2
1 Anɩ dɩ pa na anɩ sopugo dor nɔɔ dɩ nɩ kɔɔ khi mamara;
2 dabɔɔlera nɩ kɔɔ ha garnɩ dɩ na-n kpaan na fɩlɛɛkɛ dɔnɩ thɩɩkɛɛda, dɩ na-n nɩ nũu ʋrɛraakɛ dɔnɩ kɔ̃tɩn fãgadarasɔraakɛ dɔnɩ thudaakɛ hanɩ jɩɛra le ƴũ, kɛ dɔnɩ ʋrɛ n dɔnanɩ gɩrɛ nũ nʋʋrdara thɔma.
3 Sɛrɛ fɛʋ dakha thalera sɩ kɔɔ ha dɩ sa-n kɔɔ ɩɩr mɔ̃kɛ asɩ tibil do pa n ƴaalnɩ, dɩ sa-n cʋʋna dakha gɩrɛ n kɔnɩ asɩ tomɩ na asɩ kpɩɛr thue, dɩ asɩ ti parakɛ Thãgbaa nĩkhi too sɩ too ɩkhasɔɔ kha.
4 Sɩ Thãgbaakɛ ɔɔ bɔ dona na wabɩnɩ kpãkpalã ga, na ɔɔ naʋ kɔ̃tɩ̃ɩkɛ a kɔɔ na sɩnɩ,
5 sɩɩ dorakɛ sɛr dɔ wɩrɛ kɔɔ khenɩ dɩɩ do asɩ dɩ pa dɔ nɔɔ a bire ha sɩ yire na Kirisiti. Thãgbaa bɔ jɩ dɔ nɔɔ dɩ nɩ 'lɛ taarɛ.
6 A kɔɔ ɩɩr sɛr kha dɩ sɩ gbɛbɩ too Thãgbaa dʋɔ nakha Kirisiti, dɩɩ the asɩ bɩɛl dora na Jeju Kirisiti.
7 Gɩ do nɔɔ a nɩna bɔɔraakɛ n ɩnanɩ mɔ̃kɛ ɔɔ bɔ jɩ thʋnɩ wabɩ, dɩɩ the bɔɔraakɛ a bɔ sarnɩ dɩɩ do Jeju Kirisiti dɔ nɔɔ.
8 Gɩdonɩ Thãgbaa bɔ jɩra nɩ kɔɔ 'lɛ taarɛ dɩɩ the ha pɛrɛra, ga do anɩ pa gɩ tha', Thãgbaa khaarda gɩ.
9 Məbi paar na ha liir tibil n məbiroə', gɩdonɩ ga do anɩ dɩkha cʋʋra gɩ tha'.
10 Gɩdonɩ sɛr dɔ Thãgbaa nyɛ̃ thɔ̃; a kɔɔ ti ser dɩɩ do Jeju Kirisitii pa gɩ the, sa-n cʋɛ thɔ̃ bʋɔɔkɛ a kɔɔ maanɩ gbɛbɩrɛ sa-n cʋɛ.
11 Gɛr gɩ nɩ jɛna gɩrɛ nɩ kɔɔ donɩ mamara, nɛr kɔɔ dɔ ca kpalaakɛ Juifisɔ n hɩɩnnɩ mɔ̃ na donɩ khʋ̃ kurdara ga, sɩɩ do mɔ̃ wɩ donɩ khʋ̃ kurdara jɩɩn gɩɩkɛ tibil nyɛ̃ɛ pɛrnɩ.
12 Ɔbɔɔraalera na kɔɔ hana Kirisita', na kɔɔ hana lõ paar Ɩjɩrayɛldaraa thɩ̃thɩɩna', nɩ kɔɔ dor kpakpala nɔ bɩɛl ʋlfɛrɛraakɛ kɔɔ ʋlfɛnɛnɩ, na kɔɔ hana nũ pɛra', na kɔɔ hana Thãgba thɩɩraaka'.
13 Sɩ nɛnɛ̃ dɩphã nɛrkɛ kɔɔ hʋnɔnɛnɩ mamara, Kirisitii tɔmɩ̃ cʋʋ nɛr dɩ nɩ tɔ wɔrɔ̃ gɩrɛ, dɩɩ the anɩ bɩɛl dora na Jeju Kirisiti.
14 Gɩdonɩ ɔr dʋɔn asɩ ha ie, ɔrkɛ cʋɛnɩ Juifisɔ na ca kpala dɩ wɩ do bɩɛl, mɔ̃ a wɩɛlnɩ laarɛɛkɛ dɔnɩ gʋʋkɛ lea wɩnɩ kha.
15 Ɔɔ tomɩ a gba a kʋkʋʋlna jɔfʋ na gɩrɛ jɔfʋ n yɩnɩ foo gɩ cʋɛ, na sɔsɔɔkɛ gɩ hananɩ, a cʋʋrɛ mɛ̃ gɩ do nɔɔ caar yenyɔɔle n gbɛbɩ wɩ do tɩɩ pha bɩɛl, gɩ do thale dɔ ha ɩɩ a pɛrnɩ.
16 Ɔɔ khi kʋkʋ thɩrʋra a kʋna laarɛ, a cʋʋna dakha caar yenyɔ dɩ wɩ bir kũu kha na Thãgba a do tomɩ bɩɛl.
17 A kɔɔ ɩnɛ a mɩɩ tutugo bʋɔɔkɛ dɔnɩ ha iedaa nɛrɛraakɛ hʋnɔnɛnɩ na Thãgba, na wɩrɛraakɛ wɔrɔnɛnɩ.
18 Ɔr dɔ nɔɔ dɩ sɛrɛ bɩɛlbɩɛl yɩ lõ paar Thɩrɛra na Thu Phuu bɩɛl.
19 Gɛr gɩ dɩphã na do kpakpala na hʋ ka bã, sɩ bɩɛl nɩ do na tɩɩ phuusɔ a dona Thãgbaa cɔ too.
20 Nɛr dɔ cʋɔrɩkɛ mɛnɩ, sɩ thɔ̃thɔna na Thãgba tukɩr tidara kɔɔ kpɛa gʋʋ ɓo, dɩ Jeju Kirisitii thɛthɛ dɔ go tɩ bokaar.
21 Bɩɛl dʋʋr na ɔr thɛthɛ na dɔ nɔɔ dɩ cʋɔrra fɛʋ na cõcool na khɔ̃ a na do cɔ phuu Kɔ̃tɩnna.
22 Bɩɛl dʋʋrrara na ɔr wɩ gba nɩ a ɓaan a gbɛbɩ mɩ dɩ nɩ do cʋɔr Thãgbara, kɛ Thu Phuu n cɔrɔnɩ.