Thõõth cĩ lemnyiok cĩk Ẽvẽthathĩ
2
Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak, õlõõ ĩcĩ gaalawu ĩcĩ Ẽvẽthathĩ.Duwak ĩnõõnõ ennek ne, ‘Aku thõõth coo ĩcĩ Et cĩ agam mũnyũny tũrgẽrẽm attia cĩ athio, ĩthõng õtõ kõrgẽna cĩ thĩĩk tũrgẽrẽm cĩk ẽẽn daab, cĩk ayak kaal cĩk katũkũlẽnĩ. 2 Kagga na kaal vẽlẽk cĩk adĩmannu niigia, ĩthõng kĩcĩna ngatĩ aticaninu õrrõt, kĩ ngatĩ omogu thoothonniok. Ĩthõng naboo, kagawa ngatĩ athii cĩ ẽdẽmẽthanu eet cĩk gerthek. Ĩtĩmantu niigia eet cĩk õvõlõng athĩ ne, keeginna tionniak, ĩthõng monogo nẽnnẽ athii cĩ ẽẽn tionniak dĩdĩ. Ũrũbtawu niigia dĩdĩ, ngatĩ ẽnnẽ nẽẽgẽ volongnyiak. 3 Omokju balna niigia thoothonniok cĩk gerthek, ĩthõng ehecciewu õrrõt, nyatarka aneeta, ĩthõng alna ngaanĩ omokju kũdũt athii cĩ uungniccu.
4 Ĩthõng thĩ, athii na cĩ katalneccung agiitia, nyatarka thõõth coo. Ĩnĩnga niigia amĩnannangũ aneeta, kõdẽ goonogu kaavu kĩ balna ĩcĩ owu baa ngĩ ẽlẽmnyangũ niigia aneeta. 5 Ahaddia nõõnõ thõõth wũ balna adĩmannu niigia jurrung, ĩthĩ rẽẽn ngĩtĩ atdukuanu niigia õrrõt! Oboddia ĩcannĩ, ĩthõng ĩdĩmantu thoothonniok wũk balna adĩmannu ĩcĩ owu. Mĩ athii cĩ õbõdanu, kakuni katĩ kõkõyyẽ thiihit cunung cĩ ayak gii cĩ tũkũlẽnto ngatĩ aavẽ nẽ ẽẽ, ĩthõng kẽnyẽhẽ ĩnõõnõ. 6 Ĩthõng thĩ, aavĩ gii codoi doo cĩ adĩmannu jurrung. Aaburneccu niigia thoothonniok cĩk gerthek cĩk adĩman eeta cĩk õwõb thõõth cĩ eet cĩk Nikolaĩ, kĩcĩ kaaburneei na buu.
7 Mĩ ayakcu kĩĩn, ĩthĩrarit thõõth cĩ aduwaai Ririwacĩ cĩ Dĩhĩmĩ meelitinnya cĩk lemnyiowu wo jurrung. Kaanyi katĩ na et cĩ abũrĩ thoothonniok cĩk gerthek, kuduk kẽẽt cĩ rũgẽtõa cĩ aavĩ paradithiowa cĩ Nyekuco.’ ”
Thõõth cĩ lemnyiok cĩk Thimirna
8 Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak, õlõõ ĩcĩ gaalawu ĩcĩ Thimirna.
Duwak ĩnõõnõ ethek ne, ‘Aku thõõth neccie ĩcĩ Et cĩ ẽẽn terehianĩt, ĩthõng ẽẽn turnanẽt. Adaak balna nẽ, ĩthõng ũrũga. 9 Kagga na pĩrnanẽt cunung kĩ ngatĩ eeginnu ngĩjũrra, ĩthõng thĩ, abalinu nẽnnẽ pee. Ĩthõng kagga ngatĩ adaaccung eeta cĩk athĩ ne, ẽẽn nẽẽgẽ Yudei wo, ĩthõng athii cĩ ẽẽn nẽẽgẽ Yudei dĩdĩ. Ẽẽn nẽẽgẽ meelitin cĩ Thĩttano.b 10 Ĩthõng nyĩ ongolinu gõõl cĩ katĩ õvvõ acananinu. Agamnyung katĩ alaanĩ cĩ ririwanĩn cĩk gerthek,c ĩthõng ariwung kĩjanatõ, ehecinu katĩ õrrõt wathinniok õmmõtõ. Nyĩ uungniccu thõõth cannĩ, kõdẽ woyyia ngĩ adaaknu buu, ĩthõng kaanyung katĩ na anyinit cĩ rũgẽt cĩ alna kũdũt.
11 Mĩ ayakcu kĩĩn, ĩthĩrarit thõõth cĩ aduwaai Ririwacĩ cĩ Dĩhĩmĩ meelitinnya cĩk lemnyiowu wo jurrung. Ĩthõng eeti cĩ abũrĩ thõõth cĩ Thĩttano kũdũt, athii katĩ eeti neccie cĩ õkkõ eheccie guyyia cĩ aavĩ kũdũt, nyatarka daaĩth cĩ ẽẽn rammad neccie.’ ”
Thõõth cĩ lemnyiok cĩk Pergamawo
12 Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak, õlõõ ĩcĩ gaalawu ĩcĩ Pergamawo.
Duwak ĩnõõnõ ethek ne, ‘Thõõth cĩ aku ĩcĩ Et cĩ ayak nyetubat cĩ lẽhẽdĩ õrrõt neccio. 13 Kagga na ngĩtĩ attiyyu niigia wo, ẽẽn kõrõõk cĩ gaalawu cobbi cĩ aavẽ Thĩttanĩ makathĩta cĩnnĩ, ĩthõng thĩ, ngaanĩ athunnu niigia thõõth cannĩ noko. Kõdẽ woyyia balna ngĩ aruwue Antipathĩ, eeti wũ balna ẽẽn keberec cannĩ, kõrgẽna cunung õlõõ ĩcĩ gaalawu, ĩcunung cĩ aavẽ Thĩttanĩ ẽẽ.
14 Ĩthõng thĩ, kayai na thoothonniok cĩk kĩdĩk cĩk kadiimi ngĩ kaduwacung, cĩk ngaanĩ adĩmannu niigia gõõla cĩ gerthe. Aatĩ eeta gwuak kõrgẽna cunung cĩk õwõb liman cĩ Balaamĩ,e wũ balna eyeleei Balakf kaanyĩk eet cĩk Ĩthraĩlĩ kĩdĩmanit thoothonniok cĩk gerthek. Baa lõõla, alabeei Balaamĩ eet kẽgẽrẽthantõy gõõla cĩ adaĩ dainit cĩ anyi eeta kaal cĩk aar nẽẽgẽ kĩĩtõ nyekucnya. Ĩthõng alabek nẽ ĩnõõgõ kataguthõ kĩ ngaay taktak. 15 Ĩthõng naboo, attiyyu niigia gwuak cĩk owobju liman cĩ eet cĩk Nikolaĩ. 16 Kaduwacunga, ũtũngtek thoothonniok cĩk gerthek cĩkkõ, mĩ athii cĩ uungniccu, kakuni katĩ tamanoko kikiyyia kuuktowa kĩ eet cĩk atican thoothonniok cĩkkõ. Karui katĩ ĩnõõgõ nyetubata cĩ aku ngatĩvõrĩ kũtũga cannĩ.
17 Mĩ ayakcu kĩĩn, ĩthĩrarit thõõth cĩ aduwaai Ririwacĩ cĩ Dĩhĩmĩ meelitinnya cĩk lemnyiowu wo jurrung. Ĩthõng kaanyi katĩ na et cĩ amaacĩ Thĩttan dainit cĩ athĩ maanag cĩ kalugunyi na ngamanĩ tammuatiddina. Ĩthõng naboo, kaanyi katĩ eet codoi codoi bĩĩ cĩ võõrĩ cĩ eheedinie thara cĩk jõr, cĩk athii eeti cĩ aga thar nĩĩkẽ tõ, aga katĩ baatĩ tharu dõ.’ ”
Thõõth cĩ lemnyiok cĩk Thiatira
18 Ĩthõng ennea Eeti cĩ õgõõn kĩ Ngẽrtĩ Eeto ne, “Teheedĩk thõõth coo anjĩlõ cĩ meelitin cĩ lemnyiok cĩk kelethiawak, õlõõ ĩcĩ gaalawu cĩ Thiatira.
Duwak ĩnõõnõ ethek ne, keeni na Ngẽrtĩ Nyekuco, cĩ alanyĩt kẽbẽrẽ õgõõn kĩ lanyĩtĩ cĩ guyyio, ĩthõng utuguthõ thoona kĩ thĩĩha cĩk maantĩk cĩk ataalĩthĩ. 19 Kagga na kaal vẽlẽk cĩk adĩmannu niigia. Kagga mĩnan cunung, kĩ leminit cunung, kĩ tiic cunung, kĩ gõõl cĩ omogu thoothonniok. Ĩthõng kagga ngatĩ adĩmannu thoothonniok jurrung wathinniowẽy cĩkkõ kijiar wũk balna adĩmannu ĩcowu.
20 Ĩthõng thĩ, aavĩ thõõth codoi doo cĩ kadiimi ngĩ kaduwacunga. Ũtũngtewu naboo niigia ngaa cĩ athĩ Jethebelh ẽẽ, kovolongek nẽ eet õrrõt athĩ ne, ẽẽn nẽ et cĩ õthõõth molook cĩ Nyekuco, ĩthõng ilimanek eet võlõng, ĩthõng naboo alabek ticcianniok cĩganĩk kuduit dainit, cĩ kaal cĩk aar eeta kĩĩtõ nyekucnya, ĩthõng ilimanek ĩnõõgõ kĩdĩmanit thoothonniok cĩk ẽẽn riiriny buu. 21 Kaanyĩha na ĩnõõnõ kõr cĩ ũũngnĩcẽ gerthetin cĩnnĩ cĩ oginnie nẽ, kĩ eet taktak, ĩthõng athii kẽnnẽ thẽk cĩ adiim ngĩ ũũngnĩcẽ nẽ gerthetin cĩnnĩ.
22 Ĩthõng yoko, katdukeei katĩ na Jethebel lobela cĩ hecinto, ĩthõng kaanyĩha eet cĩk atican kĩ ĩnõõnõ thoothonniok cĩk ẽẽn riiriny ẽẽ, kipiryia õrrõt, katĩ ngĩ athii cĩ uungni gerthetin cĩnĩng ẽẽ. 23 Karui katĩ na wobjiak cĩgĩnĩk kadaaitõ, ĩthõng katĩ ivitia agaacõ meelitinnya cĩk lemnyiowu vẽlẽk, ngatĩ ẽẽn aneeta cĩ kẽrẽppani muwẽẽnĩt, kĩ thoothonniok vẽlẽk cĩk ayak eeta thinnetinẽy cĩgĩk. Ĩthõng katĩ kadũmani na eet codoi codoi gõõla cĩ aticanini nẽẽgẽ. 24 Ĩthõng thĩ, nẽnnẽ niigia gwuak cĩk attiyyu õlõõ ĩcĩ gaalawu cĩ Thiatirawa wo, athii cĩ owobju thõõth cĩ gerthe cĩ alimanecung ngaa neccio wo. Athii cĩ elemnyu gii cĩ Thĩttano cĩ amigẽnĩ nẽ. Ĩthõng kethecung ne, ĩthĩnga katĩ katadicung pĩrnanẽt ĩmma naboo. 25 Uthuutti thõõth cĩ Nyekuco dõ jurrung, gii ngĩ kikiyyia na.
26 Ĩthõng kaanyi katĩ na et cĩ ũtũbũr thõõth cĩ Thĩttano, ĩthõng ũthũũtĩ leminit cannĩ kũdũt, makathĩt cĩ agamĩ loociok vẽlẽk, gii ngĩ õdõlan ditianẽtĩ cĩ loocu.
27 ‘Agam katĩ nẽ ĩnõõgõ tẽlẽẽa cĩ ẽẽn thiihit,
athaan katĩ nẽ loociok, cĩkkõ kaavutõ
kĩ ijjionya cĩk alibie.’i