6
1 Dɩ mɔ̃kɛ sɩ-n donɩ kha thɔma na Thãgba, sɩ-n phʋʋr nɛr dɩ na-n do Thãgbaa bɔ jɩ na do nar thɩ̃aa ga.
2 Gɩdonɩ a sor ayɩ: «Bɔɔkɛ gɩ teenɩ kha mɩ kɔɔ pɛ fɛr nũu, tataa wire mɩ kɔɔ bul fer.» Hɩnɛ, nɛnɛ̃ dʋɔn bɔɔkɛ gɩ teenɩ kha. Hɩnɛ, nɛnɛ̃ dʋɔn tataa wire.
3 Sa-n pɛ nɛ baradaa tibillə thɩ̃ɛ wo thɩ̃ bɩɛllalaka', gɩ ho thɔmaakɛ na hananɛ kpɛ paara'.
4 Sɩ thɩ̃ɛ fɛʋra, asɩ fɩl n nɩna dɩ Thãgbaa thɔ̃dara sɩ do, ha fʋrɛraakɛ sɩ-n hananɩ jɔɔ nɩwɛra, na gɩrɛraakɛ telene sɩnɩ, na mɔ̃ sa-n yɩnɩ fɛfɛɛ paara',
5 na bɩɩrɛra, na khaɩ pɛrra, na dɩ nyanyaanɛna, na thɔ̃ khe dʋʋrra, na yi cɔnanɛna, na kɔmɛr cɔnanɛna,
6 dɩɩ the dakha fɩl phuurə, na jɩɩrra, na ha fʋ yɩrrɛra, na ha bulo fɩlɛla, na Thu Phuurə, na naʋ bʋɔra,
7 na sobɔ thɩmɩɩrra, na Thãgbaa fãgara, na fɩl sar ko ke thɩ̃ɛɛkɛ sɩ-n pɩɛrnanɩ a dona gɩrɛ sɩ-n phinəni tomɩr;
8 na dakha i dʋbɩrɛra, na beesirera, kuerera na i bɔ werra; fɩfɩla wɩ-n we sɩ, sɩrakɛ sobɔ so tɩbɩla ha sɩ.
9 Wa jɩ sa', sɩrakɛ tɩɩ jɩnanɛ bɔɔbɔɔ ha sɩ; wɩ yɩ sa jɩ paar na pɔa', sɩ sɛrkɛ na yire; wɩ yɩ sɩ-n yɩrɛ naarɛ, sɩ ga do sa khirə';
10 wɩ yɩ gbobire wɔɔ sarɛ, sɩ wire fɛʋ daʋ n fʋ sɛr; wɩ yɩ bɔdara ha sɩ, sɩ sɛr n lɛ tɩbɩla jɔɔ; wɩ yɩ sa hana thɩ̃a', sɩ sɛr hɩna thɩ̃ɛ fɛʋ.
11 Korɛ̃tɩdara wei, sa mʋ̃ nar dɩkha ga, sɩ faarɛ haar yala a ha nɩ.
12 Asɩ naʋ na 'lũə', sɩ anɩda 'luno.
13 Nɩ faa haar yala a ha sɩ mɔ̃ sɩ faanɩ asɩda a ha nɩ, mɩ mɩɩna nɛr mɔ̃ nɩ donɩ ɩ̃ bɩsãsɔ.
14 Na-n tu kpele bɩɛl tʋʋr na wɩrɛ dɔnɩ ha pɛ 'leedara ga. Gɩdonɩ anyee bɔ ca fɩl sarʋ na fɩl gõgolõ na-n bɔ kha? Anye dahɩrɛ na dabirə ha kha?
15 Anyee 'li ca Kirisiti na 'linə kha Belɩal? Anyera ʋrɛ pɩɛrnɩ haar na ʋrɛ na pɩɛrnɩ haara' na bul kha?
16 Anyee gbɛbɩ ca Thãgbaa cɔ na gbɛbɩ na thɩla? Gɩdonɩ sɛr dʋɔn cʋɔr Thãgba yidaarra, mɔ̃kɛ Thãgba kɔɔ sonɩ ayɩ: «Ma toore awɩ bɩnɔ, ma-n kpaarɛ awɩ thɩ̃thɩɩn. Ma dor awɩ Thãgba, dɩ wa dor ɩ̃ too.»
17 Gɛr gɩ, «Nɩ thɛ awɩ thɩ̃thɩɩn, nɩ lea hana kpɩɩ, Kɔ̃tɩn sɔ. Na-n tha gɩrɛraakɛ bisenenə', dɩ mɛrɛ ma tee ner,
18 dɩ ma do narɛ Thɩrɛ, dɩ nɛrɛ na do marɛ bikona na bikhɛna, mɛr Kɔ̃tɩn fãga fɛʋʋ hɩ̃daar sɔ.»