5
1 Wɩ-n mɩɩrɛ paar fɛʋ ayɩ, bɔdɛl cʋʋrɛ n har anɩ thɩ̃thɩɩn, dɩ bɔdɛl cʋʋ caakɛ na-n hanɩnakɛ thɩldaraa pa gaa gɩ, dɩ tibil bɩɛl ba gbananakɛ ɔɔ thɩɩ khɛr.
2 Sɩ dɩ nɩ borakɛ sɩ na ka iree. Mee bʋɔ ka teena gɩ fɔ nɩ, wɩ ti tibil ca ole cʋɛnɩ thɩ̃ɛ thale a hɛllɔ anɩ thɩ̃thɩɩn.
3 Sɩ ado me wer ma hanɩ kha na nɛrɛ tomɩrra gbelẽ gbelã', sɩɩ do thue haan kha na nɛrɛ, mɩ 'lire kɩɩlna tibilile cʋɛnɩ ga thɩ̃ caale pɩ, dɩɩ ho mɩ kɔɔ hale.
4 Jeju Kɔ̃tɩnɩ iikɛ sɩ-n gbɛbɩrɔnɩ kha, dɩ ɩ̃ thu n hale, dɩ Jeju Kɔ̃tɩnɩ fãga n ha kha na sɛrɛ,
5 nɩ dɔ tibil ca ole n do ʋrɛ wɩ-n faanɩ ha Satã, a kʋɛsʋʋ tomɩr, dɩ mɛ̃ ɔɔ thu na 'lɛ taarɛ Jeju Kɔ̃tɩnɩ wirə.
6 Khaar nɩ-n məbi mɔlɔ; na jɩ dɩɩ do tabɩɩr fɩɩʋ n cʋʋrɛ buru mɩ̃ boloo fɛʋ dɩɩ bʋ̃aa?
7 Nɩ cʋɛ tabɩ tɩ̃ɩ gɩ buur, dɩ mɛ̃ na do buru mɩ̃ bolo phaa, gɩ the gɩrɛraakɛ na hananɩ tabɩɩra'; gɩdonɩ wɩ jinəne Kirisiti asɩ Pakɩ bana bi bonɩɛ.
8 Gɛr gɩ sa-n cʋɛ fɛtɩɩle ga-n do na tabɩ tɩ̃a', na tabɩɩrɩkɛ hananɩ puu cʋʋrɛ dɩ kpallɛ ga, sɩ gɩ dɔ buruukɛ tabɩɩr na harna', gɛr dʋɔn phur nakha sobɔr.
9 Mɩ kɔɔ kherere ɩ̃ sɛbɛra a ha nɩ ayɩ: Na-n bɔ kha na bɔdɛl cʋʋdara ga.
10 Sɩ ga do waa bɔdɛl cʋʋdaraakɛ hanɩ thɩɩraakɛ ba, na ha pɩɛrdara, na tɩɩ tagɩrɩdara, na thɩldara mɩ soa', gɩdonɩ ado thale gɩ, ga dor gɩ teenanɛ nɩ thɩɩr thɩɩraakɛ.
11 Sɩ gɩrɛ mɩ khere narnɩ gɩrɛ dʋɔn wɔɔ: Na-n bɔ kha na tibilikɛ yɛnɩ omine ha nɩ, sa do bɔdɛl cʋʋdaar, agɩbo ha pɩɛrdaara', dɩ agɩbo thɩl a hana, dɩ agɩbo tɩɩ nɩɩrdaar ga, agɩbo ta laardaar gɩ, na tɩɩ tagɩrɩdaara'; na-n kho kha dɩkorrakɛ na tibil ca ola'.
12 Gɩdonɩ anye mɩ ha kha na tɩɩ khɩna a na kɩɩlna wɩ? Ga do wɩrɛ nɩ donanɩ kha pa bɩɛldara na kɩɩlna gaa?
13 Mee gɩ kherere Thãgbaa sɛbɛra ayɩ: «Nɩ te tɩɩ puu anɩ thɩ̃thɩɩn a faa.» Ado wɩrɛ dɔnɩ tɩɩ khɩna wɛ, Thãgba na kɩlɛna wɩ.