7
1 Ado gɩrɛraakɛ nɩ kɔɔ khere marnɩ gɩ, gɩ bɔrɛ tibillə dɩ a na-n tha khɛrra ga.
2 Sɩ mɔ̃ ga fʋnɩ sɩ bɔdɛl cʋʋrɛ na-n hala', dɔ kuun n hana ɔɔ khɛr ker, khɛr n hana ɔɔ ko ker.
3 Dɔ kuun na-n ha ɔɔ khɛr gɩrɛɛkɛ teanaanɩ, khɛr na-n cʋɛ ɔmɛ̃ dakha ɔɔ kora.
4 Khɛr na hɩ̃ ɔɔ tomɩ dɩbara ga, sɩ kuun hɩna; mɛna gɩ, kuun na hɩ̃ ɔɔ tomɩ dɩbara ga, sɩ khɛr hɩna.
5 Na-n bo kha phɩɩn, saagado nɔ bɩɛl nɩ gʋʋr kha sa lee kha gbe, nɩ yɩ ƴɩɛ Thãgba bɩɛlɛla gaaga; sɩ agɩpɩ nɩ bir nɩ gbɛbɩ, a mɛ̃ gaa Satã na yɩrɛ hʋɛ na fifilə ni, gɩrɛraakɛ na marnɩ na fʋ dɩbara ga.
6 Mɔ̃ mɩ yɩnɩ thɩ̃ɛ dɩɩ ha thakɛ gɛrra mɩ so, sɩ ga do jɔfʋ gɩ dɩ ɩ̃ pɛra',
7 sɩ ga da marɛ ado tɩbɩla fɛʋ na har mɔ̃kɛ mɩ hanɩ; sɩ tɩbɩla bɩɛlbɩɛl hananɛ khaardaa dɩɩdɩɩkɛ thɛnɩ Thãgbaa pa, ʋ n hana ɔɔda kpɩɩ, ʋ na ɔɔda kpɩɩ.
8 Sɩ ado wɩrɛɛkɛ na hɛnɩ pa', na khikhɛra, mer yɩ gɩ bɔrɛ wɩ tɔɔ mɔ̃kɛ mɩ hanɩ.
9 Sɩ ado wa mar na fʋ dɩbara ga, dɔ wɩ he, gɩdonɩ her baar thueekɛ na fɔ wɩnɩ ga-n hərə wi.
10 Sɩ ado wɩrɛ hɛnɩ pɩ gɩ, jɔfʋ gɩ dɩ ɩ̃ pɛr, sɩ ga do mɛr jɛ gɩ pɛra', Kɔ̃tɩn sɔ, dɩ khɛr na-n bo ɔɔ koa'.
11 Sɩ ado a 'lire bor, a tɔɔ a na-n he tɩɩ kpɩɩ bã, agɩbo wɩ gʋrɛ kha sa a bir a gba ɔɔ ko; sɩ kuun na-n faa ɔɔ khɛra'.
12 Sɩ mɩ sor wɩ̃ tibilsɔra ga do Kɔ̃tɩn ga, sɩ ɩ̃ pa gɩ the: Ado õkuun hananɛ khɛrɩkɛ na pɩɛrnɩ haara', sɩ khɛr dɔɔ tu ɩna toore na ɩnɩ ko, kuun na-n fagʋa'.
13 Sɩ a khɛr hana kuun daa pɛr haara', sa tu a toona khɛr dɔɔ, khɛrɩle na-n faa ɔɔ kora ga.
14 Gɩdonɩ kuunikɛ na pɩɛrnɩ haara', khɛr n dor nɔɔ dɩ tiro dɩ ha kpɩɩ; dɩ khɛrɩkɛ na pɩɛrnɩ haara', õkuun n dor nɔɔ dɩ tiro dɩ ha kpɩɩ; a ga ha thala', ga dor anɩ bɩsãsɔ na hor thɩldaar bɩsana, sɩ nɛnɛ̃kɛ wɩ tirore ha kpɩɩ.
15 Sɩ ado ʋrɛɛkɛ na pɩɛrnɩ haara' ƴaalɛ ɩnɩ-n bo a punone bo; a õkuun gɩ, a õkhɩɛn gɩ, liir dɩphã li paar na hala', gɩdonɩ ha ie toorera Thãgba we sɩ.
16 Gɩdonɩ khɛr, mɔ̃ fɩ jɩ dɩ fɛr na dɔ nɔɔ dɩ afɩ ko na 'lɛrɔ taarɛ? Dɩ agɩbo kuun, mɔ̃ fɩ jɩ dɩ fɛr na dɔ nɔɔ dɩ afɩ khɛr na 'lɛrɔ taarɛ?
17 Gele hale gbobi, sɩ tɩbɩla dɩɩdɩɩ na-n jala mɔna Kɔ̃tɩn kɔɔ yɩnɩ gɩ hana, gɩ mɩɛna mɔ̃ Thãgba wenɩ ntɛ; thakɛ mɩ pɛr gɩ hana we gbɛbɩdarara paar fɛʋ.
18 Tibil hale dɩ Thãgba kɔɔ wɩɩ ɔbɔɔkɛ a donɩ khʋ̃ kurdaar ya? A na-n kerroa'. Tibil hale dɩ Thãgba kɔɔ wɩɩ sɩ aa 'lɛ kur khʋ̃a ya? Ntɛ na-n kur khʋ̃ʋ bã.
19 Khʋ̃ kurre na do thɩ̃a', a fa kur khʋ̃a', ga do thɩ̃ɛ dakha ga, sɩ Thãgbaa jɔfʋ hɩɩnɛ gɛr dɔ thɩ̃ɛ.
20 Tibil n tɔɔ mɔ̃kɛ a kɔɔ hanɩ sɩ dɩ Thãgba wɩɩ.
21 Dee fɩ kɔɔ do sɩ dɩ Thãgba we fɩ ya? Fa-n dɛna ga; sɩ ado fɩ yɩ hʋɛ wer a na do waʋ, ka gba hʋ dɔɔle.
22 Gɩdonɩ ʋrɛɛkɛ dɔnɩ dee, sɩ dɩ Kɔ̃tɩn wɩɩ, Kɔ̃tɩnɩ waʋ a do; dɩ mɛ̃ ʋrɛɛkɛ dɔnɩ waʋ, sɩ dɩ Thãgba wɩɩ, Kirisitii dee a do.
23 Thãgba kɔɔ the ner the nʋɔ dɩɩ khɩɩr ka, na-n debi do tɩbɩlaa dea'.
24 Omɩna, mɔ̃kɛ nɩ kɔɔ hanɩ ɔbɔɔkɛ Thãgba kɔɔ we nɩnɩ dɩɩdɩɩ, mɛ̃ na too kha na Thãgba.
25 Sɩ ado wɩrɛ dɔnɩ khɛ biirəəkɛ na jɛnɩ kuunaa gɩ, ma hana jɔfʋʋkɛ thɛnɩ Kɔ̃tɩnɩ pa ga, sɩ ɩ̃ kpɩɛrnɔ mɩ-n ha nɩ, mɔ̃kɛ mɩ donɩ tibilikɛ Kɔ̃tɩn donanɩ bʋɔ dɩ ɩ̃ do sobɔ tibil.
26 Gɛr gɩ gɩrɛ mɩ-n kpɩɛrnɩ gɛr bʋɔnɔ, gɩdonɩ bɔɔkɛra n ɩnanɩ khɩɩrɛ: Gɩ bɔrɛ dɩ tibil na too mɔ̃kɛ a hanɩ.
27 Fɩ lire kha na khɛr ya? Fa-n ƴaal fɩ kuure lidaala'; a fa hana khɛra', fa-n yɩ fɩ hɛ khɛra'.
28 Sɩ ado fɩ her, ga do sopugo fɩ cʋa'; sɩ ado khɛ biireekɛ na jɛnɩ kuuna' he kuun, ga do sopugo a cʋa'. Sɩ wɩrɛ hɛnɩ, wa yɩrɛ nɩwɛ awɩ yi hanana, dɩ ma-n na nɩ yɛ ga nɩɩlera ga.
29 Sɩ mɩ yɩ wɔɔ omɩnaa: Bɔɔra 'lire paalɛ, dɔ dɩphã wɩrɛ hananɩ khɛr n ho wɩrɛ na hananɩ khɛra ga;
30 dɩ wɩrɛ n bɛnɩ n ho wɩrɛ na-n bɛna'; dɔ wɩrɛ n kãkanɛnɩ n ho wɩrɛ na-n kãkanɛna', dɩ wɩrɛ n thɛnɩ thɩ̃ɛ n ho wɩrɛ na hananɩ thɩ̃a';
31 dɔ wɩrɛ n 'lɛnɩ awɩda thɩɩraakɛ n ho wɩrɛ na-n 'lɛnɩ thɩ̃a'; gɩdonɩ mɔ̃ thɩɩra hanɩ gɩrɛ, a-n phor.
32 Sɩ mɩ nar na-n dɛ fɩɩʋraka'. Ʋrɛɛkɛ na hɛnɩ khɛra', Kɔ̃tɩnɩ thɩ̃ a-n dɛna, mɔ̃ a na fʋnɩ sɩ na da Kɔ̃tɩn haar.
33 Sɩ ʋrɛɛkɛ hɛnɩ khɛr, thɩɩkɛɛda a-n dɛna, mɔ̃ a na fʋnɩ sɩ na da ɔɔ khɛr haar,
34 dɩ ƴɩɛ yenyɔ a-n jɛ. Khɛrɩkɛ na hananɩ kuuna' na khɛ biireekɛ na jɛnɩ kuuna', Kɔ̃tɩnɩ thɩ̃ wɩ-n dɛna ɩnɩ-n pho tomɩrra na thuerə. Sɩ ʋrɛɛkɛ hɛnɩ kuun, thɩɩkɛɛda a-n dɛna, mɔ̃ a na fʋnɩ sɩ na da ɔɔ ko haar.
35 Mɔ̃ mɩ-n mɩɩnɩ thakɛ, anɩda bɔ mɩ-n ƴaal, ga do pheru mɩ-n pɛ nara', sɩ fɩl bʋɔ mɩ-n nɩ nar, dɩ na jɩɩ hɩɩn nɩ faa dɩbara Kɔ̃tɩnna, dɩ dɩkha na hale na dĩdiə na'.
36 Sɩ ado tibil yɩɛ dɩɩ do ga dor i kʋɛ thɩ̃ɛ ɔɔ khɛ biirrəəkɛ na jɛnɩ kuuna', ado ɔɔ he bɔ na ka, dɩ kpɩɛr a yɩɛ dɩɩ bɔr herra, a cʋɛ gɩrɛ a yɩnɩ dɩɩ bɔr, ga do sopugo a cʋa'; dɔ her n cʋʋ.
37 Sɩ ʋrɛɛkɛ kpɩɛrɛnɩ hi ɔɔ bɩnɔ dɩ ga do fɛrɛrɛ ga, sɩɩ do dɩbara a fʋ ayɩ, ɩna mar ɩnɩ khɛ biirrəəkɛ na jɛnɩ kuuna' da too, ntɛɛle cʋʋrɛ bɔɔ.
38 Mɛ̃ gɩ, ʋrɛɛkɛ faanɩ ɔɔ khɛ biirikɛ na jɛnɩ kuuna' dɩ he kuun, a cʋʋrɛ bɔɔ, sɩ ʋrɛɛkɛ na tuonni ɩnɩ khɛ biir n hɛ kuuna', a cʋʋrɛ bɔɔ a jɔ.
39 Khɛr n lire kha na ɔɔ ko bɔɔ fɛʋʋkɛ ɔɔ ko hananɩ yire; sɩ a ɔɔ ko khi, a hananɛ hʋɛ na he ʋrɛɛkɛ a-n ƴaalnɩ, sɩ dɔ gɩ do mɔ̃ Kɔ̃tɩn tuni.
40 Sɩ ado mɔ̃ ɩ̃ kpɩɛrnɔ hanɩ gɩ, ado a too mɔ̃kɛ a hanɩ ga daaraarɛ na jɔ, dɩ mɩ pɛrɛ haar Thãgbaa Thu wer mɩ hanaanɛ.