Õbõlõca Nyion dilẽnĩt cĩ ẽẽn tũrgẽrẽm
8
Ma balna ngĩ õbõlõca Nyion dilẽnĩt cĩ ẽẽn tũrgẽrẽm wo, ikiyyia ẽlẽmanẽ tammutiddin kĩdĩĩc itin cĩ ẽẽn kõrgẽn. 2 Ĩthõng kĩcĩna balna na Yoanẽ anjĩlẽt cĩk ẽẽn tũrgẽrẽm, ngĩ abĩlĩ ĩcowu ĩcĩ Nyekuco, ngatĩ anyĩwothĩcẽ nyeepunya codoi codoi.3 Ma natẽ, iliba anjĩlõ ĩmma cĩ ayaha lõkũlkũl cĩ engenyciay daaba cĩ avaadinie mõõcacĩ, ĩthõng ikiyyia ĩbĩl ngatĩ todongintio cĩ avaadinie mõõcacĩ. Anyĩwothi balna anjĩlõ mõõcacĩ cĩ obbi, ĩthõng avaad nẽ ngatĩ todongintio cĩ ẽẽn daab, nguuma cĩ taaba cĩ Nyekuco, baa ngaanĩ ala eeta cĩk callĩk Nyekuc. 4 Ngaatĩ ĩngannĩ burruti cĩ mõõcaco kĩ lawinit cĩ eet cĩk callĩk, õkõyyĩ tiddina nguuma cĩ Nyekuco, attia ĩcĩ anjĩlõ nĩcẽ.
5 Ma natẽ, ĩdĩma anjĩlõ lõkũlkũl cĩ mõõcaco, ĩthõng ũtũkũla guo ngatĩ todongintio cĩ avaadinie mõõcacĩ, ĩthõng utdukeek lõkũlkũl cĩ mõõcaco looc. Ma natẽ, abad tammu, ĩthõng icciawõy õrrõt, ĩthõng ikiyyia kirikirihi cobbi cĩ õmmõnnĩ looc vẽlẽk.
Nyeepunya cĩk ẽẽn wec
6 Ma natẽ, ĩdĩmantothĩk anjĩlẽta cĩk ẽẽn tũrgẽrẽm wo, ngatĩ abũẽ nyeepunya cĩgĩk.
7 Ma balna ngĩ abũ anjĩlõ cĩ owu nyeepu cĩnnĩ ẽẽ, atdukuay kẽnnẽ mũllẽna kĩ guo cĩ õngõtanni kĩ biyyie, kivitia loota ngato, ĩthõng ũtũũthẽ lõõcĩ, kĩ kẽẽn tõõna ĩcĩ odoi, tonniowẽy ĩcĩk ẽẽn iyyio,a kĩ kartẽ cĩk cũlaĩk vẽlẽk.
8 Ma balna ngĩ abũ anjĩlõ cĩ ẽẽn ramma nyeepu cĩnnĩ ẽẽ, ikiyyia utdukwuay gii ĩmma cĩ õgõõn kĩ thiir cobbi cĩ atũũthĩ, ĩthõng utdukothĩk bũlũcatõ, ĩthõng ũtũwẽ bũlũc tõõna ĩcĩ odoi, tonniowẽy ĩcĩk ẽẽn iyyio kĩĩ biyyie, 9 ngaatĩ adaaknĩ kaala cĩk gõõ arũgĩ bũlũcatõ tõõna ĩcĩ odoi, tonniowẽy ĩcĩk ẽẽn iyyio vẽlẽk, ĩthõng apaktẽ kõvõwõlẽta cĩk aatĩ bũlũcatõ tõõna ĩcĩ odoi, tonniowẽy ĩcĩk ẽẽn iyyio buu vẽlẽk.
10 Ma balna ngĩ abũ anjĩlõ cĩ ẽẽn iyyio nyeepu cĩnnĩ wo, utdukwuay mũnyũnyõcĩ ĩmma cobbi õrrõt, cĩ alanyĩt õgõõn kĩ gii cĩ katũkũlẽnĩ, ĩthõng utdukothĩk lilliok kĩ bẽrẽ cĩk duwwenu tõõna ĩcĩ odoi, tonniowẽy ĩcĩk ẽẽn iyyio. 11 Athĩ balna thar cĩk mũnyũnyõc nĩcẽ, Aakaatĩ, ĩthõng utuwuyyie maama tõõna ĩcĩ odoi, tonniowẽy ĩcĩk ẽẽn iyyio aakaatit kẽẽk, ĩthõng ivitia adaaitõ eeta cĩk meelĩk õrrõt, nyatarka aakaatĩ maama neekie.
12 Ma balna ngĩ abũ anjĩlõ cĩ ẽẽn wec nyeepu cĩnnĩ ẽẽ, ikiyyia ithii lanyĩtĩ cĩ korro tõõna ĩcĩ odoi, tonniowẽy ĩcĩk ẽẽn iyyio, ĩthõng ithii lanyĩtĩ cĩ nyĩĩlowo buu tõõna ĩcĩ odoi, tonniowẽy ĩcĩk ẽẽn iyyio, ĩthõng ivitia ithiicõ mũnyũnya gwuak buu tõõna ĩcĩ odoi, tonniowẽy ĩcĩk ẽẽn iyyio, ĩthõng ivitia ĩĩtõ nẽẽgẽ vẽlẽk muwur tõõna ĩcĩ odoi, tonniowẽy ĩcĩk ẽẽn iyyio. Ma balna waath, athii kõr cĩ alanyĩt itinnya wec, ĩthõng athii nyĩĩloĩ buu cĩ alanyĩt baal itinnya wec.
13 Ma natẽ, kĩcĩna thuut ĩmma cĩ akul tammuatiddina ngĩ ẽgẽrẽny õrrõt athĩ ne, “Pĩrnanẽt, pĩrnanẽt, pĩrnanẽt cobbi õrrõt ĩcĩ eet cĩk looc coo, nyatarka idiimitõ anjĩlẽta cĩk ẽẽn iyyio cĩk aturna ngĩ ũtũbẽcõ katĩ nyeepunya cĩgĩk.”