Nyaraga cĩ
Yelintio cĩ Yesu Kiristo
Eyeleei Yesu Yoanẽ thoothonniok cĩk kõr ĩmma
1
Ẽẽn Nyaraga coo, thõõth cĩ teheedinet cĩ aduwa Yesu Kiristo. Anyi balna Nyekuci Yesu Kiristoa yelinit coo, keyelek ticcianniok cĩgĩnĩk nyia woccia thẽk katĩ cĩ aku tamanoko. Anyi nẽ yelinit coo kagawẽ, thõõtha ĩcĩ itionacẽ nẽ anjĩlõb cĩnnĩ ticciannioit cĩnnĩ Yoanẽ. 2 Ĩthõng ikiyyia uduwa Yoanẽ thoothonniok vẽlẽk wũk balna acĩn nẽ thõõtha ĩcĩ eyeleei Nyekuci, kĩ thoothonniok vẽlẽk wũk balna aduwaai Yesu Kiristo ĩnõõnõ.3 Agatan katĩ Nyekuci et cĩ ebelei eet thoothonniok, cĩk aduwa Nyekuci Nyaragawa ĩcoo, ĩthõng agatan katĩ Nyekuci eet cĩk athĩrar thoothonniok, ĩthõng elemit thoothonniok cĩk aduwuay Nyaragawa ĩcoo. Nyatarka õbõwẽ kõr cĩ katĩ avvu edenyianẽ thoothiowa cĩkkõ vẽlẽk.
Ĩthaa Yoanẽ lemnyiok
4 Aneeta Yoanẽ cĩ keheedicung agiit meelitin cĩk lemnyiok cĩk kelethianyawu,c cĩk eeginnu tũrgẽrẽm looca cĩ Athia. Aku bũnnathĩtĩ kĩ ganõn ĩcunung ĩcĩ Nyekuc cĩ aavĩ yoko wo, cĩ balna alna baa lõõla, kĩ cĩ katĩ aku kõr ĩmma, ĩthõng ĩcĩ Ririwanĩn cĩk ẽẽn tũrgẽrẽm,d cĩk aatĩ nguuma cĩ Nyekuco, ĩthõng ĩlĩkta taaba cĩnnĩ, 5 ĩthõng aku bũnnathĩtĩ, kĩ ganõn ĩcĩ Yesu Kiristo cĩ aduwacet thõõth cĩ ẽẽn dĩdĩ. Arak balna Yesu ngatĩ arũknanĩ daaĩtha, ĩthõng agam alaanẽt vẽlẽk cĩk looc coo.
Amĩnannet Yesu Kiristo ageeta, ĩthõng õgaẽt gerthetina cĩnac biyyietĩy cĩgĩnĩk, 6 ĩthõng anyet nẽ ageeta kĩĩtõ eet cĩk alaanthẽt cĩnnĩ, ĩthõng kĩĩtõ paadĩrnya cĩk katicanothi Nyekuc Baatĩnnĩ. Anycĩk ĩnõõnõ kubulie kẽyẽk tiirthẽt cĩ aavĩ kũdũt! Amẽn.
7 Ĩcĩnĩt niigia da yoko!
Iriowa nẽ kĩ diithua tammuatiddina,
acĩn katĩ eeta vẽlẽk ĩnõõnõ,
ĩthõng thẽk acĩn katĩ eeta wũk balna acuwan ĩnõõnõ buu.
Alu katĩ eeta vẽlẽk loota ngato, nyatarka ĩnõõnõ.
Dĩdĩ, aavĩ katĩ thõõth coo! Amẽn.
8 Õthõõth Makayyioiti Nyekuci athĩ ne, “Aneeta cĩ keeni terehianĩt, ĩthõng aneeta cĩ keeni turnanẽt. Kaavẽ balna na baa lõõla kũdũt, ĩthõng ngaanĩ kaavẽ noko, ĩthõng kakuni katĩ naboo, aneeta Tiiryioit cĩ Kijiari vẽlẽk.”
Ilibak Kiristo wũ balna arũkna Yoanẽ
9 Aneeta gotonu Yoanẽ cĩ kõthõl naaga, kĩ agiit canan, kĩ alaanthẽt, kĩ rewiniet, kĩ moginit cĩk karũba naaga ĩcĩ Yesu. Kitionothi balna na looc cĩ Patamothi cĩ alĩha maama, nyatarka kirioni thõõth cĩ Nyekuco, kĩ thõõth cĩ ẽẽn dĩdĩ, wũ balna eyeleca Yesu aneeta. 10 Ma balna Kõrra cĩ Makayyiokto cĩ kalawinia naaga, ikiyyia agama aneeta Ririwacĩ cĩ Dĩhĩmĩ, ĩthõng kĩthĩrara molook cobbi cĩ ẽgẽrẽny ĩcĩ bowuc cannĩ, cĩ aavĩ kĩ moloowĩ cĩ nyeepuwo, 11 cĩ othoothĩca etheca ne, “Teheedĩk nyaraga cĩ amũrmũranni thoothonniok cĩk katĩ acini niia vẽlẽk, ĩthõng itioniwu meelitinnya cĩk lemnyiok cĩk kelethianya cĩk ẽẽn tũrgẽrẽm cĩk aatĩ mĩn mĩn, Ẽvẽthatha, kĩ Thimirnawa, kĩ Pergamawa, kĩ Thiatirawa, kĩ Thardithawa, kĩ Viladelviawa, kĩ Leoditheiawa.”
12 Ma balna ngĩ kamuudie kĩcĩn et cĩ othoothĩca ẽẽ, kacini kẽnnẽ thĩĩk tũrgẽrẽm cĩk ẽẽn daab, cĩk ayak kaal cĩk katũkũlẽnĩ. 13 Ĩthõng kõrgẽna cĩ thĩĩk tũrgẽrẽm cĩk ayak kaal cĩk katũkũlẽnĩ nĩĩkẽ wo, abĩlĩ Eeti ĩmma cĩ õgõõn kĩ Ngẽrtĩ Eetoe ahimit cẽrẽm cĩ wuuni cĩ õkkõ kõdõlan thoo loota, ĩthõng amarak cẽrẽm cĩ ẽẽn daab ĩyyõwa cĩnnĩ. 14 Võõr õõ kĩ ĩm cĩgĩnĩk kutuguthõ kĩ lorudo, ĩthõng uduktõy kĩ diith cĩ võõrĩ pẽr, ĩthõng merihẽ kẽbẽrẽ cĩgĩnnẽk buu kĩ gua. 15 Ataalĩth thoona cĩgĩnnẽk kutuguthõ kĩ thĩĩha cĩk maantĩk cĩk avaaddi nyekiteta, ĩthõng ivollie, ĩthõng õrõĩ moloowĩ cĩnnẽ kĩ maama cĩk arik thõng. 16 Agam nẽ mũnyũny tũrgẽrẽm attia cĩnnĩ ĩcĩ athio, ĩthõng iliba nyetubat cĩ lẽhẽdĩ kũtũga cĩnnĩ. Ataalĩth nguum cĩnnẽ kaavu kĩ kõr wũ gõõ alanyca õrrõt.
17 Ma balna ngĩ kacini ĩnõõnõ ẽẽ, kuuka looc thoonĩy cĩgĩnĩk kaavu kĩ eeti cĩ adaaha. Ngaatĩ atadicia athiit cĩnnĩ cĩ athio, ĩthõng ennea ne, “Nyĩ ongolinanĩ! Aneeta cĩ keeni terehianĩt, ĩthõng aneeta cĩ keeni turnanẽt. 18 Aneeta cĩ karugi wo, kadaaha balna, ĩthõng yoko, kũrũga kũdũt, ĩthõng kayai mũwũtanya cĩk daaĩthak kĩ cĩk looc cĩ daakciawu.
19 “Teheedĩk nyaragawa, thoothonniok cĩk katĩ acini niia vẽlẽk wo, loota ngato, kĩ kaal cĩk aatĩ yoko, kĩ kaal cĩk katĩ avvu vurtia cĩ thoothonniok cĩkkõ, 20 kaduwaci yoko thõõth cĩ alugunyi cĩ ijiar gẽẽnyĩth cĩ eetu, cĩk mũnyũny cĩk ẽẽn tũrgẽrẽm, cĩk acini niia aatĩ ĩcĩ athiit cannĩ cĩ athio wo, kĩ thĩĩk tũrgẽrẽm cĩk ẽẽn daab, cĩk ayak kaal cĩk katũkũlẽnĩ wo buu. Ẽẽn mũnyũnya cĩk ẽẽn tũrgẽrẽm wo anjĩlẽt cĩk meelitinnya cĩk lemnyiok cĩk kelethianya cĩk ẽẽn tũrgẽrẽm wo, ĩthõng ẽẽn thĩĩha cĩk ẽẽn tũrgẽrẽm, cĩk ayak kaal cĩk katũkũlẽnĩ wo, ẽẽn vatĩk cĩk kelethianyawu, cĩk ẽẽn tũrgẽrẽm wo.”