Õyõwẽ kõrõõgĩ cĩ gaalawu cobbi cĩ Babilonia
18
Ma vurtia ĩcoo, kĩcĩna balna na Yoanẽ anjĩlõ ĩmma cĩ allucciay tammuatiddina, cĩ ayak tiirthẽt cobbi õrrõt, ĩthõng alanyĩt ẽlẽ cĩnnẽ kũtũkũl looc vẽlẽk, nyatarka bulẽnĩt cĩnnĩ. 2 Ma natẽ, ikiyyia ẽgẽrẽny anjĩlõ neccie õrrõt ĩĩ ne,“Athaanẽ athaanẽ, Babilonia cobbi,a õyõwẽ vẽlẽk!
Ikiyyia ĩthĩ kõrõõk cĩ ririwanĩn cĩk gerthek,
kĩ kĩballĩ kĩ kẽlẽgẽ cĩk gerthek vẽlẽk.
3 Ũwũdĩt balna loociowa vẽlẽk
mẽrtẽ cĩ thoothonniok cĩgĩnĩk
cĩk ẽẽn riiriny, ĩthõng ĩbaktẽ.
Ivitia ataguuthõ alaanẽta cĩk looc vẽlẽk kĩ ngaa nĩcẽ,
ĩthõng ivitia tuyyiowua cĩk looc vẽlẽk buu aballiõy,
nyatarka abarriteei ngaa coo kaal cĩk õkõmĩ,
cĩk ũũta nẽ ĩcĩ tuyyiawu nyarobinyay ĩcĩk meelĩk.”
4 Ma natẽ, kĩthĩrara balna na molook ĩmma cĩ aku tammuatiddina cĩ õthõõth athĩ ne,
“Niigia eeta cĩganniek, ẽtẽẽkta ngatĩvõrĩ Babilonia,
kĩĩ katĩ kithii cĩ othollu gerthetin kĩ ĩnõõnõ,
ĩthõng naboo, kĩĩ katĩ kithii cĩ ijiowanu theretua cĩgĩnĩk.
5 Nyatarka athaddie balna thoothonniowa cĩk gerthek
cĩk Babilonia õrrõt kũdũt, ĩthõng õdõlanit tammutiddin,
ĩthõng aga Nyekuci gerthetin cĩnnĩ.
6 Ĩdĩmantek ngaa nĩco thoothonniok
wũk balna adĩmaneei nẽ buu eeta.
Uukit ĩnõõnõ ngõnana ramma thoothonniowẽy
wũk balna adĩmaneei nẽ ĩnõõgõ.
Aryik mẽrtẽ lõkũlkũla cĩnnĩ ngõnana ramma
cĩ ẽlẽnõy ngatĩ uuku niigia ĩnõõnõ gerthetina ĩcĩnnĩ.
7 Anycĩk ĩnõõnõ ukwẽẽnĩt kĩ wuciith cĩ,
aduwõy kĩ bulẽnĩt kĩ rũgẽt cĩnnĩ cĩ abũnna.
Ẽngẽrẽn nẽ thĩnĩna cĩnnĩ, athĩ ne,
‘Keeni na ngaa cĩ kagami taaba kogooni kĩ alaanĩ,
athii cĩ keeni ngaa cĩ bõyyĩ,
ĩthõng athii katĩ cĩ kalu kũdũt.’
8 Ĩthõng thĩna, thẽk atinya katĩ nẽ theretua
cĩk agam ĩnõõnõ, butuny kĩ ulua kĩ daaĩth.
Atũũth katĩ gua ẽlẽ cĩnnĩ mukukuk, nyatarka
ẽngẽr Makayyioiti Nyekuci Tiiryioiti thõõth cĩnnĩ.”
9 “Ma katĩ mĩ alu alaanẽta cĩk loocu, wũk balna oogin kĩ ĩnõõnõ, ĩthõng otholit balinit cĩnnĩ, ngatĩ acĩnĩ guo kĩ burrut cĩ atũũthẽnẽ ngaa neccie. Alu katĩ nẽẽgẽ, ĩthõng omoththie, nyatarka ĩnõõnõ. 10 Anyi katĩ pĩrnanẽtĩ cĩnnẽ alaanẽt cĩkkõ kotongollie, ĩthõng ibillia rẽẽna, ĩthõng ĩĩtõ ne,
“ ‘Pĩrnanẽt pĩrnanẽt ĩcunni kõrõõgĩ cĩ gaalawu cobbi wo!
Yiey Babilonia, kõrõõgĩ cobbi cĩ tiiri!
Aku girianẽtĩ cunnie itin codoi doo yoko!’
11 “Alu katĩ tuyyiowua cĩk looc nĩco vẽlẽk ĩnõõnõ, nyatarka ithii katĩ eeti cĩ ngaanĩ ũũt ijjio cĩgĩk tõ, 12 cĩk ẽẽn daab, kĩ thĩĩk cĩk athĩ kathalkathal, kĩ tẽllẽẽn cĩk ataalĩth, kĩ pẽalnya, kĩ ceremua cĩk dĩhĩmĩk, kĩ kaal cĩk rẽgẽẽtĩk, kĩ ceremua cĩk athalkatĩ, kĩ ceremua cĩk merihik, kĩ kẽẽt cĩ õkõmĩ ngatĩ kũtanẽ, kĩ kaal cĩk aturiay nyĩgĩtẽy cĩk ongoluanu, kĩ kẽẽt cĩ õkõmĩ, kĩ thĩĩk cĩk maantĩk, kĩ bĩĩyẽn cĩk dĩhĩmĩk. 13 Ithii katĩ eeti cĩ ngaanĩ ũũt kaal cĩk anyi dainit kẽmmẽd kĩ mõõcac, kõdẽ mẽrtẽ, kõdẽ ngooroc cĩ olivi, kõdẽ labĩ, kõdẽ gẽẽmẽ, kõdẽ tĩĩn, kõdẽ athaa, kõdẽ nyangõlẽnya, kõdẽ kaal cĩk agurrie kĩ toromilẽta, kõdẽ nyakapanak.
14 “Ĩthõng utuluthõ katĩ nẽẽgẽ ĩĩtõ ne, ‘Babilonia! Ithiicõ kaala wũk balna adiimi niia vẽlẽk, ithii balinti kĩ bulẽnĩt cunni kũdũt.’ 15 Aballiõy balna tuyyiowua õrrõt, nyatarka utuyyik balna nẽẽgẽ ijjio cĩkkõ vẽlẽk eet cĩk Babilonia cobbi ẽẽ. Ma balna ngĩ acĩn nẽẽgẽ pĩrnanẽt cĩnnĩ ẽẽ, ivitia otongollie, ĩthõng utuluthõ nẽẽgẽ, ĩthõng ibillia rẽẽna, 16 ĩthõng ĩĩtõ ne,
“ ‘Pĩrnanẽt, pĩrnanẽt, Babilonia cobbi,
õgõõn Babilonia, kĩ ngaa wũ gõõ ahimtie
ceremuanĩy ĩcĩk dĩhĩmĩk cĩk rẽgẽẽtĩk, kĩ ĩcĩk merihik,
ĩthõng itihim ngariko cĩk ataalĩth cĩk aturiay daaba,
kĩ bĩĩyẽnĩy, kĩ pẽalnyayb cĩk dĩhĩmĩk.
17 Ithii balinti cĩ kõrõõk cĩ gaalawu cobbi ẽẽ, itina codoi.’
“Ĩthõng ibillia baajigi kõvõwõlẽt, kĩ macucciok kĩ eet vẽlẽk cĩk õtõd kõvõwõlẽt kĩ tuyyiak cĩk bulucuanu vẽlẽk, rẽẽna. 18 Ma ngĩ ĩcĩnĩt nẽẽgẽ burrut cĩ atũũthẽnẽ kõrõõgĩ cĩ gaalawu cobbi neccie, ivitia egerenyit nẽẽgẽ ĩĩtõ ne, ‘Aavĩ da balna kõrõõgĩ cĩ gaalawu cobbi õrrõt loota ngato cĩ ijiar coo tõ?’ 19 Ma natẽ, alu katĩ nẽẽgẽ õrrõt, ĩthõng ubukantek ooti cĩgĩk tuduwac, ĩthõng aavutõ uluana, ĩthõng othoothitõ ĩĩtõ ne,
“ ‘Pĩrnanẽt, pĩrnanẽt ĩcĩ kõrõõk cĩ gaalawu cobbi cĩ Babilonia!
Aballiõy eeta vẽlẽk wũk balna ayak kõvõwõlẽt bulucuanĩy,
nyatarka balliok cĩk kõrõõk cĩ gaalawu nĩcĩ obbi ẽẽ.
Ma tamanoko, ithii kõrõõgĩ cĩ gaalawu nĩcĩ obbi ẽẽ,
kõr cĩ odoi.
20 Ebelbelit niigia eeta cĩk Nyekucak tammuatiddina
kĩ eet cĩk callĩk, kĩ tionniakc kĩ eet
cĩk õthõõth molook cĩ Nyekuco vẽlẽk,
nyatarka uuk Nyekuci eet cĩk kõrõõk cĩ gaalawu nĩcẽ kuduktõy
kĩ gõõl wũ balna adĩmannung nẽẽgẽ agiit buu.’ ”
21 Ma natẽ, õdõnga anjĩlõ ĩmma cĩ tiiri õrrõt bĩĩ cobbi, ĩthõng utdukeek tiirthẽta bũlũcatõ, ĩthõng õthõõth ĩĩ ne,
“Ẽẽn coo gõõl cĩ katĩ athaaninie Babilonia
kithii cĩ edenyiay naboo.
22 Ĩthĩnga katĩ kidõrẽta, kĩ belliok, kĩ nyalomoriet, kĩ nyeepunya
cĩ ngaanĩ athĩknẽ õlõõ cobbi ĩcĩ gaalawu naboo.
Ithiicõ katĩ ticcianniowa cĩk
ngaanĩ ẽngẽnyẽt dũkanẽt ĩcĩnnĩ naboo,
ĩthõng ĩthĩnga katĩ rabathuana
cĩk ngaanĩ athĩknẽ ĩcĩnnĩ naboo.
23 Athii katĩ gii cĩ tũkũlẽnto cĩ ngaanĩ
alanyĩt Babilonia naboo.
Athii katĩ moloowĩ cĩ nyẽtẽranit cĩ maacĩ,
kĩ cĩ ngayyi cĩ athĩknẽ ĩcĩnnĩ naboo.
Ẽẽn balna tuyyiowua cugunniek eet cĩk obbitik õrrõt loota ngato.
Ĩthõng ivitia balna ngarẽta cuguk wo,
ĩthõng aanycĩk eet cĩk loociok vẽlẽk kĩgoollie.
24 Aruk balna eeta cĩk Babilonia eet wũk õthõõth molook cĩ Nyekuco,
kĩ eet cĩk dĩhĩmĩk cĩk Nyekucak,
kĩ eet vẽlẽk wũk balna aruwue loota ngato.”