Nyion cĩ apuuk nyaraga
5
Ĩthõng kĩcĩna balna na Yoanẽ nyaraga cĩ amũrmũranni attia cĩ athio ĩcĩ Et cĩ aavĩ taabawa wo, cĩ eheeddi ĩcĩtõ kĩ ngatĩvõrĩ vẽlẽk, ĩthõng idile dilẽntiok tũrgẽrẽm. 2 Ĩthõng naboo kĩcĩna anjĩlõ cobbi cĩ tiiri õrrõt cĩ ẽgẽrẽny athĩ ne, “Ngẽnẽ cĩ ũũlĩ ngatĩ õbõlõca dilẽntiok cĩk nyaraga coo wo, ĩthõng upuuwa, kĩĩ katĩ kẽbẽlẽ?” 3 Athii balna eeti ĩmma loota ngato, kõdẽ tammuatiddina, kõdẽ looca cĩ daakciawu, cĩ woccia ũũlĩ ngatĩ apuui, ĩthõng ẽbẽl nyaraga nĩcẽ tõ.4 Ma natẽ, kutulu na õrrõt, nyatarka athii balna eeti cĩ amudiay cĩ woccia ũũlĩ ngatĩ õbõlõca dilẽntiok, ĩthõng upuuk nyaraga nĩcẽ, ĩthõng ẽbẽl tõ. 5 Ma natẽ, othoothĩha eeti cobbi ĩmma kõrgẽna cĩ eet cĩk obbitik cĩk ẽẽn etĩmma kĩ wec ẽẽ, ennea ne, “Nyĩ alu! Cĩn da nõõnõ, aavĩ Eeti cĩ tiiri cĩ õgõõn kĩ maa, ĩnõõnõ cĩ arittiay kabicoca cĩ Yudaa, tatũga cĩ alaan Davide cĩ ijiar kaal vẽlẽk. Ĩnõõnõ dõ cĩ woccia ũũlĩ ngatĩ õbõlõca dilẽntiok cĩk ẽẽn tũrgẽrẽm, ĩthõng upuuk nyaraga nĩcẽ.”
6 Ma natẽ, kĩcĩna Nyion,a cĩ õgõõn kĩcĩ balna õtõdõngẽ vẽlẽk cĩ abĩlĩ joonui taabawa, alĩha kaala cĩk ẽẽn wec cĩk arũgĩ, kĩ eet cĩk obbitik cĩk ẽẽn etĩmma kĩ wec ẽẽ, ĩnõõnõ. Ayak balna nẽ otoo tũrgẽrẽm kĩ kẽbẽrẽ tũrgẽrẽm buu, cĩk ẽẽn Ririwanĩn tũrgẽrẽm cĩk Nyekucak, cĩk itionai nẽ looc vẽlẽk. 7 Ikiyyia Nyion, ĩthõng agama nyaraga ĩcĩ athiit cĩ athio cĩ Et cĩ aavĩ loota taabawa. 8 Ma balna ngĩ agama nẽ nyaraga nĩcẽ ẽẽ, uukitõ kaala cĩk arũgĩ cĩk ẽẽn wec kĩ eet cĩk obbitik cĩk ẽẽn etĩmma kĩ wec wo, looc, ĩthõng akattiek Nyion kuthungti. Ayak balna nẽẽgẽ vẽlẽk kidõrẽt, kĩ lõkũlkũlẽt cĩk ẽẽn daab, cĩk abbĩththĩ mõõcacĩ cĩ ẽẽn lawinit cĩ eet cĩk callĩk cĩk Nyekucak. 9 Ĩthõng ebelit nẽẽgẽ tẽgẽl cĩ jõr cĩ athĩ ne,
“Aniitia dõ cĩ woccia uuli ngatĩ õkõyyẽ nyaraga,
ĩthõng õbõlõca dilẽntiok cĩgĩnĩk,
nyatarka uruwue balna niia,
ivitia utuyyia biyyieta cugunniek eet
kĩĩtõ eet cĩk Nyekucak,
kabiconyay kĩ kutugetinẽy cĩk
õthõõth eeta vẽlẽk mĩn mĩn
kĩ eet loociowẽy vẽlẽk.
10 Anyiwu niia ĩnõõgõ kivitia kĩĩtõ
alaanthẽt kĩ paadĩrnya cĩk aticanothi Nyekuc,
ĩthõng agam katĩ nẽẽgẽ looc coo.”
11 Ma naboo natẽ, kĩcĩna balna na, ĩthõng kĩthĩrara moloowua cĩk anjĩlẽt cĩk meelĩk cĩk ẽẽn vucciaknya, kĩ vucciaknya cĩk athii cĩ ekebji. Ĩthõng ĩlĩkta taaba cobbi wo, kĩ kaal cĩk ẽẽn wec cĩk arũgĩ wo, kĩ eet cĩk obbitik. 12 Ebellie nẽẽgẽ kũdũt moloowa cobbi athĩ ne,
“Ũũlĩ balna Nyion wũ balna aruwue,
kaanyĩwothĩk ĩnõõnõ tiirthẽtĩ, kĩ balinit, kĩ gẽẽnyĩth,
kĩ tongolinit, kĩ bulẽnĩt, kĩ dĩhĩthẽnĩt.”
13 Ma natẽ, kĩthĩrara balna na kaal cĩk arũgĩ vẽlẽk, cĩk aatĩ tammuatiddina, kĩ loota, kĩ looca cĩ daakciawu, kĩ bulucuanĩy vẽlẽk ngĩ ebellie athĩ ne,
“Kaanyi naaga Et cĩ aavĩ taabawa wo kĩ Nyion,
dĩhĩthẽnĩt, kĩ tongolinit, kĩ bulẽnĩt,
kĩ tiirthẽt vẽlẽk erkinya kĩ erkinya vẽlẽk kũdũt.”
14 Ngaatĩ ẽdẽcĩ kaala cĩk arũgĩ cĩk ẽẽn wec ẽẽ, athĩ ne, “Amẽn!” Ma natẽ, akatit eeta cĩk obbitik cĩk ẽẽn etĩmma kĩ wec wo kuthungti, ĩthõng alaacõ Nyekuc kĩ Nyion.