Upuuk Nyion dilẽntiok tũrgẽrẽm
6
Ma natẽ, kĩcĩna na Yoanẽ Nyion ngatĩ õbõlõcanĩ dilẽnĩt cĩ owu, dilẽntiowẽy ĩcĩk ẽẽn tũrgẽrẽm, ĩthõng kĩthĩrara molook codoi cĩ owu, cĩ õthõõth kaalĩy cĩk ẽẽn wec ĩcĩk arũgĩ ẽẽ. Ĩthõng icciayyi õgõõn kĩ tammu athĩ ne, “Ijjia!” 2 Ma natẽ, kĩcĩna macuccioit cĩ nyangõlẽ cĩ võõrĩ, cĩ ayak kirihit, ĩthõng itihim lũlũwoc cĩ balna anyĩwothi ĩnõõnõ, ĩthõng ikiyyia atamaac nẽ mĩrõk jõrẽnĩnẽy ĩcĩk meelĩk.3 Ma balna ngĩ õbõlõca Nyion dilẽnĩt cĩ ẽẽn ramma, kathihi gimma cĩ arũgĩ cĩ ẽẽn ramma athĩ ne, “Ijjia!” 4 Ma natẽ, iliba nyangõlẽ cĩ merihi, õtõd macuccioiti ĩnõõnõ cĩ anyĩwothi tiirthẽtĩ cĩ ẽnyẽẽĩ ganõn loota ngato, kĩĩ katĩ kuuktõy eeta kadaaitõ nẽẽgẽ mĩn, ĩthõng anyĩwothi balna ĩnõõnõ nyetubat cobbi buu.
5 Ma natẽ, õbõlõca Nyion dilẽnĩt cĩ ẽẽn iyyio ẽẽ, ĩthõng kĩthĩha gii cĩ arũgĩ cĩ ẽẽn iyyio ẽẽ, ngĩ athĩ ne, “Ijjia!” Ngaatĩ kacĩnẽ na nyangõlẽ cĩ olli, ĩthõng ẽcẽrẽma macuccioit cĩ ayak gii cĩ atĩmanĩ eeta ijjio attia cĩnnĩ. 6 Ĩthõng kĩthĩrara molook cĩ aku kõrgẽna cĩ kaal cĩk arũgĩ cĩk ẽẽn wec ẽẽ, ĩthõng õthõõth ĩĩ ne, “Awũpan dũwũcĩ cĩ gẽẽmẽ cĩ tiic cĩ kõr codoi doo, kõdẽ dũũcẽ iyyio cĩk lothihenu cĩ tiic cĩ kõr codoi doo dũman. Ĩthõng nyĩ aminyu ngooroc, kõdẽ mẽrtẽ cĩ vĩnõwo.”
7 Ma balna ngĩ õbõlõca Nyion dilẽnĩt cĩ ẽẽn wec ẽẽ, kathihi gii cĩ arũgĩ cĩ ẽẽn wec ẽẽ, ngĩ athĩ ne, “Ijjia!” 8 Ĩthõng kĩcĩna nyangõlẽ cĩ edenyiay ngĩ ĩmmõrĩ. Athĩ thar cĩk macucciokto Daaĩth, ĩthõng vurtia cĩnnĩ, ikiyyia lõõcĩ cĩ daakciawu. Anyĩwothi balna ĩnõõgõ makathĩtĩ cĩ agamĩ eet tõõna ĩcĩ odoi, tonniowẽy ĩcĩk ẽẽn wec loota ngato,a ĩthõng uruit eet nyetubanyay, kĩ butunya, kĩ moorithiowẽy, ĩthõng uruit eet kẽlẽgẽnẽy ĩcĩk arũgĩ ĩcĩk bõõnak.
9 Ma balna ngĩ õbõlõca Nyion dilẽnĩt cĩ ẽẽn tur ẽẽ, kacini kẽnnẽ ririwanĩn cĩk eet wũk balna aruwue vẽlẽk aatĩ loota ngatĩ todongintio, nyatarka balna ẽlẽmĩ nẽẽgẽ thõõth cĩ Nyekuco. 10 Ẽgẽrẽny nẽẽgẽ moloowa cobbi athĩ ne, “Makayyioit Tiiryioit, aniitia cĩ callĩ, ĩthõng eeni dĩdĩ, ĩcaaca woccia katĩ niia biyyie cĩgaak, ĩthõng etediwu eet thõõth, ĩthõng uuku eet wũk balna arukcet ageeta katĩngan?” 11 Anycĩwothĩk balna eet cĩk uruktie vẽlẽk ceremuana cĩk võõrĩk. Uduwak balna ĩnõõgõ thõõth kuyuwuthit nõõnõ kĩdĩĩc, gii ngĩ ẽlẽntõy kebinietĩ cĩ gõtõõnõgĩ kĩ ngõõnõgĩ cĩgĩk, cĩk ẽẽn ticcianniok cĩk Yesu cĩk katĩ aruwue.
12 Ma balna ngĩ õbõlõca Nyion dilẽnĩt cĩ ẽẽn tõrkõnõm ẽẽ, ikiyyia iliba kirikirihi cobbi õrrõt, ĩthõng ũtũwẽ kõr kĩĩ ollia cuc kĩ tholomonti, ĩthõng ũtũwẽ nyĩĩloĩ kĩĩ merik, kuduktõy kĩ biyyie. 13 Ma natẽ, utduktiay mũnyũnya kivitia looc, kutuguthõ kĩ mũũnĩ cĩk abiiri cĩk arurra ngõõtĩ cĩ tiiri kẽẽta. 14 Ma natẽ, ũmũrmũranẽ tammutiddin kĩ nyaraga cĩ amũrmũranni, ĩvĩjait thiiryiowa kĩ loociok cĩk alĩha maama vatĩkẽy wũk gõõ aatẽ nẽẽgẽ.
15 Ma natẽ, ivitia ulugunycie alaanẽta cĩk loocu, kĩ makayyiok, kĩ gaala cĩk nyĩcẽkẽru, kĩ balliok, kĩ eet cĩk tiirtik, kĩ nyakapanak, kĩ eet wũk balna athii cĩ ẽẽn nyakapanak vẽlẽk, ngilomĩtẽy, kĩ bĩĩyẽnĩy thiiryiowẽy. 16 Ma natẽ, utuluththik nẽẽgẽ thiiryiok kĩ bĩĩyẽn entek ne, “Ummunycetu, ĩthõng ulugunycetu. Nyĩ anyiccu kĩcĩnet Eeti cĩ aavĩ loota taabawa ẽẽ, ĩthõng ulugunycetu, nyatarka avaracĩcet ageeta Nyiona. 17 Nyatarka ikiyyia wanĩco kõr cĩ varac cĩ Nyekuco kĩ cĩ Nyiono, ĩthõng ngẽnẽ woccia katĩ cĩ ũũlõy kĩ ĩnõõgõ?”