Eet ramma cĩk ẽẽn kẽbẽrẽ
11
Ma natẽ, anya balna anjĩlõ ĩmma aneeta kẽẽt cĩ aavĩ kĩ wũ gõõ katĩmani looc, ĩthõng ennea nẽ aneeta ne, “Bĩt tĩman Ciith cĩ Nyekuco, kĩ ngĩtĩ todongintio cĩ avaadinie mõõcacĩ, ĩthõng ekebu eet vẽlẽk cĩk alayyie natẽ. 2 Ĩthõng thĩ, nyĩ atĩmani looc reerunga cĩ Ciith cĩ Nyekuco. Tũngek reerung kaavu noko, nyatarka balna anyĩwothi eet cĩk ngaanĩ kagaacõ Nyekuc, ĩthõng avvu katĩ agam nẽẽgẽ kõrõõk cĩ gaalawu cobbi cĩ dĩhĩmĩ cĩ Nyekuco wo, nyĩĩlõwẽ eet ramma kĩ ramma. 3 Kaanyi katĩ na makathĩt cannĩ, eet cĩk ẽẽn kẽbẽrẽ cĩganĩk ramma, ĩthõng katĩ othoothitõ nẽẽgẽ thõõth cĩ Nyekuco wathinniok cĩk ẽẽn vucciak codoi, kĩ eet õmmõtõ kĩ eet iyyio (1,260) cĩk ahimit ijjio cĩk uluanak.”4 Ẽẽn cĩkkõ eet cĩk ẽẽn kẽbẽrẽ cĩganĩk cĩk õgõõn kĩ kẽẽna ramma cĩk olivi,a ĩthõng õgõõn kĩ thĩĩha cĩk ẽẽn ramma cĩk ayak kaal cĩk katũkũlẽnĩ, cĩk abĩlĩ nguuma cĩ Makayyioit cĩ agam looc. 5 Mĩ adiim mĩrõwa gwuak ngĩ aruk ĩnõõgõ, aku gua kutugetinẽy cĩgĩk, ĩthõng ũtũũth mĩrõk kedecciay vẽlẽk, gõõl cĩ katĩ thẽk adaaknĩ nẽẽgẽ neccie. 6 Ayak balna eeta cĩk ẽẽn kẽbẽrẽ cĩkkõ tiirthẽt cĩ abĩlnĩ tammu, kĩĩ katĩ kithii cĩ atĩĩlĩ wathinniowẽy cĩk ngaanĩ irionĩcẽ nẽẽgẽ eet thõõth cĩ Nyekuco. Ĩthõng ayak nẽẽgẽ tiirthẽt cĩ woccia ũũkcĩ maam kĩĩ biyyie, ĩthõng ayaktak eet pĩrnanẽt cobbi õrrõt loota ngato.
7 Ma katĩ ngĩ edecciak eeta cĩk ẽẽn kẽbẽrẽ tiic cĩ irionĩcẽ eet thõõth cĩ Nyekuco, ẽẽkta katĩ nacamba cĩ aavĩ loowa cĩ kothii turnanẽt wo, ĩthõng ikiyyia atamaac nẽ ĩnõõgõ jora, ĩthõng uruk ĩnõõgõ. 8 Abaawothi katĩ eleeti cĩgĩk loota, õlõõ ĩcĩ gaalawu cobbi wũ balna ododowothi Makayyioiti cĩnĩng kurucea. Ĩthõng õlõõ cĩ gaalawu nĩcẽ, aduwõy kĩ Thõdõm kĩ Ijibb thõng. 9 Wathinniowẽy cĩk ẽẽn iyyio kĩ kõrgẽn, acĩn katĩ eeta cĩk õthõõth thoothiowẽy mĩn mĩn, kĩ loociok, kĩ kabicõnĩnẽ vẽlẽk, eleeti cĩgĩk, ĩthõng athii cĩ ẽlẽmanĩ nẽẽgẽ ĩnõõgõ kadayyie. 10 Ẽbẽlbẽl katĩ eeta cĩk loocu, ĩthõng ũrũgũmĩta, anycĩk katĩ gõõnõgĩ anyintiok, nyatarka thõõth wũ balna adĩmanothi eet cĩk ẽẽn kẽbẽrẽ cĩkkõ, cĩk õthõõth molook cĩ Nyekuco wũk ẽẽn ramma, wũk balna ayahai pĩrnanẽt gẽrẽthanniok, cĩk ngaanĩ kudukta thoothonniok cĩgĩk cĩk gerthek loota ngato.
11 Ĩthõng thĩ, ma vurtia cĩ wathinniok iyyio kĩ kõrgẽn, aku katĩ Nyekuci kaanyĩk eet cĩk ẽẽn kẽbẽrẽ cĩgĩnĩk kũrũgĩt naboo, ngaatĩ ĩngannĩ nẽẽgẽ jiena. Atdirlangan katĩ thõõth coo eet wũk balna acĩn ĩnõõgõ, ĩthõng katĩ otongollie õrrõt. 12 Ma natẽ, ĩthĩraritõ eeta cĩk ẽẽn kẽbẽrẽ molook cobbi cĩ aku tammuatiddina cĩ athĩ ne, “Ivitia tiddina ngato.” Ma balna ngĩ õdõng diith ĩnõõgõ õkõyyĩ tammuatiddina ẽẽ, acĩn kẽnnẽ mĩrõwa cĩgĩk ĩnõõgõ noko.
13 Ma itina nĩcẽ noko, iliba kirikirihi cobbi õrrõt, ĩthõng athaan tõõn codoi goolliowẽy ĩcĩk ẽẽn õmmõtõ, cĩ kõrõõk cĩ gaalawu cobbi. Ĩthõng adaaitõ eeta vucciaknya tũrgẽrẽm (7,000). Ĩthõng ivitia otongollie eeta wũk balna ngaanĩ arũgĩ, ngaatĩ abuluthi nẽẽgẽ Nyekuc cĩ aavĩ tammuatiddina, talintia cobbi.
14 Ĩthõng nẽnnẽ yoko, alacanẽ pĩrnanẽtĩ cĩ ẽẽn ramma, ĩthõng õbõwẽ ikiyyia cĩ ẽẽn iyyio.
Nyeepu cĩ ẽẽn tũrgẽrẽm
15 Ma balna ngĩ abũ anjĩlõ cĩ ẽẽn tũrgẽrẽm nyeepu cĩnnĩ wo, ivitia acalcallit moloowuana gwuak cĩk meelĩk tammuatiddina ĩĩtõ ne,
“Ĩthõng yoko, ikiyyia alaanthẽtĩ cĩ looc coo,
ĩthĩ alaanthẽt cĩ Makayyioit Nyekuc cĩnac, kĩ Kiristo cĩnnĩ,
agam katĩ nẽ alaanthẽt cĩnnĩ erkinya kĩ erkinya.”
16 Ma natẽ, ivitia akatit eeta cĩk obbitik wũk balna ẽẽn etĩmma kĩ wec, wũk balna aatĩ loota taabĩtẽy ĩcowu ĩcĩ Nyekuco kuthungti, ĩthõng alaacõ ĩnõõnõ, 17 athĩ nẽẽgẽ ne,
“Makayyioit Nyekuc Tiiryioit cĩ Ijiari vẽlẽk, cĩ aavẽ,
ĩthõng balna aavẽ dĩdĩ, kennecci ne, ibalallẽ,
nyatarka iticanõẽ niia tiirthẽt cunni cobbi,
ĩthõng ẽtẽrẽhaẽ ngatĩ agamẽ looc.
18 Avaracĩth balna eeta cĩk loociok vẽlẽk,
ĩthõng ikiyyia avaracu niia buu!
Ĩthõng yoko, ikiyyia kõr cĩ katĩ
etedinie thoothiowa cĩk daakciawu.
Ĩthõng ikiyyia kõr cĩ katĩ
anyĩcẽ niia anyintiok ticcianniok cugunik,
cĩk ẽẽn eet cĩk õthõõth molook cunni.
Ĩthõng anyiwu anyintiok eet cĩk callĩk vẽlẽk,
wũk balna adĩhĩth thar cugunik,
eetĩnẽy cĩk kĩdĩk, kĩ ĩcĩk obbitik vẽlẽk.
Ikiyyia kõr cĩ katĩ aruwue niia Nyekuci
eet vẽlẽk wũk balna ẽgẽrẽthan looc.”
19 Ma natẽ, ikiyyia õwẽ katũk cĩ Ciith cĩ Nyekuco tammuatiddina, ĩthõng edenyiay Nyethuduwoc cĩ Ngẽrẽmngẽrẽmõc cĩnnẽ cĩ iyiang nẽ Ciiatõ cĩnnĩ. Ma natẽ, abad tammu, ĩthõng icciawõy kĩĩ gẽrtha wak, ĩthõng ikiyyia kirikirihi cobbi õrrõt, ĩthõng utduktiak mũllẽn looc.