Maam cĩk rũgẽtak
22
Ma natẽ, eyeleea balna anjĩlõ lĩĩl cĩ arihanĩ maama cĩk rũgẽtak taabawa cĩ aavẽ Nyekuci kĩ Nyion. Ataalĩth balna maama, ĩthõng võõrĩ pẽr edenyiay õgõõn kĩ gĩlathĩ. 2 Ariha lĩĩlĩ kõrgẽna cĩ nyetuluba cobbi cĩ kõrõõk cĩ gaalawu cobbi, ĩthõng titimmuanĩy ĩcĩk lĩĩl nĩcẽ, aavĩ kẽẽt cĩ rũgẽtõ,a cĩ aari nyĩĩlõwẽ vẽlẽk nyegerua cĩk abiiri, cĩk ẽẽn õmmõtõ kĩ ramma cĩk ẽẽn nyẽgẽlẽ nyẽgẽlẽ, ĩthõng ballõwa cĩgĩnnẽk buu ẽẽn kẽgẽrnat cĩ awũd eeta loociowẽy vẽlẽk kũbũnta kũdũt, kĩĩ katĩ kithii mõõrĩthĩ tõ. 3 Athii katĩ cĩĩnẽnẽtĩ cĩ Nyekuco cĩ agam eet cĩk kõrõõk cĩ gaalawu cobbi nĩcẽ. Aavĩ katĩ Nyekuci kũdũt taabawa cĩnnĩ, kĩ Nyion buu, ĩthõng ivitia ticcianniowa cĩk Nyekucak iticantothĩk ĩnõõnõ. 4 Avvu katĩ acĩn nẽẽgẽ nguum cĩnnĩ, ĩthõng katĩ eteheddie thara cĩgĩnnẽk nguumtẽnẽy ĩcĩgĩk. 5 Ithii katĩ baalini tõ. Ĩthõng ĩthĩnga katĩ adiim thẽk nẽẽgẽ kõr, kõdẽ gimma cĩ atũkũlẽẽnĩ, nyatarka ikiyyia ĩthĩ katĩ Makayyioiti Nyekuci lanyĩt cĩnĩng, ĩthõng ivitia katĩ nẽẽgẽ agamit looc kĩ Nyekuc kũdũt.6 Ngaatĩ ethecia balna anjĩlõ ne, “Edeemothi thoothiowa cĩk kaduwaci na wo, ĩthõng ẽẽn dĩdĩ. Makayyioit Nyekuc cĩ eet cĩk õthõõth molook cĩnnĩ, cĩ balna itiona anjĩlõ cĩnnĩ kũũk kuduwak ticcianniok cĩgĩnĩk, thoothonniok cĩk katĩ avvu tamanoko.”
Õbõda katĩ Yesu tamanoko
7 Athĩ Yesu ne, “Ĩcĩnĩt, kakuni katĩ na tamanoko! Agatan katĩ Nyekuci eet cĩk athĩrar thõõth, ĩthõng uthuutti thõõth cĩ aduwa Nyaraga coo wo!”
8 Aneeta balna Yoanẽ cĩ kathĩrari, ĩthõng kĩcĩna thoothonniok cĩkkõ, ĩthõng thĩ, nyatarka thoothonniok cĩkkõ, kakata kuthungti, ĩthõng kidiima ngĩ kalawa anjĩlõ cĩ aku balna eyeleca thoothonniok cĩkkõ wo. 9 Etheca kẽnnẽ nẽ ne, “Nyĩ alayya aneeta, keeni na ticciannioit cĩ Nyekuco kaganoko kĩ niia wo, ĩthõng kĩ goonogu cĩk ẽẽn lemnyiok cĩk õthõõth molook cĩ Nyekuco, ĩthõng kĩ eet vẽlẽk cĩk athĩrar thoothonniok cĩk eheeddi nyaragawa ĩcoo wo. Laa niia Nyekuc dõ.”
10 Ĩthõng uduwaha nẽ naboo ethea ne, “Nyĩ amigẽnẽ thoothonniok cĩk aduwa Nyaraga coo, nyatarka edenyiay katĩ kaala cĩkkõ vẽlẽk tamanoko. 11 Anycĩk niigia et cĩ atican thoothonniok cĩk gerthek, kĩdĩman thoothonniok cĩk gerthek noko, ĩthõng eeti cĩ adĩman gerthetin kũdũt, anycĩk ĩnõõnõ kaavu kĩdĩman gerthetin kũdũt. Ĩthõng eeti cĩ adĩman thoothonniok cĩk abũnna, anycĩk ĩnõõnõ kaavu kĩdĩman thoothonniok cĩk abũnna, ĩthõng anycĩk et cĩ callĩ, kaavu kĩĩ calla kũdũt.”
12 Athĩ Yesu ne, “Ĩcĩnĩt, kakuni na tamanoko! Kayaha na dũmaniniet cannĩ cĩ kadũmanẽ eet vẽlẽk, kaalĩy ĩcĩk balna adĩman nẽẽgẽ. 13 Aneeta cĩ kuwantanẽ, ĩthõng aneeta cĩ katurna, aneeta cĩ kẽtẽrẽhanẽ kaal vẽlẽk, ĩthõng aneeta cĩ kẽdẽcai kaal vẽlẽk.”
14 “Agatan Nyekuci eet vẽlẽk cĩk ũũny ceremua kĩdĩhĩmtẽ.b Ẽlẽmacĩ katĩ nẽ ĩnõõgõ keteeitõ katũgẽt cĩk kõrõõk cĩ gaalawu cobbi, ĩthõng anyĩk ĩnõõgõ kuduit nyegerua cĩk abiiri kẽẽta cĩ rũgẽt cĩ aavĩ kũdũt. 15 Ĩthõng õlõõ cĩ gaalawu cobbi ngatĩvõrĩ, aatĩ eeta cĩk õgõõn kĩ kũrthĩĩ, ẽẽn nẽẽgẽ ngarẽt kĩ eet cĩk oogin kĩ ngaay taktak, kĩ rukciok, kĩ eet cĩk ala kaal cĩk aar eeta kĩĩtõ nyekucnya, kĩ eet cĩk atarnanĩ ngatĩ õthõõthĩ thoothonniok cĩk ẽẽn võlõng.
16 “Aneeta Yesu, cĩ balna kitionacung na agiitia anjĩlõ cannĩ kikiyyia kuduwawung thoothonniok cĩkkõ, kĩĩ katĩ kĩthĩraritõ kelethianya vẽlẽk. Keeni na kegeroc, ĩthõng keeni vurut cĩ Davide. Ĩthõng keeni cooboc cĩ alanyĩt ngerenniet.”
17 Ĩthõng entea Ririwacĩ cĩ Dĩhĩmĩ kĩ ngaa cĩ ẽẽn nyẽtẽranit ne, “Ijjia niia!” Anyĩk niia et cĩ athĩrar thõõth coo, kikiyyia. Mĩ adiim eeti ĩmma maam cĩk awũd, anyĩk ĩnõõnõ kũwũd maam cĩk rũgẽt cĩ aavĩ kũdũt.
18 Ĩthõng na Yoanẽ, katiriththung agiitia vẽlẽk cĩk athĩknu rion cĩ Nyaraga coo wo. Ma ngĩ ĩtoori eeti ĩmma thõõth ĩmma cĩnnĩ, uuk katĩ Nyekuci ĩnõõnõ theretuanĩy ĩcĩk gerthek õrrõt, ĩcĩk eheeddi Nyaragawa ĩcoo wo. 19 Ĩthõng ma ngĩ utdukeek eeti thõõth ĩmma Nyaragawa ĩcoo tuu, athii katĩ cĩ ẽlẽmacĩ Nyekuci et nĩcẽ, kuduk nyegerua cĩk abiiri cĩk kẽẽt cĩ rũgẽt cĩ aavĩ kũdũt wo, ĩthõng ĩcaac katĩ Nyekuci ĩnõõnõ ngatĩ iithiowĩ, kõrõõk cĩ gaalawu cobbi cĩnnĩ cĩ dĩhĩmĩ cĩ aduwuay Nyaragawa ĩcoo wo.
20 Ĩthõng Eeti cĩ ẽẽn berec cĩ thoothonniok cĩkkõ vẽlẽk athĩ ne, “Ii, kakuni katĩna na tamanoko!”
Amẽn! Ijjia Makayyioit Yesu!
21 Anycĩk niigia bũnnathĩt cĩ Makayyioit Yesu kaavu ĩcĩ eet cĩk callĩk cĩk Nyekucak. Amẽn.