13
Ĩthõng ũũk balna ĩbĩl kuguli neccie, ẽrẽẽwõy titimma cĩ bũlũco.Nacamba cĩ ẽẽn codoi
Ma natẽ, kĩcĩna balna na Yoanẽ nacamba ĩmma cĩ ẽẽkta bũlũcatõ cĩ ayak otoo õmmõtõ kĩ ooti tũrgẽrẽm. Ayak otoo cĩk ẽẽn õmmõtõ vẽlẽk lũlũwẽn õmmõtõ, ĩthõng eteheddie thara cĩk adaac Nyekuc ootinẽy cĩk ẽẽn tũrgẽrẽm wo vẽlẽk. 2 Ĩthõng balna nacamba cĩ kacini na wo, ayak ẽlẽ kĩ kẽẽlangĩ, ĩthõng ayak thoo kĩ kelegiti cĩ boono cĩ athĩ biia,a ĩthõng ayak kũtũk kĩ maa. Ma natẽ, anyĩk kuguli tiirthẽt kĩ makathĩt cĩnnĩ vẽlẽk nacamba nĩcẽ. 3 Ayak balna õõ codoi cĩ nacamba nĩcẽ kaakuac cobbi õrrõt, cĩ woccia baalia aruk ĩnõõnõ, ĩthõng thĩ, balna ikiyyia alal kaakuacĩ. Ma natẽ, ikiyyia ubulan thõõth coo eet vẽlẽk loota ngato, ngaatĩ õwõbĩ nẽẽgẽ nacamba nĩcẽ. 4 Avvu balna ala eeta kugul nĩcẽ, nyatarka aanyĩk nẽ nacamba makathĩt cĩnnĩ. Ngaatĩ avvu alawĩ eeta nacamba buu athĩ ne, “Ngẽnẽ cĩ aduwõy kĩ nacamba coo, ĩthõng ngẽnẽ cĩ woccia uukõy kĩ ĩnõõnõ wo?”
5 Ma natẽ, anyĩwothĩk balna nacamba nĩcẽ thoothonniowa cĩk ẽngẽrẽnĩ kĩ thoothonniok cĩk adaacĩ Nyekuc, ĩthõng iticanõĩ makathĩt cĩnnĩ wo, nyĩĩlõwẽ eet ramma kĩ ramma. 6 Ĩthõng ikiyyia balna adaac nacamba Nyekuc, kĩ thar cĩgĩnĩk, kĩ kõrõõk cĩnnĩ, kĩ eet vẽlẽk cĩk arũmẽ kĩ ĩnõõnõ tammuatiddina. 7 Ma natẽ, ikiyyia anyĩwothĩk nacamba nĩcẽ tiirthẽtĩ kuuktõy kĩ eet cĩk Nyekucak, kĩĩ katĩ katamac nẽ ĩnõõgõ. Ĩthõng balna anyĩwothĩk nacamba nĩcẽ buu makathĩtĩ cĩ agamĩ looc, kĩ kabicõnĩnẽ, kĩ tatũgẽt kĩ eet cĩk thoothonniok mĩn mĩn vẽlẽk. 8 Ngaatĩ avvu katĩ alawĩ eeta vẽlẽk cĩk looc coo nacamba nĩcẽ. Ẽẽn eeta cĩkkõ, eet wũk athii cĩ eheeddi thara cĩgĩk, balna ngaanĩ ketengenyiay lõõcĩ, nyaragawa cĩ rũgẽtõ cĩ Nyion wũ balna aruwue.
9 Ĩthõng eeti cĩ ayak kĩĩn, anyĩk ĩnõõnõ kĩthĩwõy jurrung.
10 Mĩ adiim Nyekuci et ĩmma kagamẽ kũũk kĩjana,
agamnyi thẽk katĩ nẽ,
ĩthõng mĩ adiim Nyekuci et ĩmma kõngõlanẽ,
õngõlanni thẽk katĩ nẽ kabaatha.
Anyi thõõth coo eet cĩk callĩk cĩk Nyekucak komogit canan, ĩthõng uthuutti thõõth cĩnnĩ kũdũt.
Nacamba cĩ ẽẽn ramma
11 Ma natẽ, kĩcĩna balna na nacamba ĩmma naboo, cĩ ẽẽkta loota ngato, cĩ ayak otoo ramma kĩ nyiona, ĩthõng thĩ, õthõõth nẽ kĩ kuguli. 12 Adĩmanini nẽ tiirthẽt vẽlẽk, cĩ nacamba wũ balna owu, wũ balna ayak tubeenit õõwa wũ alal vẽlẽk. Ĩthõng ĩtĩnganeek eet makathĩta cĩnnĩ loota ngato, kalaacõ nacamba wũ owu. 13 Ĩthõng balna adĩman nacamba coo, kaal cĩk anaat eeta, ĩthõng aanyĩk guo kikiyyia tammuatiddina kõdõlan looc, ĩthõng acĩn eeta noko. 14 Ĩgõõl balna nacamba neccie, eet loota ngato, ngatĩ adĩmanẽcĩ thoothonniok cĩk, anaat eeta cĩk nacambawak wũk balna owu. Ma natẽ, ikiyyia uduwak eet, kẽtẽngẽnyca gii cĩ õgõõn, kĩ nacamba cĩ balna athii cĩ adaaĩ, kõdẽ woyyia balna ngĩ acuwanni nyetubata. 15 Ma natẽ, anyĩwothi balna ĩnõõnõ tiirthẽt kũtũbũwek ngõõt cĩ ẽẽn rũgẽt gii cĩ õgõõn kĩ nacamba cĩ owu ẽẽ, kĩĩ katĩ kõthõõth nẽ. Ĩthõng eeta vẽlẽk cĩk abũrĩ ngatĩ alawĩ gii nĩco, aruwue katĩ nẽẽgẽ. 16 Ma natẽ, ikiyyia ĩtĩnganeek nacamba coo, eet vẽlẽk cĩk abulie, kõdẽ cĩk athii cĩ abulie, balliok kĩ ngĩjũrra, nyakapanak, kĩ eet cĩk athii cĩ ẽẽn nyakapanak, kĩĩ katĩ karyiwothĩk nyekerwuana nguumtẽnẽy, kõdẽ athĩnẽy cĩgĩk ĩcĩk athio, 17 kĩĩ katĩ kĩĩ dũũwũk et cĩ ayak nyẽkẽmẽr nĩcẽ, cĩ ũũlĩ ngatĩ ũũtẽnẽ ijjio cĩgĩnĩk, kõdẽ kũtũwa ijjio õõgĩ buu. Ẽẽn nyẽkẽr neccie thar cĩk nacamba nĩcẽ kĩ kebiniet cĩ thar cĩgĩnĩk.
18 Adiim thẽk ngĩ egeenyi, kĩĩ katĩ gaa kebiniet cĩ nacamba nĩcẽ! Ĩthõng mĩ egeenyi, aga woccia ngatĩ aticani thõõth coo. Ẽẽn kebinietĩ cĩ nacamba nĩcẽ eet etĩmma, kĩ eet õmmõtõ, kĩ eet iyyio, kĩ tõrkõnõm (666), ĩthõng ẽẽn kebinietĩ coo cĩ nacambawo.