Keelit eet vẽlẽk
6
Gõtõõnõga kĩ ngõõnõga, mĩ ẽgẽrẽthanõy eeti ĩmma kõrgẽna cunung, oboddiaĩ niigia eeta cĩk okomtu Ririwaca cĩ Nyekuco wo et nĩcẽ, ĩthõng atamatiwu ĩnõõnõ, ĩthõng anyciwu ĩnõõnõ kaavu gõõla ĩcĩ abũnna jurrung. Ĩthõng thĩ, ĩrĩcanta eleeti cuguk, kĩĩ katĩ athii cĩ atĩmaninu niigia buu gerthetina ĩcĩnnĩ. 2 Elliõy nyaguana thoothonniowẽy ĩcĩk pĩrnantak, ĩthõng ngĩ ĩdĩmantu thoothonniok cĩkkõ monogo kir thẽk owobtu ngiran cĩ Kiristo. 3 Ma ngĩ ahad eeti ĩmma athĩ ne, ijiar nẽ gõõnõgĩ, ĩthõng athii nẽ cĩ ijiar buu, ĩgõõl nẽ ẽlẽ cĩnnĩ. 4 Ticcan tiic cunni jurrung, ĩthõng thĩ, katĩ engerenu nyiangũ dõ. Ĩthõng nyĩ eyehethei tiic cĩ ĩdĩmanu niia goonogu õõgĩ, 5 nyatarka adiim thẽk eeti codoi codoi ngĩ arĩcana tiic cĩnnĩ.6 Adiim thẽk eeta cĩk alimanothi thõõth cĩ Nyekuco, ngatĩ õthõlĩ kaal vẽlẽk cĩk abũnna kĩ et cĩ aliman ĩnõõgõ wo.
Õgõõn rũgẽtĩ kĩ evvinti cĩ manu
7 Nyĩ anyiccu kĩgoolung eeti ĩmma agiitia. Athii eeti cĩ woccia agiith Nyekuc tõ, nyatarka ẽtẽda katĩ eeti gii cĩ balna thẽk athacĩ nẽnẽ. 8 Eeti cĩ athacĩ kinyomo cĩk thoothonniok cĩk gerthek, nyatarka abarriteei ẽlẽ cĩnnẽ, amũda katĩ nẽ gerthetin kĩ daaĩth. Ĩthõng thĩ, eeti cĩ athacĩ kinyomo, kĩĩ katĩ kẽbẽlbẽl Ririwacĩ cĩ Dĩhĩmĩ, amũda thẽk katĩ nẽ rũgẽt cĩ alna kũdũt. 9 Ĩthõng athii woccia naaga cĩ kalĩbĩ ngatĩ kẽẽlĩ goonogiet, nyatarka kamũda katĩ naaga gataninit, katĩ ngĩ ikiyyia itini, ma ngĩ athii naaga cĩ kuungni tiic. 10 Ĩthõng thĩna, kĩdĩmanit naaga jurrung, katĩ ngĩ karũba naaga gõõl ĩmma cĩ kẽẽlĩ eet vẽlẽk jurrung, arru thẽk kir katĩ ngĩ ẽẽn nẽẽgẽ eet cĩk ẽlẽmĩ Yesu.
Thoothonniok cĩk Paulo cĩk aturna
11 Ĩcĩnĩt da nõ thõõth cĩ kẽhẽdacung na agiitia nyaragawa ĩcoo wo, abbacadanyay ĩcĩk obbitik koo attia ĩcannĩ wo jurrung.
12 Eeta cĩk aduwaccung agiitia ennecung ne, adiim thẽk ngĩ abũũrannu eleeti cuguk. Adiim nẽẽgẽ ngĩ ẽyẽla eleeti cĩgĩk athĩ ne, keeginna tiirti. Ĩthõng athii nẽẽgẽ cĩ adiim ngatĩ amũdanĩ pĩrnanẽt gõõla ĩcĩ irioni daaĩth cĩ Kiristo kurucea. 13 Athii eeta cĩk abũũranni eleeti cĩgĩk buu cĩ õwõb Ngiran, ĩthõng nga adiimnyung nẽẽgẽ agiitia ũbũũrantẽ, kĩĩ katĩ kengerenit nẽẽgẽ, nyatarka anyung nẽẽgẽ agiitia ũbũũrantẽ. 14 Kiriani woccia na kurucea cĩ Makayyioit cĩnac Yesu Kiristo dõ, nyatarka kuruce cĩnnĩ, ivitia balna adaaitõ kaala cĩk gerthek cĩk loocu ĩcannĩ vẽlẽk, ĩthõng kadaaha na buu ĩcĩnĩng. 15 Athii cĩ gẽrtha katĩ ngĩ abũũranni eeti, kõdẽ ngĩ athii cĩ abũũranini, ĩthõng thõõth vẽlẽk cĩ tiiri dõ cĩ ẽnnẽ niia et cĩ jõr. 16 Anycĩk Nyekuc kaanyĩk ganõn cĩnnĩ kĩ tamati eet vẽlẽk cĩk õwõb tĩrĩthẽnĩt coo, eet nĩĩkẽ dĩdĩ cĩk ẽẽn eet cĩk Nyekucak.
17 Ĩthõng thĩna, turnanta cĩnnĩ, athii cĩ kadiimi et cĩ ẽhẽcca aneeta, nyatarka kayai na marcallẽn ẽla cannĩa cĩk ẽyẽla ngatĩ kẽnnẽ na et cĩ Yesu.
18 Gõtõõnõga kĩ ngõõnõga cĩk eeginnu niigia lemnyiok wo, anycĩk bũnnathĩt cĩ Makayyioit Yesu Kiristo kaavu ririwanĩnẽy cuguk vẽlẽk. Amẽn.