Yelinit 9

Ũtũbũ anjĩlõ cĩ ẽẽn tur nyeepu cĩnnĩ

Ma balna ngĩ abũ anjĩlõ cĩ ẽẽn tur nyeepu cĩnnĩ ẽẽ, kacini kẽnnẽ na Yoanẽ mũnyũnyõc ngatĩ atdukuanĩ tammuatiddina kikiyyia loota. Ĩthõng anyĩwothi balna mũnyũnyõc nĩcẽ mũwũta cĩ gõõl cĩ ẽhẽẽt loowa ĩcĩ wuuni ĩcĩ athii turnanẽtĩ tõ, ĩcĩ ecebini alaanĩ cĩ ririwanĩn cĩk gerthek. 2 Ma balna ngĩ õõ nẽ katũk cĩ look nĩcẽ ẽẽ, iliba burruti ĩmma cobbi õrrõt cĩ aavĩ kĩ gua cĩ atũũth yũwan cĩ manu, ĩthõng athii burruti cĩ anyi talanyõn cĩ korro kũtũkũlõy.

3 Ma natẽ, itigiryiay girroca burrutta nĩĩcẽ kukkuyyia looc, ĩthõng anyĩwothi girroc tiirthẽtĩ cĩ icciawĩ eet, cĩ aduwõy kĩ tiirthẽt cĩ ayak kĩtẽẽna thõng. 4 Uduwak balna girroc nĩĩkẽ thõõth cĩ athĩ ne, athii nẽẽgẽ cĩ adak kartẽ, kõdẽ kẽẽn, kõdẽ kaal vẽlẽk cĩk akula, ĩthõng thĩ, abũnna woccia thẽk ngĩ iccia nẽẽgẽ eet cĩk athii cĩ ayak nyẽkẽr cĩ Nyekuco nguumtẽnẽy cĩgĩk. 5 Ĩthõng naboo, athii balna cĩ anyĩwothi girroc makathĩt cĩ arui nẽẽgẽ eeta, ĩthõng thĩ, iccia ĩnõõgõ nyĩĩlõwẽ tur wuciitha ĩcĩ õgõõn kĩ gõõ ngĩ iccia kitia et. 6 Ĩthõng wathinniowẽy nĩĩkẽ, adiim katĩ eeta daaĩth, ĩthõng thĩ, athii cĩ arũba. Ma katĩ ngĩ abarriteei nẽẽgẽ daaĩth, alĩta kẽnnẽ katĩ daaĩthĩ ĩnõõgõ thõng.

7 Aatĩ balna girroca neekie kĩ nyangõlẽnya cĩk adĩmanothi kõõt jora, ĩthõng ahimit balna nẽẽgẽ vẽlẽk lũlũwẽn cĩk ẽẽn daab, ĩthõng ayait nguumti cĩk õgõõn kĩ cĩk eetu. 8 Ĩthõng aavutõ ĩmana cĩgĩk ĩĩtõ wuunti kĩ ĩmana cĩk ngaawak, ĩthõng ayait nyĩgĩt cĩk õgõõn kĩ nyĩgĩta cĩk maawak. 9 Ahimit balna nẽẽgẽ kilibwua cĩk ẽẽn thĩĩk ĩyyẽtẽy cĩgĩk, ĩthõng õrõĩ kavutanẽ cĩgĩk kaavutõ kĩ nyangõlẽnya cĩk meelĩk cĩk aviri, kĩ kaal cĩk õgõõn kĩ toromilẽta cĩk agurut nyangõlẽnya cĩk nyĩcẽkẽru cĩk aduothi jore. 10 Ayak balna nẽẽgẽ vẽlẽk kulli cĩk õgõõn kĩ kulli cĩk kĩteenu, ayak nẽẽgẽ vẽlẽk tiirthẽt cĩ icciawĩ eet kullẽnẽy ĩcĩgĩk, ĩthõng aanycĩk eet kipiryia nyĩĩlõwẽ tur. 11 Ayak balna nẽẽgẽ alaan cĩnĩng cĩ ẽẽn anjĩlõ cĩ ẽẽn makayyioit cĩ look cĩ wuuni cĩ athii turnanẽtĩ tõ ẽẽ. Athĩ balna thar cĩgĩnĩk Hebureyyiey ne, Abaddõn, ĩthõng thõõtha cĩ eet cĩk Girihi, athĩ ne, Apollion.

12 Ĩthõng nẽnnẽ yoko, edeciay balna pĩrnanẽtĩ wũ owu, ĩthõng ngaanĩ attĩyya gwuak cĩk ẽẽn ramma cĩk gerthek õrrõt vurtia.

Ũtũbũ anjĩlõ cĩ ẽẽn tõrkõnõm nyeepu cĩnnĩ

13 Ma natẽ, ũtũbũ balna anjĩlõ cĩ ẽẽn tõrkõnõm nyeepu cĩnnĩ, ĩthõng kĩthĩrara molook kuduluanĩy ngatĩ todongintio ĩcĩ engenyciay daaba cĩ avaadinie mõõcacĩ abĩlĩ nguuma cĩ Nyekuco. 14 Ĩthõng ethek moloowĩ neccie anjĩlõ cĩ abũ nyeepu ẽẽ ne, “Õõga niia anjĩlẽt cĩk ẽẽn wec cĩk ecebjie titimma cĩ Lĩĩl cobbi cĩ Yuvarẽthĩ ẽẽ.” 15 Ngaatĩ õõganẽ nẽ anjĩlẽt cĩk ecebjie cĩk ẽẽn wec ẽẽ, ĩthõng ĩdĩmantothĩk itin nĩcẽ, kõr nĩcẽ, nyĩĩlok nĩcẽ, kĩ erkit nĩcẽ noko, kĩĩ katĩ kivitia kuruit eet tõõna ĩcĩ odoi, tonniowẽy ĩcĩk ẽẽn iyyio cĩk loocu. 16 Ĩthõng ngaatĩ kathĩknẽ, balna ngĩ ekebji nyĩcẽkẽrĩ cĩk nyangõlẽnya cĩk jorak cĩk ẽẽn pudnya eet õmmõtõ (200,000,000).

17 Kacini balna na macucciok ngĩ aatẽ nyangõlẽnya ngonothintia cannĩ. Ahimit balna nẽẽgẽ kilibwua cĩk ẽẽn thĩĩk ĩyyẽtẽy cĩgĩk cĩk ayak yeeli cĩ merihi, ĩthõng cũlak, ĩthõng maan. Ayak balna nyangõlẽnya ooti kĩ maata, ĩthõng ĩtĩvõngta guo kĩ burrut kutugetinẽy cĩgĩk. 18 Aruk balna gua kĩ burrut cobbi cĩ aaburi patdahac cĩ ĩvõngna nyangõlẽnya neekie ẽẽ, eet loota ngato tõõna ĩcĩ odoi, tonniowẽy ĩcĩk ẽẽn iyyio. 19 Nyatarka aku tiirthẽtĩ cĩ nyangõlẽnyawu kutugetinẽy cĩgĩk kĩ kullẽnẽy. Õgõõn kulli cĩgĩk kĩ kũwaanya cĩk gerthek cĩk adak eeta.

20 Ĩthõng eeta wũk balna ngaanĩ arũgĩ vurtia cĩ hecinit cĩ kaal cĩkkõ, athii cĩ uungni gerthetin cĩnĩng buu, ala ririwanĩn cĩk gerthek noko kĩ kaal cĩk aar eeta kĩĩtõ nyekucnya cĩk adĩmaniay daaba, kĩ thĩĩhĩy ĩcĩk athĩ kathalkathal, kĩ thĩĩhĩy ĩcĩk maantĩk kĩ bĩĩyẽnĩy, kĩ cĩk õdõvaniay kẽẽnĩy. Ĩthõng cĩkkõ vẽlẽk, ẽẽn kaal cĩk aar eeta kĩĩtõ nyekucnya cĩk athii cĩ acĩnẽ, kõdẽ athĩknẽ, kõdẽ õwõ. 21 Athii balna eeta cĩkkõ cĩ ũũwũ thinneti cĩgĩk, kĩ avuthit cĩ arui eeta, kõdẽ abũũĩ nẽẽgẽ, kõdẽ thoothonniok cĩk tegemthetino, kõdẽ gõr cĩnĩng kũdũt.