Yelinit 15

Anjĩlẽt tũrgẽrẽm kĩ theretua tũrgẽrẽm

Ma vurtia, kĩcĩna na Yoanẽ yelinit cobbi tammuatiddina, ĩthõng ĩthĩ tiir õrrõt. Ẽẽn yeliniti neccie cĩ ayak anjĩlẽta cĩk ẽẽn tũrgẽrẽm ẽẽ theretua tũrgẽrẽm cĩk hecintiak cĩk aturna, ĩthõng mĩ edecciay nẽẽgẽ, ũtũbanothĩk thĩ katĩ varacĩ cĩ Nyekuco.

2 Ma natẽ, kĩcĩna balna na gimma cĩ ataalĩth cĩ õgõõn kĩ gĩlathĩ cobbi cĩ ẽẽn kĩ bũlũc, ĩthõng õngõtanothi kĩ guo. Abĩlĩ eeta titimma cĩ bũlũc coo, wũk amaacĩ nacamba, kĩ gii cĩ õgõõn kĩ nẽ, kĩ kebiniet cĩ ẽyẽla thar cĩk nacambawo. Agam balna nẽẽgẽ vẽlẽk kidõrẽt wũk balna aanyĩk Nyekuci ĩnõõgõ. 3 Ĩthõng ebelit tẽgẽl cĩ Mutha wũ balna ẽẽn ticciannioit cĩ Nyekuco, ĩthõng ebelit tẽgẽl cĩ Nyiono buu ĩĩtõ ne,

“Makayyioit Nyekuc Tiiryioit cĩ Ijiari vẽlẽk,

abulannet thoothiowa cĩk adĩmani niia cĩk ẽẽn dĩdĩ.

Agami niia eet vẽlẽk jurrung,

eeni niia Alaan cĩ erkinya vẽlẽk.

4 Makayyioit, ngẽnẽ woccia cĩ athii

cĩ ongolini aniitia, ĩthõng ĩdĩhĩth thar cugunik?

Nyatarka aniitia dõ cĩ eeni calla.

Avvu katĩ eeta cĩk loociok vẽlẽk,

ĩthõng alayyi aniitia,

nyatarka edenyciay tiicanẽ cugunniek

cĩk abũnna wo vẽlẽk.”

5 Ma vurtia, kĩcĩna Ngĩtĩ Angiranni cĩ Dĩhĩmĩ Õrrõt Ciitha cĩ Nyekuco tammuatiddina õwẽ. 6 Ma natẽ, ẽtẽẽkta anjĩlẽta wũk balna ẽẽn tũrgẽrẽm Ciiatõ cĩ Nyekuco ngatĩvõrĩ, ayaha theretua tũrgẽrẽm buu. Ahimit balna nẽẽgẽ ceremua cĩk võõrĩk pẽr, ĩthõng amaragitõ ceremua cĩk ẽẽn daab ĩyyẽtẽy cĩgĩk. 7 Ma natẽ, ikiyyia balna gimma codoi cĩ arũgĩ kaalĩy ĩcĩk ẽẽn wec ĩcĩk arũgĩ ẽẽ, engereek anjĩlẽt nĩĩkẽ diicua cĩk ẽẽn daab. Abbĩththĩ balna varacĩ cĩ Nyekuc cĩ arũgĩ kũdũt diicuanĩy nĩĩkẽ. 8 Ma natẽ, ukku burruti Ciith cĩ Nyekuco cĩ aku bulẽnta kĩ tiirthẽta cĩ Nyekuco. Ĩthõng athii balna eeti cĩ ẽhẽẽt Ciith cĩ Nyekuco ẽẽ tõ, gii ngĩ edecciak anjĩlẽta cĩk ẽẽn tũrgẽrẽm ẽẽ, ngatĩ atduutĩcẽ theretua cĩk ẽẽn tũrgẽrẽm ẽẽ, looc.