13
1 A mɩ jɩ tibil caar fɛʋʋ thɩmɩɩ na mɩɩ, a gɩrɛ thɔ̃thɔ̃daar thusɔ n mɩɩnɩ gɩ, sɩ a ma hana naʋa', nʋɔ mɩ-n kɩɛr oro oro gbõgbõ khaa, agɩbo dẽgelẽbi khaa wele wele.
2 A mɩ hana punone a na tinə Thãgba tukɩrʋ, a mɩ jɩrɛrakɛ dakha thɩ̃ gbulsɔ fɛʋ, a hanana jɩɩr ɓibi, ado mɩ hananakɛ ha pɛrɛ ɓibiikɛ na əəleni gɔ̃gɔna, sɩ a ma hana naʋa', ma do thɩ̃a'.
3 A mɩ gbarakɛ ɩ̃ thɩ̃ fɛʋ a tɩnɛ bɔdara, a ɩ̃ tomɩ mɩ gbarakɛ 'laa wɩ thiə, sɩ a ma hana naʋa', gele na taa mɩ bʋɔa'.
4 Naʋ n hananɛ ha fʋrɛ, naʋ n bulole haar ka, naʋ na-n gbugə', naʋ na-n nɩna dɩbara ga, aa-n ka irə',
5 naʋ na-n cʋʋ thɩ̃ɛɛkɛ na teanɩ kha gaaga, aa-n yɩrna ɔɔda ga, aa-n hana nĩkhiə', aa-n therna puureekɛ wɩ-n cʋgʋʋna';
6 gɩrɛ na sarana' na-n daaraa ga, sɩ sobɔr n daaraa.
7 Naʋ na-n bo da-n ɩɩ haanɩ dɩ para ga, a-n hananɛ ha pɛrɛ thɩɛna fɛʋ, a-n hananɛ nũ pɛrɛ thɩɛna fɛʋ, a-n hananɛ ha fʋrɛ thɩɛna fɛʋ.
8 Naʋ na hana khu paara'. Thãgba tukɩr tir na phor na ka, thɩmɩɩ kpɩɩ mɩɩrɛ ga pɩrrɛ, jɩɩr na phor na ka;
9 gɩdonɩ jɩ kuru sɩ hana, dɩ Thãgba tukɩr kuru sɩ-n ti.
10 Sɩ ɔbɔɔkɛ gɩrɛɛkɛ thʋnanɩ bɔr ka na ɩnɩ, gɩrɛ dɔnɩ dakuru na phor na ka.
11 Ɔbɔɔkɛ mɩ kɔɔ donɩ bɩsaan, bɩsaanɛ mɩ-n mɩɩ, dɩ bɩsaanɛ mɩ-n kpɩɛr, dɩ mɔ̃ mɩ-n kuurni na bɩnɛ, bɩsã khaara gɩ oti. Sɩ ɔbɔɔkɛ mɩ khɔnɩ pɩ, gɩrɛ dɔnɩ bɩsaanɛ pho marɛ ka.
12 Nĩkɛ sɩ-n yɩrɛ ɩhĩɛ mɔ tibil n yɩnɩ thɩ̃ɛ hɩɩnʋna, sɩ biroo sɩ-n yɩɛ, sɩ a bɔɔ dã gbelẽ gbelẽ sa yɩɛ. Nĩkɛ dakuru sɩ jɩ, sɩ a bɔɔ dã ma jɩ gɛr vʋ̃ʋ mɔ̃kɛ Thãgba jɩ mɩnɩ.
13 Gɛr gɩ gɩrɛ, thɩ̃ɛ yẽtherɩkɛ jɩlɛnɩ dʋɔn: Ha pɛrɛ, nũ pɛrɛ, naʋ, sɩ geleelerarakɛ dakɔ̃tɩ̃ɩkɛ jɔnɩ fɛʋ dʋɔn naʋra.