Eliay katĩ eeta cĩk Nyekucak
7
Ma balna natẽ, kĩcĩna na Yoanẽ anjĩlẽt wec cĩk abĩlĩ kuduluanĩy ĩcĩk ẽẽn wec cĩk loocu. Abĩlĩ codoi tõõna ĩcĩ alibanĩ kõrra, ĩthõng abĩlĩ codoi tõõna ĩcĩ okolothĩcẽ kõr, ĩthõng abĩlĩ codoi tõõna ĩcĩ diinu, ĩthõng ĩbĩl ĩmma tõõna ĩcĩ lootu. Alaam nẽẽgẽ ngootua wec, kĩĩ katĩ kithii cĩ avungan looc, kõdẽ bũlũc, kõdẽ kẽẽna. 2 Ma natẽ, kĩcĩna anjĩlõ ĩmma cĩ aku tõõna ĩcĩ alibanĩ kõr, cĩ ayak nyẽkẽr cĩ Nyekuc cĩ arũgĩ. Ma natẽ, ũtũvvũ nẽ anjĩlẽt cĩk ẽẽn wec moloowa cobbi õrrõt wũk balna anyĩwothi ĩnõõgõ tiirthẽtĩ, cĩ ẽgẽrẽthanĩ looc kĩ bũlũc, 3 ĩthõng ethek ne, “Ereyyiõy da nõõnõ, nyĩ ẽgẽrẽthannu looc, kĩ bũlũc, kĩ kẽẽna, gii ngĩ karyiha dilẽntiok nguumtẽnẽy ĩcĩk ticcianniok cĩk Nyekucak.”4 Ma natẽ, kikiyyia balna kĩthĩrara na kebiniet cĩ eet cĩk ariwothi nyekerwuana nguumtẽnẽy ĩcĩgĩk. Ẽẽn kebinietĩ vẽlẽk vucciaknya eet tur kĩ vucciaknya eet ramma kĩ vucciaknya wec (144,000), cĩk eberiay tatũgẽtẽy cĩk eet cĩk Ĩthraĩlĩ. 5 Awũthĩ balna nyekerwuana gõõ eet tatũga ĩcĩ Yudaa, kĩ ĩcĩ Ruubenĩ, kĩ ĩcĩ Gadĩ vucciaknya õmmõtõ kĩ vucciaknya ramma (12,000) ĩnõõgõ vẽlẽk codoi codoi. 6 Ĩthõng awũthĩ balna nyekerwuana gõõ eet tatũga cĩ Athẽrĩ, kĩ cĩ Navtali, kĩ cĩ Manathi vucciaknya õmmõtõ kĩ vucciaknya ramma (12,000) ĩnõõgõ vẽlẽk codoi codoi. 7 Awũthĩ balna nyekerwuana gõõ eet tatũga cĩ Thimionĩ, kĩ cĩ Levi, kĩ cĩ Ithacarĩ vucciaknya õmmõtõ kĩ vucciaknya ramma (12,000) ĩnõõgõ vẽlẽk codoi codoi. 8 Ĩthõng naboo, awũthĩ balna gõõ nyekerwuana eet tatũga cĩ Thebuluni, kĩ cĩ Yothẽbõ,a kĩ cĩ Benyamini vucciaknya õmmõtõ kĩ vucciaknya ramma (12,000) ĩnõõgõ vẽlẽk codoi codoi.
Meelitin cobbi cĩ eetu
9 Ma natẽ, kĩcĩna balna na meelitin cobbi õrrõt cĩ eet cĩk amacca ngatĩ kẽkẽbẽ buu, eet cĩk eberyiay kabicõnĩnẽy cĩk loociok vẽlẽk cĩk õthõõth thoothiowẽy mĩn mĩn, abĩlĩ nguuma cĩ Nyekuco kĩ ĩcĩ Nyiono, ahimit nẽẽgẽ vẽlẽk ceremua cĩk võõrĩk, ĩthõng agamit lõbũrtũllẽn athĩnẽy cĩgĩk. 10 Ẽgẽrẽny nẽẽgẽ vẽlẽk athĩ ne,
“Aku elinti vẽlẽk ĩcĩ Nyekuc cĩnac
cĩ aavĩ taabawa wo,
ĩthõng aku ĩcĩ Nyiono.”
11 Ĩthõng abĩlĩ anjĩlẽta vẽlẽk aliheei taaba, kĩ eet cĩk obbitik, kĩ kaal wec cĩk arũgĩ kõrgẽn, ĩthõng akattiek kuthungti, ulul nguumti cĩgĩk, ĩthõng alaacõ Nyekuc ĩĩtõ ne,
12 “Amẽn! Aavĩ dĩhĩthẽnĩtĩ kĩ bulẽnĩt kũdũt,
kĩ gẽẽnyĩth kĩ talinit kĩ tongolinit,
kĩ tiirthẽt vẽlẽk ĩcĩ Nyekuc cĩnac kũdũt. Amẽn!”
13 Ma natẽ, ikiyyia ijina balna eeti cobbi ĩmma eetĩnẽy ĩcĩk obbitik ĩcĩk ẽẽn etĩmma kĩ wec ẽẽ, ennea ne, “Eet cĩk ngẽnẽ neekie ahimte ceremuanĩy ĩcĩk võõrĩk pẽr ẽẽ? Avvu eeta neekie nga?”
14 Ĩthõng kẽdẽca kennea ne, “Makayyioit, aga niia.” Ngaatĩ aduwacia nẽ ennecia ne, “Ẽẽn balna cĩkkõ eet wũk balna õmõgĩ hecinit wũ balna obbi õrrõt. Ĩtĩlaccõ nẽẽgẽ ceremua cĩgĩk biyyietĩy cĩk Nyionak kĩĩtõ võõrĩ. 15 Ĩnõõnõ thĩ yoko cĩ,
“abĩlnĩ nẽẽgẽ nguuma cĩ taaba cĩ Nyekuco,
ĩthõng alaacõ ĩnõõnõ waathĩn kĩ baalin Ciiatõ cĩnnĩ ẽẽ.
Ĩthõng Eeti cĩ aavẽ taaba ẽẽ,
ẽvvẽtĩ katĩ nẽ cẽrẽm cĩnnĩ kubung ĩnõõgõ vẽlẽk.
16 Ĩthĩnga katĩ adak ĩnõõgõ boobo naboo,
kõdẽ aruk ĩnõõgõ kõr.
Ithii katĩ kõr cĩ ngaanĩ atũũth ĩnõõgõ naboo tõ.
17 Nyatarka Nyion cĩ aavĩ taabawa wo,
ikiyyia katĩ ĩthĩ tũwayyioit cĩnĩng.
Õkõyyĩ katĩ nẽ ĩnõõgõ ngatĩ aatẽ
maama cĩk rũgẽt cĩ aavĩ kũdũt.
Ĩthõng katĩ apucan Nyekuci tulalõ
vẽlẽk kẽbẽrẽnĩy cĩgĩk.”