Ngaa kĩ kugul
12
Ma natẽ, kĩcĩna na Yoanẽ gimma cĩ anaat eeta cĩ edenyiay tammuatiddina. Ẽẽn ngaa ĩmma cĩ ahimit ceremua cĩk ẽẽn kõr, abĩlĩ nyĩĩlowa, ĩthõng itihim lũlũwoc cĩ ayak mũnyũny õmmõtõ kĩ ramma. 2 Anyakcie balna ngaa neccie, ĩthõng utulu õrrõt, nyatarka wuciith cĩ dooleco baa ngĩ idiim nẽ utuwuay.3 Ma tamanoko, ikiyyia edenyiay gimma tammuatiddina naboo, cĩ õgõõn kĩ kuguli cobbi cĩ merihi,a cĩ ayak ooti tũrgẽrẽm, kĩ otoo õmmõtõ, ĩthõng ayak ooti cĩk ẽẽn tũrgẽrẽm ẽẽ, vẽlẽk lũlũwẽn. 4 Ma natẽ, itivil kuguli neccio mũnyũny, tõõna ĩcĩ odoi, tonniowẽy ĩcĩk ẽẽn iyyio kuula cĩnnĩ tammuatiddina, kutdukwuak ĩnõõgõ looc loota ngato. Ĩthõng ĩbĩlek kuguli ngaa cĩ aam doolec ẽẽ, kĩĩ katĩ kadak doolec, katĩ ngĩ utuwuay.
5 Ma natẽ, ũtũwa ngaa neccio doolec cĩ maacĩ cĩ katĩ aku agam nẽ loociok vẽlẽk gõõla cĩ tiiri õrrõt. Ma natẽ, ikiyyia ũũwĩ Nyekuci doolec, ĩthõng ũũk arĩk taabawa cĩnnĩ. 6 Ngaatĩ aviri ngaa neccio õkõyyĩ bõõnatõ ĩmmanĩ ĩcĩ õdõõĩ kak, ngatĩ balna adĩmaneei Nyekuci kũthũtĩ ĩnõõnõ wathinniok vucciak codoi kĩ eet õmmõtõ kĩ eet iyyio (1,260).
7 Ma natẽ, iliba jore tammuatiddina. Uukõy balna alaanĩ cĩ anjĩletu cĩ athĩ Maĩkõl kõdõwẽ kĩ anjĩlẽt cĩgĩnĩk vẽlẽk kĩ kugul kĩ anjĩlẽt cĩgĩnĩk noko. 8 Ma natẽ, ikiyyia balna atamaac nẽ kugul kĩ anjĩlẽt cĩgĩnĩk vẽlẽk, ngaatĩ ingkawĩ nẽ ĩnõõgõ ngatĩvõrĩ õlõõ cĩ Nyekuco ngatĩnĩng tammuatiddina. 9 Ĩthõng kuguli cobbi coo, ẽẽn kũwaat wũ balna rẽẽnĩb wũ ẽẽn alaan cĩ ririwanĩn cĩk gerthek, cĩ athĩ thar cĩgĩnĩk Thĩttan, wũ gõõ ĩgõõl looc. Ĩthõng utduktiak nẽ kĩ anjĩlẽt cĩgĩnĩk vẽlẽk looc loota ngato.
10 Ma natẽ, kĩthĩrara balna na molook cobbi cĩ aku tammuatiddina cĩ õthõõth athĩ ne,
“Kõr coo, ikiyyia elinti kĩ makathĩt,
kĩ alaanthẽt cĩ Nyekuc cĩnac, kĩ makathĩt cĩ Kiristo cĩnnĩ.
Nyatarka utduktiak nẽẽgẽ volongnyiait
cĩ gotoonogiet kĩ ngoonogiet cĩgaac looc,
cĩ õvõlõngĩ ĩnõõgõ nguuma cĩ Nyekuc cĩnac
baalin kĩ waathĩn.
11 Ijiar balna lemnyiowa Thĩttan
biyyietĩy ĩcĩk Nyionak kĩ thõõtha
ĩcĩ ẽẽn dĩdĩ cĩ irion nẽẽgẽ.
Athii balna cĩ amĩnan nẽẽgẽ
rũgẽt cĩnĩng õrrõt,
ĩnõõnõ thĩ cĩ athii
cĩ ongollie nẽẽgẽ ngatĩ adaaknĩ wo.
12 Ĩthõng thĩna, anycĩk tammutiddin kẽbẽlbẽl,
ĩthõng atalit niigia vẽlẽk eeta cĩk attiyyu natẽ!
Ĩthõng thĩ, aavĩ pĩrnanẽtĩ kĩ agiitia eet,
cĩk attiyyu loota ngato kĩ bulucuanĩy,
nyatarka ikiyyiawung balna agiitia alaanĩ
cĩ ririwanĩn cĩk gerthek loota ngato.
Avaracĩth nẽ õrrõt, nyatarka aga nẽ ngĩ athĩ ne,
ayak nẽ itin cĩ dĩcĩ kaganoko.”
13 Ma balna mĩ aku atinya kuguli ngĩ atdukothi looc ẽẽ, ikiyyia umur nẽ ngaa wũ balna ũũkca ngẽrĩnĩ. 14 Anyĩwothi balna ngaa nĩco kavutanẽ ramma cĩk obbitik, cĩk õgõõn kĩ kavutanẽ cĩk thuutak cĩk ẽẽl ĩnõõnõ kivir kugula, kũũk ĩcĩ baath cĩ õdõõĩ kak, ngatĩ athii cĩ õdõlanĩ kũwaat neccio,c ĩthõng ulugunyie, nẽ natẽ erkinya iyyio kĩ kõrgẽn. 15 Ma natẽ, ĩthĩĩca kũwaat maam cĩk ẽẽn kĩ tõwõn, kĩĩ katĩ kitik tõwõnĩ ngaa nĩcẽ. 16 Ẽẽl balna lõõcĩ ngaa nĩcẽ, nyatarka upuuwe balna lõõcĩ, ĩthõng ukku maam wũk balna athĩĩca kũwaat neccie. 17 Ma natẽ, ikiyyia avaracĩk kuguli neccio ngaa nĩcẽ õrrõt kũdũt, ngaatĩ ahĩ kuguli jore, ĩthõng õõt uuktõy kĩ dõõlĩ cĩk ngaa nĩcẽ, ẽẽn nẽẽgẽ eet cĩk athĩrar thoothonniok, cĩk tĩrĩthẽntiok cĩk Nyekucak, ĩthõng elemit thoothonniok cĩk aliman Yesu. 18 Ĩthõng ũũk balna ĩbĩl nyawu neccie, ẽrẽẽwõy titimma cĩ bũlũco.