𖼺𖽔 𖼖𖽦 𖼐𖽺𖾐 𖼳𖽡𖽕𖾑 𖼰𖽡𖽕 𖼞𖽪𖾐 𖼮𖽡𖽺𖾐
16
1 𖼽𖽕𖾑 𖼂𖽚 𖼖𖽕 𖼄𖽳 𖼻𖽙 𖼺𖽔 𖼖𖽦 ，𖼽𖽻 𖼖𖽙𖾐 𖼀𖽙𖾐 𖼻𖽙 𖼄𖽡𖾐 𖼐𖽜𖾐 𖼄𖽔 𖼽𖽚𖾐．𖼺𖽔 𖼖𖽦 𖼮𖽜𖾐 𖼄𖽙𖾐 𖼊𖽑𖽡 𖼽𖽚𖾐 𖼮𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼣𖽻𖾐，𖼳𖽡𖽕𖾑 𖼰𖽡𖽕 𖼄𖽡𖾐．2 𖼺𖽔 𖼖𖽦 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼄𖽔 𖼠𖽸𖾑，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼣𖽙𖾐 𖼮𖽜𖾐 𖼄𖽙𖾐 𖼖𖽙𖾐 𖼮𖽑𖽻𖾐 𖼦𖽑𖽦 𖼽𖽡𖾐，𖼽𖽻 𖼞𖽳𖾐 𖼮𖽑𖽻𖾐 𖼣𖽙𖾐 𖽃𖽔𖾐 𖼞𖽶𖾑 𖽂𖽙𖾐 𖼊𖽙𖾐 𖼖𖽡𖾐 𖼷𖽻．” 𖼽𖽕𖾑 𖼂𖽚 𖼖𖽕 𖼺𖽔 𖼖𖽦 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼮𖽶𖾐．
3 𖽃𖽔𖾐 𖼺𖽺𖾑，𖼽𖽻 𖼄𖽳 𖼻𖽙 𖼺𖽔 𖼖𖽦 𖼽𖽻 𖼮𖽜𖾐 𖼄𖽙𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼳𖽡𖽕𖾑 𖼰𖽡𖽕 𖼊𖽑𖽺 𖼀𖽑𖽨 𖼽𖽕𖾑 𖼂𖽚 𖼖𖽕 𖼞𖽳𖾐 𖼄𖽳 𖼖𖽳𖾐 𖼰𖽕𖾐．𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽕 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼷𖽑𖽡𖾐 𖼞𖽑𖽚 𖼮𖽻𖾐 𖼦𖽑𖽙𖾐．
4 𖼽𖽕𖾑 𖼂𖽚 𖼖𖽕 𖼽𖽡𖾐 𖼳𖽡𖽕𖾑 𖼰𖽡𖽕 𖼖𖽙𖾐 𖼮𖽑𖽻𖾐 𖼦𖽑𖽦，𖼳𖽡𖽕𖾑 𖼰𖽡𖽕 𖼄𖽺 𖼊𖽦𖾐．𖼳𖽡𖽕𖾑 𖼰𖽡𖽕 𖼽𖽻 𖼄𖽳𖾑 𖼄𖽺 𖼊𖽦𖾐 𖼺𖽝𖾑 𖼺𖽺𖾑，𖼽𖽻 𖼺𖽡 𖼄𖽙𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐． 5 𖼺𖽔 𖼖𖽦 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼣𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼄𖽳𖾐．𖼣𖽙𖾐 𖼮𖽜𖾐 𖼄𖽙𖾐 𖼊𖽑𖽺 𖼀𖽑𖽨 𖼐𖽑𖽡𖾐 𖼍𖽦𖾐 𖼞𖽚 𖼰𖽡𖽺𖾐，𖼽𖽻 𖼞𖽶𖾐 𖼮𖽑𖽶 𖼄𖽺 𖼊𖽦𖾐 𖼦𖽑𖽙𖾐 𖼺𖽝𖾑 𖼺𖽺𖾑，𖼣𖽙𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐．𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽡𖾐 𖼣𖽙𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼄𖽡𖽻 𖼮𖽳 𖼖𖽡𖾐．”
6 𖼽𖽕𖾑 𖼂𖽚 𖼖𖽕 𖼺𖽔 𖼖𖽦 𖼖𖽙𖾐 𖼀𖽦𖾐：“𖼮𖽜𖾐 𖼄𖽙𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽻𖾐 𖼄𖽔 𖼣𖽻𖾐 𖼖𖽔？𖼽𖽻 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼺𖽳 𖼐𖽑𖽡𖾐 𖼖𖽙𖾐 𖼮𖽻𖾐．” 𖽃𖽔𖾐 𖼺𖽺𖾑，𖼺𖽔 𖼖𖽦 𖼳𖽡𖽕𖾑 𖼰𖽡𖽕 𖼞𖽜 𖼳𖽚𖾑 𖼞𖽑𖽪 𖼷𖽶𖾐 𖼺𖽺𖾑，𖼳𖽡𖽕𖾑 𖼰𖽡𖽕 𖼮𖽡𖽪 𖼊𖽚𖾐 𖼽𖽡𖾐 𖼦𖽑𖽙𖾐．
𖼳𖽡𖽕𖾑 𖼰𖽡𖽕 𖼻𖽙 𖼽𖽚𖾐
7 𖼳𖽪𖾐 𖽃𖽳 𖼄𖽡𖾐 𖼊𖽺𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼈𖽡𖾐 𖼊𖽚𖾐 𖼀𖽙 𖼮𖽑𖽶𖾐 𖼞𖽑𖽶𖾑 𖼠𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼳𖽡𖽕𖾑 𖼰𖽡𖽕 𖼊𖽑𖽺 𖼷𖽶𖾐 𖼄𖽳𖾐， 8 𖼽𖽻 𖼊𖽑𖽺 𖼊𖽻 𖼐𖽙𖾐：“𖼺𖽔 𖼖𖽦 𖼞𖽳𖾐 𖼮𖽜𖾐 𖼄𖽙𖾐 𖼳𖽡𖽕𖾑 𖼰𖽡𖽕 ，𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 ？𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼊𖽻𖾐 𖼐𖽺𖾑？”
𖼳𖽡𖽕𖾑 𖼰𖽡𖽕 𖼀𖽦𖾐：“𖼣𖽙𖾐 𖼣𖽙𖾐 𖼺𖽡 𖼄𖽙𖾐 𖼺𖽔 𖼖𖽦 𖼞𖽳𖾐 𖼮𖽑𖽻𖾐 𖼮𖽡𖽪 𖼊𖽚𖾐 𖼖𖽻𖾐 𖼺𖽪𖾐 𖼣𖽻𖾐．”
9 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽑𖽚𖾐 𖼐𖽑𖽡𖾐 𖼺𖽡 𖼄𖽙𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼞𖽚 𖼽𖽡𖾐，𖼽𖽻 𖼊𖽑𖽺 𖼮𖽻𖾑 𖼊𖽴 𖼖𖽡𖾐．” 10 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼦𖽑𖽔𖾐 𖼖𖽺𖾑 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼀𖽑𖽙 𖼄𖽨 𖽂𖽙 𖼊𖽙𖾐 𖼍𖽪𖾐 𖼖𖽻𖾐，𖼈𖽜𖾐 𖼦𖽑𖽻𖾐 𖼄𖽔 𖼊𖽙𖾐 𖼊𖽻𖾐．”
11 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼦𖽑𖽔𖾐 𖼖𖽺𖾑 𖼽𖽻 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖼐𖽑𖽡𖾐 𖼄𖽺 𖼊𖽦𖾐 𖼦𖽑𖽻𖾐，𖼐𖽑𖽡𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐 𖼊𖽻𖾐，𖼽𖽻 𖼊𖽑𖽺 𖼽𖽡 𖼳𖽸 𖼄𖽔 𖼖𖽡𖾑 𖼄𖽡𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼞𖽳𖾐 𖼳𖽚𖾑 𖼞𖽑𖽪 𖼊𖽑𖽺 𖼊𖽻 𖼮𖽨 𖼦𖽑𖽻𖾐．
12 𖼽𖽻 𖼮𖽻𖾐 𖼮𖽡𖽺𖾐 𖼷𖽑𖽜𖾑 𖼷𖽑𖽜𖾐 𖼄𖽡𖾐 𖼳𖽡𖽻𖾐 𖼀𖽙 𖼊𖽑𖽳 𖼖𖽳𖾐 𖼄𖽪 𖼖𖽙𖾐 𖼺𖽶𖾑 𖼊𖽻𖾐．𖼽𖽻 𖼖𖽦 𖼀𖽑𖽦𖾐 𖼺𖽙𖾐 𖼊𖽑𖽺 𖼊𖽝 𖼊𖽦 𖼊𖽻𖾐，𖼺𖽙𖾐 𖼖𖽦 𖼀𖽑𖽦𖾐 𖼖𖽺𖾑 𖼽𖽻 𖼊𖽑𖽺 𖼊𖽝 𖼊𖽦 𖼊𖽻𖾐．𖼽𖽻 𖼷𖽑𖽜𖾑 𖼷𖽑𖽜𖾐 𖼈𖽧 𖼐𖽑𖽳𖾐 𖼞𖽑𖽙𖾐 𖼣𖽻𖾐 𖼖𖽙𖾐 𖼮𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽪 𖼊𖽻𖾐 \fr 16．12 \ft 𖼦𖽑𖽺𖾑 𖼊𖽑𖽡 𖼮𖽑𖽡𖽺 “𖼽𖽻 𖼷𖽑𖽜𖾑 𖼷𖽑𖽜𖾐 𖼈𖽧 𖼐𖽑𖽳𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽻𖾐 𖼊𖽻𖾐” 𖼀𖽦𖾐 𖼺𖽪𖾐 𖼖𖽺𖾑 𖼮𖽻𖾐．．”
13 𖽃𖽔𖾐 𖼺𖽺𖾑，𖼳𖽡𖽕𖾑 𖼰𖽡𖽕 𖼽𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 “𖼐𖽑𖽡𖾐 𖼦𖽑𖽺𖾑 𖼷𖽑𖽻𖾐 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐 ” 𖼰𖽕𖾐．𖼞𖽪𖾐 𖼮𖽡𖽺𖾐 𖼽𖽻 𖼀𖽦𖾐：“𖼣𖽙𖾐 𖼦𖽑𖽺𖾑 𖼠𖽻𖾐 𖼞𖽳𖾐 𖼮𖽻𖾐 𖼺𖽺𖾑，𖼷𖽑𖽻𖾐 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽂𖽙𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐．” 14 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼈𖽡𖾐 𖼊𖽪 𖼞𖽑𖽶𖾑 𖼊𖽝𖾐 𖼊𖽑𖽺 𖼂𖽧𖾑 𖽃𖽳 𖼖𖽔𖾐 𖼦𖽡𖽺 𖼖𖽦 \fr 16．14 \ft “𖼂𖽧𖾑 𖽃𖽳 𖼖𖽔𖾐 𖼦𖽡𖽺 𖼖𖽦 ” 𖼦𖽑𖽺𖾑 “𖼣𖽙𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽪𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼈𖽡𖾐 𖼊𖽪 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐，𖼈𖽡𖾐 𖼊𖽪 𖼞𖽑𖽶𖾑 𖼰𖽡𖽔𖾐 𖼍𖽡𖾐 𖼺𖽶𖾐 𖼄𖽡𖾐 𖼊𖽺𖾐 𖼐𖽺𖾐 𖼂𖽔𖾐 𖼖𖽡𖽦𖾑 𖼖𖽪𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖼣𖽻𖾐．