖾑 𖼻𖽻𖾐，𖼣𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼺𖽙 𖼍𖽴𖾑 𖼺𖽺𖾑，𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼂𖽺𖾐． 14 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼄𖽔 𖼂𖽺𖾐 𖼺𖽪𖾐 𖼻𖽙 𖼐𖽜𖾐，𖼽𖽻 𖼄𖽡𖾐 𖼷𖽑𖽜𖾑 𖼷𖽑𖽜𖾐 𖼷𖽑𖽻𖾐 𖼀𖽺 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼣𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼊𖽑𖽺 𖼀𖽑𖽚𖾐．”
𖼺𖽔 𖼖𖽦 𖼊𖽑𖽺 𖼺𖽔 𖼖𖽔𖾐 𖼄𖽡𖾐 𖼂𖽚𖾐
15 𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽦𖾐：“𖼐𖽑𖽡𖾐 𖼄𖽳 𖼻𖽙 𖼄𖽡𖾐 𖼹𖽦𖾑 𖼺𖽔 𖼖𖽦 𖼄𖽔 𖽃𖽶𖾐 𖼊𖽻𖾐，𖼽𖽻 𖼊𖽑𖽺 𖼺𖽔 𖼖𖽔𖾐 𖼄𖽡𖾐 𖼖𖽡𖾐． 16 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼄𖽢 𖼖𖽪 𖼽𖽻 𖼊𖽑𖽺 𖼄𖽻𖾑 𖼞𖽜，𖼦𖽑𖽔𖾐 𖼖𖽺𖾑 𖼽𖽻 𖼞𖽜 𖼐𖽑𖽡𖾐 𖼖𖽙𖾐 𖼀𖽙𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐．𖼣𖽙𖾐 𖼄𖽢 𖼖𖽪 𖼽𖽻 𖼊𖽑𖽺 𖼄𖽻𖾑 𖼞𖽜，𖼽𖽻 𖼞𖽜 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼞𖽳𖾐 𖽃𖽔 𖼄𖽙𖾐 𖼂𖽺𖾐，𖼈𖽪𖾐 𖼍𖽦 𖼞𖽑𖽙 𖼄𖽙𖾐 𖼽𖽻 𖼞𖽳𖾐 𖼮𖽑𖽻𖾐 𖼊𖽚𖾐 𖼊𖽻𖾐．”
17 𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽔𖾐 𖼦𖽗 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼈𖽳𖾐 𖼀𖽑𖽪𖾐 𖼊𖽑𖽧 𖼖𖽻𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼀𖽦𖾐：“𖼊𖽑𖽡 𖼦𖽑𖽙𖾐 𖼞𖽑𖽚 𖼖𖽚 𖼺𖽪𖾐 𖼷𖽑𖽻𖾐，𖼦𖽑𖽔𖾐 𖼖𖽺𖾑 𖼻𖽙 𖼽𖽚𖾐 𖼠𖽸𖾑 𖼍𖽳𖾐 𖼖𖽔𖾑？𖼺𖽔 𖼖𖽔𖾐 𖼠𖽶𖾐 𖼷𖽑𖽡𖾐 𖼞𖽑𖽚 𖼖𖽚 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼻𖽙 𖼽𖽚𖾐 𖼠𖽸𖾑 𖼍𖽳𖾐 𖼖𖽔𖾑？” 18 𖼽𖽕𖾑 𖼂𖽚 𖼖𖽔𖾐 𖼦𖽗 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽦𖾐：“𖼽𖽡 𖼳𖽸 𖼄𖽔 𖼖𖽡𖾑 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽢 𖼀𖽜𖾐 𖽂𖽙𖾐 𖼖𖽡𖾐． \fr 17．18 \ft “𖼽𖽡 𖼳𖽸 𖼄𖽔 𖼖𖽡𖾑 𖼞𖽜 𖼠𖽙𖾑 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖽂𖽙𖾐 𖼮𖽻𖾐 𖼖𖽡𖾐 ” 𖼐𖽺𖾑 “𖼽𖽡 𖼳𖽸 𖼄𖽔 𖼖𖽡𖾑 𖼞𖽜 𖼄𖽡𖾐 𖼳𖽡𖽪 𖼦𖽺𖾑𖽑 𖽂𖽙𖾐 𖼖𖽡𖾐 ” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐． ”
19 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐！ 𖼐𖽑𖽡𖾐 𖼄𖽳 𖼻𖽙 𖼺𖽔 𖼖𖽔𖾐 𖼠𖽕𖾐 𖼰𖽶𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐，𖼐𖽑𖽡𖾐 𖼽𖽻 𖼊𖽑𖽺 𖼽𖽡 𖼺𖽔 𖼄𖽡𖾐 𖼖𖽡𖾐．𖼣𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼽𖽻 𖼞𖽜 𖼻𖽳𖾐 𖼹𖽦𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼂𖽺𖾐 𖼊𖽻𖾐． 20 𖼀𖽦𖾐 𖼺𖽺𖾑 𖼽𖽡 𖼳𖽸 𖼄𖽔 𖼖𖽡𖾑 𖼖𖽙𖾐 𖼮𖽑𖽡𖾐，𖼐𖽑𖽡𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖼣𖽙𖾐 𖼊𖽻 𖼮𖽨 𖼦𖽑𖽻𖾐．𖼐𖽦𖾐 𖼄𖽺！ 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼄𖽢 𖼖𖽪 𖼽𖽻 𖼊𖽑𖽺 𖼄𖽻𖾑 𖼞𖽜，𖼽𖽻 𖼞𖽜 𖼀𖽑𖽙 𖼄𖽨 𖽂𖽙 𖼊𖽙𖾐 𖼊𖽻𖾐，𖼽𖽻 𖼷𖽑𖽜𖾑 𖼷𖽑𖽜𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼞𖽳𖾐 𖼈𖽪𖾑 𖼷𖽪𖾐 𖼊𖽑𖽺 𖼽𖽚𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼽𖽻 𖼞𖽜 𖼠𖽚 𖼈𖽳 𖼄𖽙𖾐 𖼊𖽴𖾐 𖼊𖽻𖾐． 21 𖼦𖽑𖽻𖾐 𖼊𖽑𖽻𖾐，𖼐𖽦𖾑 𖼦𖽑𖽦 𖼦𖽑𖽺𖾑 𖼊𖽑𖽙𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼺𖽔 𖼖𖽔𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼽𖽡 𖼺𖽔 𖼊𖽑𖽺 𖼽𖽚𖾐 𖼊𖽻𖾐．𖼣𖽙𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐，𖼽𖽡 𖼺𖽔 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼳𖽶 𖼣𖽻𖾐．” 22 𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼺𖽺𖾑，𖼽𖽻 𖼖𖽙𖾐 𖼀𖽜𖾐 𖼀𖽺 𖼄𖽶 𖼠𖽻𖾐 𖼊𖽑𖽺 𖼊𖽦𖾐 𖼽𖽡𖾐 𖼦𖽑𖽙𖾐．
𖽂𖽙 𖼊𖽺𖾐 𖼊𖽑𖽡 𖼰𖽻𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐
23 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖽂𖽙 𖼺𖽙𖾐 𖼂𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼽𖽻 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼐𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽻𖾐 𖼺𖽪𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖽃𖽔𖾑 𖼞𖽑𖽶𖾐 𖼽𖽚𖾐 𖼺𖽪𖾐 𖼣𖽻𖾐 𖼦𖽻，𖼀𖽑𖽨𖾐 𖼻𖽜 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼦𖽻，𖼄𖽳𖾑 𖼄𖽳 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐． 24 𖼽𖽕𖾑 𖼂𖽚 𖼖𖽔𖾐 𖼦𖽗 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼠𖽶𖾐 𖼷𖽑𖽡𖾐 𖼠𖽶𖾐 𖼞𖽑𖽚 𖼖𖽚． 25 𖼽𖽻 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼷𖽑𖽡𖾐 𖼺𖽙𖾐 𖼞𖽑𖽚 𖼖𖽚． 26 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽻 𖼻𖽙 𖼽𖽡 𖼳𖽸 𖼄𖽔 𖼖𖽡𖾑 𖼊𖽑𖽡 𖼊𖽑𖽜 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐．
27 𖼽𖽕𖾑 𖼂𖽚 𖼖𖽔𖾐 𖼦𖽗 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽻𖾐 𖼺𖽪𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖽃𖽔𖾑 𖼞𖽑𖽶𖾐 𖼽𖽚𖾐 𖼺𖽪𖾐 𖼣𖽻𖾐 𖼦𖽻，𖼀𖽑𖽨𖾐 𖼻𖽜 𖼞𖽑𖽻𖾐 𖼂𖽻𖾑 𖼀𖽑𖽙 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼦𖽻，𖼄𖽳𖾑 𖼄𖽳 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐．