Nyion kĩ wobjiak cĩgĩnĩk
14
Ĩthõng thĩ, kĩcĩna na Yoanẽ Nyion abĩlĩ Thiira ĩcĩ Thionĩ,a arũmẽ kĩ eet cĩk ẽẽn vucciaknya eet tur kĩ vucciaknya eet ramma kĩ vucciaknya wec (144,000), cĩk ayak thar cĩgĩnĩk kĩ thar cĩk Baatĩnnĩ nguumtẽnẽy cĩgĩk. 2 Ma natẽ, kĩthĩrara balna na molook ĩmma cĩ aku tammuatiddina, cĩ õrõĩ õrrõt kĩ maama cĩk aciidiay thiira, kõdẽ aavĩ kĩ gõõ ngĩ icciayyi tammu katĩ ngĩ atĩĩlĩ, ĩthõng kõdẽ kĩ gõõ ngĩ õrõĩ kidori. 3 Ĩthõng ebellie tẽgẽl cĩ jõr nguuma cĩ taaba cĩ Nyekuco, kĩ nguumtẽnẽy ĩcĩk kaal cĩk arũgĩ wũk balna ẽẽn wec buu, kĩ eet cĩk obbitik. Kothii balna et cĩ aga tẽgẽl nĩcẽ kũdũt. Aga tẽgẽl nĩcẽ eeta cĩk ẽẽn vucciaknya eet tur, kĩ vucciaknya eet ramma, kĩ vucciaknya wec (144,000) wũk balna eliay loota ngato. 4 Athii balna nẽẽgẽ vẽlẽk cĩ oogin kĩ ngaay taktak, ĩthõng callẽ nẽẽgẽ. Ĩthõng õwõb Nyion kũdũt, gõõla cĩ õkõyyĩ nẽ. Ĩthõng balna eliay nẽẽgẽ kõrgẽna cĩ eet vẽlẽk loota ngato. Anyĩwothi katĩ nẽẽgẽ Nyekuc kĩ Nyion, kutuguthõ kĩ labĩna cĩk eteediay ĩcowu cĩk anyĩwothi Nyekuc. 5 Athii eeta cĩkkõ cĩ õvõlõng kũdũt, ĩthõng athii woccia cĩ emeryi kaganoko.Nyemutua cĩk anjĩlẽt cĩk ẽẽn iyyio
6 Ma natẽ, kĩcĩna balna na anjĩlõ ĩmma cĩ akul tammuatiddina, ayaha Nyemut cĩ Abũnna cĩ aavĩ kũdũt cĩ Nyekuco, cĩ aku aduwaai loociok, kĩ kabicõnĩnẽ, kĩ tatũgẽt, kĩ eet cĩk õthõõth thõõth cĩnĩng vẽlẽk. 7 Ẽgẽrẽny balna anjĩlõ coo õrrõt athĩ ne, “Otongollie niigia Nyekuc, ĩthõng anyciwu ĩnõõnõ bulẽnĩt, nyatarka õbõwẽ kõr cĩ aku ẽtẽẽdĩ nẽ thoothonniok cĩk eetu. Alaac ĩnõõnõ, nyatarka ẽngẽnyca balna nẽ tammutiddin kĩ looc, kĩ bulucua kĩ duwwuẽn vẽlẽk.”
8 Ĩthõng õwõba balna anjĩlõ cĩ ẽẽn ramma, cĩ ẽgẽrẽny athĩ ne, “Õyõwẽ, õyõwẽ kõrõõgĩ cĩ gaalawu cobbi cĩ Babilonia!b Nyatarka aanyĩk Babilonia eet vẽlẽk kĩbaktẽ mẽrta cĩ vĩnõwo, ĩthõng ĩdĩmanit thoothonniok cĩk ẽẽn riiriny.”
9 Ma natẽ, õwõba balna anjĩlõ cĩ aturna cĩ ẽẽn iyyio, ĩthõng ẽgẽrẽny nẽ buu ĩĩ ne, “Eeti cĩ ala nacamba, kĩ gii cĩ õgõõn kĩ nẽ, ĩthõng ẽlẽm ngatĩ, aarĩcẽ nyamacar cĩ nacambawo nguuma cĩnnĩ, kõdẽ attia cĩnnĩ, 10 awũd katĩ nẽ mẽrtẽ cĩ atduutiai ngĩtĩvõrĩ varacintia cĩ Nyekuco. Acananni katĩ nẽ guyyia, cĩ aaburi patdahac, ĩthõng acĩn Nyion, kĩ anjĩlẽt cĩgĩnĩk cĩk dĩhĩmĩk noko. 11 Ma ngĩ ala eeti ĩmma nacamba, kĩ gii cĩ õgõõn kĩ nẽ, ĩthõng ẽlẽm nyamacarnya cĩk thar cĩgĩnĩk, acananni katĩ nẽ baalin, kĩ waathĩn. Ĩthõng ĩngathĩ katĩ burruti cĩ canan cĩnnĩ wo, kũũk tammuatiddina kũdũt kaganoko, ĩthõng athii katĩ, cĩ ayuwuth nẽ kũdũt.” 12 Athĩ thõõth coo ne, adiim ngĩ, õmõgĩ eeta cĩk Nyekucak canan, ĩthõng uthuutti thoothonniok cĩk tĩrĩthẽnĩt cĩ Nyekuco, ĩthõng uthuutti leminit cĩnĩng ĩcĩ Yesu kũdũt.
13 Ngaatĩ kathĩknẽ balna na molook, cĩ aku tammuatiddina athĩ ne, “Tẽhẽẽd thõõth coo loota. Ẽtẽrahanĩ kõr coo, agatan katĩ Makayyioiti eet cĩk adaaĩ cĩk ẽlẽmĩ nẽẽgẽ ĩnõõnõ.”
Ẽdẽcĩ Ririwacĩ cĩ Dĩhĩmĩ athĩ ne, “Ii, arũba katĩ nẽẽgẽ yuwuthõn tiica cĩnĩng, ĩthõng katĩ anyĩwothi ĩnõõgõ anyintiowa cĩk adũman tiic cĩnĩng.”
Teedinet cĩ aturna
14 Ma natẽ, kĩcĩna balna na Et cĩ aavĩ kĩ Ngẽrtĩ Eeto,c aavĩ loota diitha cĩ võõrĩ pẽr, ĩthõng itihim lũlũwoc cĩ ẽẽn daab, ĩthõng agam thẽrẽthẽrẽ cĩ teedintio attia cĩnnĩ. 15 Ma natẽ, ẽtẽha balna anjĩlõ ĩmma ngatĩvõrĩ Ciitha cĩ Nyekuco, cĩ egerenyeei Et cĩ aavĩ loota diitha wo, ethei ne, “Tẽrẽhaĩ teedinet thẽrẽthẽrẽwa cunni ĩcĩ lẽhẽdĩ wo, nyatarka ibbir mana, ĩthõng ũtũbanothĩk kõr cĩ teedintio loota ngato.” 16 Ngaatĩ balna adĩmanĩ Eeti cĩ aavĩ loota diitha natẽ ẽẽ, thẽrẽthẽrẽ cĩnnĩ, ĩthõng ẽtẽrẽhaĩ ẽtẽda kaal cĩk ibbiritõ loota ngato wo.
17 Ma natẽ, ẽtẽha anjĩlõ ĩmma naboo, ngatĩvõrĩ Ciiatõ cĩ Nyekuco tammuatiddina, cĩ ayak thẽrẽthẽrẽ cĩ lẽhẽdĩ buu cĩ teedintio. 18 Ma vurtia, ikiyyia anjĩlõ ĩmma cĩ agam tiirthẽt cĩ guyyio ũtũngek ngĩtĩ todongintio cĩ avaadinie mõõcacĩ, ĩthõng uduwak anjĩlõ nĩcẽ ethek ne, “Dĩma thẽrẽthẽrẽ cunni cĩ lẽhẽdĩ ẽẽ, ĩthõng ẽtẽdaẽ nyegerua cĩk ibbiritõ cĩk vĩnõwak loota ngato.” 19 Ngaatĩ ẽtẽdanẽ anjĩlõ nyegerua cĩk ibbiritõ cĩk vĩnõwak thẽrẽthẽrẽwa cĩnnĩ. Ma natẽ, ũlũtek nẽ nyegerua loowatõ ngatĩ amacũwẽnĩ vĩnõ,d kĩĩ yelinit cĩ varac cĩ Nyekuco. 20 Aavĩ balna look cĩ amacũwẽnĩ vĩnõ ẽẽ, ngatĩvõrĩ kabanyca, ĩcĩ kõrõõk cĩ gaalawu cobbi. Ma balna ngĩ amacũwĩ vĩnõ neccie ẽẽ, ũũkcĩ kẽnnẽ kĩĩ biyyie. Ma natẽ, utuwuyyie biyyieta kĩĩtõ duwwo cĩ arik õrrõt, kõdõlan reenitin cĩ ẽẽn maĩlnyae eet tur kĩ eet wec (180), ĩthõng wuun awũpan woccia ngatĩ õdõlanĩ õõ cĩ nyangõlẽwo.