4
1 Ɔbɔɔkɛ Pɩɛr na Jã hanɩ dɩ wa-n mɩɩna tɩbɩla, bonɩ jidara na Thãgba fʋɔr cɔ kɔ̃tɩ̃ gardɛɛ̃ kʋmãda, na wɩrɛ n yɛnɩ khi ɩɩrɛ na hala' pɔr.
2 Gɩ puu warɛ gɩdonɩ wɩ-n dɩɩrɛ tɩbɩla dɩ wa-n mɩɩna aa: Jeju kɔɔ ɩɩrɛ a the khirera, gɛr nɛna dɩ khe na ɩɩrɛ na the khirera.
3 Dɩ wɩ fʋlɛ wɛr a to khaɩra phaphapha dɩɩ n wɩl, gɩdonɩ dɩɩ 'lire dʋɔrɛ pɩ.
4 Sɩrakɛ tibil jɔɔle kɔɔ pɛnɩ thɩmɩɩrɩle nũu kɔɔ pɛrɛ haar, dɩ konaa nɔ daan gbɩlanɩ yemɔɩ.
5 A dɩɩ wɩl, tɩbɩlaa kɔ̃tɩ̃sɔ, na kɔ̃tɩnasɔ, na jɔfʋ dɩɩrdarasɔ kɔɔ gbɛbɩrɛ kha Jerujalɛm,
6 na An gbõdaar, na Kaɩfɩ, na Jã, na Alesãdɩɩr, na wɩrɛ fɛʋ dɔnɩ gbõdaraa too.
7 Dɩ wɩ kpar Pɩɛr na Jã a pɔna awɩ thɩ̃thɩɩn a bule wi aa: Amɛɛ fãga, agɩbo amɛɛ i nɩ-n cʋʋna thɩ̃ɛɛkɛra?
8 Dɩ le Pɩɛrɩkɛ henəni Thu Phuu so war: Nɛr tɩbɩlaa kɔ̃tɩ̃sɔ na nɛr kɔ̃tɩnasɔ,
9 mɔ̃kɛra nɩ-n bule sini nĩ bɔ cʋʋrɛraakɛ sɩ kɔɔ cʋʋnɩ gbãgbarʋraakɛ na mɔ̃ gɩ fʋnɩ sɩ dɩ kpɛɛ,
10 nɛrɛ fɛʋ nɩ jɩɛ jɩ na Ɩjɩrayɛldara fɛʋ, dɩ Najarɛtɩ Jeju Kirisiti, ʋrɛɛkɛra nɩ kɔɔ kpanɩ kʋkʋ thɩrʋra sɩ dɩ Thãgba ɩɩrʋʋ dɩ the khirera, ɔɔ i dɔ kɩrʋ dɩ kuunikɛ hanɩ gɩrɛ kɩɛr ba hana tomɩ kheu.
11 Jeju dɔ ʋrɛ Thãgbaa sɛbɛra sonɩ ayɩ: «Bokaarɩkɛ nɛr cɔ mɛ kɔɔ bonɩ, sɩ a debire a do go tɩdaa.»
12 Taarɛ na hale tibil kpɩɩ pa ga, gɩdonɩ i kpɩɩ na hakɛ thɩɩra tɩbɩlaa thɩ̃thɩɩn kɛ dɔnɩ gɛr na taa sa'.
13 Mɔ̃ wɩ yɩnɩ Pɩɛr na Jãa 'la, nʋɔ kpaa wɛr gɩdonɩ wɩ jɩrɛ dɩ tɩbɩla wɛɛkɛ na jɛnɩ sɛba' dɩ wɩ har dakha mɔ̃ tibil ba hanɩ; wɩ jɩrɛ dakha dɩ wɛr dɔ wɩrɛ kɔɔ hanɩ kha na Jeju.
14 Sɩ mɔ̃ wɩ yɩnɩ kuunikɛ khoo kɔɔ kpɛɛnɩ dɩ jɩɩlna Pɩɛr na Jã, wa puno so thɩ̃a'.
15 Sɩ so gʋʋrdaraale kɔɔ so warɛ wɩ thɛ bɔɔ gbe, agɩpɩ wɩ mar a gʋʋr kha awɩ ha ayɩ:
16 Anye sa ka na cʋʋ tɩbɩlaakɛra ya fɛ? Gɩdonɩ Jerujalɛmdara ɓibi jɩrɛ dɩ wɛr kɔɔ cʋɛ nɔ kpaa thɩ̃ kɔ̃tɩ̃ɩkɛ, dɩ sa puno na yɩ bana paar bã.
17 Sɩ mɔ̃ ga fʋnɩ sɩɩ do ga kpaar jɔɔ tɩbɩlaa pa bã, sɩ phərəne wi dɩ wa-n gba ga iikɛra a na mɩɩ tɩbɩla 'lo bã.
18 Dɩ le wɩ kɔɔ we wɩ a pɩɛr wɩ sa kpãkpãa war dɩɩ khɩɩr ka ayɩ, wa-n gba Jejuu i a na mɩɩ a na dɩɩrna tɩbɩla kpɩɩrakɛ bã.
19 Dɩ Pɩɛr na Jã birse wi: Gɩ telene Thãgbaa ƴɛra dɩ sa nɩ Thãgba nũu yaa, sɩ nɛ nɛrɛ nũu, ner n ka kpɩɛrɛ hɩnɛ.
20 Gɩdonɩ sa puno na pɩrrɔ gɩ do sa mɩɩ gɩrɛ sɩ yɩnɩ a nɩɛna gaaga.
21 Ɔbɔɔkɛ wɩ birni phərə wi wo, wɩ faa wɛr gɩdonɩ wa jɩ mɔ̃ wa heen wɩnɩ sor tɩbɩlaa ƴɛra ga, gɩdonɩ tɩbɩla fɛʋ n dʋbɩrɛ Thãgbaa i gɩrɛraakɛ kɔɔ cʋɛnɩ.
22 Gɩdonɩ kuunikɛ 'lɛnɩ nɔ kpaa kho kpɛɛrɛɛle kɔɔ hananɛ yɛna kpalanyɔ na dɛbɩrɛ.
23 Ɔbɔɔkɛ wɩ faa wɩnɩ pɩ, Pɩɛr na Jã jaal awɩ too pa a mɩɛ wɩ thɩ̃ɛ fɛʋʋkɛ bonɩ jidaar kɔ̃tɩna na kɔ̃tɩna kɔɔ so warnɩ.
24 Ɔbɔɔkɛ wɩ nɩɛnɩ gele, wɩ ture kha nɔ bɩɛl sa bɩɛl Thãgba ayɩ: Kɔ̃tɩn, fɛrɛɛkɛ kɔɔ cʋɛnɩ ƴũ, na thɩɩ, na lanyʋɔn, na gɩrɛ fɛʋʋkɛ harɔnɩ bɩnɔ,
25 fɛr kɔɔ cʋɛ asɩ mama thɩ kɔ̃tɩ̃ Davɩdɩ afɩ thɔ̃daar, dɩ mɩɩ dɩɩ the Thu Phuurə ayɩ: «Mɔ̃gɩdo dɩ ca kpala ɩɩrna khʋ̃ɛ thaa jɔɔjɔɔ, dɩ tɩbɩla na-n kpɩɛr dakha kpɩɛrnɔɔkɛ dʋɔnnɩ mɔlɔdaa?
26 Thɩɩ fãgadara pallɛ ɩɩr, dɩ kɔ̃tɩnasɔ dakha kpa kha a gʋʋr, sɩ wa-n kɛ̃kɛrɛna Kɔ̃tɩn nakha ʋrɛ a phiirni.»
27 Gɩdonɩ sobɔr gɩ dɩɩraakɛ Ɛrɔɔdɩ, na Pɔ̃sɩ Pɩlatɩ, na ca kpala, na Ɩjɩrayɛldara kɔɔ kpa kha a gʋʋr, sɩ wa-n kɛ̃kɛrɛna afɩ thɔ̃daar phu Jeju, ʋrɛɛkɛra fɩ kɔɔ phiirni,
28 dɩ wa-n cʋʋ gɩrɛɛkɛ fɛʋ afɩ nyɔ̃ na afɩ tu kɔɔ maanɩ pɛrɛ gɩ dana.
29 Dɩ nɛnɛ̃ Kɔ̃tɩn, jɩɛ pɛ nũu awɩ phərə thɩmɩɩra sa 'laanɛ afɩ thɔ̃darasɔra 'lar wa-n mɩɩna afɩ so;
30 hana wɩ punone wa-n kpɛɛna khoosɔ, wa-n cʋʋna nɔ kpaa thɩ̃ɛsɔ, na ma kʋ thɩ̃ɛsɔ na afɩ thɔ̃daar phu Jejuu i.
31 Ɔbɔɔkɛ wɩ kɔɔ bɩɛlnɩ Thãgba pɩ, paarɩkɛ wɩ kɔɔ toonɩ gbugbuyore dɩ wɛr fɛʋ hinə Thu Phuu phi, a ma dɩ wa-n mɩɩ Thãgbaa thɩmɩɩ na 'lar.
32 Tibil jɔjʋɔɔkɛ kɔɔ pɩɛrnɩ haar kɔɔ hananɛ bɩ̃ bɩɛl na kpɩɛr bɩɛl. Tibil bɩɛllakɛ na-n so dɩ yɩ thɩ̃ɛɛkɛ ɩnɩ hananɩ ɩnɛr bɩɛl hɩna ga, sɩ wɩ kɔɔ bulle kha thɩ̃ɛ fɛʋ hɩ̃.
33 Thɔ̃thɔna n kɔɔ mɩɩrɛ sobɔ so jɩ thɩmɩɩr Jeju Kɔ̃tɩnɩ khi ɩɩrdara dɩɩ hana fãga, dɩ wɛr fɛʋ 'lɛr bɔ jɩɩr dɩɩ kar.
34 Tibil bɩɛl na ha awɩ pa dɩ 'lee thɩ̃a', gɩdonɩ wɩrɛ fɛʋʋkɛ hananɩ lɩɛ, a cɔna gɩ, wɩ-n dolone dɩ wɩ gba thɩ̃ doora wɩ dolonɩɩ war a jalna dʋ thɔ̃thɔnaa nyɔ̃kɔɔ;
35 dɩ wɩ gba tɩnɛ tɩbɩla fɛʋ bɩɛlbɩɛl mɔ̃ ntɛɛ thɩ̃ ɓɔr hanɩ.
36 Kũu bɩɛl gɩ da-n do Jojɛfɩ; Sɩpɩr yɔ dɩɩra wɩ kʋ̃ɔ, Levɩɩ ca a do, kɛ thɔ̃thɔna hanɩ ire Barnabasɩ, i kɩrʋ dʋɔn buhul tibil; ɔr hana lɩɛ,
37 a dolõ a gba war a dʋ thɔ̃thɔnaa nyɔ̃kɔɔ.