12
1 Gɩ teenanɛ ɩ̃ məbi sɩrakɛ ga-n hana khora', sɩ ma mɩɛ nɛr thɩ̃ yɩr na thɩ̃ nɩrɔrɛɛkɛ Kɔ̃tɩn kɔɔ cʋʋ mɩnɩ dɩ ɩ̃ yɩ.
2 Mɩ jɩrɛ tibil bɩɛlɩkɛ hanɩ Kirisitira, kɛ Thãgba kɔɔ vəni a jʋʋnna a dana balãther thãgbara ƴũ, yɛna yʋɔr yenã gɩ gɩrɛ, ado tomɩr a kɔɔ hana ya, ado tomɩr gaa ya, ma ja', Thãgba jɩɛn.
3 Dɩ tibilile ado tomɩr a kɔɔ hana ya, ado tomɩr gaa ya, ma ja', Thãgba jɩɛn.
4 Mɩ jɩrɛ dɩ Thãgba kɔɔ gbaarɛ a lona hɩɩr paar Thãgbaa kal ƴɔɔ, dɩ a kɔɔ nɩrɛ thɩmɩaakɛ tibil na marnɩ na mɩa', kɛ tibil na hananɩ dakha hʋɛ a na mɩɛa'.
5 Ma məbire tibil caarra thale, sɩ ado mɛrɛɛ thɛthɛra wer, ma məbi saagado ɩ̃ yɔɔda gaaga.
6 Sɩ ado mɩ-n ƴaalɛ ɩ̃ məbi, ga do də̃bəl ma doa', gɩdonɩ sobɔr ma so, sɩ ma-n cʋa', dɩ mɛ̃ tibil na hana mar kpɩɛrɛ gɩ kãasɩ gɩrɛraakɛ wɩ-n yɩnɩ mɛrɛra, agɩbo gɩrɛraakɛ wɩ-n nɩnɩ mɛrɛra ga.
7 Mɔ̃ na dɔnɩ nɔɔ sɩ thɩ̃ nɩrɔ caale na hanɩ mɩɛrɛra ga na cʋʋ mɩ dɩ ma ti gunə', gɛr gɩ dɩ uu ga mar tomɩrra, kɛ dɔnɩ Satãa thɔ̃thɔ̃daar a na-n ʋ̃ʋ mar gɩ do nɔɔ ma ti gunə'.
8 Gelelala mɩ kɔɔ bɩɛl Kɔ̃tɩn balãther a cʋɛ gɩ gɩ hʋnɔ mar.
9 Sɩ a so marɛ ayɩ, bʋɔraakɛ ɩnɩ-n jɩ mɩnɩ gɩ daan, gɩdonɩ yɔɔrɛra ɩnɩ-n jɩɩ nɩna ɩnɩ fãga. Dɩ gɛr gɩ ma-n ka jɩɛ məbi na daʋ ɩ̃ yɔɔra, gɩdonɩ liir Kirisitii fãga n ha mar.
10 Gɛr dɔ kɩrʋ dɩ ma-n kãka yɔɔrɛra, na nɩɩrɛra, na nɩwɛra, na kpoorera, na bɔ gaarɛra Kirisitii sora; gɩdonɩ ɔbɔɔkɛ mɩ-n yɔɔnɩ, liir mɩ-n ka 'lɛ fãga.
11 Də̃bəl mɩ debi do, sɩ nɛr kɔɔ tɔ mɩ pɛr dɩ ɩ̃ ha mɛ̃. Gɩdonɩ anɩ pa gɩ kɔɔ teenana gɩ thɛ nɩ yɩ ɩ̃ tɩɩ teena do. Gɩdonɩ ma 'lũ fɩɩʋrakɛ a jɔ wa thɔ̃thɔnaale bʋɔnɔnɩ ka ga, sɩrakɛ ma do thɩ̃a'.
12 Gɩrɛ n nɛnanɩ ɩ̃ thɔ̃thɔ̃daar do, gɩ yɩrrɛ anɩ thɩ̃thɩɩn na ha fʋrɛɛkɛ jʋɔnɔnɩ ka, na jẽ thɩ̃ɛsɔ, na ma kʋ thɩ̃ cʋʋrɛ, na nɔ kpaa thɩ̃ cʋʋrɛ.
13 Anye kɔɔ ɓɔra nɩ sɩ dɩ wɩ̃ we gbɛbɩdara hana gɩ a jɔ nɩ, saagado gekɛ ma kɔɔ do narnɩ heendaa gaaga. Dɩ nɩ faa ɩ̃ dɩɩdɩɩ hɩɩnna ha mɩ.
14 Hɩnɛ, mɩ gbɛbɩrɛ gɩrɛ pɩ ɩ̃ pɔ anɩ pa balãther pʋɔr, sɩ ga do heendaa ma do nara', gɩdonɩ ga do anɩ thɩ̃ mɩ-n ƴaala', sɩ nɛrɛɛ thɛthɛ gɩ. Gɩdonɩ ga do bɩsana teana wa-n thɩnɛ thɩ̃ɛ a hana thɩrɛ na nɩra', sɩ thɩrɛ na nɩrɛ teana wa-n thɩnɛ thɩ̃ɛ a hana awɩ bɩsãsɔ.
15 Sɩ ado mɛr gɩ, mɩ ture na haar ɩ̃ 'laa gɩrɛ mɩ hananɩ, ɩ̃ 'laana dakha dɩbara koo gɩ do anɩda thuerə dɔ nɔɔ. Dɩ mɔna mɩ-n na nɩnɩ mɛna dɩɩ thʋ̃ kar, gɩ dor nɔɔ dɩ anɩ naʋ na-n wurəə bɛ?
16 Sɩ anaa na sor wo nayɩ, ma kɔɔ do nar heendaa wera', sɩ mɔ̃ mɩ donɩ tɩɩ fɩɩl tibil, gɛr mɩ kɔɔ fɩɩl nar sa 'li ni.
17 Tɩbɩlaakɛ mɩ kɔɔ thɔnɩ anɩ pa, mɩ ba phiro sɩ ma-n kho nɩ yaa?
18 Tɩtɩ mɩ kɔɔ bɩɛl a jala anɩ pa, dɩ mɩ kɔɔ thɔnaanɛ dakha omi bɩɛl. Dɩ Tɩtɩ ba khɔ nɩ yaa? Ga do kpɩɛr bɩɛlla sɩ ha kha na ɔraa? Ga do nɛ ka bɩɛlla sɩ-n 'loro kha gaa?
19 Nɩ kɔɔ mãa kpɩɛrɛ kɛkɛkɛ dɩ sor sɩ-n hɛl dɩbara nɛrɛra. Kirisitira sɩ ha dɩ sa-n mɩɩ Thãgbaa ƴɛra. Nɛrɛɛkɛ mɩ-n nanɩ wei, gelela fɛʋ anɩ khɔ̃ pɛ sɩ-n ƴaal.
20 Gɩdonɩ maar fʋ mɛr dɩ anaa a ma dã le, ma yɩ nɛr dɩ na ha mɔ̃ ma-n ƴaalna', nɩ yɩ mɩ dakha ɩ̃ ha mɔ̃ na-n ƴaalna'. Maar fʋ mɛr dɩ anaa kɩla, na gbugi, na nĩkhii, na dɩbara na kɛ̃kɛrɛnɛ, na tibil kuere, na wɩ yɩ mɩɩrɛ, na i kaar, na nyanyaanɛ na har anɩ thɩ̃thɩɩn.
21 Maar fʋ mɛr dɩ a ma dã le, ɩ̃ Thãgba na cʋʋ mɛr dɩ yicuru na bir na fʋ mɩ anɩ sora, ĩ tha ɩ̃ thʋnɔ sɩ ma-n bɩ wɩrɛraakɛ kɔɔ maanɩ cʋʋrɛ sopugo, sɩ ɩkhasɔ wɛrra na kɔɔ debi haar thɩ̃ bise cʋʋrɛraalera, na bɔdɛl cʋʋrɛra, na dakhaba cʋʋrɛra ga.