Anjĩlõ kĩ nyaraga cĩ amũrmũranni cĩ dĩcĩ
10
Ĩthõng kĩcĩna balna na Yoanẽ anjĩlõ ĩmma cĩ tiiri õrrõt, cĩ allucciay tammuatiddina aku loota. Amũta balna ĩnõõnõ diith, ĩthõng õwõranothĩk borowecĩ õõ cĩnnĩ tiddin. Alanyĩt balna nguum cĩnnẽ kaavu kĩ kõrra, ĩthõng ayak nẽ thoo cĩk õgõõn kĩ lanyĩtĩ cĩ guyyio. 2 Ayak balna nẽ nyaraga cĩ dĩcĩ cĩ upuuwe vẽlẽk attia cĩnnĩ. Abĩlĩ balna nẽ aari thooc cĩ athio bũlũcatõ, ĩthõng atadĩk thooc cĩ angettio looca. 3 Ẽgẽrẽny nẽ moloowa cobbi ĩcĩ aavĩ kĩ gõõ ngĩ arruk maa. Ĩthõng mĩ ẽgẽrẽny ẽẽ, ivitia tammuẽna cĩk ẽẽn tũrgẽrẽm ẽẽ, buu icciayyiõy. 4 Ma balna ngĩ ĩbĩlĩt moloowuana cĩk icciayyi tammuẽnẽy ĩcĩk ẽẽn tũrgẽrẽm ẽẽ, ĩthõng kĩĩthĩ ne, kẽtẽhẽẽd thõõth cĩ aduwa nẽẽgẽ ẽẽ, loota, ĩthõng thĩ, etheca kẽnnẽ moloowĩ ĩmma tammuatiddina ne, “Nyĩ eheedi niia thoothonniok nĩĩkẽ loota, moloowuanĩy ĩcĩk icciayyi tammuẽnẽy cĩk ẽẽn tũrgẽrẽm ẽẽ.”5 Ma natẽ, kĩcĩna anjĩlõ wũ balna aari thooc codoi bũlũcatõ, ĩthõng aari ĩmma tõdõway tiddina, ngĩ odongei athiit cĩnnĩ cĩ athio tammutiddin. 6 Ĩthõng ũbũtan anjĩlõ neccie thaarĩy cĩk Nyekuc cĩ arũgĩ, erkinya kĩ erkinya, cĩ balna ẽngẽnyca tammutiddin, kĩ looc, kĩ bũlũc, kĩ kaal vẽlẽk cĩk aatĩ ĩcĩnĩng, ĩthõng ĩthĩ ne, “Ĩthĩnga Nyekuci ereyyi naboo.” 7 Ĩthõng thĩ, ma baa ngĩ idiim ũtũbũ anjĩlõ cĩ ẽẽn tũrgẽrẽm nyeepu cĩnnĩ, katĩ ngĩ ũtũbantothĩk thoothonniowa cĩkkõ, wũk balna alugunyi wũk ijiar gẽẽnyĩth cĩ eetu, wũk balna aduwaai Nyekuci ticcianniok cĩgĩnĩk wũk õthõõth molook cĩnnĩ.a
8 Ĩthõng othoothĩha moloowĩ cĩ balna kathihi na tammuatiddina naboo ennea ne, “Bĩt gama nyaraga cĩ upuuwe ẽẽ, cĩ ayak anjĩlõ cĩ abĩlĩ, ĩthõng atadĩk thooc codoi doo bũlũcatõ, ĩthõng aari ĩmma looca ẽẽ.”
9 Ma natẽ, kũwa ĩcĩ anjĩlõ nĩcẽ, ĩthõng kijina ĩnõõnõ kaanya nyaraga cĩ dĩcĩ wo. Ẽdẽcca kẽnnẽ etheca ne, “Irie nyaraga coo dawũ, ẽmmẽdẽ katĩ kũtũga cunni õgõõn kĩ lotecĩ, ĩthõng thĩ, kẽẽngatõ cunni õkkõ amũcarĩ.” 10 Ma natẽ, kagama anjĩlõ nĩcẽ nyaraga, ĩthõng ma ngĩ kadai wo, ẽmmẽdẽ kẽnnẽ kũtũgatõ cannĩ ẽlẽmlẽmĩ kĩ lotecĩ, mĩ kaku wo, ũũkcĩ kẽnnẽ amũcarĩ kẽẽngatõ cannĩ. 11 Ngaatĩ ethecia moloowĩ neccie ne, “Duwak eet naboo thoothonniok cĩk Nyekucak cĩk katĩ adĩmanothi ĩnõõgõ vẽlẽk, loociowẽy cĩgĩk, kĩ eet cĩk õthõõth thoothiowẽy mĩn mĩn, kĩ alaanẽt cĩgĩk vẽlẽk.”