𖽂𖽙 𖼮𖽑𖽻 𖼺𖽪𖾑 15

𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐

1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼊𖽚𖾐 𖼊𖽑𖽧 𖼖𖽻𖾐 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖼀𖽦𖾐：“𖼽𖽕𖾑 𖼂𖽚 𖼖𖽕 ，𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐！ 𖼣𖽙𖾐 𖼐𖽑𖽡𖾐 𖼀𖽑𖽻𖾐 𖼈𖽜 𖼞𖽳𖾐 𖼮𖽑𖽨𖾑 𖼊𖽪𖾐 𖼣𖽻𖾐，𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼮𖽡 𖼖𖽪 𖼈𖽳 𖽂𖽙𖾐 𖼊𖽻𖾐．”

2 𖼽𖽕𖾑 𖼂𖽚 𖼖𖽕 𖼀𖽦𖾐：“𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！ 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼖𖽪 𖼣𖽙𖾐 𖼊𖽑𖽺 𖼄𖽻𖾑 𖼊𖽻𖾐 𖼐𖽺𖾑？𖼣𖽙𖾐 𖼻𖽙 𖼄𖽡𖾐 𖼐𖽜𖾐 𖼖𖽺𖾑 𖼄𖽔 𖼮𖽻𖾐，𖼣𖽙𖾐 𖽃𖽔𖾑 𖼞𖽑𖽶𖾐 𖼄𖽡𖾐 𖼳𖽡𖽪 𖼊𖽑𖽺 𖼖𖽦 𖼹𖽦𖾑 𖼊𖽻𖾐 𖼺𖽪𖾐，𖼞𖽑𖽶𖾑 𖼣𖽙𖾐 𖼮𖽜𖾐 𖼀𖽑𖽙 𖼍𖽕𖾑 𖼄𖽔 𖼳𖽸𖾑 𖼠𖽴 𖼖𖽪𖾐 𖼞𖽳𖾐 𖼷𖽑𖽻𖾐 𖼽𖽡 𖼖𖽡𖾑 𖼽𖽡 𖼳𖽡𖽺𖾑 𖼣𖽻𖾐．” 3 𖼽𖽕𖾑 𖼂𖽚 𖼖𖽕 𖼦𖽑𖽔𖾐 𖼖𖽺𖾑 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼣𖽙𖾐 𖼊𖽑𖽺 𖼻𖽙 𖼄𖽡𖾐 𖼐𖽜𖾐 𖼄𖽔 𖼞𖽜 𖼺𖽺𖾑，𖼣𖽙𖾐 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽻𖾐 𖼽𖽚𖾐 𖼺𖽪𖾐 𖼮𖽜𖾐 𖼀𖽑𖽙，𖼽𖽻 𖼣𖽙𖾐 𖼄𖽡𖾐 𖼳𖽡𖽪 𖼊𖽑𖽺 𖼖𖽦 𖼹𖽦𖾑 𖼺𖽪𖾐 𖼷𖽑𖽻𖾐 𖼀𖽑𖽢 𖼊𖽻𖾐．”

4 𖼽𖽺𖾐 𖼦𖽴 𖼦𖽫 𖼹𖽦𖾑 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖼀𖽦𖾐：“𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼖𖽦 𖼹𖽦𖾑 𖼺𖽪𖾐 𖼷𖽑𖽻𖾐 𖼄𖽔 𖼀𖽑𖽢 𖼊𖽻𖾐，𖼐𖽑𖽡𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼺𖽺𖾑 𖼐𖽑𖽡𖾐 𖼞𖽳𖾐 𖼖𖽦 𖼹𖽦𖾑 𖼺𖽪𖾐 𖼷𖽑𖽻𖾐 𖼂𖽺𖾐 𖼊𖽻𖾐．” 5 𖽃𖽔𖾐 𖼺𖽺𖾑，𖼽𖽻 𖼊𖽑𖽺 𖼦𖽳 𖼊𖽦 𖼀𖽙 𖼽𖽡𖾐，𖼀𖽦𖾐：“𖼐𖽑𖽡𖾐 𖼄𖽶 𖼠𖽻𖾐 𖼊𖽑𖽺 𖼘𖽜𖾑 𖼐𖽦𖾐，𖼠𖽳𖾐 𖼊𖽑𖽺 𖼈𖽜𖾐，𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼈𖽜𖾐 𖼦𖽑𖽻𖾐 𖼊𖽙𖾐 𖼖𖽔𖾑？𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼄𖽨 𖼊𖽻𖾐．”

6 𖼽𖽕𖾑 𖼂𖽚 𖼖𖽕 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽻 𖼮𖽶𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼹𖽳𖾐 𖼰𖽕𖾐．

7 𖼽𖽺𖾐 𖼦𖽴 𖼦𖽫 𖼹𖽦𖾑 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐．𖼣𖽙𖾐 𖼰𖽡𖽔𖾐 𖼖𖽴𖾑 𖼍𖽡 𖼄𖽡𖾐 𖼊𖽺𖾐 𖼈𖽮 𖽃𖽳 𖼖𖽪𖾐 𖼞𖽳𖾐 𖼮𖽑𖽻𖾐 𖼐𖽑𖽡𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．𖼣𖽙𖾐 𖼐𖽑𖽡𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐 𖼺𖽪𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐．”

8 𖼽𖽕𖾑 𖼂𖽚 𖼖𖽕 𖼀𖽦𖾐：“𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！ 𖼣𖽙𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖽂𖽙𖾐 𖼊𖽻𖾐 𖼞𖽑𖽶𖾑 𖼺𖽝𖾑 𖼊𖽙𖾐 𖼐𖽺𖾑？”

9 𖼽𖽺𖾐 𖼦𖽴 𖼦𖽫 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼀𖽙𖾐 𖼺𖽙𖾐 𖼞𖽑𖽚 𖼖𖽚 𖼺𖽪𖾐 𖼐𖽑𖽡 𖼄𖽙𖾐 𖼦𖽑𖽦 𖼊𖽑𖽡 𖼮𖽑𖽡𖾐，𖼺𖽙𖾐 𖼞𖽑𖽚 𖼖𖽚 𖼺𖽪𖾐 𖽃𖽔𖾑 𖼮𖽑𖽸 𖼄𖽙𖾐 𖼊𖽑𖽡 𖼊𖽝𖾐，𖼺𖽙𖾐 𖼞𖽑𖽚 𖼖𖽚 𖼺𖽪𖾐 𖼽𖽻𖾐 𖼖𖽙𖾐 𖼊𖽑𖽡 𖼊𖽝𖾐，𖼊𖽪 𖼂𖽡𖾐 𖼄𖽡 𖼊𖽑𖽡 𖼮𖽑𖽡𖾐 𖼐𖽺𖾐 𖼣𖽕𖾐 𖼻𖽙 𖼊𖽑𖽡 𖼮𖽑𖽡𖾐 𖼈𖽺𖾐 𖼂𖽻𖾐 𖼖𖽻𖾐．” 10 𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽕 𖼄𖽳𖾑 𖼄𖽳 𖼈𖽺𖾐 𖼂𖽻𖾐 𖼖𖽻𖾐，𖼊𖽑𖽡 𖼳𖽶𖾑 𖼳𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼞𖽑𖽡𖽳 𖼐𖽑𖽡 𖼀𖽜𖾐 𖼂𖽺𖾐，𖼀𖽑𖽨 𖼐𖽑𖽡 𖼀𖽳 𖼀𖽑𖽡𖽻 𖼍𖽙𖾑，𖼣𖽕𖾐 𖼍𖽺𖾑 𖼄𖽔 𖼞𖽑𖽡𖽳 𖼀𖽳． 11 𖼷𖽜𖾐 𖼐𖽦𖾐 𖼄𖽙𖾐 𖼄𖽶 𖼖𖽙𖾐 𖼀𖽙 𖼮𖽑𖽻𖾐 𖼮𖽑𖽙 𖼹𖽺𖾐 𖼖𖽻𖾐，𖼮𖽡𖽺 𖼳𖽶𖾐 𖼄𖽻𖾐 𖼊𖽑𖽺 𖼐𖽙，𖼽𖽕𖾑 𖼂𖽚 𖼖𖽕 𖼽𖽻 𖼈𖽳𖾐 𖼊𖽑𖽺 𖼞𖽕 𖼦𖽑𖽙𖾐．

12 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽕 𖼽𖽦 𖼄𖽳𖾑 𖼦𖽑𖽙𖾐．𖼐𖽕 𖼊𖽺𖾐，𖼐𖽦𖾑 𖼐𖽦𖾐 𖼊𖽑𖽡 𖼮𖽑𖽙𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼰𖽻𖾑 𖼍𖽡． 13 𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼠𖽕𖾐 𖼰𖽶𖾐 𖼺𖽝𖾑 𖼖𖽡𖾐，𖼠𖽙𖾑 𖼍𖽻𖾐 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼺𖽙𖾐 𖼄𖽡𖾐 𖼊𖽺𖾐 𖼞𖽳𖾐 𖼣𖽙𖾑 𖼮𖽻𖾐 𖼽𖽡𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽺𖾑，𖼽𖽻 𖼈𖽳𖾐 𖼞𖽜 𖼖𖽡𖾐 𖼦𖽑𖽙𖾐 𖼞𖽑𖽚 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐． 14 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐 𖼠𖽚，𖼣𖽙𖾐 𖽂𖽙 𖼇𖽕 𖼳𖽶 𖼊𖽻𖾐．𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼄𖽡𖽻 𖼐𖽑𖽡 𖼷𖽙 𖼊𖽪𖾐 𖼐𖽺𖾐 𖼞𖽑𖽙𖾐 𖼮𖽻𖾐 𖼳𖽶 𖼄𖽳𖾑 𖼄𖽳 𖼈𖽺𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼊𖽻𖾐． 15 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼻𖽳𖾐 𖼳𖽶𖾐 𖽂𖽙𖾐 𖼮𖽻𖾐，𖼺𖽙𖾑 𖼺𖽙𖾐 𖼊𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼷𖽑𖽻𖾐 𖼐𖽑𖽡𖾐 𖼊𖽑𖽺 𖼀𖽑𖽨 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑 𖼊𖽻𖾐． 16 𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽡𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼀𖽑𖽚𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽚 𖼖𖽻𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖽃𖽔𖾑 𖼄𖽳𖾐𖼀𖽡𖾐 𖼄𖽔 𖼖𖽚𖾐 𖼺𖽺．” 17 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼄𖽶 𖼮𖽑𖽧 𖼞𖽑𖽶𖾑 𖼮𖽶𖾐，𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼺𖽪𖾐，𖽃𖽔𖾑 𖼞𖽑𖽶 𖼊𖽚𖾐 𖼺𖽪𖾐 𖼖𖽚𖾐 𖼹𖽚 𖼐𖽺𖾐 𖼮𖽑𖽡𖽪𖾐 𖼀𖽨𖾐 𖼺𖽪𖾐 𖽃𖽔𖾐 𖼍𖽚𖾑 𖼹𖽜𖾐 𖼮𖽻𖾐，𖼦𖽙 𖼀𖽳 𖼞𖽑𖽶𖾑 𖼹𖽻𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼠𖽚 𖼽𖽡𖾐． 18 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼀𖽦𖾐：“𖽃𖽦𖾐 𖼰𖽧 𖼖𖽻𖾐 𖼮𖽻 𖼮𖽑𖽻𖾐 𖼽𖽙𖾑 𖼇𖽕 𖼖𖽔𖾐 𖼍𖽡 𖼖𖽻𖾐 𖼮𖽻 𖼄𖽙𖾐 𖼖𖽙𖾐 𖼮𖽑𖽡𖾐 𖼞𖽳𖾐 𖼄𖽡𖾐 𖼊𖽺𖾐，𖼣𖽙𖾐 𖼖𖽪 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼦𖽑𖽻𖾐． 19 𖼄𖽡𖾐 𖼊𖽺𖾐 𖼦𖽑𖽺𖾑 𖼰𖽡𖾐 𖼐𖽑𖽧 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖾐 𖼐𖽑𖽧 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽕 𖼄𖽚 𖼐𖽑𖽧 𖼮𖽑𖽪𖾐 𖼳𖽶 𖼷𖽑𖽻𖾐、 20 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼖𖽡𖾑 𖼇𖽕 𖼽𖽺𖾐 𖼮𖽑𖽪𖾐 𖼳𖽶 𖼷𖽑𖽻𖾐、 21 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼠𖽴 𖼰𖽡𖽔𖾐 𖼺𖽔 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼣𖽻𖾐．”