Talinit cobbi õlõõ cĩ Nyekuco
19
Ma natẽ, kĩthĩrara balna na Yoanẽ molook cĩ meelitin cobbi cĩ eetu, tammuatiddina cĩk ẽgẽrẽny athĩ ne,“Kadĩhĩththa naaga Nyekuc!
Aku tiirthẽtĩ kĩ bulẽnĩt kĩ elianĩt Nyekuca cĩnac,
2 nyatarka ẽngẽr nẽ thoothonniok gõõla cĩ mũrrĩ dĩdĩ.
Etedĩk balna nẽ thõõth ngaa wũ ẽẽn tegemnyiait
wũ ẽgẽrẽthan looc tegemitina.
Ẽtẽd nẽ thõõth cĩnnĩ,
nyatarka aruk nẽ ticcianniok cĩgĩnĩk.”
3 Ĩthõng ivitia egerenyit nẽẽgẽ naboo ĩĩtõ ne,
“Kĩdĩhĩthĩt Makayyioit!
Ĩngathĩ burruti cĩ guo cĩ atũũth ngaa nĩcẽ wo,
kithii cĩ abĩlĩ ngatĩ õkõyyĩ tiddina kũdũt!”
4 Ĩthõng akatit eeta cĩk obbitik cĩk ẽẽn etĩmma kĩ wec, kĩ kaal cĩk ẽẽn wec cĩk arũgĩ wo, kuthungti nguuma cĩ taaba cobbi cĩ Nyekuco, ĩthõng alaacõ ĩnõõnõ ĩĩtõ ne, “Amẽn! Kĩdĩhĩthĩt Makayyioit!”
5 Ĩthõng kĩthĩrara molook ĩmma cĩ aku taabawa, cĩ athĩ ne,
“Ĩdĩhĩthĩt Nyekuc cĩnac,
niigia vẽlẽk ticcianniowa cĩgĩnnẽk,
niigia vẽlẽk cĩk ongollinu ĩnõõnõ,
ẽtẽrẽhanĩ eetĩnẽy ĩcĩk obbitik kĩ ĩcĩk kĩdĩk vẽlẽk.”
Peyian cĩ tihẽnĩt cĩ Nyiono
6 Ma natẽ, kĩthĩrara balna na molook ĩmma cĩ meelitin cobbi cĩ ẽgẽrẽny kĩ tõwõnĩ cobbi cĩ alathanai looc, ĩthõng icciayyi tammu, ẽgẽrẽny nẽẽgẽ moloowuanĩy õrrõt athĩ ne,
“Kĩdĩhĩthĩt Nyekuc! Nyatarka Makayyioit cĩnac
Nyekuc Tiiryioit cĩ Ijiar vẽlẽk.
Ẽẽn nẽ Alaan cobbi cĩ agam looc vẽlẽk.
7 Kebelbelit thẽk, ĩthõng kubuluthit ĩnõõnõ,
nyatarka ikiyyia kõr cĩ tihẽnĩt cĩ Nyiono,
ĩthõng ĩdĩmanothĩk ngaa cĩ Nyionoa wo vẽlẽk.
8 Ahimtothi katĩ ngaa nĩcẽ
ceremuana cĩk võõrĩk pẽr cĩk dĩhĩmĩk.”
Ĩthõng ceremuana cĩk võõrĩk pẽr cĩk ahimit nẽ wo, eyehethothi thoothonniok cĩk abũnna wũk balna atican eeta cĩk Nyekucak loota ngato.
9 Ma natẽ, othoothĩha anjĩlõ ennea ne, “Tẽhẽẽd thõõth nĩco loota. ‘Agatan katĩ Nyekuci eet vẽlẽk cĩk avvu tihẽnta cĩ Nyiono.’ ” Ĩthõng uduwaha nẽ naboo ennea ne, “Ẽẽn thoothiowa vẽlẽk cĩkkõ dĩdĩ, cĩk aduwa Nyekuci wo.”
10 Ma balna ngĩ kakaneei na anjĩlõ kuthungti, ĩthõng kidiima kalawa ĩnõõnõ, etheca kẽnnẽ ne, “Nyĩ alayya aneeta! Keeni na ticciannioit cĩ Nyekuco kaganoko kĩ niia wo, ĩthõng kaduwona kĩ gotoonogu kĩ ngoonogu cĩk ẽlẽmĩ Yesu. Laa niia Nyekuc dõ! Nyatarka eeti cĩ alimaneei gõõnõgĩ thõõth cĩ Yesu, aliman tiirthẽta cĩ Ririwac cĩ Dĩhĩmĩ.”
Macuccioit cĩ nyangõlẽ cĩ võõrĩ
11 Ma natẽ, kĩcĩna balna na tammutiddin ngatĩ owine naboo, kaavu ngaburur, ĩthõng kĩcĩna nyangõlẽ cĩ võõrĩ cĩ amacuc macuccioiti cĩ athĩ thar cĩgĩnĩk Et cĩ ẽẽn Dĩdĩ cĩ Aticanothi Nyekuc Jurrung. Ẽngẽr nẽ thoothonniok jurrung gõõla ĩcĩ abũnna, ĩthõng adĩman jore gõõla ĩcĩ abũnna. 12 Merihẽ balna kẽbẽrẽ cĩgĩnnẽk õgõõn kĩ gua, ĩthõng itihim lũlũwẽn cĩk meelĩk. Ĩthõng eheeddi thara ẽla cĩnnĩ cĩk athii cĩ aga eeti ĩmma, ĩthõng thĩ, aga nẽ dõ. 13 Ĩthõng naboo, itihim cẽrẽm cĩ awũthĩ biyyieta, ĩthõng athĩ thar cĩgĩnĩk, “Thõõth cĩ Nyekuco.”b 14 Ĩthõng õwõb balna ĩnõõnõ nyĩcẽkẽrĩ cĩk avvu tammuatiddina, cĩk amacuc nyangõlẽnya cĩk võõrĩk, ĩthõng itihimit ceremua cĩk võõrĩk pẽr cĩk dĩhĩmĩk. 15 Ẽẽkta balna nyetubat cĩ lẽhẽdĩ õrrõt kũtũga cĩnnĩ, cĩ katĩ ẽngẽddĩ nẽ eet cĩk loociowu. “Agam katĩ nẽ ĩnõõgõ tẽlẽẽa cĩ ẽẽn thiihit.”c Amacũwa nẽ vĩnõ cĩ ariha loowa, ĩthõng utduta vĩnõ cĩ ẽẽn varac cobbi cĩ Nyekuc Tiiryioit cĩ Ijiar vẽlẽk. 16 Ĩthõng cẽrẽma ĩcĩnnĩ ĩcĩ wuuni, kĩ athana cĩnnĩ eheedothi thõõth cĩ athĩ ne,
Alaan cĩ alaanetu, ĩthõng Makayyioit cĩ makayyiowu.
17 Ma natẽ, kĩcĩna balna na anjĩlõ ĩmma cĩ abĩlĩ kõrra, ĩthõng ũtũvvũ kodobbwua cĩk akul ngõõta tõõ vẽlẽk, ethek ne, “Ivitia niigia adait peyian cobbi cĩ aari Nyekuci, 18 kĩĩ katĩ adait niigia eleeti cĩk alaanetu, kĩ makayyiok cĩk obbitik, kĩ nyĩcẽkẽr cĩgĩk, kĩ nyangõlẽnya, kĩ eet cĩk amacuc ĩnõõgõ, kĩ nyakapanak, kĩ eet cĩk athii cĩ ẽẽn nyakapanak, kĩ eleeti cĩk eet cĩk obbitik, kĩ cĩk kĩdĩk, vẽlẽk cĩk adaaitõ.”
19 Ma natẽ, kĩcĩna balna na nacamba kĩ alaanẽt cĩk loocu kĩ nyĩcẽkẽr cĩgĩk ngatĩ alũtẽnĩ, kĩĩ katĩ kuuktõy kĩ Et cĩ amacuc nyangõlẽ cĩ võõrĩ ẽẽ, kĩ nyĩcẽkẽr cĩgĩnĩk. 20 Ma jora natẽ, ikiyyia agamẽ nacamba kĩ et cĩ õthõõth molook cĩnnĩ cĩ ẽẽn volongnyiait, cĩ balna adĩman thoothonniok cĩk anaat eeta õrrõt, nyatarka nacamba. Ĩthõng ĩgoolito thoothonniowa neekie eet wũk balna ayak nyamacar cĩ nacambawo, ĩthõng alaacõ gii cĩ õgõõn kĩ nacamba cĩnnẽ. Ma natẽ, utduktothĩk nacamba kĩ et cĩ õthõõth molook cĩnnĩ, cĩ ẽẽn volongnyiait wo buu, bũlũca cobbi cĩ guo cĩ aaburi patdahac cĩ alna kũdũt. 21 Ma natẽ, igiiryiay nyĩcẽkẽrĩ vẽlẽk cĩk nacambawo, nyetubata cĩ lẽhẽdĩ ĩcĩ balna ẽẽkta kũtũga cĩ Et cĩ amacuc nyangõlẽ cĩ võõrĩ ẽẽ, ĩthõng adait kodobbwuana eleeti cĩgĩk.