𖽂𖽙 𖼮𖽑𖽻 𖼺𖽪𖾑 13

𖼽𖽕𖾑 𖼂𖽚 𖼖𖽕 𖼀𖽑𖽚𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽚 𖼽𖽡𖾐

1 𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽕 𖼽𖽻 𖼄𖽳 𖼻𖽙 𖼐𖽺𖾐 𖼖𖽚 𖼍𖽴 ，𖼽𖽻 𖼞𖽑𖽙𖾐 𖼮𖽻𖾐 𖼳𖽶 𖼊𖽑𖽺 𖼦𖽳 𖼺𖽜，𖼊𖽑𖽡 𖼊𖽑𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖼐𖽑𖽧 𖼠𖽴 𖼇𖽪𖾐 𖼄𖽡𖾑 𖼐𖽦𖾐 𖼽𖽡𖾐． 2 𖼞𖽑𖽶𖾑 𖼮𖽶𖾐，𖼽𖽕𖾑 𖼂𖽚 𖼖𖽕 𖼮𖽡𖽺 𖼐𖽺𖾐 𖼀𖽑𖽨𖾐 𖼳𖽳𖾐 𖼦𖽑𖽔𖾐 𖼮𖽶𖾐 𖼮𖽻𖾐 𖼄𖽨．

3 𖼽𖽻 𖼈𖽳𖾐 𖼹𖽦𖾑 𖼐𖽑𖽧 𖼠𖽴 𖼇𖽪𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽜𖾐 𖼖𖽜𖾐 𖼮𖽑𖽶𖾑 𖼺𖽜 𖼺𖽺𖾑，𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼽𖽡𖾐．𖼽𖽻 𖼈𖽳𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼐𖽺𖾐 𖽃𖽦𖾑 𖼖𖽪𖾐 𖼠𖽻𖾐 𖼊𖽑𖽺 𖼷𖽻 𖼞𖽳𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼞𖽑𖽶𖾑 𖼽𖽕𖾑 𖼂𖽚 𖼖𖽕 𖽂𖽙 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼠𖽚 𖼞𖽳𖾐 𖼣𖽻𖾐， 4 𖼦𖽑𖽔𖾐 𖼖𖽺𖾑 𖼽𖽻 𖽂𖽙 𖼊𖽺𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼞𖽳𖾐 𖼣𖽻𖾐．𖼽𖽕𖾑 𖼂𖽚 𖼖𖽕 𖼹𖽦𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐．

𖼽𖽕𖾑 𖼂𖽚 𖼖𖽕 𖼐𖽺𖾐 𖼖𖽚 𖼍𖽴 𖼷𖽙𖾐 𖼖𖽙𖾐 𖼀𖽜𖾐 𖼀𖽺

5 𖼽𖽕𖾑 𖼂𖽚 𖼖𖽕 𖼖𖽙𖾐 𖼮𖽑𖽻𖾐 𖼺𖽜 𖼺𖽪𖾐 𖼖𖽚 𖼍𖽴 𖼖𖽺𖾑 𖼐𖽑𖽡 𖼷𖽪𖾐 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼮𖽻𖾐，𖼦𖽑𖽺𖾐 𖼠𖽴𖾐 𖼮𖽻𖾐 𖼄𖽨． 6 𖼞𖽑𖽶𖾑 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼄𖽔 𖼊𖽺𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼞𖽳𖾐 𖼮𖽡𖽺 𖼷𖽪𖾐 𖼦𖽑𖽔𖾐 𖼮𖽶𖾐 𖼄𖽨 𖼺𖽺𖾑，𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼀𖽑𖽢 𖼄𖽔 𖼊𖽙𖾐． 7 𖼽𖽕𖾑 𖼂𖽚 𖼖𖽕 𖼞𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼐𖽺𖾐 𖼖𖽚 𖼍𖽴 𖼞𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼍𖽪𖾐 𖼖𖽻𖾐．𖼞𖽑𖽶𖾑 𖼮𖽶𖾐，𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽺𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐．

8 𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽕 𖼖𖽚 𖼍𖽴 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽺𖾐 𖼣𖽙𖾐 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼄𖽔 𖼊𖽙𖾐，𖼐𖽑𖽡𖾐 𖼞𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼐𖽺𖾐 𖼣𖽙𖾐 𖼞𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼖𖽺𖾑 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼄𖽔 𖼊𖽙𖾐，𖽃𖽔 𖼐𖽺𖾑 𖼈𖽧 𖼐𖽑𖽳𖾐 𖼰𖽡𖾐 𖼣𖽻𖾐． 9 𖼞𖽑𖽙𖾐 𖼮𖽑𖽡𖾐 𖼊𖽪 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼍𖽳𖾐 𖼄𖽔 𖼣𖽻𖾐 𖼖𖽔？𖼐𖽑𖽡𖾐 𖼣𖽙𖾐 𖼖𖽙𖾐 𖼰𖽡𖾑 𖼦𖽑𖽙𖾐 𖼽𖽡𖾐 𖼮𖽑𖽳𖾐！ 𖼐𖽑𖽡𖾐 𖼈𖽳𖾑 𖼀𖽳 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼽𖽙𖾐 𖼀𖽳 𖼽𖽡𖾐 𖼊𖽻𖾐．𖼐𖽑𖽡𖾐 𖼽𖽙𖾐 𖼀𖽳 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾑 𖼀𖽳 𖼽𖽡𖾐 𖼊𖽻𖾐．”

10 𖼖𖽚 𖼍𖽴 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐 𖼄𖽡𖽻𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖼊𖽺𖾐 𖼠𖽻𖾐 𖼮𖽑𖽻𖾐 𖼺𖽙 𖽃𖽳 𖼖𖽪𖾐 𖼖𖽙𖾐 𖼮𖽑𖽡𖾐，𖼄𖽳𖾑 𖼄𖽳 𖽃𖽔𖾐 𖼮𖽡𖽦𖾐 𖼀𖽻𖾐 𖼀𖽡𖾐 𖼄𖽡𖾐 𖼊𖽺𖾐 𖼣𖽻𖾐．𖼽𖽺𖾐 𖼦𖽴 𖼦𖽫 𖼺𖽙 𖼍𖽙𖾐 𖼄𖽔 𖼖𖽪𖾐 𖼐𖽺𖾐 𖽃𖽴 𖼄𖽚 𖼖𖽔𖾐 𖼖𖽪𖾐 𖼊𖽑𖽺 𖼄𖽔 𖼄𖽳 𖼮𖽡𖽦 𖼺𖽺 𖽃𖽙𖾑 𖼄𖽺，𖼦𖽑𖽺𖾑 𖼄𖽡𖾐 𖼊𖽺𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼖𖽙𖾐 𖼺𖽶𖾑，𖼦𖽑𖽔𖾐 𖼖𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼖𖽙𖾐 𖼺𖽶𖾑 𖼹𖽳𖾐 𖼳𖽶 𖼣𖽻𖾐． 11 𖽃𖽔𖾐 𖼺𖽺𖾑，𖼖𖽚 𖼍𖽴 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖼊𖽺𖾐 𖼠𖽻𖾐 𖼊𖽑𖽺 𖼺𖽺𖾐 𖼄𖽳𖾐，𖼮𖽑𖽶𖾑 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽡𖾐，𖼽𖽻 𖼈𖽳𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼷𖽙𖾐 𖼖𖽙𖾐 𖼀𖽜𖾐 𖼀𖽺 𖼦𖽑𖽙𖾐． 12 𖼽𖽕𖾑 𖼂𖽚 𖼖𖽕 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽻𖾐．𖼖𖽚 𖼍𖽴 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼖𖽪𖾐 𖼞𖽑𖽶𖾑 𖼹𖽻𖾐 𖼞𖽳𖾐 𖼮𖽻𖾐，𖼽𖽻 𖼖𖽜𖾐 𖼖𖽜𖾐 𖼦𖽑𖽺𖾐 𖼠𖽴𖾐 𖼮𖽑𖽶𖾑 𖼺𖽜 𖼺𖽺𖾑，𖼺𖽙 𖼍𖽙𖾐 𖼄𖽔 𖼖𖽪𖾐 𖼞𖽕 𖼰𖽡𖽺𖾐 𖼮𖽑𖽡𖾐． 13 𖼽𖽺𖾐 𖼦𖽴 𖼦𖽫 𖼐𖽦𖾐 𖼂𖽻𖾐 𖼖𖽻𖾐，𖼺𖽙 𖼍𖽙𖾐 𖼄𖽔 𖼺𖽪𖾐 𖼷𖽑𖽻𖾐 𖼽𖽺𖾐 𖼮𖽑𖽡𖽪𖾑 𖼈𖽳 𖼰𖽡，𖼊𖽶𖾐 𖼮𖽑𖽪 𖼀𖽡𖾐 𖼖𖽚𖾐．

𖼽𖽕𖾑 𖼂𖽚 𖼖𖽕 𖼊𖽑𖽺 𖼞𖽜 𖼮𖽙𖾐 𖼞𖽳𖾐 𖼄𖽡𖾐 𖼊𖽺𖾐

14 𖼖𖽚 𖼍𖽴 𖼽𖽕𖾑 𖼂𖽚 𖼖𖽕 𖼊𖽑𖽺 𖼰𖽡𖾑 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼖𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐 𖼻𖽻𖾐，𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼞𖽳𖾐 𖼄𖽡𖾑 𖼐𖽦𖾐 𖼮𖽑𖽻𖾐 𖼮𖽡𖾐 𖼊𖽚𖾐 𖼄𖽡𖾐、 𖼮𖽡𖾐 𖼖𖽻𖾑 𖼄𖽡𖾐、 𖼠𖽳𖾐 𖼻𖽸 𖼄𖽡𖾐 𖼐𖽺𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼘𖽜𖾑 𖼐𖽦𖾐． 15 𖼐𖽑𖽡𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼞𖽳𖾐 𖼄𖽡𖾐 𖼊𖽺𖾐，𖼣𖽙𖾐 𖼖𖽪 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼄𖽻𖾑 𖼺𖽺𖾑，𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐． 16 𖼣𖽙𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼄𖽡𖾑 𖼐𖽦𖾐 𖼊𖽑𖽺 𖼦𖽳 𖼐𖽑𖽡 𖼖𖽙𖾐 𖼺𖽶𖾑 𖼄𖽨 𖼊𖽻𖾐，𖼷𖽑𖽻𖾐 𖼄𖽡𖾑 𖼐𖽦𖾐 𖼊𖽑𖽺 𖼦𖽳 𖼐𖽑𖽡 𖼈𖽜𖾐 𖼦𖽑𖽻𖾐 𖼄𖽔 𖼠𖽸𖾑 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼈𖽜𖾐 𖼦𖽑𖽻𖾐 𖼄𖽔 𖼠𖽸𖾑 𖼊𖽻𖾐． 17 𖼐𖽑𖽡𖾐 𖼍𖽪𖾐 𖼖𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼺𖽜 𖼻𖽶𖾐！ 𖼞𖽪𖾐 𖼮𖽡𖽺𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼊𖽑𖽺 𖼄𖽻𖾑 𖼊𖽻𖾐．”

18 𖽃𖽔𖾐 𖼺𖽺𖾑，𖼽𖽕𖾑 𖼂𖽚 𖼖𖽕 𖼖𖽜𖾐 𖼖𖽜𖾐 𖼦𖽑𖽺𖾐 𖼠𖽴𖾐 𖼮𖽑𖽶𖾑 𖼺𖽜，𖼖𖽻𖾐 𖼳𖽡𖾐 𖼂𖽚 𖼖𖽪𖽦 𖼖𖽪𖾐 𖼞𖽳𖾐 𖼮𖽑𖽡𖾐，𖼄𖽕𖾑 𖼖𖽡𖾑 𖼞𖽳𖾐 𖼺𖽧𖾐 𖼈𖽳 𖼷𖽡𖾐 𖼞𖽕 𖼰𖽡𖽺𖾐 𖼞𖽑𖽶𖾑 𖼠𖽻𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐．