Thõõth cĩ lemnyiok cĩk Thardithĩ
3
Ĩthõng ethea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak, õlõõ ĩcĩ gaalawu ĩcĩ Thardithĩ.Duwak ĩnõõnõ ennek ne, ẽẽn thõõth coo cĩ aku ĩcĩ Et cĩ ayak Ririwanĩn cĩk Nyekucak tũrgẽrẽm, kĩ mũnyũny tũrgẽrẽm. Athĩ nẽ ne, ‘Kagga na thoothonniok vẽlẽk cĩk adĩmannu niigia. Ahaddu yoko athinnu ne, ngaanĩ aruknu niigia, monogo nẽnnẽ aavuttu kĩ cĩ adaaktu vẽlẽk. 2 Ĩtĩngath ĩdĩmantek tiirthẽt cĩ dĩcĩ cĩ ngaanĩ uungnothi wo, nyatarka õbõwẽ edeciay, nyatarka ngaanĩ kũmũda balna na ngatĩ athĩknu niigia thoothonniok vẽlẽk cĩk Nyekucak dõ. 3 Ahaddia thoothonniok wũk balna alimanothicung agiitia, ĩthõng uthuuttu jurrung, kĩĩ ũtũngtek thoothonniok cuguk cĩk gerthek. Ĩthõng thĩ, ma ngĩ athii cĩ attiyyu vĩrĩngĩng, kanĩhacung katĩ na kĩ goryiaiti kõrra cĩ athii cĩ agayyu niigia.
4 Ĩthõng ngaanĩ ayakcu niigia eet õõgĩ cĩk kĩdĩk meelitina cĩ lemnyiok cĩk Thardithĩ, cĩk ngaanĩ kõngõrõnyanit ceremua cĩgĩk. Ahimit nẽẽgẽ ceremua cĩk võõrĩk, ĩthõng kiiriokca katĩ na kĩ ĩnõõgõ, nyatarka callẽ nẽẽgẽ. 5 Ĩthõng eeti cĩ ijiar thõõth cĩ Thĩttano, ahimit katĩ nẽ ceremua cĩk võõrĩk kĩ nẽẽgẽ. Ĩthõng athii katĩ na cĩ kapucana thar cĩgĩnĩk nyaragawa cĩ rũgẽtõ, ĩthõng thĩ, kaduwai katĩ na Baang kĩ anjĩlẽt cĩgĩnĩk kennei ne, ẽẽn nẽ wobjiait cannĩ. 6 Mĩ ayakcu kĩĩn, ĩthĩrarit thõõth cĩ aduwaai Ririwacĩ cĩ Dĩhĩmĩ meelitinnya cĩk lemnyiowu wo jurrung.’ ”
Nyemut cĩ lemnyiok cĩk Viladelvia
7 Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak õlõõ ĩcĩ gaalawu cĩ Viladelvia.
Duwak ĩnõõnõ ennek ne, ‘Ẽẽn thoothiowa cĩkkõ cĩk avvu ĩcĩ Et cĩ callĩ cĩ ẽẽn dĩdĩ, cĩ ayak mũwũta cĩ Davide.a Mĩ õõ nẽ katũk, athii woccia eeti cĩ anyũk naboo tõ, ĩthõng mĩ ũnyũga, athii eeti cĩ õõ tõ. 8 Kagga na thoothonniok vẽlẽk cĩk adĩmannu niigia. Ĩcĩnĩt da nõõnõ, koyiwung na agiit katũk cĩ athii eeti cĩ woccia anyũk naboo tõ. Kagga na ayakcu nẽnnẽ niigia tiirthẽt cĩ dĩcĩ, ĩthõng thĩ, ngaanĩ athunnu niigia balna thõõth cannĩ, ĩthõng ngaanĩ ẽpẽkanit thar cĩganĩk kũdũt. 9 Katĩnganei katĩ na eet cĩk ciith cĩ Thĩttano kivitia kakattewung agiitia kuthungti, õthõõth athĩ ne, ẽẽn nẽẽgẽ eet cĩk Yudei, ĩthõng thĩ, monogo ẽẽn nẽẽgẽ volongnyiak. Avvu katĩ aga nẽẽgẽ ngatĩ eeginnu, niigia eet cĩk balna kamĩnanung na. 10 Nyatarka ithiktu niigia tĩrĩthẽnĩt cannĩ, ĩthõng omoktu pĩrnanẽt, kathunnung katĩ na buu agiit kõr cĩ katĩ atĩmanini eeta cĩk abaak looc vẽlẽk.
11 Kakuni katĩ na tamanoko, uthuutti thõõth cannĩ wũ balna alimanothicunga, kĩĩ katĩ kithii eeti cĩ katĩ agamanung anyinit cunung, cĩ kaanyung na agiitia wo. 12 Ĩthõng eeti cĩ ũtũbũr thõõth cĩ Thĩttano kũdũt, kaanyi katĩ na ĩnõõnõ kutugu kĩ kitiiri cĩ Ciith cĩ Nyekuc cannĩ, ĩthõng ĩthĩnga ẽhẽẽt nẽ ngatĩvõrĩ naboo kũdũt. Keheedi katĩ na thar cĩk Nyekuc cannĩ ẽla cĩnnĩ, kĩ thar cĩk kõrõõk cĩ gaalawu cobbi cĩ Nyekuc cannĩ ẽla cĩnnĩ cĩ ẽẽn, Yeruthalẽm cĩ Jõr cĩ katĩ itiona Nyekuci cannie tammuatiddina kikiyyia loota, ĩthõng katĩ ketehedĩha na thar cĩganĩk cĩk jõr ẽla cĩnnĩ. 13 Mĩ ayakcu kĩĩn, ĩthĩrarit thõõth cĩ aduwaai Ririwacĩ cĩ Dĩhĩmĩ meelitinnya cĩk lemnyiowu wo jurrung.’ ”
Nyemut cĩ lemnyiok cĩk Leoditheia
14 Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak õlõõ ĩcĩ gaalawu cĩ Leoditheia.
Duwak ĩnõõnõ ennek ne, ‘Avvu thoothonniowa cĩkkõ ĩcĩ Et cĩ athĩ Amẽn,b Et cĩ athũnnĩ thõõth cĩ aduwa nẽ, ĩthõng ĩĩ nẽ keberec cĩ ẽẽn dĩdĩ, cĩ ẽngẽnycanĩ Nyekuci kaal vẽlẽk ĩcĩnnĩ. 15 Kagga na thoothonniok vẽlẽk cĩk adĩmannu niigia, ĩthõng athii cĩ edenyiay ngatĩ, alalĩ thinneti cuguk thõõtha ĩcĩ Nyekuco, kõdẽ aaburi thinneti cuguk thõõtha ĩcĩ Nyekuco. Kadiimi na ngatĩ woccia alalĩ thinneti cuguk, kõdẽ ngatĩ aaburni thinneti cuguk. 16 Ĩthõng nyatarka athii cĩ aaburni thinneti cuguk, kõdẽ alalĩ, kathĩcanung katĩ na agiitia kũtũga cannĩ kĩ amũta. 17 Athinnu ne, “Kabalina, ĩthõng kayakca gii vẽlẽk, ĩthõng athii cĩ kadiimnya gimma naboo,” ĩthõng athii cĩ acĩnnu pĩrnanẽt cunung, amannu niigia, ĩthõng eeginnu ngĩjũrra, ĩthõng iittu rubẽnẽ, ĩthõng aavuttu tdilanyany. 18 Kathĩ ne, kitirithung na agiit, utuyyia ĩcannĩ daab cĩ avaaddi guyyia kũbũna, kĩĩ katĩ aballiõy, ĩthõng itihimtu ceremua cĩk võõrĩk, kĩĩ katĩ ũmmũtĩt ngawani cĩ attiyyu tdilanyany, ĩthõng utuyyiawu gẽrnat cĩ kẽbẽrẽ cuguk, kĩĩ katĩ kaanyung agiit ĩcĩntẽ jurrung.
19 Katirithi na eet cĩk kamĩnani kũdũt, ĩthõng kegerenyewung, kĩĩ katĩ ũtũngtek niigia gerthetin cunung. 20 Ĩthĩktangũ aneeta jurrung, kabili na katũga cunung, ĩthõng kuuka, mĩ ĩthĩrar eeti ĩmma molook cannĩ, ĩthõng õõ katũk, kẽẽkta katĩna, ĩthõng kivitiaha kuduktowa kõdõwẽ kĩ ĩnõõnõ.