Ngaa cĩ ẽẽn tegemnyiait kĩ nacamba
17
Ma natẽ, ikiyyia balna anjĩlõ ĩmma anjĩlẽtẽy ĩcĩk ẽẽn tũrgẽrẽm wũk balna ayak diicua tũrgẽrẽm, ennea ne, “Ijjia da ngato, kĩĩ katĩ keyeleei gõõl cĩ katĩ õkkõ uuki Nyekuci ngaa cĩ ẽẽn tegemnyiait cobbia õrrõt, cĩ aavĩ loota maamĩy ĩcĩk meelĩk. 2 Ataguuthõ balna nẽ kĩ alaanẽt vẽlẽk loota ngato. Ĩthõng eeta cĩk looc coo, ĩbaktẽ thoothonniowẽy ĩcĩk ẽẽn riiriny ĩcĩk adĩman nẽ.”3 Ngaatĩ okoyyia balna aneeta anjĩlõ Ririwaca cĩ Dĩhĩmĩ baatha cĩ õdõõĩ kak. Ma natẽ, kĩcĩna ngaa coo cĩ aavẽ nacamba cĩ merihib cĩ ayak ooti tũrgẽrẽm kĩ otoo õmmõtõ, ĩthõng eheedothi balna thara ẽla cĩnnĩ, cĩk adaac Nyekuc. 4 Ĩthõng ahimit balna ngaa neccie ceremua cĩk dĩhĩmĩk cĩk merihik, kĩ cĩk rẽgẽẽtĩk, ĩthõng ahimit nẽ kaal cĩk ataalĩth cĩk aturiay daaba, kĩ bĩĩyẽnĩy ĩcĩk addi kĩ pẽalnya.c Ayak nẽ lõkũlkũl cĩ ẽẽn daab athĩnẽy cĩgĩnĩk, cĩk abbĩththĩ kaala cĩk ammu cĩk ẽẽn riiriny cĩk gõõ atican nẽnẽ. 5 Ĩthõng nguuma cĩnnĩ, eheedothi thara cĩk athĩ ne.
Gii cĩ Alugunyi,
Babilonia Cobbi,
Yaatĩ Tegemnyiawu,
Yaatĩ Kaal cĩk Gerthek cĩk Loocu.
6 Ĩthõng kacini balna na Yoanẽ ngĩ, ĩbakci ngaa neccie õrrõt biyyietĩy ĩcĩk agĩĩranẽ nẽ eet cĩk callĩk, wũk balna ẽlẽmanĩ eleeti cĩgĩk kowobit Yesu.
Ĩthõng abulanna balna thõõth coo õrrõt. 7 Ma natẽ, ennea anjĩlõ ne, “Akulei niia jien noko nyia? Kẽkẽbaci katĩ na thõõth cĩ alugunyi cĩ ijiar gẽẽnyĩth cĩ eetu, cĩ ngaa nĩco, kĩ nacamba cĩ ayak ooti tũrgẽrẽm kĩ otoo õmmõtõ buu, cĩk amacuc ngaa neccie wo. 8 Ẽẽn nacamba cĩ balna acini niia ẽẽ, nacamba cĩ balna arũgĩ baa lõõla, ĩthõng yoko adaaha, ẽẽkta katĩ loowa cĩ wuuni cĩ athii cĩ aturnẽcẽ, ĩthõng ũũk katĩ nẽ uruwue. Ĩthõng eeta cĩk looc coo, cĩk balna ngaanĩ keteheddie thara cĩgĩk nyaragawa cĩ rũgẽtõ baa ngaanĩ ketengenyiay lõõcĩ, akulei katĩ nẽẽgẽ jien ma ngĩ acĩn nẽẽgẽ nacamba, nyatarka abaak balna nõ nẽ, ĩthõng yoko ithiiwa, ĩthõng thĩ, nganĩ katĩ aku.
9 “Aga eeti cĩ ẽgẽẽnyĩ athĩ ne, ẽẽn ooti cĩk ẽẽn tũrgẽrẽm cĩk aavẽ ngaa neccio wo, thiiryiok tũrgẽrẽm, 10 ĩthõng naboo, eyehethothi ooti cĩkkõ buu alaanẽt cĩk ẽẽn tũrgẽrẽm ẽẽ. Adaaitõ alaanẽta cĩk ẽẽn tur vẽlẽk, ĩthõng ngaanĩ aavĩ codoi, cĩ ngaanĩ agam looc yoko, ĩthõng ngaanĩ katĩ aku ĩmma. Ĩthõng mĩ ikiyyia neccie, aku katĩ agam looc itinnyiay cĩk kĩdĩk. 11 Ĩthõng nacamba wũ balna arũgĩ, adaak yoko, ẽẽn nẽ alaan cĩ ẽẽn turgi. Ẽẽn nẽ alaan codoi alaanĩtẽy ĩcĩk ẽẽn tũrgẽrẽm ẽẽ, aruwue katĩ nẽ buu, kithii kaganoko.
12 “Ĩthõng otoo cĩk ẽẽn õmmõtõ wo, ẽẽn alaanẽt õmmõtõ õõgĩ naboo, cĩk katĩ ngaanĩ kagamit loociok cĩgĩk, ĩthõng thĩ, katĩ nẽẽgẽ kĩ nacamba anyĩwothi makathĩtĩ cĩ agamĩ looc itin codoi doo. 13 Ẽlẽmĩ katĩ nẽẽgẽ vẽlẽk ngatĩ anyĩcẽ nacamba nĩcẽ tiirthẽt kĩ makathĩt cĩnĩng. 14 Ĩthõng aak katĩ alaanẽta neekie vẽlẽk jore cĩ õvvõ uukõnẽ kĩ Nyion. Amaacĩ katĩ Nyion ĩnõõgõ, nyatarka ẽẽn nẽ Makayyioit cĩ makayyiowu, ĩthõng ĩthĩ Alaan cĩ alaanetu vẽlẽk. Arũmẽ katĩ Nyion kĩ eet wũk balna avva nẽ, ĩthõng ẽbẽra, nyatarka balna athĩrar nẽẽgẽ ĩnõõnõ, ĩthõng uthuutti thõõth cĩnnĩ.”
15 Ĩthõng ennea balna anjĩlõ ne, “Acini niia bulucua cĩk aavẽ ngaa cĩ ẽẽn tegemnyiait ẽẽ, eyehethothi bulucuana meelitin cĩ kabicõnĩnẽ kĩ tatũgẽt cĩk loociok vẽlẽk cĩk õthõõth thoothiowẽy mĩn mĩn. 16 Aku katĩ nacamba kĩ otoo cĩgĩnĩk cĩk ẽẽn õmmõtõ ẽẽ, ẽtẽrẽhanĩ nẽẽgẽ ngatĩ katĩ aaburnẽccĩ ngaa cĩ ẽẽn tegemnyiait. Apũrũca katĩ nẽẽgẽ ceremua cĩk ahimit ngaa neccie ẽẽ, vẽlẽk, ĩthõng ũtũngtek ĩnõõnõ kaavu tdilanyany, ĩthõng katĩ adait ẽlẽ cĩnnĩ, ĩthõng ĩdĩmta lõtaabũr cĩk ẽlẽ cĩnnĩ ẽẽ, ĩthõng utdukteek ẽlẽ cĩnnĩ guyyiatõ kũtũthẽ vẽlẽk. 17 Nyatarka anyi Nyekuci alaanẽt nĩĩko kõdõwẽ muwẽẽnĩtĩ cĩnĩng, ĩnõõnõ thĩ cĩ ẽlẽmtaĩ nẽẽgẽ vẽlẽk tiirthẽt cĩnĩng ngatĩ anyĩcẽ nacamba nĩco wo. Atican thẽk katĩ nẽẽgẽ noko, gii ngĩ ikiyyia thõõth wũ balna aduwa Nyekuci kĩĩ dĩdĩ. 18 Ĩthõng ngaa cĩ acini balna niia ẽẽ, eyehethothi kõrõõk cĩ gaalawu cobbi cĩ agam alaanẽt cĩk loocu vẽlẽk.”