Diicua cĩk varac cĩ Nyekuco
16
Ma natẽ, kĩthĩrara na Yoanẽ molook cobbi cĩ aku Ciitha cĩ Nyekuco cĩ aduwaai anjĩlẽt tũrgẽrẽm ethei ne, “Õõt utduutik varac cĩ Nyekuco cĩ aavĩ diicuanĩy ĩcĩk ẽẽn tũrgẽrẽm ẽẽ, eetĩnẽy vẽlẽk ĩcĩk abũrĩ thõõth cĩ Nyekuco loota ngato.”2 Ma natẽ, ĩcĩĩdĩk balna anjĩlõ cĩ owu thẽrẽt cĩ ayak nẽ dĩĩca cĩnnĩ wo eet loota ngato. Ma tamanoko, ilibtia kaakuanya cĩk gerthek, ĩthõng ẽcẽrẽt õrrõt eetĩnẽy cĩk ayak nyẽkẽr cĩ nacambawo, ĩthõng alaacõ gii cĩ õgõõn kĩ nacamba.
3 Ma naboo natẽ, ĩcĩĩdĩk balna anjĩlõ cĩ ẽẽn ramma thẽrẽt cĩ dĩĩc cĩnnĩ bũlũcatõ. Ma natẽ, ũtũwẽ bũlũc ĩthĩ biyyie cĩk õgõõn kĩ biyyieta cĩk et cĩ adaak vẽlẽk, ngaatĩ adaaknĩ kaala cĩk aatĩ bũlũcatõ vẽlẽk.
4 Ma tamanoko, õwõbẽĩ anjĩlõ cĩ ẽẽn iyyio ĩcĩĩdak thẽrẽt cĩ dĩĩc cĩnnĩ lilliowẽy vẽlẽk ĩcĩk arik loota ngato. Ma natẽ, utuwuyyie maama lilliowẽy vẽlẽk kĩĩtõ biyyie. 5 Ĩthõng kĩthĩrara balna na anjĩlõ ĩmma cĩ agam maam vẽlẽk, õthõõth athĩ ne,
“Eeni niia Nyekuc cĩ ẽẽn dĩdĩ cĩ
eteedi thoothonniok jurrung, aniitia cĩ aavẽ yoko,
kĩ balna ngĩ aavẽ baa lõõla buu noko,
ĩthõng eeni niia dõõkĩthĩ Nyekuc cĩ callĩ,
nyatarka engeri niia thoothonniok gõõla cĩ edeemothi.
6 Uruit balna eeta wũk gerthek eet cugunik cĩk callĩk,
kĩ eet cĩk õthõõth molook cunni.
Ĩthõng anyiwu balna niia eet cĩk gerthek wo, kũwũdĩt biyyie,
nyatarka adĩman balna nẽẽgẽ kaal cĩk gerthek.”
7 Ĩthõng thĩ, kĩthĩrara balna na molook ngatĩ todongintio cĩ avaadinie mõõcacĩ cĩ õthõõth athĩ ne,
“Ii, Makayyioit Nyekuc Tiiryioit cĩ Ijiari vẽlẽk,
engeri niia thoothonniok jurrung gõõla cĩ edeemothi.”
8 Ma natẽ, utduutik anjĩlõ cĩ ẽẽn wec dĩĩc cĩnnĩ kõrratõ, ngaatĩ atũũthĩ aburthẽtĩ cĩ korro cĩ õgõõn kĩ gua eet õrrõt. 9 Atũũth balna aburthẽtĩ cĩ korro eet wũk balna gerthek kipiryia õrrõt, ngaatĩ acĩĩnĩ nẽẽgẽ thar cĩk Nyekuc wũ balna ayak makathĩt cĩ theretua cĩk gerthek wak wo. Ĩthõng thĩ, alna balna abũrĩ nẽẽgẽ ngatĩ ũũngnĩcẽ thoothonniok cĩgĩk cĩk gerthek, ĩthõng athii cĩ abuluth ĩnõõnõ buu.
10 Ma natẽ, ũũk utduutik balna anjĩlõ cĩ ẽẽn tur dĩĩc cĩnnĩ taabawa cĩ nacambawo, ma tamanoko, ũtũwẽ lõõcĩ cĩ alaanthẽt cĩnnĩ ĩĩ muwur, ngaatĩ adaĩ eeta ahaatua cĩgĩk wuciitha, 11 ĩthõng nyatarka wuciith cĩ kaakuanya cĩgĩk ẽẽ, alna balna nẽẽgẽ acĩĩn Nyekuc cĩ tammutiddin, ĩthõng naboo, alna atican nẽẽgẽ thoothonniok cĩk gerthek noko.
12 Ma natẽ, ikiyyia utduutik balna anjĩlõ cĩ ẽẽn tõrkõnõm dĩĩc cĩnnĩ Lĩĩla cobbi ĩcĩ Yuvarẽthĩ, ngaatĩ õdõõngnĩ Lĩĩlĩ coo, ĩthõng ĩthĩ gõõl cĩ õwõyyĩ alaanẽta cĩk avvu tõõna cĩ alibanĩ kõrra. 13 Ma natẽ, kĩcĩna balna na ririwanĩn iyyio cĩk gerthek, cĩk õgõõn kĩ nyarũdẽta. Ẽẽkta ĩmma kũtũga cĩ kugulo, ĩthõng ẽtẽha ĩmma kũtũga cĩ nacambawo, ĩthõng naboo, ẽtẽha ĩmma kũtũga cĩ et cĩ õvõlõng athĩ ne, ẽẽn nẽ et cĩ õthõõth molook cĩ Nyekuco. 14 Ĩthõng ririwanĩna cĩk gerthek ĩcĩk ẽẽn iyyio wo, ayak tiirthẽt cĩ adĩmanĩ thoothonniok cĩk anaat eeta. Ma natẽ, õõt uduktiak alaanẽt cĩk loocu vẽlẽk kuluttie ngatĩ odoi, kĩĩ katĩ kõõt jora cĩ kõr cobbi, cĩ katĩ ẽtẽẽdĩ Nyekuci Tiiryioiti cĩ Ijiar vẽlẽk, thoothonniok kõrra cĩ ditianẽt cĩ loocu.
15 Athĩ Yesu ne, “Ĩcĩnĩt, kanĩha katĩ na kĩ goryiaiti! Agatan katĩ Nyekuci et cĩ aavĩ vĩrĩngĩng, ĩthõng ayak cẽrẽm ẽla cĩnnĩ, kĩĩ katĩ kithii cĩ woccia aavĩ tdilanyany, ĩthõng anyĩk ẽlẽ cĩnnĩ ngawani.”
16 Ĩthõng uluttia ririwanĩna cĩk gerthek wo, alaanẽt cĩk loocu kĩ nyĩcẽkẽr cĩgĩk vẽlẽk ngatĩ odoi, athĩ nginicẽ Hebureyyiey ne, Aramageddõn.a
17 Ma natẽ, utduutik balna anjĩlõ cĩ ẽẽn tũrgẽrẽm dĩĩc cĩnnĩ ngõõta. Ma natẽ, ẽgẽrẽnya Nyekuci moloowa cobbi taabawa Ciitha cĩnnĩ ĩĩ ne, “Kẽdẽcaha thõõth vẽlẽk!” 18 Ma natẽ, abad tammu kĩĩ kicciawõy, ĩthõng iliba kirikirihi buu cobbi õrrõt cĩ gõõ ngaanĩ kikiyyia erkinyiay vẽlẽk. 19 Ngaatĩ aku balna engerini kõrõõgĩ cĩ gaalawu cobbi cĩ Babilonia kĩĩ iyyio, ĩthõng naboo, ivitia õõyõktẽ korookjiowa cĩk gaalawu cĩk loociok vẽlẽk buu kĩĩ ĩĩr. Ngaatĩ ahadanĩ Nyekuci gerthetin cĩ eet cĩk Babilonia vẽlẽk, ĩthõng aanyĩk nẽ ĩnõõgõ kũwũdĩt mẽrtẽ cĩ varac cĩnnĩ. 20 Ĩthõng balna ivitia ithiicõ loociowa cĩk alĩha maama kĩ thiiryiok cĩk wuuntik vẽlẽk. 21 Ĩthõng naboo, utduuttiak mũllẽnab gwuak cĩk obbitik cĩk tammuak cĩk ẽẽn kĩ dongok cĩ labinu eeta, ĩthõng ũmũnyĩtõ eet loota ngato õrrõt. Ma natẽ, ĩcĩĩnĩtõ eeta Nyekuc õrrõt kaganoko, nyatarka balna aanycĩk mũllẽna neekie eet kipiryia õrrõt kũdũt.