𖼈𖽪𖾐 𖼍𖽦 𖼖𖽡𖾐 𖼽𖽚𖾐 𖼍𖽪𖾐 𖼖𖽻𖾐 𖼈𖽪𖾐 𖼍𖽦 𖼣𖽙 𖼽𖽚𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦
14
1 𖽃𖽕𖾑 𖼖𖽔𖾐 𖼇𖽺𖾐 𖼈𖽪𖾐 𖼍𖽦 𖼳𖽶𖾑 𖼐𖽕 𖼄𖽡𖾐 𖼊𖽺𖾐 𖼠𖽕 𖼞𖽑𖽶𖾑 𖼊𖽑𖽙𖾐，𖼽𖽕𖾑 𖼖𖽲𖾑 𖼈𖽪𖾐 𖼍𖽦 𖼽𖽡 𖼖𖽔𖾐 𖼺𖽔 𖼄𖽡𖾐 𖼊𖽺𖾐 𖼠𖽕，𖼰𖽡𖾐 𖼍𖽕𖾑 𖼖𖽻 𖼄𖽔 𖼈𖽪𖾐 𖼍𖽦 𖼽𖽡 𖼖𖽕 𖼄𖽡𖾐 𖼊𖽺𖾐 𖼠𖽕，𖼊𖽑𖽧 𖼍𖽕 𖼈𖽪𖾐 𖼍𖽦 𖼠𖽜𖾐 𖼽𖽺𖾑 𖼄𖽡𖾐 𖼊𖽺𖾐 𖼠𖽕． 2 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼖𖽡𖾐 𖼽𖽚𖾐 𖼄𖽦 𖼀𖽑𖽙 𖼦𖽳 𖼺𖽺𖾑，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽡 𖼖𖽔𖾐， 𖽃𖽴 𖼄𖽚 𖼖𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽡 𖼳𖽔𖾐 ，𖼽𖽔𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼳𖽶𖾑 𖼐𖽕𖾑 ，𖼳𖽡 𖼂𖽡𖽺 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼳𖽕𖾑 𖼽𖽡 𖼂𖽡𖽦 𖼐𖽺𖾐 𖼂𖽡 𖼖𖽔𖾐 \fr 14．2 \ft “𖼂𖽡 𖼖𖽔𖾐 ” 𖼞𖽑𖽶𖾑 “𖼺𖽙 𖽃𖽳 ” 𖼣𖽻𖾐． 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼣𖽙 𖼽𖽚𖾐 𖼊𖽑𖽺 𖼊𖽝 𖼊𖽦．3 𖼈𖽪𖾐 𖼍𖽦 𖼦𖽑𖽺𖾑 𖼣𖽙 𖼽𖽚𖾐 𖼳𖽡𖾐 𖼍𖽧𖾑 \fr 14．3 \ft “𖼳𖽡𖾐 𖼍𖽧𖾑 ” 𖼖𖽻𖾐 𖼞𖽑𖽪 𖼄𖽙𖾐 𖼦𖽑𖽺𖾑 𖽃𖽔𖾑 𖼄𖽳𖾐 𖼞𖽳𖾐 𖼷𖽑𖽙 𖼈𖽡𖾐 𖼦𖽜𖾐 𖼄𖽙𖾐 𖼣𖽻𖾐． 𖼖𖽻𖾐 𖼞𖽑𖽪 𖼄𖽙𖾐 𖼞𖽳𖾐 𖼻𖽶𖾑 𖼖𖽻𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐． 4 𖼽𖽻 𖼈𖽳𖾐 𖼷𖽑𖽡𖾐 𖼐𖽑𖽡 𖼞𖽑𖽚 𖼰𖽡𖾐 𖼍𖽕𖾑 𖼖𖽻 𖼄𖽔 𖼈𖽪𖾐 𖼍𖽦 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼦𖽑𖽙𖾐，𖼷𖽑𖽡𖾐 𖼺𖽙𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐 𖼽𖽻 𖼈𖽳𖾐 𖼀𖽑𖽚𖾐 𖼊𖽦 𖼍𖽪𖾐 𖼖𖽻𖾐．
5 𖼷𖽑𖽡𖾐 𖼖𖽡𖾐 𖼞𖽑𖽚 𖼮𖽑𖽡𖾐，𖼰𖽡𖾐 𖼍𖽕𖾑 𖼖𖽻 𖼄𖽔 𖼈𖽪𖾐 𖼍𖽦 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼈𖽪𖾐 𖼍𖽦 𖼺𖽙𖾐 𖼽𖽚𖾐，𖼊𖽑𖽡 𖼊𖽑𖽜 𖼊𖽚𖾐 𖼖𖽻𖾐，𖼽𖽕𖾑 𖼊𖽑𖽴𖾑 𖼖𖽲𖾑 𖼰𖽡𖽔𖾐 𖼐𖽑𖽧 𖼖𖽪𖾐 𖼞𖽳𖾐 𖼖𖽡𖾑 𖼇𖽕 𖼽𖽺𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐，𖼦𖽔𖾐 𖼄𖽦𖾑 𖼖𖽪𖾐 𖼞𖽳𖾐 𖼺𖽪𖾐 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐，𖼳𖽔𖾐 𖼈𖽪𖽺𖾐 𖼰𖽡𖾐 𖼖𖽡𖽦𖾑 𖼊𖽑𖽧 𖼄𖽡𖾐 𖼊𖽺𖾐 𖼞𖽳𖾐 𖼽𖽡 𖼄𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐， 6 𖼳𖽡𖾐 𖽃𖽳 𖽂𖽙 𖼰𖽡𖽺𖾐 𖼞𖽳𖾐 𖼦𖽴 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐，𖼞𖽕 𖼊𖽝 𖼺𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼖𖽙𖾐 𖼐𖽳 𖼞𖽳𖾐 𖼽𖽡𖾐 𖼖𖽴𖾑 𖼂𖽔𖾐 𖼖𖽕 𖼖𖽪𖾐 𖼮𖽑𖽡𖾐． 7 𖼠𖽙𖾑 𖼍𖽻𖾐，𖼰𖽻𖾐 𖼀𖽑𖽚𖾐 𖽃𖽔𖾐 𖼄𖽧𖾑 𖼂𖽔𖾐 \fr 14．7 \ft 𖼞𖽑𖽶𖾑 “𖼰𖽡𖽔𖾐 𖼍𖽡𖾐 𖼺𖽶𖾐 ” 𖼄𖽡𖾐 𖼊𖽺𖾐 𖼣𖽻𖾐． 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼄𖽳𖾑 𖼄𖽳 𖼊𖽑𖽺 𖼐𖽻𖾑 𖼂𖽻𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼦𖽔𖾐 𖼳𖽡 𖼳𖽲𖾑 𖼊𖽑𖽔𖾐 𖼄𖽔 𖼖𖽪𖾐 𖼞𖽳𖾐 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐．
8 𖼞𖽑𖽶𖾑 𖼮𖽶𖾐，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦，𖽃𖽴 𖼄𖽚 𖼖𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦，𖼽𖽔𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦，𖼳𖽡 𖼂𖽡𖽺 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼂𖽡 𖼖𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾑 𖼣𖽙 𖼽𖽚𖾐 𖼊𖽚𖾐 𖼖𖽻𖾐，𖼄𖽦 𖼀𖽑𖽙 𖼦𖽳 𖼳𖽡𖾐 𖼍𖽧𖾑 𖼖𖽻𖾐 𖼞𖽑𖽪 𖼄𖽙𖾐 𖼞𖽳𖾐 𖼮𖽻𖾐，𖼂𖽺𖾐 𖼳𖽡𖽻𖾐 𖼀𖽑𖽢 𖼰𖽕𖾑 𖼊𖽝 𖼊𖽻𖾐． 9 𖼽𖽻 𖼈𖽳𖾐 𖼊𖽚𖾐 𖼖𖽻𖾐 𖼺𖽺𖾑，𖼽𖽡 𖼖𖽕 𖼄𖽡𖾐 𖼊𖽺𖾐 𖼞𖽳𖾐 𖼰𖽡𖾐 𖼍𖽕𖾑 𖼖𖽻 𖼄𖽔 𖼈𖽪𖾐 𖼍𖽦，𖼠𖽜𖾐 𖼽𖽺𖾑 𖼄𖽡𖾐 𖼊𖽺𖾐 𖼞𖽳𖾐 𖼊𖽑𖽧 𖼍𖽕 𖼈𖽪𖾐 𖼍𖽦，𖼳𖽶𖾑 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖽃𖽕𖾑 𖼖𖽔𖾐 𖼇𖽺𖾐 𖼈𖽪𖾐 𖼍𖽦 𖼐𖽺𖾐 𖼽𖽡 𖼖𖽔𖾐 𖼺𖽔 𖼄𖽡𖾐 𖼊𖽺𖾐 𖼞𖽳𖾐 𖼽𖽕𖾑 𖼖𖽲𖾑 𖼈𖽪𖾐 𖼍𖽦 𖼖𖽡𖾐 𖼽𖽚𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦．𖼦𖽑𖽺𖾑 𖼈𖽪𖾐 𖼍𖽦 𖼖𖽡𖾐 𖼽𖽚𖾐 𖼐𖽺𖾐 𖼈𖽪𖾐 𖼍𖽦 𖼣𖽙 𖼽𖽚𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼺𖽪𖾐 𖼣𖽻𖾐． 10 𖼳𖽡𖾐 𖼍𖽧𖾑 𖼖𖽻𖾐 𖼞𖽑𖽪 𖼄𖽙𖾐 𖼞𖽳𖾐 𖼖𖽚𖾐 𖼷𖽑𖽳𖾐 𖼈𖽡𖾐 \fr 14．10 \ft 𖼖𖽚𖾐 𖼷𖽑𖽳𖾐 𖼈𖽡𖾐 𖼦𖽑𖽺𖾑 𖼖𖽧𖾑 𖼮𖽑𖽡𖽺𖾐 𖼣𖽻𖾐． 𖼄𖽡𖾐 𖼊𖽪 𖼦𖽑𖽔𖾐 𖼮𖽶𖾐 𖼄𖽨．𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦，𖼄𖽦 𖼀𖽑𖽙 𖼦𖽳 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼮𖽶𖾐，𖼊𖽑𖽡 𖼹𖽻𖾐 𖼮𖽑𖽙 𖼖𖽚𖾐 𖼷𖽑𖽳𖾐 𖼈𖽡𖾐 𖼄𖽡𖾐 𖼊𖽪 𖼞𖽑𖽶𖾐 𖼹𖽺𖾐 𖼽𖽡𖾐，𖼊𖽑𖽡 𖼹𖽻𖾐 𖼮𖽡𖽪 𖼀𖽑𖽻𖾐 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐． 11 𖽃𖽔𖾐 𖼺𖽺𖾑，𖼈𖽪𖾐 𖼍𖽦 𖼞𖽑𖽶𖾑 𖼖𖽡𖾐 𖼽𖽚𖾐 𖼺𖽙 𖼍𖽙𖾐 𖼄𖽔 𖼖𖽪𖾐 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼄𖽡𖽻 𖼐𖽑𖽡 𖼐𖽺𖾐 𖼷𖽙 𖼊𖽪𖾐 𖼄𖽳𖾑 𖼄𖽳 𖼐𖽻𖾑 𖼂𖽡𖾐 𖼽𖽡𖾐 𖼦𖽑𖽙𖾐． 12 𖼽𖽕𖾑 𖼂𖽚 𖼖𖽕 𖼞𖽳𖾐 𖼻𖽙 𖼊𖽪𖾐 𖼖𖽚 𖼍𖽴 𖼊𖽑𖽺 𖼐𖽺𖾐 𖼖𖽚 𖼍𖽴 𖼞𖽑𖽙𖾐 𖼮𖽻𖾐 𖼳𖽶 𖼖𖽺𖾑 𖼽𖽻 𖼈𖽳𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽙𖾐．𖼞𖽑𖽶𖾑 𖼮𖽶𖾐，𖼖𖽚 𖼍𖽴 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼮𖽻𖾐．
𖼽𖽕𖾑 𖼂𖽚 𖼖𖽕 𖼽𖽡𖾐 𖼖𖽚 𖼍𖽴 𖼊𖽑𖽺 𖼰𖽨𖾑 𖼞𖽑𖽚 𖼖𖽻𖾐
13 𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽡𖽪 𖼊𖽜𖾑 𖼊𖽚𖾐 𖼖𖽻𖾐，𖼽𖽻 𖼖𖽻𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐 𖼊𖽑𖽧．𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽕 𖼞𖽑𖽻𖾑 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽕𖾑 𖼖𖽡𖾑 𖼞𖽳𖾐 𖼺𖽧𖾐 𖼈𖽳 𖼷𖽡𖾐 𖼞𖽑𖽶𖾑 𖼠𖽻𖾐 𖼮𖽻𖾐．𖼄𖽕𖾑 𖼖𖽡𖾑、 𖼽𖽡 𖼳𖽸 𖼠𖽴𖾑 𖼐𖽺𖾐 𖼽𖽕𖾑 𖼐𖽺 𖼈𖽧 𖼄𖽻 𖼐𖽑𖽳𖾐 𖼄𖽻 𖼣𖽻𖾐，𖼽𖽻 𖼈𖽳𖾐 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼞𖽙𖾐 𖼮𖽑𖽻 𖼣𖽻𖾐．
14 𖼽𖽕𖾑 𖼂𖽚 𖼖𖽕 𖼊𖽻 𖼮𖽨，𖼽𖽻 𖼻𖽙 𖼊𖽪𖾐 𖼊𖽑𖽺 𖼮𖽴𖾐 𖼂𖽡𖾐 𖼽𖽡𖾐 𖼦𖽑𖽙𖾐．𖽃𖽔𖾐 𖼺𖽺𖾑，𖼽𖽻 𖽃𖽔𖾑 𖼞𖽑𖽶𖾐 𖼮𖽻𖾐 𖼽𖽚𖾐，𖼄𖽪𖾑 𖼊𖽑𖽧 𖼖𖽻𖾐 𖼺𖽪𖾐 𖼮𖽜𖾐 𖼀𖽑𖽙 𖼺𖽙𖾐 𖼦𖽑𖽙𖾐 𖼷𖽑𖽡𖾐 𖼦𖽑𖽦 𖼽𖽚𖾐 𖼊𖽑𖽺 𖼦𖽳，𖼞𖽕 𖼺𖽺𖾑 𖼍𖽗𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐． 15 𖼄𖽶 𖼮𖽑𖽧 𖼠𖽻𖾐 𖼞𖽑𖽶𖾐，𖼽𖽕𖾑 𖼂𖽚 𖼖𖽕 𖼽𖽻 𖼮𖽜𖾐 𖼀𖽑𖽙 𖼊𖽑𖽺 𖼀𖽜𖾐 𖼀𖽑𖽪𖾐，𖼽𖽻 𖼈𖽳𖾐 𖼊𖽑𖽺 𖼦𖽳 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐，𖼞𖽕 𖼺𖽺𖾑 𖼍𖽕𖾑 𖼄𖽔 𖼳𖽸𖾑 𖼠𖽴 𖼖𖽪𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼦𖽴 𖼂𖽔𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐． 16 𖼄𖽡𖽻 𖼐𖽑𖽡 𖼐𖽺𖾐 𖼷𖽙 𖼊𖽪𖾐 𖼄𖽳𖾑 𖼄𖽳 𖼐𖽻𖾑 𖼀𖽑𖽚𖾐 𖼞𖽑𖽚 𖼖𖽻𖾐，𖼽𖽻 𖼻𖽙 𖼊𖽪𖾐 𖼖𖽚 𖼍𖽴 𖼐𖽺𖾐 𖼖𖽚 𖼍𖽴 𖼞𖽳𖾐 𖼄𖽡𖽻 𖼐𖽑𖽡 𖼷𖽙 𖼊𖽪𖾐，𖼹𖽦𖾑 𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼖𖽺𖾑 𖼐𖽻𖾑 𖼀𖽑𖽚𖾐 𖼞𖽚 𖼖𖽻𖾐．
𖼄𖽦𖾑 𖼰𖽡𖾐 𖼳𖽡 𖼍𖽴 𖼄𖽢 𖼦𖽙𖾐 𖼽𖽕𖾑 𖼂𖽚 𖼖𖽕 𖼊𖽑𖽺 𖼞𖽜
17 𖼽𖽕𖾑 𖼂𖽚 𖼖𖽕 𖼞𖽑𖽻𖾑 𖼰𖽡𖾐 𖼍𖽕𖾑 𖼖𖽻 𖼄𖽔 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼈𖽪𖾐 𖼍𖽦𖾐 𖼺𖽙𖾐 𖼽𖽚𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽚𖾐 𖼖𖽻𖾐，𖼳𖽔𖾐 𖼈𖽪𖽺𖾐 𖼖𖽻𖾐 𖼞𖽑𖽪 𖼄𖽙𖾐 𖼽𖽻 𖼊𖽑𖽺 𖼹𖽶𖾐 𖼖𖽻𖾐．𖼳𖽔𖾐 𖼈𖽪𖽺𖾐 𖼖𖽻𖾐 𖼞𖽑𖽪 𖼄𖽙𖾐 𖼞𖽑𖽶𖾑 𖼈𖽪𖾐 𖼍𖽦 𖼞𖽳𖾐 𖼖𖽻𖾐 𖼞𖽑𖽪 𖼣𖽻𖾐．
18 𖼺𖽔 𖼖𖽜 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼄𖽦𖾑 𖼰𖽡𖾐 𖼳𖽡 𖼍𖽴 𖼦𖽑𖽺𖾑 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼍𖽡𖾐 𖼄𖽻 𖼣𖽻𖾐，𖼽𖽻 𖼖𖽺𖾑 𖽃𖽔𖾑 𖼂𖽻𖾐 𖼐𖽺𖾐 𖼮𖽶𖾐 𖼀𖽳 𖼈𖽺𖾐 𖼽𖽕𖾑 𖼂𖽚 𖼖𖽕 𖼊𖽑𖽺 𖼹𖽶𖾐 𖼖𖽻𖾐． 19 𖼽𖽻 𖼄𖽢 𖼦𖽙𖾐 𖼽𖽕𖾑 𖼂𖽚 𖼖𖽕 𖼊𖽑𖽺 𖼞𖽜，𖼀𖽦𖾐：
“𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼹𖽸𖾑 𖼺𖽪𖾐 𖼺𖽡 𖼀𖽑𖽙，𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐！
𖼄𖽢 𖼖𖽪 𖼽𖽕𖾑 𖼂𖽚 𖼖𖽕 𖼊𖽑𖽺 𖼄𖽻𖾑 𖼞𖽜．
20 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼮𖽡𖾐 𖼂𖽦𖾐 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐，
𖼽𖽻 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼣𖽻𖾐！”
𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽕 𖼞𖽑𖽙𖾐 𖽂𖽙𖾐 𖼺𖽪𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼈𖽺𖾐 𖼊𖽑𖽧 𖼖𖽻𖾐，𖼄𖽦𖾑 𖼰𖽡𖾐 𖼳𖽡 𖼍𖽴 𖼊𖽑𖽺 𖼞𖽜．
21 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼷𖽑𖽻𖾐 𖼀𖽺 𖼀𖽑𖽨 𖼣𖽙𖾐 𖼊𖽑𖽺 𖼞𖽑𖽚 𖼞𖽜，𖼄𖽡𖽻 𖼐𖽑𖽡 𖼷𖽙 𖼊𖽪𖾐 𖼐𖽑𖽡𖾐 𖼈𖽺𖾐 𖼂𖽡𖾐 𖼽𖽡𖾐 𖼻𖽻𖾐．”
22 𖼽𖽕𖾑 𖼂𖽚 𖼖𖽕 𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼹𖽸𖾑 𖼺𖽪𖾐 𖼺𖽡 𖼀𖽑𖽙，𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐，
23 𖼐𖽑𖽡𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼄𖽡𖽻 𖼐𖽑𖽡，𖼮𖽑𖽡𖾐 𖼰𖽴𖾐 𖼊𖽑𖽡 𖼮𖽑𖽡𖾐 𖼣𖽻𖾐 𖼦𖽻，𖼮𖽑𖽡𖾑 𖼐𖽴𖾐 𖼰𖽕𖾐 𖼊𖽑𖽡 𖼮𖽑𖽡𖾐 𖼣𖽻𖾐 𖼦𖽻，𖼣𖽙𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼈𖽺𖾐，𖼐𖽑𖽡𖾐 𖼞𖽜 𖼺𖽺𖾑 ‘ 𖼣𖽙𖾐 𖼽𖽕𖾑 𖼂𖽚 𖼖𖽕 𖼞𖽜 𖼀𖽻𖾐 𖼀𖽡𖾐 ’ 𖼀𖽦𖾐 𖼄𖽔 𖼻𖽻𖾐． 24 𖼮𖽜𖾐 𖼀𖽑𖽙 𖼷𖽙 𖼦𖽑𖽙𖾐 𖼺𖽪𖾐 𖼊𖽑𖽺 𖼠𖽳𖾐，𖼣𖽙𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼖𖽡𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼺𖽪𖾐 𖼽𖽕𖾑 𖼐𖽺、 𖼽𖽡 𖼳𖽸 𖼠𖽴𖾑 𖼐𖽺𖾐 𖼄𖽕𖾑 𖼖𖽡𖾑 𖼞𖽑𖽙𖾐 𖽂𖽙𖾐 𖼷𖽻 𖼺𖽪𖾐，𖼽𖽻 𖼈𖽳𖾐 𖼞𖽜 𖼈𖽺𖾐 𖼂𖽡𖾐 𖼽𖽡𖾐 𖼮𖽑𖽳𖾐．”