𖽂𖽙 𖼮𖽑𖽻 𖼺𖽪𖾑 8

𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼐𖽙

1 𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼊𖽑𖽺 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽻𖾐 𖼺𖽪𖾐 𖼐𖽑𖽡𖾑 𖼻𖽙 𖼣𖽕𖾐 𖼐𖽜𖾐，𖼮𖽡𖽺 𖼞𖽑𖽙𖾐 𖼣𖽻𖾐 𖼊𖽑𖽺 𖼦𖽙𖾑 𖼮𖽑𖽡．𖽂𖽙 𖼺𖽙𖾐 𖼂𖽙𖾐 𖽃𖽔𖾑 𖼄𖽶 𖼳𖽡𖽺𖾐 𖼀𖽑𖽨 𖼄𖽡𖾑 𖼐𖽦𖾐 𖼊𖽑𖽺 𖼮𖽝，𖽃𖽔𖾐 𖼮𖽡𖽦𖾐 𖼞𖽜 𖼖𖽜𖾐 𖼖𖽜𖾐 𖼺𖽧 𖼹𖽺𖾐 𖼽𖽡𖾐． 2 𖼊𖽑𖽻𖾐 𖼐𖽦𖾑 𖼞𖽑𖽙𖾐 𖼣𖽻𖾐 𖼞𖽳𖾐 𖼈𖽡𖾐 𖼊𖽚𖾐 𖼮𖽑𖽡𖽪 𖼐𖽺𖾐 𖼄𖽶 𖼠𖽻𖾐 𖼞𖽳𖾐 𖽃𖽔𖾑 𖼊𖽪 𖼄𖽳𖾑 𖼄𖽳 𖼂𖽡𖾑 𖼍𖽡 𖼦𖽑𖽙𖾐，𖽃𖽔𖾑 𖼄𖽶 𖼖𖽺𖾑 𖼦𖽑𖽙𖾐 𖼐𖽙 𖼦𖽑𖽻𖾐． 3 𖽃𖽔𖾐 𖼮𖽡𖽦𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽻𖾐 𖼖𖽜𖾐 𖼖𖽜𖾐 𖼺𖽧 𖼹𖽺𖾐 𖼽𖽡𖾐，𖼊𖽑𖽡 𖼦𖽑𖽙𖾐 𖼣𖽙 𖼷𖽑𖽡𖾐 𖼐𖽑𖽡𖾐 𖼠𖽚 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖽃𖽔𖾐 𖼮𖽡𖽦𖾐 𖼺𖽧 𖼹𖽺𖾐 𖼽𖽡𖾐 𖼦𖽑𖽙𖾐． 4 𖼳𖽶 𖼳𖽨𖾐 𖼷𖽑𖽡𖾐 𖼳𖽶 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼖𖽡𖾑 𖼞𖽑𖽪 𖼽𖽕𖾑 𖼖𖽔𖾐 𖼖𖽕 𖽂𖽙 𖼰𖽡𖽺𖾐 𖼊𖽑𖽺 𖼐𖽙 𖼹𖽺𖾐． 5 𖽃𖽔𖾐 𖼮𖽡𖽦𖾐 𖼹𖽦𖾑 𖼺𖽧 𖼹𖽺𖾐 𖼽𖽡𖾐 𖼺𖽺𖾑，𖼷𖽑𖽡𖾐 𖼳𖽨𖾐 𖼖𖽙𖾐 𖼮𖽑𖽡𖾐．𖼷𖽑𖽡𖾐 𖼳𖽨𖾐 𖼊𖽦𖾐 𖼊𖽑𖽡，𖽂𖽙 𖼰𖽡𖽺𖾐 𖼈𖽪𖾑 𖼊𖽡𖾐 𖼄𖽳𖾑 𖼄𖽳 𖼊𖽑𖽦 𖼊𖽚𖾐 𖼊𖽑𖽧 𖼖𖽻𖾐 𖼦𖽑𖽻𖾐．

6 𖼹𖽦𖾑 𖼖𖽡𖾐 𖼷𖽑𖽡𖾐 𖼐𖽑𖽡𖾐 𖼠𖽚 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼐𖽚 𖼽𖽕𖾑 𖼽𖽻 𖼞𖽑𖽙𖾐 𖼹𖽸𖾑 𖼺𖽪𖾐 𖼖𖽡𖾑 𖼞𖽑𖽪 𖼞𖽳𖾐 𖼀𖽜𖾐 𖼖𖽜𖾐 𖼳𖽡𖽪𖾐 𖼀𖽑𖽪𖾐 𖼖𖽦𖾑， 7 𖽃𖽔𖾐 𖼐𖽦𖾐 𖼊𖽑𖽡 𖼮𖽑𖽡𖾐 𖼀𖽑𖽨 𖼊𖽑𖽧 𖼽𖽡𖾐．𖽃𖽔𖾐 𖼐𖽦𖾐 𖼀𖽨𖾐 𖼽𖽡𖾐 𖼀𖽨𖾐 𖼖𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖽃𖽔𖾐 𖼮𖽡𖽦𖾐 𖼦𖽡𖽳𖾐 𖼦𖽑𖽻𖾐 𖼖𖽙𖾐 𖼰𖽶𖾐 𖼮𖽑𖽡𖾐． 8 𖼽𖽻 𖼹𖽦𖾑 𖼊𖽪 𖼂𖽡𖾐 𖼄𖽡 𖼊𖽑𖽡 𖼮𖽑𖽡𖾐 𖼀𖽑𖽨 𖼊𖽑𖽧 𖼽𖽡𖾐 𖼺𖽺𖾑，𖼄𖽡𖾑 𖼐𖽦𖾐 𖼊𖽑𖽺 𖽃𖽔𖾐 𖼮𖽡𖽦𖾐 𖼺𖽧 𖼄𖽔 𖼺𖽧 𖼹𖽺𖾐 𖼽𖽡𖾐 𖼐𖽦𖾐． 9 𖼦𖽑𖽻𖾐 𖼊𖽑𖽻𖾐，𖼞𖽑𖽙𖾐 𖼮𖽑𖽡𖾐 𖼊𖽪 𖽃𖽔𖾐 𖼮𖽡𖽦𖾐 𖼍𖽺𖾑 𖼣𖽻𖾐，𖼊𖽪 𖼂𖽡𖾐 𖼄𖽡 𖼐𖽙 𖼞𖽳𖾐 𖼊𖽑𖽡 𖼄𖽦𖾐 𖼻𖽙 𖼖𖽺𖾑 𖼰𖽙𖾐 𖽂𖽙𖾐 𖼄𖽔 𖼊𖽙𖾐 𖼺𖽺𖾑，𖼀𖽑𖽚𖾐 𖼐𖽚 𖼽𖽕𖾑 𖼖𖽡𖾑 𖼞𖽑𖽪 𖼞𖽳𖾐 𖼞𖽑𖽻𖾑 𖼞𖽚 𖼖𖽻𖾐．𖼐𖽚 𖼽𖽕𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼺𖽺𖾑，𖼊𖽪 𖼂𖽡𖾑 𖼄𖽡 𖼊𖽑𖽺 𖼷𖽶𖾐 𖼖𖽡𖾑 𖼞𖽑𖽪 𖼞𖽑𖽶𖾐 𖼊𖽡 𖼖𖽻𖾐． 10 𖼹𖽦𖾑 𖼳𖽶 𖼐𖽑𖽡𖾐 𖼳𖽡𖽻𖾐 𖼦𖽑𖽙𖾐，𖼽𖽻 𖼦𖽑𖽔𖾐 𖼖𖽺𖾑 𖼊𖽪 𖼂𖽡𖾑 𖼄𖽡 𖼊𖽑𖽡 𖼮𖽑𖽡𖾐 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼀𖽑𖽨 𖼊𖽑𖽧 𖼽𖽡𖾐． 11 𖼄𖽶 𖼮𖽑𖽧 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼊𖽪 𖼂𖽡𖾐 𖼄𖽡 𖼀𖽑𖽚𖾐 𖼐𖽚 𖼽𖽕𖾑 𖼞𖽳𖾐 𖼞𖽚 𖼖𖽻𖾐，𖼄𖽡 𖼞𖽑𖽪𖾐 𖼞𖽑𖽶𖾐 𖽃𖽔 𖼮𖽑𖽙 𖼀𖽑𖽦 𖼷𖽑𖽝𖾐 𖼹𖽺𖾐 𖼖𖽻𖾐 𖼍𖽺𖾑 𖼺𖽺 𖼺𖽪𖾐 𖼊𖽑𖽡 𖼀𖽑𖽦 𖼮𖽑𖽳 𖼍𖽳𖾐．𖽃𖽔𖾐 𖼺𖽺𖾑，𖼐𖽚 𖼽𖽕𖾑 𖼺𖽝𖾑，𖼄𖽡𖾑 𖼐𖽦𖾐 𖼊𖽑𖽺 𖽃𖽔𖾐 𖼮𖽡𖽦𖾐 𖼺𖽧 𖼹𖽺𖾐 𖼽𖽡𖾐 𖼦𖽑𖽙𖾐． 12 𖼐𖽚 𖼽𖽕𖾑 𖼹𖽦𖾑 𖼳𖽶 𖼐𖽑𖽡𖾐 𖼳𖽡𖽻𖾐 𖼦𖽑𖽙𖾐 𖼺𖽺𖾑，𖼦𖽑𖽔𖾐 𖼖𖽺𖾑 𖼊𖽪 𖼂𖽡𖾐 𖼄𖽡 𖼊𖽑𖽡 𖼮𖽑𖽡𖾐 𖼀𖽑𖽨 𖼊𖽑𖽧 𖼽𖽡𖾐，𖼊𖽪 𖼂𖽡𖾐 𖼄𖽡 𖼀𖽑𖽚𖾐 𖼽𖽻 𖼞𖽳𖾐 𖼄𖽔 𖼞𖽚 𖼖𖽻𖾐．

13 𖼐𖽚 𖼽𖽕𖾑 𖼮𖽑𖽡𖽚 𖼦𖽑𖽙𖾐 𖼐𖽺𖾐 𖼊𖽑𖽡 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼞𖽑𖽚 𖼳𖽸 𖼊𖽦𖾐 𖼊𖽑𖽡 𖼖𖽙𖾐 𖼮𖽑𖽡𖾐，𖼄𖽡𖾑 𖼐𖽦𖾐 𖼊𖽑𖽺 𖽃𖽔𖾐 𖼮𖽡𖽦𖾐 𖼦𖽡𖽳𖾐 𖼦𖽑𖽻𖾐．𖼐𖽚 𖼽𖽕𖾑 𖼖𖽡𖾑 𖼞𖽑𖽪 𖼀𖽜𖾐 𖼊𖽪𖾐 𖼀𖽑𖽪𖾐 𖼖𖽦𖾑 𖼐𖽦𖾐，𖼄𖽡𖾑 𖼐𖽦𖾐 𖼀𖽙 𖼦𖽡𖽳𖾐 𖼦𖽑𖽻𖾐 𖼞𖽳𖾐 𖼄𖽡𖽻𖾐． 14 𖼀𖽸𖾐 𖼺𖽸 𖼳𖽨𖾐 𖼐𖽑𖽡 𖼷𖽑𖽡𖾐 𖼳𖽶 𖼖𖽙𖾐 𖼮𖽑𖽡𖾐，𖼄𖽡𖾑 𖼐𖽦𖾐 𖼀𖽙 𖼦𖽡𖽳𖾐 𖼮𖽨𖾐 𖼦𖽑𖽻𖾐．

𖼐𖽚 𖼽𖽕𖾑 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐

15 𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼖𖽙𖾐 𖼀𖽦𖾐 𖼊𖽑𖽧： 16 “𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼄𖽳 𖼻𖽙、 𖼐𖽑𖽡𖾐 𖼻𖽙 𖼐𖽺𖾐 𖼮𖽑𖽡 𖼄𖽙𖾐 𖼄𖽳𖾑 𖼄𖽳 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼖𖽡𖾐． 17 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽻𖾐 𖼺𖽺𖾑，𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐：𖼣𖽕𖾐、 𖼮𖽡𖽺 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼄𖽝𖾐 𖼺𖽜 𖼺𖽪𖾐 𖼀𖽶 𖼊𖽡𖾐 𖼀𖽶 𖼄𖽳，𖼐𖽑𖽡𖾐 𖼄𖽳𖾑 𖼄𖽳 𖼊𖽑𖽺 𖼦𖽳 𖼊𖽚𖾐 𖼖𖽻𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽪𖾐 𖼀𖽑𖽙 𖼮𖽑𖽪𖾐 𖼦𖽑𖽨𖾐，𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐 𖼖𖽡𖾐．”

18 𖽃𖽔𖾐 𖼺𖽺𖾑，𖼐𖽚 𖼽𖽕𖾑 𖼐𖽺𖾐 𖼽𖽻 𖼻𖽙、 𖼽𖽻 𖼄𖽳 𖼻𖽙 𖼐𖽺𖾐 𖼮𖽑𖽡 𖼄𖽙𖾐，𖼄𖽳𖾑 𖼄𖽳 𖼊𖽑𖽡 𖼊𖽑𖽜 𖼊𖽚𖾐 𖼖𖽻𖾐 𖼦𖽑𖽙𖾐． 19 𖼞𖽑𖽙𖾐 𖼣𖽻𖾐 𖼳𖽶 𖼐𖽑𖽡𖾑 𖼳𖽶𖾐、 𖼮𖽡𖽺、 𖼣𖽕𖾐 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼄𖽝𖾐 𖼺𖽜 𖼺𖽪𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐，𖼄𖽳𖾑 𖼄𖽳 𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼦𖽑𖽙𖾐．

𖼐𖽚 𖼽𖽕𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐

20 𖼐𖽚 𖼽𖽕𖾑 𖼖𖽚𖾐 𖼄𖽙𖾐 𖼻𖽜 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼊𖽑𖽧 𖼖𖽻𖾐，𖼞𖽑𖽙𖾐 𖼣𖽻𖾐 𖼳𖽶 𖼺𖽡 𖼮𖽡𖾐 𖼺𖽪𖾐 𖼮𖽡𖽺 𖼐𖽺𖾐 𖼣𖽕𖾐 𖼈𖽺𖾐 𖼺𖽺𖾑，𖼦𖽑𖽙𖾐 𖼍𖽡𖾐 𖼷𖽻𖾐 𖼊𖽑𖽺 𖼍𖽦𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐． 21 𖼽𖽺𖾐 𖼦𖽴 𖼦𖽫 𖼳𖽡𖽻𖾐 𖼺𖽦 𖼊𖽑𖽺 𖼐𖽜 𖽂𖽙𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼀𖽦𖾐：“𖼣𖽙𖾐 𖼹𖽦𖾑 𖼷𖽑𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽡𖾑 𖼐𖽦𖾐 𖼊𖽑𖽺 𖼄𖽔 𖼮𖽙 𖼰𖽪𖾑 𖼊𖽻𖾐 ( 𖼞𖽪𖾐 𖼮𖽡𖽺𖾐，𖼷𖽑𖽻𖾐 𖼽𖽳𖾐 𖼊𖽑𖽙 𖼹𖽦𖾐 𖼐𖽑𖽧𖾐 𖼄𖽙𖾐 𖼊𖽶𖾐 𖼮𖽑𖽪 𖼺𖽪𖾐 𖼣𖽻𖾐 )，𖼣𖽙𖾐 𖼹𖽦𖾑 𖼞𖽑𖽙𖾐 𖼂𖽺𖾐 𖼦𖽑𖽙𖾐 𖼖𖽙𖾐 𖼺𖽶𖾑 𖼠𖽙𖾑 𖼺𖽦 𖼮𖽻𖾐 𖼺𖽪𖾐 𖼊𖽑𖽺 𖼄𖽔 𖼄𖽳 𖼮𖽡𖽦 𖼊𖽻𖾐． 22 𖼄𖽡𖾑 𖼐𖽦𖾐 𖼞𖽑𖽙𖾐 𖼮𖽻𖾐 𖼊𖽑𖽙，𖼹𖽚 𖼳𖽶𖾑 𖼠𖽜𖾐 𖼷𖽑𖽳，𖼐𖽳𖾐 𖼳𖽡𖽺𖾐 𖼮𖽑𖽚𖾐 𖼷𖽑𖽪𖾐，𖼄𖽶 𖼐𖽑𖽡𖾐 𖼄𖽶 𖼦𖽑𖽦，𖼻𖽳𖾐 𖼻𖽳𖾐 𖼄𖽔 𖼐𖽙 𖼊𖽻𖾐．”