Yeruthalẽm cĩ Jõr
21
Ma natẽ, kĩcĩna balna na Yoanẽ tammutiddin cĩ jõr kĩ looc cĩ jõr,a nyatarka ithiicõ balna tammutiddin kĩ looc cĩ ũnũũwa, ĩthõng ithii bũlũc buu. 2 Ĩthõng thĩ, kĩcĩna balna na Yeruthalẽm cĩ Jõrb cĩ ẽẽn kõrõõk cĩ gaalawu cobbi cĩ dĩhĩmĩ, ngatĩ aluucianẽ ĩcĩ Nyekuco tammuatiddina, kaavu kĩ bũwẽẽcĩ cĩ ahimtie kĩdĩhĩmẽ cĩ aku atik maac cĩnnẽ.3 Ĩthõng kĩthĩrara balna na molook cĩ acalcala taabawa cĩ Nyekuco athĩ ne, “Ĩthõng yoko, ikiyyia kõrõõgĩ cĩ Nyekuco ũrũmtẽ kĩ eet cĩgĩnĩk. Ẽẽn katĩ nẽẽgẽ eet cĩgĩnĩk, ĩthõng ĩthĩ katĩ Nyekuci Nyekuc cĩnĩng. Ĩthõng dĩdĩ aari katĩ Nyekuci kõrõõk cĩnnĩ kõrgẽna cĩ eet cĩgĩnĩk. 4 Apucan katĩ Nyekuci tulalõ vẽlẽk kẽbẽrẽnĩy cĩgĩk. Ĩthõng thĩ, katĩ ithii daaĩthĩ, kõdẽ ulua, kõdẽ wuciithi, nyatarka ithiicõ kaala cĩkkõ, wũk balna owu vẽlẽk kũdũt.”
5 Ma natẽ, ikiyyia õthõõth balna Eeti cĩ aavĩ loota taabawa wo ĩthĩ ne, “Kengenyeti katĩ na kaal vẽlẽk kĩĩtõ jõr!” Ĩthõng naboo, uduwaha balna ennea ne, “Tẽhẽẽd thoothonniok cĩk kaduwacĩ na wo loota, nyatarka kaduwaci thoothonniok cĩk ẽẽn dĩdĩ, cĩk katĩ adĩmanni.”
6 Ĩthõng uduwaha naboo ethea ne, “Edeciay tiici! Aneeta cĩ keeni terehianĩt, ĩthõng keeni turnanẽt. Kaanyi katĩ na et cĩ aruk kõr, kũwũd maam cĩk keberec cĩ duwwo cĩ rũgẽt cĩ alna kũdũt, athii cĩ ũũta thõng. 7 Kaanyi katĩ na et cĩ õmõgĩ canan nĩcẽ, kabarĩc kaal cĩkkõ vẽlẽk, ĩthõng keeni katĩ na Nyekuc cĩnnĩ, ĩthõng ĩĩthĩ nẽ doolec cannĩ. 8 Ĩthõng thĩ, kaanyi katĩ na gii coo, kĩdĩmanothĩk eet cĩk athii cĩ ẽlẽmĩ thõõth cannĩ, kĩ kulliak, kĩ gẽrẽthanniok, kĩ rukciok, kĩ eet cĩk oogin kĩ ngaay taktak, kĩ ngarẽt, kĩ eet cĩk ala kaal cĩk aar eeta kĩĩtõ nyekucnya, kĩ volongnyiak vẽlẽk. Atdukothi katĩ nẽẽgẽ bũlũca cobbi cĩ guo cĩ aavĩ kũdũt. Ĩthõng ẽẽn coo daaĩth cĩ ẽẽn ramma.”c
9 Ma natẽ, ikiyyia balna anjĩlõ ĩmma goonoginiy wũk ẽẽn tũrgẽrẽm, wũk balna ayak diicua cĩk abbĩththĩ theretuana cĩk gerthek õrrõt cĩk aturna, ĩthõng ethea ne, “Ijjia da ngato! Kadiimi ngĩ keyeleci na nyẽtẽranit cĩ ẽẽn ngaa cĩ Nyiono.”d 10 Ma natẽ, uuwua balna nẽ aneeta Ririwaca cĩ Dĩhĩmĩ thiira ĩmmanĩ ĩcĩ wuuni õrrõt, ĩthõng ũũk eyeleea kõrõõk cĩ gaalawu cobbi cĩ dĩhĩmĩ cĩ Yeruthalẽmĩ, cĩ allucciay õlõõ cĩ Nyekuco tammuatiddina aku loota. 11 Atũkũlĩ balna kõrõõgĩ cĩ gaalawu bulẽnta cĩ Nyekuco. Alanyĩt kõrõõgĩ cĩ gaalawu kutugu kĩ bĩĩ cĩ dĩhĩmĩ cĩ athĩ jatheper, ĩthõng edenyiay õgõõn kĩ gĩlathĩ. 12 Maka balna dilatĩ cĩ lũwatõ, ĩthõng ĩthĩ wuun, ĩthõng aryiwothĩk katũgẽta õmmõtõ kĩ ramma, cĩk obbitik cĩk ẽbẽk anjĩlẽta õmmõtõ kĩ ramma. Ĩthõng eheeddi balna thaaryiowa cĩk tatũgẽt cĩk Ĩthraĩlĩ cĩk ẽẽn õmmõtõ kĩ ramma katũgẽtẽy nĩĩko vẽlẽk codoi codoi. 13 Engeryie balna katũgẽta cĩkkõ ketee, ariwothi iyyio tõõna ĩcĩ alibanĩ kõrra, ĩthõng aryiwothĩk iyyio ĩcĩ lootu, ĩthõng iyyio ĩcĩ diinu, ĩthõng aryiwothĩk iyyio ĩcĩ okolothĩcẽ kõrra. 14 Engenyciay balna dilatĩ cĩ reerungo tiddina bĩĩyẽnĩy ĩcĩk ẽẽn õmmõtõ kĩ ramma cĩk obbitik õrrõt. Ĩthõng eheedothi balna thara cĩk tionniak cĩk Nyionak bĩĩyẽnĩy codoi codoi.
15 Ayak balna anjĩlõ wũ othoothĩca aneeta thiihit cĩ ẽẽn daab cĩ atĩmanĩ nẽ kõrõõk cĩ gaalawu cobbi nĩcẽ, kĩ katũgẽt, kĩ dilat cĩ lũwatõ buu. 16 Engenyciay balna kõrõõgĩ cĩ gaalawu cobbi neccie kayak vatĩk wec cĩk aduwõy thõng, ma balna ngĩ atĩman anjĩlõ kõrõõk cĩ gaalawu cobbi wo, amudiay kẽnnẽ vatĩka cĩkkõ vẽlẽk codoi codoi ngĩ ayak reenitin cĩ ẽẽn maĩlnyae vucciak codoi kĩ eet etĩmma (1,400), ĩthõng ẽẽn wuunthẽtĩ cĩ õkkõ tiddina ayak maĩlnya vucciak codoi kĩ eet etĩmma (1,400). 17 Ma balna ngĩ atĩman anjĩlõ dilat cĩ lũwatõ wo, amũda kẽnnẽ tingkirõn cĩ lũwatõ ngĩ atĩmaniay thoonĩy, ngĩ ẽẽn eet õmmõtõ, kĩ õmmõtõ kĩ tõrkõnõm (216). Aticanini balna anjĩlõ thoo cĩk eetak kĩtĩman lũwat.
18 Engenyciay balna dilatĩ cĩ lũwatõ bĩĩyẽnĩy cĩk ataalĩthĩ cĩk athĩ jatheper, ĩthõng ẽtẽngẽnyẽ kõrõõgĩ cĩ gaalawu cobbi daaba katalany kaavu kĩ gĩlathĩ. 19 Ĩthõng engenyciay balna vurut cĩ dilat cĩ lũwat nĩcẽ loota bĩĩyẽnĩy ĩcĩk obbitik cĩk ataalĩth mĩn mĩn, ĩcĩk ẽẽn õmmõtõ kĩ ramma, ĩthõng ĩdĩmantothĩk bĩĩyẽna cĩk kĩdĩk cĩk dĩhĩmĩk cĩk ayak yeeli cĩ ẽẽn, nyẽgẽlẽ nyẽgẽlẽ bĩĩyẽnĩy ĩcĩk obbitik wo. Athĩ balna bĩĩ cobbi cĩ owu jatheper cĩ ayak yeeli cĩ merihi tũl, ĩthõng athĩ bĩĩ cĩ ẽẽn ramma ẽẽ ne, thavire cĩ ayak yeeli cĩ loopuwo, ĩthõng athĩ cĩ ẽẽn iyyio ẽẽ ne, calcedonia cĩ ayak yelintiok cĩk meelĩk cĩk ẽẽn nyẽgẽlẽ nyẽgẽlẽ, ĩthõng athĩ cĩ ẽẽn wec emeral cĩ ayak yeeli cĩ alanyĩt cũlak, 20 ĩthõng athĩ cĩ ẽẽn tur ẽẽ ne, thardonik cĩ ayak yelintiok cĩk ẽẽn nyẽgẽlẽ nyẽgẽlẽ cĩk merihik, ĩthõng athĩ cĩ ẽẽn tõrkõnõm ẽẽ ne, karlenia cĩ ayak yeeli cĩ thoototo, ĩthõng athĩ cĩ ẽẽn tũrgẽrẽm ẽẽ ne, kiritholiat cĩ ayak yeeli cĩ cũlaĩ cĩ õgõõn kĩ kartienti, ĩthõng athĩ cĩ ẽẽn turgi ẽẽ ne, beril cĩ ayak yelintiok cĩk ẽẽn nyẽgẽlẽ nyẽgẽlẽ, ĩthõng athĩ cĩ ẽẽn tõrkõwẽc ẽẽ ne, topath cĩ ayak yeeli cĩ dĩhĩmĩ cĩ loopuwo, ĩthõng athĩ cĩ ẽẽn õmmõtõ ẽẽ ne, kirithoparia, ayak yelintiok cĩk cũlaĩk cĩk õgõõn kĩ kartienti, ĩthõng athĩ cĩ ẽẽn õmmõtõ kĩ codoi ẽẽ ne, jacinth cĩ ayak yeeli cĩ rẽgẽẽ kĩ cĩ maanĩ, ĩthõng merik, ĩthõng athĩ cĩ ẽẽn õmmõtõ kĩ ramma ẽẽ ne, amethit cĩ ayak yeeli cĩ rẽgẽẽ õrrõt. 21 Adĩmanni balna katũgẽta cĩk ẽẽn õmmõtõ kĩ ramma wo pẽalnyay. Ĩthõng adĩmanni balna katũk codoi pẽala ĩcĩ odoi. Adĩmanni balna goolliowa õlõõ cĩ gaalawu cobbi daaba kedenyiay kaavu kĩ gõõ ngĩ kacĩn gĩlatha.
22 Athii balna cĩ kacini Ciith cĩ Nyekuco õlõõ ĩcĩ gaalawu cobbi, nyatarka aatĩ balna Makayyioiti Nyekuci Tiiryioiti cĩ Ijiar vẽlẽk kĩ Nyion, ẽẽn nẽẽgẽ Ciith cĩ Nyekuco. 23 Athii kõrõõgĩ cĩ gaalawu cobbi cĩ adiim kõr, kõdẽ nyĩĩlok, nyatarka alanyĩt bulẽnĩtĩ cĩ Nyekuco õlõõ ĩcĩ gaalawu cobbi vẽlẽk, ĩthõng ẽẽn Nyion lanyĩt cĩnnĩ. 24 Õwõ katĩ eeta cĩk loocu vẽlẽk lanyĩta cĩ alanyĩt wo, ĩthõng avvu katĩ alaanẽta cĩk loocu vẽlẽk, ayaha balinit cĩnĩng natẽ. 25 Ĩthõng athii katũgẽta cĩk kõrõõk cĩ gaalawu cobbi nĩcẽ cĩ anyũgĩ, nyatarka athii baalini tõ. 26 Ayahai katĩ eeta loociowẽy vẽlẽk Nyekuc balinit kĩ bulẽnĩt cobbi õlõõ cĩ gaalawu cobbi nĩĩco. 27 Athii katĩ cĩ ẽlẽmacĩ Nyekuci gii cĩ ayak riiriny kitio kõrõõk cĩ gaalawu cobbi nĩcẽ, kõdẽ eeta cĩk atican kaal cĩk ẽẽn ngõryathẽt, kõdẽ cĩk ẽẽn volongnyiak. Ĩthõng thĩ, ẽhẽẽt katĩ eeta cĩk eteheddie thara cĩgĩk nyaragawa cĩ rũgẽtõ ĩcĩ Nyiono dõ.