𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐
9
1 𖽂𖽙 𖼺𖽙𖾐 𖼂𖽙𖾐 𖼄𖽢 𖼖𖽪 𖼐𖽚 𖼽𖽕𖾑 𖼐𖽺𖾐 𖼽𖽻 𖼻𖽙 𖼊𖽑𖽺 𖼞𖽜，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑，𖼄𖽨 𖼄𖽨𖾏 𖼀𖽑𖽙 𖼍𖽪𖾐 𖼖𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼀𖽡𖾐 𖼖𖽡𖾐． 2 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼺𖽪𖾐 𖼐𖽑𖽡𖾑 𖼳𖽶𖾐 𖼐𖽺𖾐 𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐，𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼺𖽪𖾐 𖼀𖽶 𖼊𖽡𖾐 𖼀𖽶 𖼄𖽳 𖼐𖽺𖾐 𖼦𖽜𖾐 𖼄𖽙𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼣𖽙𖾑，𖼄𖽳𖾑 𖼄𖽳 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽡𖽮𖾐 𖼷𖽑𖽚 𖼊𖽻𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼊𖽑𖽺 𖼰𖽡𖽻𖾐 𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐． 3 𖼠𖽙𖾑 𖼺𖽦 𖼮𖽻𖾐 𖼺𖽪𖾐 𖼄𖽳𖾑 𖼄𖽳 𖼐𖽑𖽡𖾐 𖼈𖽳𖾐 𖼞𖽜 𖼷𖽙 𖼊𖽪𖾐 𖽂𖽙𖾐 𖼂𖽺𖾐 𖼊𖽙𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼣𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽻𖾑，𖼈𖽻 𖼻𖽙 𖼈𖽻 𖼐𖽜𖾐 𖼖𖽙𖾐 𖼺𖽶𖾑 𖼳𖽶 𖼣𖽻𖾐． 4 𖼺𖽶 𖼄𖽔 𖼊𖽑𖽧 𖼺𖽪𖾐 𖼦𖽙，𖼐𖽑𖽡𖾐 𖼈𖽳𖾐 𖼷𖽙 𖼄𖽔 𖼊𖽙𖾐，𖼺𖽶 𖼞𖽑𖽶𖾑 𖼈𖽪𖾑 𖼠𖽻𖾐 𖼣𖽻𖾐．5 𖼐𖽑𖽡𖾐 𖼈𖽳𖾐 𖼊𖽑𖽺 𖼺𖽶 𖼊𖽑𖽧，𖼐𖽑𖽡𖾐 𖼈𖽳𖾐 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼺𖽪𖾐，𖼐𖽑𖽡𖾑 𖼳𖽶𖾐 𖼣𖽻𖾐 𖼦𖽻，𖼷𖽑𖽻𖾐 𖼣𖽻𖾐 𖼦𖽻，𖼽𖽻 𖼄𖽳𖾑 𖼞𖽳𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼣𖽻𖾐 𖼀𖽦𖾐 𖼖𖽺𖾑，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼠𖽙𖾑 𖼍𖽻𖾐 𖼰𖽙𖾐，𖼽𖽻 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼊𖽻𖾐． 6 𖼷𖽑𖽻𖾐 𖼊𖽑𖽺 𖼺𖽶 𖼊𖽑𖽧 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖼺𖽶 𖼊𖽑𖽧 𖼊𖽻𖾐．𖼞𖽪𖾐 𖼮𖽡𖽺𖾐，𖽂𖽙 𖼺𖽙𖾐 𖼂𖽙𖾐 𖼷𖽑𖽻𖾐 𖼊𖽑𖽺 𖼹𖽸𖾑 𖼺𖽪𖾐，𖼽𖽻 𖼽𖽚 𖼖𖽙𖾐 𖼮𖽑𖽻𖾐 𖼹𖽸𖾑 𖼳𖽶 𖼣𖽻𖾐． 7 𖼐𖽑𖽡𖾐 𖼈𖽳𖾐 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑，𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖽂𖽙 𖼊𖽙𖾐 𖼮𖽑𖽪𖾐 𖼮𖽑𖽻 𖼖𖽡𖾐．”
8 𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼐𖽺𖾐 𖼽𖽻 𖼻𖽙 𖼊𖽑𖽺 𖼀𖽦𖾐： 9 “𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐， 10 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐，𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼣𖽕𖾐、 𖼮𖽡𖽺 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼄𖽝𖾐 𖼺𖽜 𖼺𖽪𖾐 𖼐𖽑𖽡𖾑 𖼳𖽶𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐， 11 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐：𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼊𖽑𖽺 𖼹𖽦𖾑 𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼞𖽜 𖼄𖽔 𖼄𖽳 𖼮𖽡𖽦 𖼊𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼖𖽺𖾑 𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼞𖽜 𖼄𖽔 𖼣𖽡𖽳𖾑 𖼀𖽑𖽧𖾐 𖼊𖽻𖾐．”
12 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼻𖽳𖾐 𖼹𖽦𖾐 𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 𖼦𖽑𖽺𖾑 𖼣𖽻𖾐： 13 𖼣𖽙𖾐 𖽃𖽔𖾑 𖼄𖽶 𖼳𖽳𖾐 𖼈𖽡𖾐 𖼊𖽻𖾐 𖼀𖽑𖽨 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼍𖽙𖾑，𖼦𖽑𖽺𖾑 𖼣𖽙𖾐 𖼄𖽡𖾑 𖼐𖽦𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 𖼣𖽻𖾐．
14 𖼣𖽙𖾐 𖼍𖽡𖾐 𖼮𖽑𖽙𖾐 𖼞𖽜 𖼄𖽡𖾑 𖼐𖽦𖾐 𖼊𖽑𖽺 𖼂𖽡𖾑 𖼻𖽶𖾐 𖼞𖽑𖽶𖾑 𖼮𖽶𖾐，𖽃𖽔𖾑 𖼄𖽶 𖼳𖽳𖾐 𖼈𖽡𖾐 𖼊𖽻𖾐 𖼞𖽜 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼊𖽻𖾐． 15 𖼞𖽑𖽶𖾑 𖼮𖽶𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽑𖽺 𖼦𖽙𖾑 𖼮𖽑𖽡：𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼞𖽜 𖼺𖽺𖾑，𖼹𖽦𖾑 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐． 16 𖽃𖽔𖾑 𖼄𖽶 𖼳𖽳𖾐 𖼈𖽡𖾐 𖼊𖽻𖾐 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼣𖽙𖾐 𖼄𖽡𖾑 𖼐𖽦𖾐 𖼊𖽑𖽺 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼻𖽳𖾐 𖼹𖽦𖾐 𖼄𖽳𖾐 𖼷𖽑𖽦𖾐 𖼞𖽑𖽶𖾑 𖼊𖽑𖽺 𖼦𖽙𖾑 𖼮𖽑𖽡 𖼊𖽻𖾐．”
17 𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼖𖽙𖾐 𖼀𖽦𖾐：“𖽃𖽔𖾑 𖼄𖽶 𖼳𖽳𖾐 𖼈𖽡𖾐 𖼊𖽻𖾐 𖼦𖽑𖽺𖾑 𖼣𖽙𖾐 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 𖼣𖽻𖾐．”
𖼐𖽚 𖼽𖽕𖾑 𖼞𖽳𖾐 𖼻𖽙
18 𖼐𖽚 𖼽𖽕𖾑 𖼞𖽳𖾐 𖼻𖽙，𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼳𖽔、 𖼦𖽕 𖼐𖽺𖾐 𖼽𖽔 𖼇𖽮 𖼣𖽻𖾐．𖼦𖽕 𖼞𖽑𖽶𖾑 𖼰𖽡𖽔𖾐 𖼐𖽕 𖼞𖽳𖾐 𖽃𖽔 𖼀𖽙 𖼣𖽻𖾐． 19 𖼦𖽑𖽺𖾑 𖼺𖽙𖾐 𖼽𖽚𖾐 𖼐𖽚 𖼽𖽕𖾑 𖼞𖽳𖾐 𖼻𖽙 𖼣𖽻𖾐，𖼄𖽶 𖼊𖽑𖽡 𖼊𖽺𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼮𖽑𖽻𖾐 𖼀𖽑𖽙 𖼍𖽪𖾐 𖼖𖽻𖾐 𖼺𖽪𖾐 𖼣𖽻𖾐．
𖼐𖽚 𖼽𖽕𖾑 𖼮𖽶𖾐 𖼀𖽳 𖼽𖽦
20 𖼐𖽚 𖼽𖽕𖾑 𖼄𖽡𖾐 𖼄𖽪𖾐 𖼖𖽦 𖼠𖽸𖾑 𖼣𖽻𖾐，𖽂𖽙 𖼊𖽺𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼺𖽳 𖼖𖽳 𖼊𖽻𖾐 𖼍𖽳𖾐 𖼺𖽪𖾐 𖼞𖽑𖽶𖾑 𖼽𖽻 𖼣𖽻𖾐． 21 𖼽𖽻 𖼮𖽶𖾐 𖼀𖽳 𖼊𖽻𖾐，𖼮𖽶𖾐 𖼽𖽦 𖼺𖽺𖾑 𖼞𖽶𖾐 𖼮𖽑𖽶 𖼖𖽜 𖼄𖽙𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽻𖾐． 22 𖼰𖽡𖽔𖾐 𖼐𖽕 𖼽𖽻 𖼀𖽙 𖼦𖽕 𖼣𖽻𖾐， 𖼦𖽕 𖼽𖽻 𖼀𖽙 𖼞𖽶𖾐 𖼮𖽑𖽶 𖼖𖽜 𖼊𖽑𖽺 𖼄𖽡𖽻𖾐 𖼺𖽺𖾑，𖼊𖽦 𖼀𖽙 𖼽𖽡𖾐 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽑𖽡 𖼽𖽚𖾐 𖼊𖽑𖽺 𖼀𖽦𖾐 𖼊𖽑𖽧． 23 𖽃𖽔𖾐 𖼺𖽺𖾑，𖼳𖽔 𖼐𖽺𖾐 𖼽𖽔 𖼇𖽮 𖼐𖽑𖽡 𖼽𖽚𖾐 𖼀𖽑𖽡𖽻𖾐 𖼷𖽑𖽶 𖼊𖽑𖽡 𖼳𖽡𖽚𖾐 𖼈𖽺𖾐 𖼈𖽳𖾐 𖼀𖽑𖽳 𖼊𖽑𖽺 𖼍𖽦𖾐，𖼠𖽸𖾑 𖼍𖽕𖾑 𖼀𖽑𖽚𖾐 𖼺𖽜 𖼊𖽡 𖼽𖽡𖾐，𖼽𖽻 𖼀𖽙 𖼞𖽶𖾐 𖼮𖽑𖽶 𖼖𖽜 𖼊𖽑𖽺 𖼀𖽜𖾐 𖼍𖽡．𖼽𖽻 𖼈𖽳𖾐 𖼮𖽑𖽻 𖼄𖽦𖾐 𖼰𖽳𖾐 𖼍𖽳𖾐 𖼺𖽺𖾑，𖼽𖽻 𖼀𖽙 𖼞𖽳𖾐 𖼞𖽶𖾐 𖼮𖽑𖽶 𖼖𖽜 𖼊𖽑𖽺 𖼐𖽦𖾐 𖼄𖽔 𖼄𖽡𖽻𖾐．
𖼐𖽚 𖼽𖽕𖾑 𖼰𖽡𖽔𖾐 𖼐𖽕 𖼊𖽑𖽺 𖼮𖽙 𖼰𖽪𖾑
24 𖼐𖽚 𖼽𖽕𖾑 𖼮𖽶𖾐 𖼀𖽳 𖼽𖽦 𖼦𖽙𖾑 𖼮𖽑𖽡 𖼠𖽙𖾑 𖼍𖽻𖾐，𖼽𖽻 𖼻𖽙 𖼽𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼺𖽝𖾑 𖼦𖽑𖽻𖾐 𖼺𖽺𖾑， 25 𖼀𖽦𖾐：“𖼰𖽡𖽔𖾐 𖼐𖽕 𖼊𖽑𖽺 𖼮𖽙 𖼰𖽪𖾑 𖼷𖽻，𖼽𖽻 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼮𖽜𖾐 𖼀𖽑𖽙 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．”
26 𖼦𖽑𖽔𖾐 𖼖𖽺𖾑 𖼀𖽦𖾐：“𖼳𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼺𖽪𖾐 𖼣𖽻𖾐．𖼰𖽡𖽔𖾐 𖼐𖽕 𖼞𖽜 𖼳𖽔 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．
27 𖽂𖽙 𖼺𖽙𖾐 𖼂𖽙𖾐 𖼽𖽔 𖼇𖽮 𖼊𖽑𖽺 𖼮𖽑𖽪𖾐 𖼮𖽑𖽻，𖼽𖽻 𖼞𖽜 𖼳𖽔 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼈𖽶，𖼰𖽡𖽔𖾐 𖼐𖽕 𖼞𖽜 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．”
𖼐𖽚 𖼽𖽕𖾑 𖼳𖽶𖾐 𖼦𖽑𖽙𖾐