4
1 Dɔ wa-n hɩɩn sɩ mɔ̃kɛ sɩ donɩ Kirisitii thɔ̃dara, na wɩrɛ Thãgba pɛrnɩ wa-n dɔna ɔɔ thɩ̃ gbul thɔma;
2 sɩ a thɩɛna gaa mɔ̃ wɩ-n ƴaalnɩnakɛ thɔ̃ donaale n hana dʋɔn, dɔ wɩ do sobɔ cʋʋdara.
3 Sɩ ado mɛrra gɩ, dɩ na hɩɩn mɩ jʋjʋʋr hɩɩnʋʋ yo, dɩ agɩbo tibil n kɩlɛna mɩ kɩɩl paar yo, ga ba mɩ fɩɩʋraka', dɩ mɛrɛrakɛ ma laar nayɩ ɩ̃ yɛ dɩɩ dɩbara ga,
4 gɩdonɩ ma jɩna mɩ hananɛ bara paar dɩkhara fɩɩʋraka'; sɩ ga nɩna dɩ mɩ 'leere dɩ paar phuphulə', ʋrɛ na kɩlɛna mɩnɩ Kɔ̃tɩn gɩ.
5 Gɛr gɩ bɔɔ na danɩ pa', na-n 'laa na yɩ dɩa', na-n pɩɛrɛ Kɔ̃tɩn a ɩ̃, ʋrɛɛkɛ na cʋɛnɩ thɩ̃ɛ fɛʋʋkɛ keranɩ dɩ a the dahɩrɛra, kɛ na nɛrɔnɩ dakha gɩrɛ haar n kpɩɛrnanɩ, liir tɩbɩla fɛʋ bɩɛlbɩɛl na 'lɛ Thãgbara khɩɩrɛɛkɛ teana wɩnɩ.
6 Omɩna, nɛr dɔ nɔɔ dɩ ɩ̃ gba ɩ̃ thɛthɛ na Apolɔsɩɩda a mɩɩna nɩ thɩ̃ɛɛkɛ, dɩ mɛ̃ asɩdaakɛ na dɩɩrnɩ, dɩ na kpãsɛ gɩrɛraakɛ kherenena', gɩ ho tibil bɩɛl na hananɛ ʋ saa bo ʋa'.
7 Gɩdonɩ amɛ cʋɛ fɩ dɩ fɩ ha kpɩɩ? Anye fɩ hana, sɩ ga do wɩ kɔɔ ha fɛra? Dɩ ado wɩ kɔɔ ha fɛr, mɔ̃gɩdo dr fa-n məbi ga-n ho wɩ kɔɔ ha fɛra?
8 Nɩ 'lire hiir waa phi; nɩ 'lire dʋʋr lɛ̃lɛ; jaa fãgadara nɩ do gɩrɛ, sɩ ser na halaa koe. Ɩ̃ ƴaal werrakɛ dʋɔn nɩ dɔ fãgadara, dɩ mɛ̃ sa bul kha na nɛrɛ fãgadaar dʋʋrra.
9 Mee gɩ hʋrɛ Thãgba ka thɩɩnɛ sɛr thɔ̃thɔna, dɩ sɩ do pɩpɩra, dɩ sa-n hona wɩrɛ teananɩ kʋʋrɛ, gɩdonɩ sɩ kɔɔ debire a do fɛʋra yi ga thɩ̃ɛ, Thãgbaa thɔ̃thɔ̃daar thusɔra na tɩbɩlala.
10 Kirisiti dɔ nɔɔ dɩ sɩ do də̃bələ, sɩ ne wer ka do tɩɩ kpɛsɛsɔ Kirisitira; sɛr yɔɔ, sɩ ner ka do dakhena; wɩ-n cʋrɛ ne wer, sɩ se wer wɩ-n beesi ser.
11 A dana nɛnɛ̃kɛ, sɩ-n gaarɛ kɔmɛrra, na yɔlkhaara, sɩ ha kẽkẽ bʋɔ, bɩɩr haar wɩ-n bɩɩr sɩ, sa hana cɔ gʋa';
12 sa-n vɔɔ asɩ nyɛ̃ thɔna kpãkpalã woa'; wɩ-n nɩɩr sɛr sɩ sa-n bɔna wɩ; wɩ-n kpoo sarɛ sɩ sa-n fʋ haar;
13 wɩ-n kʋɛ sɛr ire sɩ ser n mɩɩna wɛr na hɛlɛlɛ fɩlɛ; sɩ kɔɔ debire a ho tɩbɩla fɛʋ thɩɩraa sɔ̃sʋɔn, a hona tɩbɩla fɛʋra puuyʋʋ a dana nɛnɛ̃kɛ.
14 Ga do mɩ khere narɛ ga thɩ̃sɔɔkɛ gɩ cʋɛ yicuru gɩ fʋ na', sɩ fɩlɛ mɩ-n dɩɩr nɩ, mɔ̃kɛ nɩ donɩ ɩ̃ bɩsãsɔɔkɛ mɩ-n nanɩ.
15 Gɩdonɩ adorakɛ nɩ hananɛ dɩɩrdara gbɩlanɩ yʋɔr Kirisitiidara, sɩ na hana thɛ wer jɔa', gɩdonɩ mɛr gɩɩkɛ kɔna nɩnɩ Jeju Kirisitira, dɩɩ the tutugo bʋɔra.
16 Gɛr gɩ mɩ-n phʋʋr nɛr nɩ dɔ ɩ̃ phɛldara.
17 Gɛrra dɔ nɔɔ dɩ ɩ̃ kɔɔ thɔ̃ nar Timothe ɩ̃ bikuunikɛ mɩ-n nanɩ, kɛ dɔnɩ sobɔ tibil Kɔ̃tɩnna, ɔr na cʋɛ nɩ dɩ na jɩ mɔ̃ ɩ̃ ɩɩr pa hanɩ na Kirisiti, kɛ dɔnɩ gɩrɛ mɩ-n dɩɩrnɩ we gbɛbɩdara fɛʋ paar fɛʋ.
18 Sɩ ɩkhasɔ nɛrɛra n kar ire dɩɩ ho ma pɔ la'.
19 Sɩ ado Kɔ̃tɩn tu, kɩɛr na gbe ma pɔr, sɩ ga do i kadaraa nɔfa thɩmɩɩ mɩ-n ƴaal ɩ̃ ja', sɩ awɩ fãga.
20 Gɩdonɩ Thãgbaa fãgadaar do, ga do nɔfaarra gɩ ha ga, sɩ fãga wɩ-n yɩ.
21 Anye nɩ-n ƴaal? Ɩ̃ pɔ anɩ pa na ciləmũu yaa, agɩbo ɩ̃ pɔ na naʋ na hɛlɛlɛ fɩlɛ?