Vilipi 4

Ĩthõng thĩna, gõtõõnõga kĩ ngõõnõga cĩk kamĩnanung wo, aavut uthuutti thõõth cĩ Makayyiokto jurrung. Kamĩnanung na agiit, ĩthõng kadiimi ngĩ kakuni kacinnunga. Kiriani na dõõkĩthĩ, ĩthõng kẽbẽlbẽla, nyatarka eeginnu niigia anyinit cĩ tiic cannĩ.

Utukwuanek Paulo lemnyiok Vilipa

2 Niigia Yudia kĩ Thĩntaci, eeginnu niigia eet cĩk Makayyioktak, kalayyung ibilli thõõth cunung cĩ ẽpẽkanonu wo. 3 Ĩthõng niia gõõna cĩ thĩnĩn cannĩ, cĩ katicanni kõdõwẽ wo, kalayyi ẽẽl ngaay cĩkkõ. Katicaninia balna kõdõwẽ, kĩ ĩnõõgõ ngatĩ kalimania Nyemut cĩ Abũnna. Aticanni balna nẽẽgẽ kõdõwẽ, kĩ Kẽlẽmẽn, kĩ ticcianniok õõgĩ cĩganĩk, cĩk eteheddie thara cĩgĩk nyaragawa cĩ rũgẽtõ.

4 Ebelbelit niigia dõõkĩthĩ, nyatarka Makayyioit! Kõbõdẽcẽ naboo kathĩ ne, ebelbelit. 5 Anycĩk eet vẽlẽk kicintung ngatĩ eeginnu thimattiak, nyatarka aku katĩ Makayyioiti tamanoko. 6 Nyĩ omothinu nyatarka gimma, ĩthõng thĩ, alaac Nyekuc thoothonniok vẽlẽk. Alaac ĩnõõnõ thinnetinẽy cuguk cĩk enneccu ne, ibalallẽ. 7 Ĩthõng arũbanu katĩ ganõn cĩ Nyekuco, cĩ ijiar gii vẽlẽk cĩ woccia aga eeta. Athũnnĩ katĩ ganõnĩ cĩnnẽ muwẽẽnĩt cĩ thinneti cuguk, kĩcĩ attiyyu niigia kõdõwẽ kĩ Yesu Kiristo wo.

8 Ĩthõng thĩna, yoko gõtõõnõga kĩ ngõõnõga, thõõtha cĩ aturna, ummuit thoothonniok cĩk ẽẽn dĩdĩ kĩ thoothonniok cĩk kongollie naaga, kĩ thoothonniok cĩk edeemothi, kĩ thoothonniok cĩk athii cĩ ayak gerthetin kĩ thoothonniok cĩk atalneei eeta kĩ kaal cĩk atarnanĩ eeta. Ummuit thoothonniok cĩkkõ vẽlẽk cĩk woccia adihiththu niigia õrrõt. 9 Agayyu niigia liman wũ balna kaanyung nana, ĩthõng agayyu thoothonniok wũk balna athĩkniangũ niigia aneeta ngĩ kothoothi, ĩthõng ĩcĩntangũ aneeta ngatĩ kadĩmanẽ. Owobit yelinit wũ balnanĩ. Ĩthõng katĩ aavu Nyekuci cĩ ganono ĩcunung.

Ethek Paulo lemnyiok cĩk Vilipi ne, ibalallẽ

10 Anya Makayyioiti aneeta kẽbẽlbẽl õrrõt, nyatarka elliahangũ naboo wanĩco niigia aneeta. Ĩthõng dĩdĩ, ahadanangũ balna gõõ niigia aneeta dõõkĩthĩ, ĩthõng thĩ, athii balna gõõl cĩ woccia eliangũ niigia aneeta tõ. 11 Athii cĩ kothoothi na thõõth coo kĩcĩ kadiimi gimma, nyatarka kilimana balna na ngatĩ kayahẽ kaal cĩk awũpananĩ. 12 Kagga na gõõl cĩ karũknẽ ngatĩ kothii gimma, ĩthõng kagga na ngatĩ karũknẽ kaalĩy ĩcĩk meelĩk. Ĩthõng kilimana gõõl cĩ karũknẽ wathinniowẽy vẽlẽk, kõdẽ woyyia kĩcca, kõdẽ adakca boobo, kõdẽ kayai kaal cĩk meelĩk, kõdẽ kaal cĩk kĩdĩk kaganoko. 13 Kadĩmani woccia gii vẽlẽk, nyatarka Kiristo cĩ anya aneeta tiirthẽt wo. 14 Ĩthõng abũnnanu balna niigia ngatĩ eliangũ aneeta balna nga kaavẽ pĩrnanta.

15 Gõtõõnõga kĩ ngõõnõga cĩk Vilipi, ahadanu niigia balna ngĩ õgõõn kuu balna ngĩ kẽtẽrẽhanẽ na ngatĩ kirionẽ Nyemut cĩ Abũnna looca cĩ Makedonia. Ma balna ngĩ kĩtĩnga natẽ, agiitia balna dõ cĩk eeginnu lemnyiok cĩk ẽẽlangũ aneeta kelethianyay vẽlẽk. 16 Kõdẽ woyyia balna ngaanĩ kaavẽ na õlõõ ĩcĩ gaalawu ĩcĩ Thẽthalonika, itionacangũ balna niigia aneeta elinit ngõnana cĩk meelĩk kũdũt katĩ ngĩ kadiimi na gimma. 17 Kothoothi na ketee, athii cĩ ẽẽn, nyatarka kadiimi anyinit ĩmma ĩcunung, ĩthõng thĩ, kadiimnyung na agiitia umuddia dũmaniniet cĩ thimatĩth cunung Nyekuca.

18 Nyatarka kũmũda yoko na gii vẽlẽk wũ balna itionacangũ niigia aneeta, ĩthõng kayaha kaal cĩk meelĩk õrrõt. Ĩthõng kĩyoko ngĩ ayahaha balna aneeta Epavoroditothĩ kaal cĩk itionanu niigia wo, kũmũda thĩ na kaal vẽlẽk cĩk kadiimi na. Õgõõn nẽẽgẽ kĩ tongoli cĩ ẽmẽdẽ cĩ ẽẽn anyinit cĩ ẽẽn gii cĩ cavĩto cĩ atalneei Nyekuci. 19 Ĩthõng anyung katĩ Nyekuci cannie gii vẽlẽk cĩ adiimnyu niigia, nyatarka bulẽnĩt kĩ balinit cĩnnĩ cĩk avvu ĩcĩ Yesu Kiristo.

20 Anycĩk woccia niigia Nyekuc Baangiet cĩnac kĩdĩhĩthẽ kũdũt. Amẽn.

Thawinet cĩ aturna

21 Ĩthayyihangũ eet vẽlẽk cĩk Yesu Kiristo. Ĩthayyung wobjiaha cĩgĩnnẽk cĩk karũmẽna ngato buu agiitia. 22 Ĩthayyung lemnyiowa cĩk callĩk cĩk Nyekucak vẽlẽk agiitia thẽk kir ticcianniok cĩk kõrõõk cĩ alaan cobbi cĩ Rũma.

23 Anycĩk bũnnathĩt cĩ Makayyioit Yesu Kiristo kaavu ĩcunung. Amẽn.