20
1 Dɩ wi bɩɛl mɔ̃kɛ Jeju n kɔɔ dɩɩrnɩ tɩbɩla Thãgba fʋɔr cɔ kɔ̃tɩɩna, da-n mɩɩna wɩ tutugo bʋɔɔ thɩmɩɩ, bonɩ jidaar kɔ̃tɩna na jɔfʋ dɩɩrdara na kɔ̃tɩna pɔr
2 a bulee: Sɔ sar ka hʋ caakɛra fɩ hananɩ dɩ fa-n cʋʋna thɩ̃ɛɛkɛra thenɩ, dɩ amɛ dɔ ʋrɛɛkɛ hana fɩnɩ hʋɛɛkɛra? Dɩ birse wi:
3 Ma bule ner mer dakha thɩ̃ bɩɛl.
4 Nɩ sɔ mar: Jãa yɔ kpɛɛ Thãgbaa dʋɔ gɩ the yaa, tɩbɩlaa pa gɩ the?
5 Dɩ wɩ mar dɩ wa-n bana kha awɩ hasɔ ayɩ: Ado sɩ tu ayɩ: Thãgbaa dʋɔ gɩ the, a na bule ser dɩ anye dɔ kɩrʋ dɩ sa kɔɔ pɛ ɔɔ thɩmɩɩ haara'.
6 Dɩ ado sɩ tu wo ayɩ: Tɩbɩlaa pa gɩ the, tɩbɩla fɛʋ na dʋʋr sɛr na bokana, gɩdonɩ wɩ jɩɛ jɩ dɩ Thãgbaa bobon Jã kɔɔ do.
7 Dɩ wɩ birse: Sa jɩ ka gɩ thena'.
8 Dɩ Jeju so war: Dɩ a thale gɩ, mɛrɛ dakha ma so nar ka mɩ yɩnɩ hʋɛ dɩ ma-n cʋʋna ga thɩ̃sɔɔka'.
9 Agɩpɩ Jeju gbaar thɩmɩɩr a mɩɩ tɩbɩla na sokpaa ayɩ: Kũu bɩɛl gɩ, a kɔɔ cʋʋ nãkʋɔr a gba nãkʋɔr hɩɩndara a pɛr wa-n hɩnɛ ɓo, sa jal kpaar paar da-n pʋɔr.
10 Dɩ ɔbɔɔkɛ bi khʋ̃ bɔɔ danɩ, a thʋɔn ɔɔ thɔ̃daar bɩɛl a jala nãkʋɔr hɩɩndarara wɩ hanaa dɩkhaa nãkʋɔr thɩr bi a pɔna. Sɩ nãkʋɔr hɩɩndara bɩɩrʋʋrɛ sa weguu dɩ kɔna nyɛ̃ biire.
11 Dɩ bir thɔ̃ thɔ̃daar kpɩɩ wo, dɩ wɩ bɩɩrʋʋ a pɩɛraa yicuru dɩ kɔna nyɛ̃ biire.
12 Dɩ bir thɔ̃ balãtherdaar wo, dɩ wɩ pɩɛraa kaar sa weguu.
13 Dɩ nãkʋɔr kɔ̃tɩn so: Anye ma cʋʋ dɩphã ya fɛ? Ɩ̃ bikuunikɛ mɩ-n nanɩ ma thɔ̃. Agakpaana ɔr wa cʋ.
14 Sɩ ɔbɔɔkɛ nãkʋɔr hɩɩndara yɩɩnɩ, wɩ mɩɩrɛ kha awɩ ha ayɩ: Ʋrɛ dʋɔn thɩ̃ hɩn, nɩ dɔ sɩ kʋʋ sɩ thɩ̃ɛ n do asɩda.
15 Dɩ wɩ gbaa a dʋna nãkʋɔr khuirə sa kʋʋ. Anye nãkʋɔr kɔ̃tɩn na cʋʋ wɩ dɩphã?
16 A na pɔr na kʋʋr nãkʋɔr hɩɩndaraale sa a gba nãkʋɔr a ha tɩɩ kpɩɩsɔ. Ɔbɔɔkɛ wɩ nɩɛnɩ gele wɩ sor: Ga-n ha thala koe.
17 Sɩ Jeju na-n hɩɩn wɩ sa so war: Dɩ anye gɩrɛɛkɛ kherenenɩ Thãgbaa sɛbɛra ƴaal gɩ so: «Bokaarɩkɛ cɔ mɛ kɔɔ bonɩ debire a do go tɩ bokaar»?
18 Dɩ tibil wo tibilikɛ na jenɩ bokaarraakɛ a na khaarɛ, sɩ tibil wo tibilikɛ bokaarɩkɛ na jironi, ga cʋ̃banʋʋnɛ pɛrɛ pɛrɛ.
19 Dɩ bonɩ jidaar kɔ̃tɩna na jɔfʋ dɩɩrdara n kɔɔ ƴaalɛ hʋɛ wɩ fʋ Jeju dabɔɔlera, sɩɩ do maar n fʋ wɛr tɩbɩlala. Gɩdonɩ wɩ kɔɔ jɩrɛ dɩ wɛrra Jeju so sokpaale.
20 Dɩ wɩ mar dɩ wa-n jʋʋr Jeju, a thʋɔnaa gɩgɩla dɩ wɩ pɛr fɩɩlɛ dɩɩ ho tɩɩ sara wɩ do, sɩ wɩ nʋɔ wɩ fʋ thɩmɩɩrra, wɩ liirnaa wɩ to fãga paar gobanɛr nyɔ̃kɔɔ.
21 Dɩ wɩ buleele: Dɩɩrdaar, sɩ jɩrɛ fɩ-n mɩɩrɛ dɩ fa-n dɩɩrna tɩbɩla gɩrɛ dɔnɩ sobɔr, dɩ fa-n hɩɩn dakha tɩbɩla dɩɩdɩa' sɩ dɩ fa-n dɩɩr tɩbɩla Thãgbaa hʋ na sobɔr.
22 Gɩ teere kha dɩ sa lɩmɩ Sejaar lãpho yaa, ga tee kha ga?
23 Sɩ Jeju jɩrɛ awɩ fɩɩl, a birse wi: Nɩ nɛna mɩ war bire ɩ̃ hɩɩn.
24 Amɛ ha ʋrɛ fotoraakɛ? Dɩ amɛɛ khere ha gɩrɛ? Dɩ wɩ birsee: Sejaar gɩ.
25 Dɩ Jeju so war: Dɩ gɛr gɩ nɩ 'laanɛ Sejaarra gɩrɛ dɔnɩ Sejaarɩda, a 'laanɛ Thãgbara gɩrɛ dɔhɩ Thãgbaada.
26 Dɩ wa kɔɔ puno a na fʋʋrakɛ ɔɔ thɩmɩɩ bɩɛlla tɩbɩlaa ƴɛ thɩ̃thɩɩna', sɩ nʋɔ ka kɔɔ kpaa wɛr mɔ̃ a birse wini dɩ wɩ pɩr dɩphã pɔbɩ.
27 Dɩ ɩkhaa Sadʋsɛ̃ɛsɔɔkɛ n yɛnɩ khi ɩɩrɛ na hala' pʋɔraarɛ, a bulee thakɛ aa:
28 Dɩɩrdaar, hɩnɛ gɩrɛ Mʋɩjɩ kɔɔ khere sarnɩ: «Ado tibil hana õkuun dɩ khi sa faa khɛr sɩ bɩsaan na hala', ɔɔ õkuun n gba hɛ a kɔna bɩsana wɩ do ɔɔ õkuuni məl.»
29 Dɩ õkona makonyɔ wɛ a kɔɔ hale, dɩ cacadaar kɔɔ her khɛr aa hana bɩsana ga, sa khi.
30 Dɩ balanyɔdaar na balãtherdaar gbaar khikhɛrʋʋlera.
31 Mɛna gɩ hana wɛr makonyɔɔle fɛʋ kɔɔ khireni, sɩ wa hana bɩsaana'.
32 Agɩpɩ khɛrɩlera dakha khire.
33 Dɩ ado khe na ɩɩrɛ na the khirera, ʋmɔ̃ wɛrra na hɩna khɛrɩle? Gɩdonɩ wɛr makonyɔra fɛʋʋ khɛr a kɔɔ do.
34 Dɩ Jeju birse wi: Nɛnɛ̃ bɔɔkɛɛ bɩsãsɔ n her khɛra, dɩ khɛra n her kona.
35 Sɩ wɩrɛ wa yɩnɩ, wɛr teana a na 'lɛ awɩda bɔɔraalera na ɩnanɩ a na ɩɩrna dakha na the khirera, wɛr wa he khɛra ga, dɩ khɛra na he kona ga.
36 Dɩ wa puno a na khi dakha bã, gɩdonɩ wa hʋrɛ Thãgbaa thɔ̃thɔ̃daar thusɔ a na do Thãgbaa bɩsãsɔ, gɩdonɩ wɩ ɩɩrɛ a the khirera.
37 Dɩ ado khee ɩɩr gɩ, gɛr dɔ gɩrɛ Mʋɩjɩ kɔɔ cʋʋnɩ dɩ sɩ jɩ thɩr bu thɩmɩɩrra, ɔbɔɔkɛ a wenɩ Kɔ̃tɩn, «Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba».
38 Sɩ Thãgba na do khee Thãgba ga, sɩ wɩrɛ hananɩ yiree Thãgba a do, gɩdonɩ ado ɔrra gɩ, tɩbɩla fɛʋ hananɛ yire.
39 Dɩ ɩkhaa jɔfʋ dɩɩrdara birsee: Dɩɩrdaar, sobɔr fɩ mɩɩ.
40 Dɩ wa 'la na bulee thɩ̃ bɩɛllakɛ bã.
41 Dɩ Jeju bule wi: Mɔ̃ gɩ fʋ sɩ tɩbɩla na-n so aa: Davɩdɩɩ Bikuun Kirisiti do?
42 Davɩdɩɩ thɛthɛ kɔɔ sor Khɩkhɩɩ nɩ sɛbɛra ayɩ: «Thãgba sor ɩ̃ Kɔ̃tɩna ayɩ: Tɔɔ ɩ̃ nyɔ̃bɔra,
43 phaphapha ɩ̃ cʋʋ afɩ lãlaardara wɩ do afɩ nɛ jəəda.»
44 Dɩ a Davɩdɩ n wɩɩrɛ Kɔ̃tɩn thale, mɔ̃ a na fʋ sɩ na do ɔɔ bikuun?
45 Mɔna tɩbɩla fɛʋ n kɔɔ pɩɛnɩ nũu, a sor ɔɔ kpãkpãadarara ayɩ:
46 Na-n jɩɛ dʋ bʋrɛ jɔfʋ dɩɩrdarasɔraakɛ n ƴaalɛnɩ ɩnɩ-n tɔ kẽkẽ gbana a na kpaarna ƴatɔɔ, kɛ n naannɩ tɩbɩlasɔ na-n fʋɔrɛnɩ kɔ̃tɩ̃ fʋɔrʋʋ, kɛ n phireni ƴɛ kʋʋl too paar Juifisɔɔ Thãgba fʋɔr cʋɔrɔ, na ƴɛ kʋʋl too paar dɩko kho paar,
47 kɛ n phʋʋnɛnɩ khikhɛra, sɩɩ do fɩɩlɛ wɩ-n bɩɛlna Thãgba dɩ wa-n pʋɔrna wa-n yɛ nɩ. Wele so kɔ̃tɩ̃ɩ na heen wer na khɩɩr na ka.